اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

samedi 21 juin 2008

Tiger Phone Card



But I think about you so so so so....
So much I forget to eat :)))

Dengue Fever
Venus On Earth (2008)

mardi 17 juin 2008

Deux jours après la bataille...





بعد شبه الاجماع حول نضج المشهد التدويني التونسي و بلوغ المدونات التونسية "سن الرشد" و الانتقال الى المستوى التالي من حيث المواضيع و القضايا المطروحة , يبدو اننا رجعنا (بالتوالي) الى الـ"المعبوكة" , الحكاية القديمة , الموضوع الأوحد الواحد الأحد, جواز السفر الى عالم المفكّرين و نادي المثقّفين "المتثقّفين" ... الموضوع (الكليشي) الذي افرغ من محتواه ليتمّ تكراره و اجتراره بموجب و بدون موجب و من ثمّة استهلاكه بالكامل في النقاشات التدوينية السابقة ( استعملت خلالها كل الحجج و البراهين و الاحذية الرياضية و الشلايك قياس 44 ) حول موضوع الدين و اشكاليات الحداثة و العلمانية ...

و بعد انجلاء غبار المعركة (التدوينية ) و انحسار المدّ الذي اغرق الفضاء التدويني بموجات (تسونامي) هائلة من النصوص المتتالية و المتشابهة في معظمها من الجانبين حبّيت نستغل الهدوء الذي يعم جبهات القتال باش نسأل المشاركين و غير المشاركين في هذه الحملة (على فكرة هي حملة من الجانبين فرغم كون "حلف الأنصار " كان المبادر و المنظّم لهذا الحدث إلا أن الحلف المقابل استثمر كما يجب هذا اليوم و شارك و لو بطريقة غير معلنة بالحملة المضادة ) برشة اسئلة حول حصيلة ما سمّي بـ"يوم الإسلام" :

هل دخل اللادينيون دين الإسلام ؟
هل اقتنعوا بضرورة وقف "هجماتهم " و "تدويناتهم الاستفزازية " و امضوا على معاهدة تضمن احترامهم لمشاعر النّاس ؟

هل ارتدّ "حلف الأنصار" ؟
هل تبيّن لهم انهم "غالطين على طول الخط" ؟
هل اقتنعو بأن الاسلام هو دين "مفاخذة الرضيعة " و دين "التخلّف و الإرهاب و العمى الفكري و الحضاري" و من ثمّة اقرّوا بأنهم كانوا على خطأ و انهم استفاقوا من "العصاب الجماعي" الذي كان يصيبهم ؟

هل ان الدفاع عن الاسلام يستحق يوما واحدا ؟؟ يبدأ عند الصباح و ينتهي بإعلان ختامي من احد الأطراف؟
هل أن النقاش يكون بقصّ النصوص و لصقها من المدونات العربية و غير العربية ؟
هل ان اسلوب تتابع و توالي النصوص و تشابهها في الطول المفرط و غياب المنهجية من كلا الجانبين كفيل بضمان النّصر ؟؟
هل أن النقاش حول الدين يتطلّب وجوبا عدم وجود خطّ واضح للنقاش و التركيز على استقطاب المصوّتين و احتساب الاصوات لفرض وجهة النظر الخاصّة من طرف كل جانب؟



vendredi 13 juin 2008

peinture numérique, merci SonSon


آش خير من الفن بعد الحروبات و المآسي و الميزيريا الكلبة ... شوية فنون جميلة على العينين , عينين سي عمار بو العينين , اللي كابس روحو ها الأيامات و عمل ترفيلة صحيحة على الانترنات و المدونات ...

اللوحة هاذي اسمها "البلايك"* , و متكونة من 55 كيلو بيت و حاجة , و 1024*768 بكسال
مازلت ما حددتش سوم أما اللي يحب يشري يتصل بالآنسة غرق نوفراج سنسن , وكيلة الاعمال و المتخصّصة في الفنون الجميلة


lundi 9 juin 2008

القوادة الجماعية في سمفونية البلاغات المحلّية

الصفحة 3 من جريدة الضريح متاع اليوم (09/جوان/2008)

حسب البلاغات اللي خرجت نهارة الأحد قاللك اللي الجماعة خايفين من "تعمد المواطنين تصنيع زجاجات حارقة" , و اجمعو على انو اهالي الرديف هوما اللي غالطين و يلزمهم يعتذرو على اخلالهم بالأمن العام و تشويههم لسمعة البلاد, و لاستعمالهم الماطراك و الكريموجان و الكرتوش ضد قوات الأمن ... قالك يلزم " تظافر الجهود لكسب رهانات التنمية و دعم الاستقرار و الامن و السلم الاجتماعية" ( ههه ) و برشة لوح ( حسب الأصول و القواعد متاع مدرسة اللوح العتيقة) تنجمو تشوفوه في صورة المقالة المصاحبة...

و كي العادة, احزاب المعارضة متاعنا تُعبر و تبرز و ما تفوّتش الفرصة باش تدعّم رصيد الولاء و مخزون الطاعة لولي النعم ... من مادة "الطحين الغذائي " ... اللي الناس الكل تعرف انها مادة استراتيجية و حياتية في بلاد الكنتول و ضرورية في عملية التنمية و الانفتاح الديمقراطي ... الا انو كثرة استهلاك المادة هاذي و التحوّل من مرحلة الاستهلاك الى مرحلة الانتاج( من طرف الاحزاب المعارضة الموالية اللاشرقية و اللاغربية و اللا علاقة ) تسبب في تواجدها بكميات ضخمة في الأسواق , مما أثّر على جودة المنتوج و تسبب في أضرار كبيرة على صحة مدمني الحلاوة الطحينية

أما الجانب المشرق و الإيجابي في الحكاية هو انو على القليلة ارتاحو جماعة الحزب الاوحد ( اللي يعتبرو هواة في ميدان ضرب اللوغة مقارنة بمعارضيهم) من مشقة اصدار البلاغات و كيما تعرفو راحة الناس هاذي هو هدف من اهداف المخطط التنموي و اولوية من اولويات سياسة بلادنا ...
و اكاهو
باش نحرق

dimanche 8 juin 2008

استثمار البلاغ الرسمي



صحيفة الصريح (اللي بالمناسبة تمر بمصاعب مادية كبيرة هذه الايام و عندها مشاكل متاع ورق و قاعدة تخرج في اعداد صغيرة) حاولت تشتثمر لأقصى حد البلاغ الهزيل متاع وزير العدل و حقوق الانسان و نشرت جزء منو كعنوان في الغلاف , و البقية كخبر في الصفحة الثالثة (عدد السبت 8 جوان 2008)


اما صحيفة الشروق اللي -مقارنة بالبقية - تعتبر من الجرائد اللي تحقق في ارباح كبيرة و ما يهمهاش شكون يشريها طالما هي رابحة من قبل ما تتباع , و نجمو نقولو انها تنشر في الاخبار باش تسوّق الاشهار ... موش تلتجئ للاشهار لتمويل السعي للخبر و المعلومة...
و حكاية كيما حكاية قفصة بالنسبة ليهم حكاية فارغة و ما تجيبش قرّاء, بالعكس خبر منقّل من الجزيرة او العربية على مقتدى الصدر او حسن نصر الله ينجّم يصلحلهم عنوان غلاف اما حكاية قفصة فهي هرج لا فائدة منو... و لكن بما انو بلاغ رسمي فمن واجبهم انهم ينشروه ..............
و نُشر البلاغ في صفحة المحاكم...(عدد السبت 8 جوان 2008)
ة

التغطية الاعلامية و سياسة الساشي الاكحل

اليوم الصباح , و انا داخل للتاكسيفون باش نشري حاشاكم الدخان, عرضوني زوز من ناس, واحد في الثلاثينات و الآخر في الخمسينات و
الا اكثر, يتناقشو على ما يبدو على كارطة متاع تليفون, واحد يقلو تصبّت و الآخر يقلّو لا ما تصبّتش , خايفين لا تمشي عليهم الكارطة و تضيع الخمسة آلاف . قربلي واحد منهم و سألني على رقم مصلحة الحرفاء متاع التونيزيانا ... و أنا في الصباح قل و ندر وين نبدى في مزاجي - وخاصة المدة الأخيرة- ديما متغشش و ديما عاقدها مع الناس الكل... لكن المرّة هاذي برّدت دمي, و قتلو اللي مانعرفوش باش يقيلني هوا و الزنس اللي معاه...
و تفكّرت علّوش العيد...
اللي يقعد لآخر لحظات في حياتو ياكل و يبعبع و يجترّ و يعاود في اللي كلاه البارح ... ما فيبالوش لا بالسكّينة لا بشكارة الفحم و لا بالساشيات متاع الكنجيلاتور اللي يستناو فيه...
لكن هذيكة هايشة بكماء , ما نجموش نلوموها , موش بني ادم كيما الزويّز الحرفاء الأوفياء متاع التونيزيانا ... (اللي من ناحية اخرى ما يفرقوش برشة على معشر الاغنام الا بماكلة اللبلابي و الهرقمة )...


حاصيلو موش هذا موضوع التدوينة, موضوعنا اليوم هو التغطية الاعلامية للاحداث اللي قاعدة تصير في قفصة, من طرف وسائل الاعلام متاعنا .
انا الحقيقة نعرف اللي عندنا الامكانيات المادية و البشرية باش نغطيو الحوض المنجمي بالكامل ... موش الحوض المنجمي بركة , بل نجّمو نغطيو الساحل و الوسط و الشمال و الجنوب بما فيه جزر جالطة و زمبرة و مليتة و قوريا و حومة السوق تغطية كاملة و شاملة ... بساشي أكحل ...باش ما يتعدّى شي...ما يتسرّب شي ... النفس لا
و هذاكة اللي صار...
فاتّضح و انو كاميراهات التلافز متاعنا و حافلات النقل المباشر, و ميكرووات الاذاعات الوطنية و الجهوية و الخاصة متاعنا, و الأقلام الجافة (من قلة الاستخدام) متاع الصحفيين , ماتصلح كان لتصوير مقابلات الكورة و نقل المباريات و تسجيل اغاني و اهازيج الفيراج ... و رصد الشماريخ , و مطلقي الشماريخ , و احصاء الشماريخ , شمروخا شمروخا...

اما القنابل المسيلة للدموع و الرصاص الحي من بنادق اعوان حفظ النظام و الاضرابات و الاعتقالات و المداهمات و اعمال الترهيب و التنكيل بالمواطنين - و حرقهم احياء - فهي ليست من مشمولات وسائل الاعلام , المختصّة في "التغطية الاعلامية "... بل هي من المشمولات وسائل الاعلام المتخصصة في الكشف و التعرية (كشف و تعرية الحقائق) , و اللي للأسف نفتقدولها في بلادنا و حتى المواد هاذم على ما يبدو ما يقريوهمش في معهد الصحافة و علوم الاخبار متاع منوبة.

نعرفو اللي الصحافيين في العالم الكل يستغلّو الاحداث الكبيرة باش يسجّلو بيها نجاحاتهم المهنية و تلقاهم يتسابقو شكون يعمل السكوب و شكون يبعث مراسل يعملو التغطية اللازمة من موقع الحدث. فالاحداث بالنسبة للصحفي هي محور النشاط متاعو و مورد رزقو و فمة احداث تنجّم تكون سبب شهرة الصحفي و ضربة الحظ اللي تدخّلو للتاريخ (كيما الصحفيين متاع الجزيرة و الصحفي متاع السي ان ان اللي خلاه صدام يصوّر الحرب من بغداد عام 1991)...

احنا للأسف في بلاد الكنتول (المعشش في الافئدة و الجاثم على الصدور) و بحكم الغياب الكامل لاي نشاط مهني حرفي نجمو نطلقو عليه صحفي , و بحكم انقراض فصيلة الصحفيين منذ زمن , فمازلنا لتوة نلقطو في الاخبار من الداخل و الخارج و نتحايلو على الفيلتر متاع الانترنات باش نشوفو فيديو و الا باش نقراو برقية او خبر الله اعلم شكون اللي نشرو و الشنية خلفية اللي خرّجو , و نعيشو على البلاغات الرسمية و التصريحات متاع المسؤولين , ونجّمو نشوفو غرائب ما تصير كان عندنا ... و بالنسبة للعباد اللي تخدم في الحقل الصحفي في تونس ( ديما يتشكّاو من الاوضاع المادية و من قلة الموارد و عدم اقبال القراء على شراء الصحف ) فتغطية احداث قفصة بطريقة حرفية ربما كانت تكون حل لاسترجاع ثقة المواطن و المصالحة بينو و بين الصحافة المكتوبة و للنهوض بمستوى الصحف و تحسين الموارد المالية... لكن اللي صار كان مهزلة و كيما العادة لعبت الصحافة لعبة السياسة و طبّقت تعليمات امنية ربما وصلتهم ربما لا , و قامو بالواجب و اكثر من الواجب ...
في تونس سبعة -عندهم جمعة توة- كل ليلة بعد الاخبار يعديو برنامج النباتات و غرائب البحار , و ساعات برنامج الشوط الثالث متاع و الكورة, قناة 21 كيف كيف من العيادة التلفزية لبرنامج الكورة متاع البنية ندرى شسمها و حنبعل دورتها باست أوف لبرامج معز بالغربية و شلة بالمكشوف و ما فماش كلمة على اللي صاير في اخياننا اهالي الرديف... قال شنوة قاللك كشف خفايا الساحة الكروية و "تسليط الضوء على المدرّب الجديد للمنتخب"

حصيلوشي يخرج البشر من ملة محمد

samedi 7 juin 2008

بالأمن و الأمــان ....يُقتل -هنا- الإنسان


تدوينة حمراء...حمراء ...حمراء ...حمراء ...حمراء ...حمراء
حمراء ...
حمراء...
بلون الدم
حمراء بدماء الشهداء...شهداء الامن و الامان
...شهداء جودة الحياة
شهداء الكذب الاحمر و ... الدعاية

vendredi 6 juin 2008

آخر الانباء من الرديّف: الرصاص الحي ضد المتظاهرين



بعد اساليب الترويع و ترهيب المتساكنين , ثمّة انباء* عن استعمال الرصاص الحي اليوم في منطقة الرديّف و سقوط الشاب حفناوي بن رضا بن حفناوي (18 سنة) برصاص قوات الامن و جرح عدد آخر من المتظاهرين...

كيما قال المعلّق "رمضان" في التدوينة السابقة فإن حركة الاحتجاج في ولاية قفصة طوّلت برشة و بدات تقلّق في الجماعة و خذات ابعاد اخرى و ربما بدات تمتد و تتسرب الى المناطق المجاورة (ولايتي صفاقس و القصرين), و على ما يبدو فالتعليمات الحالية تدعو الى اللجوء الى الحلول الراديكالية و اعتماد الاساليب الردعية القصوى...

لكن هل انو اللجوء للكرطوش و استباحة دماء الناس اللي قالو احنا توانسة هو الحل ؟؟

*(المصدر) بلاغ لجنة مساندة متساكني الحوض المنجمي بقفصة
Comité de Soutien aux Habitants du Bassin Minier de Gafsa
صحيفة لوفيقارو وكالة فرانس براس

عندما يقول المسؤول : خلّي يموتو ...الحيوانات


الله يرحم الشهيد و يصبّر امّيمتو و اهله

jeudi 5 juin 2008

بالله حد ينوّرنا ؟وين ماشية البلاد ؟؟


شكونو اللي مات في السبيطار متاع قفصة؟؟
هل هو مرافق الشهيد هشام اللي دخل في الغيبوبة و الا شخص آخر يقال انو توفي من ضرب المطراك؟
شنية حكاية السيد اللي رمى روحو من فوق المغازة العامة في المتلوي ؟
شنية حكاية تجار المازوط متاع الدزاير في فريانة ؟
و شكونو المسؤول اللي قاللهم باش يحرقو لايطاليا اذا موش عاجبهم الوضع ؟؟
و شكونو البيّاض اللي صب السيرفاسار على راس المعتمد ؟؟ و علاش يبيّض في صلعة المعتمد ؟؟
و شنية حكاية الشانطي متاع البريتش قاز في الصخيرة ؟
و علاش مواطنين من المحرس و الصخيرة موقفين الاشغال ؟؟




الديمقراطية الامريكية و عنصرية الكرسي


هاذية تدوينة نحب نوجه فيها تحية لسي باراك اوباما, اللي سلّكها و ترشّح للنصف النهائي, انشالله مبروك,و انشالله العاقبة فيما اهم... رغم اللي برشة عباد متشككين في حقيقة النوايا متاعو و موقفو من القضية الفلسطينية و ثمة شكون باش يزيد يكرهو على خاطرو البارح تعدى في التلفزة يخطب في جماعة الـ "ايباك" و يقدّم فروض الطاعة لإسرائيل اللي اعتبرها حاجة اساسية و من اولويات السياسة متاعو اذا وصل للرئاسة. أنا الحقيقة ما يعنينيش برشة الموقف متاعو , بالعكس يظهرلي موقف طبيعي لأنو الناس الكل نعرفو امريكا و اسرائيل حلفاء من اول الدنيا, و في نهاية الامر اسرائيل ما دخلتش حرب مع امريكا و ما قتلتش مواطنين امريكان...
و اذا كان الرؤساء العرب (بما فيهم عباس) اللي تقتّل فيهم اسرائيل عندها 60 سنة , و قنبلت عليهم بانواع الاسلحة الكل و بالنابالم و القنابل العنقودية و اعدمت الاسرى متاعهم في الصحراء و مازالت لتوة تحتل ارضهم, وهوما يعنّقو في المرت و يبوسو في موفاز و يكحّلو على تزيبي ليفني , فمانجّموش نلومو على اوباما على خاطرو يحب يوصل للرئاسة و على خاطر ثنية البيت الابيض ما تنجّم تجيب كان على اسرائيل و الـايباك و اللوبي الصهيوني ....
انا باراك اوباما يمثّلي الحلم , حلم ما ينجّم يتحول لواقع كان في امريكا, اعطيوني اناهي البلاد في العالم اللي يجيها واحد نزوح بوزقليف , ممّاتو مازالت تاكل في الطابونة في مناطق الظل متاع كينيا, و ينجّم يندمج في المجتمع و يوصل يرشّح روحو للرئاسة.
علاش نبعدو لبعيد ,احنا في بلاد الامن و الامان, شكون ينجّم يرشّح روحو لرئاسة الجمعية ؟؟ تصوّرو ولد كلايتون و الا بنت سانتوس يحبو يرشّحو ارواحهم( حتى لعضوية الشعبة) ؟؟ اشنوة يصير ؟؟ اول حاجة ساعة ينحيولهم البسبور و الجنسية و يقولولهم من وقتاش وليتو توانسة...
خلّينا من التوانسة الجدد , هاو عندنا ملاين من التوانسة القدم و اللي عندهم قرون من التاريخ و الاصالة و العراقة و التجذر, اشكون ينجّم يترشّح ؟؟؟ اشكون تتوفّر فيه شروط الترشّح اصلا ؟
زعمة شكون فيها اكثر عنصرية ؟ بلاد الكنتول و الا امريكا ؟
زعمة ماعندناش عنصرية في تونس ؟
بين بيض و سود يمكن فعلا ماعندناش ... اما ؟
نقلّك عندنا عنصرية ما اشنع...عنصرية الكرسي