اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

vendredi 30 janvier 2009

للمدخّنين فقط...و ماذابينا جماعة الميريت و المارلبورو على برّة

يعاني المدخّنون في تونس من ازمة مستمرّة (توة عندها اشهرة), و لأسباب مجهولة و غامضة كاد الدخان التونسي يفقد مالأسواق . الصحافة و مسؤولي الوكالة التونسية للتبغ قدّمو برشة تبريرات و تفسيرات للأزمة, قالو اللي الطلب فاق العرض و جموع التوريست من اوروبا الشرقية و الدزاير عجبهم المارس متاعنا و شراوه لكل و روّحوا بيه لبلدانهم. بعد الصّيف جاء رمضان قاللك الشركة متاع التبغ تعمل في الصيانة للماتريال و هذاكة علاش الانتاج طاح, و توة في 2009 ما تبدّل شي, المارس ليجار ديما مفقود مالاسواق و الكميات الموجودة مجهولة المصدر (تتباع في الكياسات و اسواق ليبيا بـ7 دينارات الكرتوشة) ...

الكلاندستان -و باعتبارو من أوفياء دخان الاستقلال- توصّل لكشف الأدلّة و العلامات الصحيحة متاع الدخان الموش مضروب, و تعميما للفائدة و خدمة لجموع المدخنين من قرّاء المدوّنة, قرر انو ينشر تفاصيل الاكتشاف الهام بالصور:


التثبّت في الرقم المسجّل اسفل العلبة يلزم يكون مكتوب بارقام كبيرة في الوسط تماما (بيمن كلمتي "مارس و ليجار")



بعد فتح العلبة التثبّت من وجود الواقي الورقي العازل المكوّن من قطعتين موش من قطعة وحدة كيما في العلبة المغشوشة





التأكد من الكتابة على السيقارو : يلزمها تكون بنّية اللون , ماهياش غامقة برشة و ماهياش فاتحة او مفسّخة


و يبقى المطعم و النكهة هو الدليل القاطع و النهائي الا انك اذا وصلت انك شعّلتو السيقارو ماعادش تنجّم ترجّعو لذلك الدليل هذا ماهوش عملي في حالة كيما هاذي.

نتمنّى انو الفايدة حصلت للجميع, و السلام عليكم

samedi 24 janvier 2009

بركاتك يا بــاراك


انا عادة ما نعتقدش انو فمة شكون مشوم أحرف و شكون مبروك و كي نسمع حدّ تتجنبو لعباد و ميحبّوش يتصبّحوا عليه نضحك ...الا انو على ما يبدو الحكاية هاذية صحيحة ... اي نعم ثمة وجوه تقطع الرزق و ثمة وجوه وين تقبّل تربح و تلقاها ساهلة و مسهّلة ...
كيف نعملوا مقارنة بين زوز فترات , بين السنوات الاخيرة للثمانينات و الفترة الحالية اي أوائل 2009 , نلقاو انو دخول (خونا ) باراك حسين للبيت الأبيض جاب معاه الغيث النافع على كامل مناطق البلاد بكمّيات كبيرة و نقّصلنا في أسوام المازوط و الايسونس و أسوام الحديد (بنسبة 33%) و جابلنا زادة الزيادات في الشهرية ... عكس الفترة اللي حكيت عليها (آخر الثمانينات) اللي -و العياذ بالله - جابت معاها الجراد الصحراوي في ما يسمّى حسب منظمة الفاو بالغزو الكبير
la grande invasion
متاع 1987-1989
و عرفت كذلك ثاني اعنف فيضانات منذ الاستقلال , فيضانات 1990


مبروك لبلعوط الجمهورية ... و عليه العوض في حقوق الإنسان


ملاحظة:
انا منعرفش بقية اسماء تشكيلة المنتخب التونسي لحقوق الإنسان, و خاصّة القائمة الأولى -المشهود لها بالنزاهة و الكفاءة- لكن و بما أنو سي برهان بسيّس يتوسّط القائمة , نجّم نستنتج (باعتماد القياس ) شكونهم البقية و شنية خلفياتهم و المجالات اللي تظهر فيها نزاهتهم و كفاءتهم...و اللي بالتأكيد مجالات لا تمت بصلة لـ حقوق الإنسان

dimanche 18 janvier 2009

تدوينة وطنية

إعانات تونسيــــة


أنا بصراحة ضد انو بلادنا المحروسة تحرّك حاملات الطائرات متاعها في الحوض الشرقي للمتوسّط و الا تعلن التعبئة العامة في سلاح الصواريخ متاعها و الا تعمل جسر جوي لمدّ المقاومة الفلسطينية بالسلاح , هذا الكل زايد ... و هاو الصحيح , باش نستعرض معاكم تفصيل الإعانات اللي تبعثت في الاسبوع الاول للهجوم على غزة :

1- دارك طايحة؟؟.. راقد في الشارع؟.. مطر؟؟ ريح؟؟ قنابل ؟؟أف 16 ,. اباشي ؟؟ نورمال ... بطّانيات قصر هلال و الجم ...الدّفا و العيشة
2- هريسة الوطن القبلي : ضربة ضربة للفوسفور الأبيض , و يمكن زادة استعمالها كسلاح بيولوجي ضد الجنود و المدنيين في اسرائيل ...فعالية مضمونة بنسبة 100%
3- شكارة (على ما يبدو) سكّر ...شكون يعرف بالكشي اخيّاننا في غزّة يحششو على كاس تاي و الا قهيوة ززوة بالهيل
4- بسكويت سيّدة اللي كبرنا معاه و انشالله نكبّرو عليه صغيرات غزة و ايتام القصف ... كيف كيف فاعلية 100% و بعد 40 سنة نسمعو الشباب الغزاوي يصيح دحلان 2009
5- دبابز جافال و دينول باش الشعب الفلسطيني يغسل ايديه للـ "منكعين" (قال عادل امام) مالعرب و شعوبهم و جيوشهم و حكوماتهم و ما يعمّلوا كان على أرواحهم.

آلــــة زمـــن ...للعرب فقط
(زوز متقاعدين)
-لوكان يرجع بيا الوقت و يعطيني ربي و الزمان...بالحرام الا ما ناخذ مرا أخرى
- عليك بـزيبــي ليــفني
- أعوذ بالله من هاك الزنس
- ماقتلكش خوذها ... أما دواك على إيديها , في 2006 قالتك رجّعنا لبنان 200 سنة لتالي و في 2009 قالتلك رجّعنا غزّة 60 سنة لتالي...برّة انتي زادة جرّب حظّك بالكشي ترجّعك 20 سنة لتالي

مظاهرات تونسية

الغريب في بلادنا انو في كل مناسبة تتلم فيها حضبة اكثر من 10 من ناس خارج مدارج الملاعب ماتسمع كان الهتافات بحياة "المُعلّـم" و تمجيد الحزب الواحد الاحد.
و في مظاهرات التضامن مع غزّة , كيف كيف, ديما علم تونس و علم فلسطين في الصفوف الاولى مع الشعارات البنفسجية و صور البورتري العملاقة.
لبارح السبت, (في المسيرة اللي نظّمها الإتّحاد) , جاء سيّد هازز في يدّو تصويرة المعلّم و وقف في الصفّ الاوّل متاع النقابيين...
دزّوه و جبدوه لتالي و بعّدوه...
مافهمش روحو
الناس تصيح لنصرة غزة و هو يغني " المعلّم يا بطل و التجمّع هو الكل"
جاو جماعة نقابيين حبّوا يضربوه, تدخّل الامن, قالولو قدّم لقدّام و انشالله يكلّمك واحد...
و دخلت بعضها و قريب تتقلب المظاهرة و تفسد و يولّي فيها ضارب و مضروب و ربّما تتطوّر الامور لما لا يحمد عقباه,فـ طاح التجمّعي و تمدّ على طولو في الكيّاس و بداو اعوان الامن (السيفيل) يصيحو اشكون عندو طابع سكّر زعمة زعمة مريض ( وهو فعلا مريض) ...و لقاولوا صيغة باش يفصّعوه من غادي
من الشيرة الاخرى , كان فمة زادة جماعات الاحزاب المعارضة بكل الوانها و أطيافها , من المعارض برشة للمعارض هكاكة و برّة... للي يحسب على كرسي زايد في الانتخابات الجايّة ,و اللي يغنّي و جناحو يردّ عليه و اللي يحبّ يوحّد و اللي يحبّ يجـدّد و اللي يتلوصق لجموع النقابيين يكبّر بيهم في الحضبة متاعو , زعمة زعمة معارض صحيح, و هوما كيفهم كيف التجمّعي المتمارض , لا يهمّهم لا غزّة لا فلسطين لا بطاطا ...
يا لندرا وقتاش ياقفوا على ساقيهم ؟؟ لوقتاش يقعدلهم الإتحاد ؟


Naturists
النهارين نلقى مجموعة في الفايسبوك -مجموعة تونسية- تدعو لـ تخصيص شواطئ لهواة التعرّي في تونس.. بصراحة عجبتني الفكرة.. شبيه؟؟ ماهو نبداو بالتعرّي للي نوصلو للأقمار الصناعية و المحطّات الفضائية و البيوتكنولوجيا...
دخلت للقروب نلقى أكثر من 90% من الأعضاء ذكور ...


mercredi 14 janvier 2009

We will not go down...For Gaza




الغناية هاذي خير من الف اغنية من نوع الحلم العربي أو النواح العربي اللي يلمّدو فيها كمشة فروخ من روتانا و من الال بي سي و يعطيوهم لحن حزين يقولولهم نوّحو على المقام هذا , و يركّبوا عليه برشة تصاور محزنة و مؤثّرة ,و الحمد لله معناش مشكلة في التصاور
الحزينة , عندنا ارشيف متاع ضحايا المجازر و ضحايا القصف و جرائم الحرب اكثر يكفينا و يكفي بقية البشرية في القارات الخمس...

فالفن اللي يقولو عليه "ملتزم" تعولم هو زادة ... و من فترة كانت فيها الاغاني الحماسية و الاناشيد الثورية هي السائدة فترة "اصبح عندي الآن بندقية الى فلسطين خذوني معكم" ولّينا توة نسمعو كان البكاء و العويل و" دم الشهيد يجري على الرصيف" و "جايز ظلام الليل " و " بحب حسني مبارك و ياعيني على عمرو موسى"
و كيما قلت , مادام معناش مشكلة في تسجيلات المجازر فاسهل حاجة توة انك تعمل كليب تقول عليه ملتزم ,فيه كليمتين ماركة "شعب عربي واحد دم عربي واحد" و تزيدها مبعد كل فاصل موسيقي برشة تكبيرات (الله اكبر)...و تحضّرو و تقعد تستنّى الفترة المناسبة (اي قصف اسرائيلي و الا مجزرة امريكية في العراق اي انك بقدرة ربي ماكش باش تستنى برشة) باش تلانصي الغناية و تولي الاولى في البثّ....
لكن السؤال اللي يطرح نفسو هو اشكون باش يسمعها الغناية ؟؟ شكون باش يتفرّج في الكليب ؟؟لأشكون باش تتبثّ الاغاني هاذي؟؟ أكيد لينا احنا العرب ... يقول القايل شنية الجدوى متاع كليب يشرح و ينقل فظاعات الاحتلال الاسرائيلي للعرب؟؟ العرب الكل تعرف شنية اسرائيل و شنوة تاريخها و فاهمين ظروف و اطوار و خفايا المظلمة اللي تعرّضلها الشعب الفلسطيني ... و في نهاية الامر ماهياش مشكلة كان فهمو العرب و الا مافهموش على خاطر الأمور خرجت من ايديهم من هاك العام و ولاو لا يحكو لا يصكو ...بقر الله في زرع الله... يتبّعو في امريكا و "الدول الراعية للسلام".
توة يلزم نفهموا المواطن النصف واعي المواطن الناخب و دافع الضرائب في اوروبا و امريكا بحقيقة القضية...الحقيقة اللي بعد 60 سنة اكثر من نصف العالم مازال موش فاهمها و فيبالهم لتوة انها اسرائيل هي الحمل الوديع في وسط قطيع الذئاب ( العرب هههه)... نفهّموه موش بقناة الجزيرة اللي تتكلم بالعربي و موش بقناة الجزيرة اللي تتكلم بالانقليزية و موش لا بقناة تونس سبعة ولا بقناة 21 و لا بمسلسل نجدة انزور "سقف العالم" (اللي قالك باش يفهّم العالم حقيقة الاسلام و يردّ على الصحفي اللي صوّر رسوم مسيئة للرسول), لأنو المواطن الغربي ما ياكل كان ماكلتو ... ما نجيش انا نجبرو باش ياكل الكسكسي بالقديد و الا باش يفطر دقلة و حليب ... يلزم نخاطبوه بلغتو و عبر الثقافة متاعو ...
السيّد المغني لهنا رغم انو موش مصنّف و مازال يعتبر هاوي مقارنة بمقاييس الموسيقى الغربية و حتى بمقاييس فناني روتانا و غيرها...الا انو مادام يغني بالانقليزية و يعمل في موسيقى ساهلة و مقبولة في الاذن الغربية, فانا نرى انها اغنيتو هاذي خير مليون مرّة من الاحلام العربية اللي تعملت و اللي قاعدين يحضّروا فيها


de Michael Heart

lundi 12 janvier 2009

رسالتـي إلـى جورج بوش (قبل ما يقلب منظروا) ...على لسان هوغو شافاز

كيفاش يقولوا هوما في الخطابات , اصالة عن نفسي و نيابة عن جميع الاصدقاء و الاصحاب و اولاد الحومة (اللي ميعرفوش الانترنات ) نحب نبعث رسالة لجورج بوش الصغير (و ما يهمنيش توصلو و الا ماتوصلوش ), نعبّر فيها و نقول اللي عندي 5 و الا 6 سنين نحب نقولو , و اللي زادة يحبّو يقولوه اولاد الحومة و الاصحاب و تشكيلات الكارطة في القهوة و الجيران من بياع الفريب للمطعم متاع الملاوي و حانوت التاكسيفون(اللي يجهلوا الانترنات و بعمرهم ما سمعو حاجة اسمها تعبير ) ...هذية اذن هديتي لدبليو بوش قبل ما يقلب خلقتو من البيت الابيض , و حبّيتها تكون على لسان تشي غيفارا القرن 21 , هوغو شافاز


mercredi 7 janvier 2009

علاش يتضرب المكتب التنفيذي؟؟ و علاش يمنع الكاتب العام؟؟؟

حسب بعض المصادر النقابية , تقدّر نسبة نجاح الاضراب العام متاع البارح في قفصة بأكثر من 85% ,اضراب جاء تعبيرا عن التضامن مع اهالي غزة من جهة, و للاحتجاج على اقتحام مقر الاتحاد في قفصة و الاعتداء بالعنف على عديد النقابيين و منهم اعضاء المكتب التنفيذي الجهوي... باستثناء السيّد الكاتب العام.

و يبقى السؤال لهنا , علاش الناس الكل تاكل بالمسبط و المتراك ؟؟؟ و علاش يمنع السيّد الكاتب العام ؟؟؟

انشالله يكون السبب هو الحصانة البرلمانية (على خاطر السيد عضو في مجلس النواب لعدة دورات) باش ما يخلّيش الباب محلول امام فرضيات اخرى... أنا نرجّحها شخصيا .

dimanche 4 janvier 2009

شرط العازب ...على حسني مبارك

فيديو لقصف منطقة رفح على الحدود المصرية الفلسطينية, و صور هروب حرس الحدود المصريين و بعثة طبية كانت تحاول تقديم المساعدة لأهالي المدينة يوم 1 جانفي 2009

"حسب اتفاقية السلام الممضاة بين مصر و اسرائيل في 1979 لا يمكن للطيران الحربي المصري التحليق فوق اكثر من 80% من اراضي سيناء , ممـا يحرمها من 4 من مطاراتها في سيناء , كما لا يمكنها الاحتفاظ بقوّات مدرّعة قرب الحدود الاسرائيلية ... بقية التفاصيل هنا

في حين انو في الجانب الاسرائيلي يمكن للقوات الاسرائيلية الاحتفاظ بقوتها العسكرية الكاملة على مدى 2.5 كيلومتر من الحدود المصرية...

هذا هو سلام الشجعان متاع السادات و حسني مبارك...أو شرط العازب على الهجّـــالة
ة