اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

lundi 9 juin 2008

القوادة الجماعية في سمفونية البلاغات المحلّية

الصفحة 3 من جريدة الضريح متاع اليوم (09/جوان/2008)

حسب البلاغات اللي خرجت نهارة الأحد قاللك اللي الجماعة خايفين من "تعمد المواطنين تصنيع زجاجات حارقة" , و اجمعو على انو اهالي الرديف هوما اللي غالطين و يلزمهم يعتذرو على اخلالهم بالأمن العام و تشويههم لسمعة البلاد, و لاستعمالهم الماطراك و الكريموجان و الكرتوش ضد قوات الأمن ... قالك يلزم " تظافر الجهود لكسب رهانات التنمية و دعم الاستقرار و الامن و السلم الاجتماعية" ( ههه ) و برشة لوح ( حسب الأصول و القواعد متاع مدرسة اللوح العتيقة) تنجمو تشوفوه في صورة المقالة المصاحبة...

و كي العادة, احزاب المعارضة متاعنا تُعبر و تبرز و ما تفوّتش الفرصة باش تدعّم رصيد الولاء و مخزون الطاعة لولي النعم ... من مادة "الطحين الغذائي " ... اللي الناس الكل تعرف انها مادة استراتيجية و حياتية في بلاد الكنتول و ضرورية في عملية التنمية و الانفتاح الديمقراطي ... الا انو كثرة استهلاك المادة هاذي و التحوّل من مرحلة الاستهلاك الى مرحلة الانتاج( من طرف الاحزاب المعارضة الموالية اللاشرقية و اللاغربية و اللا علاقة ) تسبب في تواجدها بكميات ضخمة في الأسواق , مما أثّر على جودة المنتوج و تسبب في أضرار كبيرة على صحة مدمني الحلاوة الطحينية

أما الجانب المشرق و الإيجابي في الحكاية هو انو على القليلة ارتاحو جماعة الحزب الاوحد ( اللي يعتبرو هواة في ميدان ضرب اللوغة مقارنة بمعارضيهم) من مشقة اصدار البلاغات و كيما تعرفو راحة الناس هاذي هو هدف من اهداف المخطط التنموي و اولوية من اولويات سياسة بلادنا ...
و اكاهو
باش نحرق

4 commentaires:

black dark a dit…

"7lowa" menek hadhi ya clando, akahawa 3ad, el7alawa hadhi elli ydhou9ha ma3ach ynajjem ybattalha.... wallahi chay ynatta9, 9allo a7zab!!!!

Anonyme a dit…

الجماعة نزلين على أهل الرديف بالكرطوش و الأقلام المسمومة و الكلام آش نعملو يا كلندو غدوة يردوها الرديف تابعة لتنظيم القاعدة بالمغرب الاسلامي هوما ما همش مسلّمين أمّا دوّيو نموت 1000 مرّة و ما نسلمولمش
وحلفت أنا نقص راسي لو ذلّ فوق الاعتاب
مشاغب من الرديف
romdhane

علي بابا a dit…

آش تنتظر من ها السنافر ركاب تاكسي كيما ما يسمى بحزب الوحدة الشعبية غير التطبيل والتزمير لأولياء نعمتهم. أما إذا كان فيهم راجل يقدر يدخل الرديف ويقول الكلام هذا
لعنة الله على اللي ما يحشمش

never done a dit…

bjeh rabbi mata7ra9ch!!
amma 3lech mouch fi boudourou l'article hedha, bech yonchot chwaya!!