اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

samedi 26 mai 2007

سي السيّد...


و انا واقف قدام الدّار نسمع في العياط و الزّياط عند جاري...
يا ستار أستر... اشنية المصيبة اللي وقعت ... زعمة اطرشقت عليهم دبّوزة القاز و إلا واحد من الصغار ضربو الكوران...
حاصيلو خذيت فجعة هي بيدها ...و جريت مع الناس نستجلي في الامر...اش نلقى...

نلقى جاري واقف مدنكس راسو, يرعش بكلّو ويتنفس بالسيف ,السورية طالعة من تحت السروال (ظاهر ماكل تدقديقة),
و السيّدة حرمه تصيح: "تكلم ترى, حلّ فمّك...."

مرّة أخرى و انا ماشي للخدمة ... يا فتاح يا رزّاق, يا ربي العمال عليك... نتعدّى على دار سي السيّد جاري: باب القاراج محلول ... الكرهبة تخدم ... وهو ليه ليه يمسح في الباربريز و الاجناب و الرتروفيزور.

من بعد هبط البلار و مدّت مرتو راسها من الشبّاك: يزّي هكاكة, ما عادش بكري عليّ..خلّيني نمشي

بقيت نتابع في الموقف من بعيد, نخزر للكرهبة خارجة مارش اريار من القاراج و سي السيّد يسكّر الباب و يقصد ربي للخدمة - على ساقيه-

انا بطبيعتي مانيش كلوفي و ما نلوّجش على القيل و القال و جبدان العباد, بقيت متذكر الواقعة و سألت العطّار على الغلبة.
يطلع اللي سي السيّد ما عندوش البرمي ( ما خلاتوش مرتو ياخذو)
و كل صباح تمشي هي في كرهبة العائلة و يمشي هو على ساقيه علما و انّهم يخدمو في نفس البلاصة.

اش باش نقول و اش باش نعلّق ... توا بالرجال هذوما باش نخرجو اسرائيل... و الا باش نأسسو لجمهورية الغد و نبنو مجتمع المعرفة ..

يا ذنوبي...

قالو حرية المراة قلنا ميسالش..
قالو حقوق المراة قلنا هاذي حاجة جات في القران و في حقوق الانسان..
قالك كيفاش الراجل يطلق المرا بالكلمة عملنالها قوانين هي زادا تنجم تبعث راجلها (يقضي) و تطلقو بالانشاء..
تكيفو معانا الدخان.. شيّشو معانا في القهاوي ..شربو معانا السلتيا.. زمّرو علينا في الفو روج..صفّرو معانا في القيراج و البيلوز..مقّصونا في الكياسات (شرطة و حرس)..

توّا بالله اش مازال ...مازالت هاك الحكاية...توا يزيد يتقدم العلم و يوليو يجيبو الصغار من غير مزيتنا...

االنساء متاعنا هوما العفريت متاع الدبّوزة اللي استنّى الاف السنين باش يخرّجوه منها و وقت اللي خرج تقلب على اللي منّعو منها...
يمكن الدوزة متاع الحرية هبطت على رؤوسهم فرد ضربة ..يمكن ثمّة شكون يحرّش فيهم ... يمكن ثمّة شكون كذب عليهم قالهم اللي هذا هو التحضر و التقدم و اللي النسا في العالم المتقدم هكة يتصرّفو ... زعمة نحن متقدمين على الجابون و الصين و دول شرق اسيا ...

في الانتظار
انا اوجه نداء استغاثة الى كل المنظمات و الهيئات و الجمعيات و قرين بيس و بريجيت باردو و الفيفا و تجمع الساحل و الصحراء باش يتدخلو و يشوفولنا حل...
يهزّونا للدرفور ... يطيّشونا في القطب الجنوبي ... يحطونا في المحمية مع القرودة و الاّ دب الباندا ... يتصرّفو...
المهم يحمو الفصيلة هاذي من الانقراض..


7 commentaires:

naufrage a dit…

ce n'est pas une affaire de sexe mais c'est une affaire de respect !!
les causes que t'as cité sont justes mais les deux exemples ne sont pas générales
y'a des hommes qui ne savent pas comment imposer le respect! ou peut etre ma9raouchi :p
bech loumour etched blasetha lazem el rajel ikabech fi blastou ou ya3ref wa9tech i7amer 3inih pasque...el nsaa i7ebou el coté si el said fil rajel !! ama Ghir el wa9et ou grain d'or :p

samsoum a dit…

Quand le premier homme du pays se fait mener par le nez par sa femme, qu'est ce que tu attends des autres :))
@Naufrage: t'as raison, moi comme je ne peux pas "n7ammar 3inayya", j'ai acheté des lentilles rouges pour les utiliser au moins une fois par mois pour jouer le role de Si Saied. C'est comme ca que j'ai pu avoir le respect de ma femme :P :))) Je parie que tu es célibataire :))

naufrage a dit…

@samsoum
enhebou 3inih a7Mor 6 jours par semaine ou yezher kif el lion... mazelet ma9itouchi :D
LOOOL

Clandestino a dit…

@naufrage:
"y'a des hommes qui ne savent pas comment imposer le respect" ...
non ce n'est pas ca,
c'est plutot le long sejours dans les "harem", les siecles passés derriere le "nikab" ou dans le "hammam" ...la femme arabe a gardée en elle toutes ces années de douleurs.. tout un patrimoine de mauvais traitements de sévisse et de chagrin...aujourd'hui c'est l'heure du revanche ...
@samsoum:
يا خويا
يرحم بوك
و يجعل منك
صلي على النبي و خليّ المعلّم في حالو
خلّي الواحد يصيّف في دارو

Clandestino a dit…

naufrage:
يزهر كيف الصيد
؟؟؟
يبطى شوية

3amrouch a dit…

@naufrage:wallah bel7ek kollo men grain d'or.

naufrage a dit…

eyh 3amrouch kollou men grain d'or ou nana bejwane7 zeda !
:D