اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

vendredi 13 mars 2009

2009 سنة الساعة البيولوجية


على خاطر رمضان ..على خاطر شوّال ..و الا --بكل بساطة- على خاطر السنة الحالية اسمها 2009 ...ما يهمنيش.
المهم و المفيد ...ارتحنا من التوقيت صيفي

mardi 10 mars 2009

éco-citationتدوينة خضراء



بدون تعليق
عن صحيفة " التونسي "- لسان حزب الخضر للتقدّم



تونس في صور


هاذية تدوينة كانت راقدة مع المسودّات , كنت باش ننشرها كحلقة من حلقات مسلسل البرباش , الا انو بعد المدة هاذي الكل (من رمضان اللي فات) حبيت ننشرها ليوم بعد اختصارها و نزع جميع اسماء المدوّنين اللي فيها , لأنو حسب رأيي مجموعة المدونين بعيدة كل البعد عن مكونات المجتمع (الواقعي) و لا تمثل سوى شريحة ضيقة من شرائحه.

وسط المدينة - مقرّ الولاية - مكتب الوالي
الوالي: انشالله نخدموا و نعملوا على تحقيق الاهداف المرسومة...
نائب البرلمان: ايه و ندعّموا و نعززوا و نكثّفوا الجهود و نعددوا الانشطة...
الوالي: و نسّقـوا , و نلصّقوا , و نقيسوا , و نفصّلوا , القوانين و التشريعات و الدساتير , على المقاس القياسي الموحّد...
نائب البرلمان: و متنساش سيّدي الوالـي, نثمّنوا و ننوّهوا و نعددوا و نفاخروا و نفتخروا بالانجازات...
الوالـي: هكّة تفاهمنا.
نائب البرلمان: تفاهمنا مالا.
(يخرج النّائب من مكتب الوالي , يعرضو عضو اللجنة المركزية في الباب.. يقحروا لبعضهم..يسلّموا على بعضهم و يمشي كل حد في حالو)
عضو اللجنة المركزية: صباح الخير سيدي الوالي
الوالي: صباح الخير
عضو اللجنة المركزية: اش كان يعمل هاك الكلب لهنا ؟؟؟


الناحية المقابلة من المدينة - السوق العامة - نصبة الفريب
العرف : اشبيك رقدت ؟؟ الناس بدات تجي و انتي رقدت ؟؟
الصّانع: عييت عرفي من الصياح , قراجمي وجعتني ...
العرف (يصيح): هز على دينار ...كل شي بدينار...يا مدام ..يا مدموازال ...كل شي بدينار
الصّانع: تي هذيكة هي عرفي, كي العادة, الناس تتفرج و الفلوس يجيبها ربّي
( يتعدّى عون أمن بالزي الرسمي, يتجوّل و يتفرّج في السلعة...ياقف قدّام نصبة الفريب..يعجبوا صبّـاط من الجلد الأحمر ينجّم يجي قد بنتو..يزيد يقرب شويّة ..يعمل ضربتين سينيال بالجهازباش يجلب الانتباه)
عون الأمن: عندك بطاقة التعريف؟
التاجر(ابتسامة صفراء متاع قلق) : ايه عندي ..علاش شفمة ؟؟
عون الأمن: ترا بطاقة التعريف...اتوة نقلّك
(التاجر يتذكّر عندو خطية قديمة مازال ما خلّصهاش...يخاف يتعدى على الكمبيوتر تطلعلو)
التاجر: علاش بطاقة التعريف ؟ فاش قام؟ ماناش متاع هذا...اولاد بلاد راهو
(يخزرو لبعضهم...يتفاهموا بلغة العينين..التاجر يجبد ساشي و يمدّ يدو للنصبة باش يختار صبّاط..ينقّز البوليس على الصّبّاط الأحمر و يحطو في الساشي و ...يمضي في حال سبيله.)

احدى المعتمديات - مكتب المعتمد - اجتماع عام بالعمد ورؤساء الشُـعَب
المعتمد: في السنة الفارطة وصلنا و حققنا مبلغ 800 مليون , السّنة ماذابينا نوصلوا للمليار ...البارح كلّمني سيّد الوالي و أكّد عليّ في الموضوع..
واحد من العُمَد الحاضرين: سيّدي المعتمد , انشالله نوصلو نجمّلوا اكثر من المليار, عملنا مسح شامل على الحوانت , العطارة و الخضّارة و القهاوي و محلات الباتيسري و البوفات و حوانت السيبيرات و بوتيكات الحوايج و الفريب و السوبار فريب و البارفيمري ...حتّى من الجماعة اللي يطلبو قدّام الجامع انشالله ناخذو من عندهم تبرّعات.
المعتمد : يعطيكم الصّحة و بارك الله فيكم, سيادة الرئيس معمّل عليكم عاد ...
الجميع: انشالله نكونوا عند حسن الظنّ
(يخرج الجميع , يتعدّاو لبيرواتهم , ياخذ كل واحد مجموعة كرنيات مطبوعة و يفرّقهم على اعوانوا , اللي بدورهم يتفرّقوا و ينتشروا في البلاد (كالجراد)

حومة شعبية - مقهى شعبي
(اربعة شبّان قاعدين ...هيأة موحَّدة , لباس موحّد : لحية مسيّبة من غير شلاغم, "قميص" طويل للركبة , سروال 15 صنتي على الأرض, و سبادريات نايكي )
- يا قهواجي ...يا قهواجي
(الولد متاع الشيشة متعدي هازز ولعة)
-تفضّلوا
- بالله تعمل مزيّة, بدّللنا القهاوي في قوبليات
-علاش شبيهم الكيسان ؟؟ مسّخين ؟؟
-لا موش مسّخين ..نحبّوا كيسان جوتابل
(يدخل الصانع للقهوة )
-الجماعة لبرّة قالولك نحبّو كيسان بلاستيك في عوض كيسان البلار
-هاو بدأ العصب..على الصباح...لبارح قالك الكارطة حرام و ليوم ما يحبّوش البلار؟؟
(يخرج مولى القهوة لبرّة)
-شبيهم الكيسان ؟
(يشدّ كأس يثبّت فيه, يقرّبو من خشمو , يشمّو)
-هاو نظيف الكأس, ما فيه شي..ايجاو كي تحبّو ادخلوا, شوفو الـ آفابو...منبّه على الاصانع ما يغسل كان بالدينول و الجافال
- (يضحكوا) دينول ؟؟
-ايه دينول
- يا سي فلان , القضية موش قضية جافال و الا أومو ...الحكاية لا ينحّيها لا أومو لا جافال
-عجايب ...
-و غرايب زادة...الكيسان هاذم نجاسة ...على خاطر شربوا فيهم الناس لخرين
-(يحل فمو)....
- الناس الكل نجاسة...هات اعطينا قوبليات جدد يهديك



المعهد الثانوي - ساحة المعهد بعد فترة الراحة
(أستاذة خارجة من مكتب المدير شادّة جدول الاوقات في يدّها , تبكي...تبكي حظها العاثر و عمرها المشوم الاحرف و سعدها المكبوب)

في السّاحة استاذ , محفظتو في يدو (ظاهر فادد كذلك من الجدول متاعو الا انو -زيادة على ذلك ماهوش حابب يقرّي النهار هذاكة) يمشي وحدة وحدة...
يمرّ امام فصول التدريس , تقولش يمشي على البساط الاحمر و يستعرض في فرق الجيوش الثلاث (في المطار)
وين يلقى مجموعة من التلاميذ , ياقف و يسألهم: تقراو عندي توّة ؟؟
يقولولو "لا" , يزيد يتعدّى للقسم اللي بعدو و يعاود نفس السّؤال

بعد ما وصل لآخر ساحة المعهد, وقف.
خرّج ورقة من جيبو
-"تي هاو غالط الجدول ... شنوة التسيّب هذا ؟؟؟ شنيّة الفوضى هاذي؟؟ ماعادش عاطين قيمة و قدر للأستاذ ؟؟
و يجبد البورطابل و يطلب ممثّل النقابة متاع الثانوي.
ة



jeudi 5 mars 2009

على الفايسبوك: اسبوع مقاطعة الصحف التونسية


تحت عنوان : "

يزي من الضحك على الشعب - أسبوع مقاطعة الجرائد الوطنية

اطلق عدد من مستعملي الفايسبوك حملة لمقاطعة الصحافة الوطنية تحت شعار:
عاملين رواحهم ماهمش هنا و يسممو في الشعب خايفين على خبزتهم
هات نخوفوهم بخبزتهم فماش ما يقومو بواجبهم ولا يبدلو خدمهم

ملاحظة هامة (باش الاخيان الصحفيين و رؤساء التحرير ما يتفجعوش برشة):
هذه الحملة تدوم اسبوعا واحدا , بداية من الاثنين 09 مارس 2009

كونوا في الموعد على هذا الرابط
http://www.facebook.com/event.php?eid=53665463252&ref=mf




Powered By Blogger