حتّى حنّبعل مقّصوه

كيما المواطنين الكل كيف نتفرج على التلفزة ديما يشدني الحنين لقنواتنا التونسية , وقت الّلي نفدّ من جماعة الخليج و جبنة كرافت و حليب المراعي و بربيكان هذا مشروبي نولّي بالسيف نلوج على تونس سبعة ولا حنبعل على القليلة نشوف اولاد بلادي اش يحكيو...
جمعتين لتالي تفرّجت في اشهار " لانسمان" للبرنامج الحواري "دائرة الضوء" على قناة حنبعل, قالك اللي باش يحكي على المارشي متاع الشغل في تونس و عدّاو "دي اكستري" متاع عباد مساكن باعو اللي قدامهم و اللي وراهم باش يخدمو ولدهم ولا باش ينجحو بنتهم في الكاباس...لحاصيلو حكايات تحمم القلب و تسخّف اليهودي..
و ما راعني الا انو في ليلة الاربعاء ما ثماش لا دائرة ضو و لا دائرة ماء, نلقاه فيلم طايب متاع فاروق الفيشاوي منين مازال يقرى في النوفيام.
بالطبيعة ادارة القناة ما علقتش على الموضوع وما وضّحت شي للمشاهدين.. و انا نعذرهم على خاطرهم مازالو مترهوجين من المقص اللي لا يقرى و لا يكتب.. وهو اختصاص تونسي ميا بالميا كيما البسيسة و اللبلابي و عصيدة الزقوقو نتشرفو بيه في المحافل الدولية و الرياضية و نعتبروه أحد مكاسب و أحد مقومات السيادة الوطنية ..

لهنا تذكرت اجتماع نخبة فطاحلة الصحفيين متاعنا تقول انتي سي الطيب متاع الحقائق , سي صالح متاع الصريح و سي المنصف متاع اخبار الجمهورية و سي عبد العزيز متاع الحدث مع سيادة الرئيس في قصر قرطاج, وقتها وقف واحد منهم جايب روحو ملاخّر و قال سيدي الرئيس احنا رانا نعانيو من المقصّ..واحد من ناس فرحت و نفرهدت قلت اخيرا تحلّت العقدة الدفاعية و ثم اشكون حل جلغتو و جبد موضوع صحيح عل القليلة العالم يولي يحترم الصحافة التونسية و يرجعولها اعتبارها و يقبلوها في المنظمة العالمية متاع الصحفيين.
و لكن , و يا لخيبة المسعى و خيبة الامل و خيبة المنتخب في كاس العالم, طلع سي وخيّنا ما يقصدش المقص اللي في بالي و في بال الناس الكل , طلع يقصد السرقة و البيراتاج و السطو على مقالات بعضهم اي انو كل جريدة تنقّل على الاخرين و يحب حل رئاسي لمشكلة التنقيل و الفوسكوبي الصحفي..

هذاكاهو.. تمت الحكاية
و لا يغير الله ما بقوم حتى يغيرو ما بانفسهم