اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

mercredi 3 juin 2009

حول الحملة الافتراضية المزعومة


مادام مازالنا في الهدرة متاع مصيبة البلوقوسفار حلبودة ، اللي كشف على مستواه الحقيقي بتدوينة فيها كل انواع الشتم و السبّ للمدونين. و حتى كي نصحو رفيق الدرب السيتوايان (اللي بالمناسبة يظهر كي هالة الركبي كان وقت الزازة و العرعور) باش يفسّخها فإنّو ما استجابش و اختار الحفاظ عليها شاهد على مستواه و مستوى مدونتو.

نحب نوضّح حاجة:
شنية حكاية الحملة على حلبودة ؟؟؟ شكون قال اللي فمة حملة ؟؟ شكون نظمها ؟؟
و الا على خاطر الكلاندستان كتب تدوينتين في نفس الموضوع ولات فمة حملة تدوينية و اسبوع تدويني ؟؟
التوضيح هذا لازم على خاطر حلبودة على ما يبدو لجأ للأسلوب اللي يتقنو وهو اسلوب البكاء و النواح و استجداء التعاطف و لعب دور الضحية . و للنّاس اللي جاو يعفّسوا هكاكة ماهمش فاهمين الحكاية نقوقللهم اللي مافماش حملة ضد حلبودة...على خاطرو ما يستحقّش الاشهار اللي تعملو و حملة كيما هاذي فمة اسباب ما أهم ّ تستحق تنظيمها.
و للناس اللي تحب الفرجة في العرك الافتراضي و فاهمين القصة اما عاملين رواحهم موش فاهمين (مانيش باش نذكرهم يعرفو رواحهم و فيهم شكون عندو مشاكل نفسية متاع عزلة اجتماعية ) نقــلّهم اللي موش في مصلحة اي كان نطيحو للمستويات هاذي . و الميساجات اللي جاتني على الفايسبوك مازالت في الحفظ و الامان و الكلام اللي فيها زادة مازال موجود دون زيادة و لا نقصان.
و الناس اللي عاملين "حملة مضادّة" و جايبين ارواحهم نقلّهم فكرتوش شوية قبل الاندفاعة هاذي ؟؟ حسبتوهاش شوية على الاقل ؟؟
لفائدة اشكون الحملة ؟؟ و ضد اشكون ؟
و تدوينة كيما اللي عملها (خليل) هي ابرز مثال ، توة يقول فيها اللي فمة
"حملة كاملة على مدون أعزل خاطر سمى روحو مسلم سابق، خاطر عندو آراء ضد الإسلام."
مانعرفش شنوة يقصد بالأعزل ، زعمة بقية المدوّنين عندهم قنابل و رشاشات يدوّنو بيها ؟؟ و يزيد يقلك على خاطر عندو آراء ضدّ الاسلام ، وين شافها هاذي ؟
يا خليل بربي تعمل مزية فهمني فيها هاذي منين جبتها و في اناهي تدوينة لقيتها ، و في أي مدوّنة ؟ على خاطر هذا يتسمى (كذب) و (مغالطة) و الكذب و المغالطة ماعندهم وين يوصّلو
و المدوّنة اللي عملت تعليق زادة تقول فيها اللي " هذى وقفة للحرية تتحسبلك ، يا ريت المدونين الكل يفهمو كيفك"
الحقيقة تعليق مضحك و يوضح انو اللعبة الافتراضية و الانغماس فيها يوصل لمستويات خطيرة ، توّة مافهمتش انا الوقفة هاذي كيفاش باش تتحسب ؟؟ شكون باش يحسبها ؟؟ لفائدة شكون و قدّام اشكون ؟ و الاهم ضدّ اشكون ؟؟
حسب المدونة (عربية) ها الوقفة التاريخية هاذي باش تدخل للتاريخ و يسجلها التاريخ اما ضدّ شكون ؟؟ ضدّ الكلاندستان ؟؟ ضدّ حرّية التعبير ؟؟؟
تعليق غير مفهوم نتمنى انو عربية تزيد توضّحوا شوية.

حاصيلو ... باش منطوّلش برشة ، انا متوقّع مالأوّل السيّد هذا باش يذرف دموع التماسيح و يرمي روحو شهيد حرّية التعبير .
و هاذية حاجة عادية و منستغربهاش منو
الا اني نأكّد على حقّي في حرّية التعبير و رفضي للقيود اللي حطّها عاشور و برشة مدوّنين ، و المضايقات اللي يسبب فيها لكل المدوّنين و عشرات التدوينات التفاعلية اللي كتبها لسبّ الرأي الآخر و نعته بعديد النعوت و الاوصاف القبيحة ، و اتهامه الجميع بالارهاب ، و اتهامه الجميع بالجهل و التخلّف، و السخرية من معتقدات الناس ، و اطلاقه المزاعم الكاذبة ضدّ كل المدوّنين اللي يخالفوه في الرأي، و السخرية و التهكّم من كل محاولات الحوار الجدّي. فكيفاش نجّمو نشوفو اشكال متاع حرية تعبير في جوّ مشحون كيما هذا ؟؟ و في وجود مضايقات من الشخص هذا ؟؟ تي حتّى الحاكم و الوكالة التاونسية للانترنات اذا لقاو رأي مخالف ما يعجبهمش يقصّوا الموقع جملة وحدة و بضربة وحدة من غير مضايقات و تهديدات و شتم كيما اللي يعمل فيه ها الحلبودة .

و في التدوينات الاخيرة أنا طالبت بحقي في حرية التعبير و مارست حقّي في حرّية التعبير ، و مايهمنيش في ردود الأفعال و لو انّي نعتذر من قرّاء المدوّنة اللي لقاو ارواحهم مجبرين على متابعة مسلسل لا علاقة لهم به على خاطر اغلبهم ما يعرفش المدوّن هذا و ماذابية يعرفوه و يكتشفوه على حقيقتو و يكفيه الإشهار المجاني متاع 3 أو 4 تدوينات.




10 commentaires:

Khalil a dit…

باهي سي الكلاندو,
ما فيها بأس كان نتناقشوا، توا انتي تعيط للراجل حلبودة وعامل تدوينتين تقولش عليك باش تجيب السيد من وذنو وباش تكشف أسرار خطيرة في نطاق المؤامرة على مستقبلكم. وتختم تدوينتك بكلمة باش تخصص كل أسبوع تدوينة "للكارثة هذا"... مش حملة هذه ؟
وكلمة مدون أعزل يعني متحامين فيه تشكيلة كاملة تقول شلة تسالوه مغرفة، هذه تنفع وهذه تضر.

كذب ومغالطة... توا ندخل في الميدان إلي تحبذه برشة حسب ما فهمت. هو سبان إلي يخالفك في الرأي. المهم نجاوبك، عاود أقر تدوينتك إلي سميتها قصة عاشور الناجي تو تفهم كل شيء... وإذا كان ما فهمتش انتي، أكيد تو الفاهم يفهم.
بالسلامة وانشالله معرفة طيبة.

faouzi a dit…

الاخ كلانديستونو السلام عليكم

اقول لك يا اخي دعك من هذا "المسلم السابق" كما يقول عن نفسه، ودعك من جماعته الذين تنادوا لنصرته عند أول فزع منه

يا اخي هؤلاء ارهاط يقاربون المرضى، اؤكد لك هذا الكلام، هؤلاء لاينفع معهم الحديث و لاالنقاش، انهم اقل من ان تنتبه لهم فضلا على ان تناقشهم

هؤلاء اناس مساكين، اقصد عاشور ومجوعته، هؤلاء يمكن ان يقع تناولهم كمواضيع للبحث كامثلة لما ينتجه الاقتلاع الفكري والالحاق بالغرب حينما يضاف للتصحر العقدي بتونس، ولكن لا يصح ابدا نقاشهم واضاعة الوقت معهم واعطائهم اهمية

اتعرف لماذا، لان هؤلاء لايملكون من امرهم شيئا، هؤلاء عبيد لاهوائهم ، وهم يعملون على تصوير انحرافاتهم على انها حرية فكر، يصورون تهجمهم على الاسلام على انه حرية فكر، يصورون انحرافاتهم وسقطاتهم من سكر وزنا وغيرها من الموبقات على انها حرية راي، يصورون حبهم للالحاق بالغرب واسرائيل على انه حرية راي

ماذا تريد ان تناقش معهم

خلاصة القول، ارى ان تكف على مجادلة هؤلاء الحمقى المساكين

وافضل حل في الوقت الحاضر هو السكوت والاعراض عنهم، في انتظار ان ياتي وقت ربما سيتلاشون فيه بتلقائية او ربما سيسمح الوقت ساعتها بالتخاص منهم مثلهم مثل بقايا الفضلات او الاغذية منقضية الصلوحبة

انا نفسي كنت قد ناقشتهم وتاكدت من وضاعتهم، ومن ساعتها لم اعد اعيرهم اهتماما

Clandestino a dit…

@khalil:
الكذب هو انو تختلق حاجات لا أساس لها من الصحة:

شكون قال اللي انا ندافع على الإسلام ؟؟ شكون قالك اللي التدوينات اللي تكتبت على عاشور بسبب اراؤو اللي ضدّ الإسلام؟؟
عاود اقرأ نصوص التدوينات و مبعد احكم

تحبّ دوّروها حكاية مسلمين و كفار ؟؟؟
لا يا سيدي غالط انا ما يهمنيش فيه مسلم موش مسلم و الا يعبد حتى زرزومية ، هذيكة
امورو

@fauzi:
موافقك 100%
فعلا حسيت انو من غير المجدي نقاش الجماعة هاذي لذلك استعملت معاهم سلاحهم وهو سلاح التدوين التفاعلي
و المحاصرة اللصيقة
خلي نشوفو وين باش يوصل ترا ؟

Hatim a dit…

Il ne s'agit plus de discuter ou débattre, c'est juste un pauvre qui se croit tout permis parce que qques pauvres sont tombés dans son panneau! Il est temps qu'il comprenne!!! Ce achour n'a pas de recul. tant pis pour lui.

Bej a dit…

أهلا سي كلاندو،
النقاش والحوار يكون مع عباد تحترملك شخصيتك و عقيدتك!
أنا عايش في بلاد أوروبية وعندي صحاب مسلمين ومسيحين وهندوس و إلخ ومنهم إلي لا دين ولا ملة، ولا عمرو حد فيهم مسني في عقيدتي ولا في شخصيتي أثناء الحوارات والنقاشات إلي دارت بيننا، مع العلم إلي فيهم برشة (ما عدا المسلمين) ما يأمنوش بمحمد ودين محمد (صلعس)!
خويا رهو الحوار ونقاش عندو مبادئ وأولهم الإحترام المتبادل ! يعني كيف نلقى انسان يعبد في بقرة، عمري لا نجي نسبلو البقرة متاعو ولا نقلو راهي لحمتها بنينة!!
يا خويا احنا جهلة في عين حلبودة، وتبركالله عليه هو عندو الحق واليقين!! الله يرحم والديك (بالرحمة إلي تعرفها إنت يا حلبودة) حطنا على جهلنا، رانا فرحانين بروحنا هكا ومقتنعين، وحالتنا هذي ما فيهاش دوى و مستعصية ! يعني من غير ما تحاول

Khalil Gdoura a dit…

Clando vous avez votre propre style et je l'apprécie, c'est dommage que vous vous occupiez des blogueurs avec qui vous n'allez jamais vous entendre (autour des sujet "islam", "islamophobie", et je m'en passe..).

Je comprends qu'on aurait pu vous provoquer, mais ça vous donne pas de raison de sombrer dans des commentaires du tic-au-tac qui vont de mal en pis.

Laissez votre croyance pour vous, tant que vous en êtes fier et comblé, c'est l'essentiel. N'oublions pas non plus que des blogs comme "ex-mouslem" ou "3ayech" sont crées pour défendre une certaine vision de la vie. Faut pas les juger non plus, surtout qu'il y a bien des Tunisiens (en dehors de la blogosphère)qui partagent leurs idées.

Vous, en revanche, avez un autre style tout à fait distingué , TOUT le monde peut l'apprécier.

D'ailleurs, à quand le prochain épisode des histoires du Sidi el Bey? ;-)Bonne continuation.

faouzi a dit…

سيد خليل غدورة الامر ليس كما تحاول تصويره

تأتي تحت ستار التلطف بكلاندو، ولكنك تعمل من طرف خفي للترويج لما يقوله هؤلاء السفهاء "المسلم السابق" ومن شايعه من خفاف العقل والدين، ثم تروج لكلام من أنه ليس من حق احد ان يناقشهم في افكارهم وان هناك من التونسيين من له نفس الاراء

يجب ان تعرف ان مايقوله هؤلاء هو اقرب للانحراف منه للفكر، وليس يلزم الناس ان تحترم المنحرفين وان زعموا انهم اصحاب فكر

ثم ان الالتزام بالاسلام لايجب ان يوضع بنفس المستوى مع الالحاد، ليس الأمران سواء، مثل هذا الكلام يمكن ان يقال في بلد غربي، و لكنه حتما لايجب ان يقال فضلا على أن يقبل في بلد مسلم

المسلم ليس كالملحد، والالحاد ليس كالاسلام، هذان أمران بعيدان كالثرى والثريا

اقصى مايجب ان يحلم به احدهم ممن غلبته شقوته وارتضى اتباع اهوائه تحت مزاعم الالحاد، هو كما قلت من قبل، ان ينغلق في قوقعته بين جدران منزله وان لا يتحدث عن انحرافاته التي يتصورها فكرا، ثم أن لا يتجرأ على اي من معتقدات الاسلام،و ان لايهاجم المسلمين في عقائدهم

اما والحال ليس كذلك، فان هؤلاء المنحرفين يجب ان يدفعوا للسكوت والخمود بأي وسيلة متاحة، لعلها الان حوارات ولعلها ان تكون غير ذلك في أحيان أخرى

ace of diamond a dit…

وينهم اصحاب الضمائر الحية الي هبوا لنصرة المنكوب الاعزل المسكين حلبودة ( بالحق هو مسكين)
وينهم شهر و لا شهرين التالي كيف المدونات الشقيقة والصديقة لحزب الديك قعدو "ينقدو" في مدونة نضال ضد الطابور
تي هو طارق كيف كتب ارتيكلوات على الاسلاموفوبيا قام البلوغسيفار وما قعدش و دخلت فيهم غولة وموجة شديدة متاع حكة معدية وولات مقالات طارق"الاكاديمية اكثر من اللازم"محل تندر
وظهرت تكتلات وولينا نسمعوا في لغة "وينوصاحبك ؟ شبيه ما جاوبش" و الا الاخر قالو "لن يمروا" ههههه
زعمة اما احق بتسمية حملة هاالزويز مقالات اولا الي كنت نحكي عليه ؟
اما ميسالش نعرف الي الناس هذوم فيسع ما ينساو "زعمة علامات الشيخوخة المبكرة؟ و"الا قلوبهم فيسع ما تصفا"و"الا لعب ذر؟"
وزيد اساليبهم متاع ضربني وبكي سبقني و شكي تذكرني برشة بسياسة اسرائيل ومن بعد يستغربوا ويقلولك من جبتها حكايت العمالة و الصهيونية ؟
الحاصل ناري عليك يا حلبودة طلعت ولد ناناطي و"نغار مايحملش الضرب" و بنات مدونة نضال ضد الطابور طلعوا اصح منك والا بعبارة اخرى نعرفك تحبها انت و صحابك
طلعوا "ارجل"منك...

esprit primal a dit…

moni kotlek clando qu'il va chercher ses amis et ya3mil chahid... imela kamel lilkoudem icha3b m3ak... AU fait le problème de ce personnage ce n'est pas ses positions vis-à vis de l'islam mais le fait qu' il stigmatise les autres qui ne pensent pas comme (bien des fois je ne comprend pas trop ce qu'il pense), exerçant un "terrorisme intellectuel" ... 7aldouba kif eddouda...mé touktilch ama daouer lakhouater

esprit primal a dit…

moni kotlek clando qu'il va chercher ses amis et ya3mil chahid... imela kamel lilkoudem icha3b m3ak... AU fait le problème de ce personnage ce n'est pas ses positions vis-à vis de l'islam mais le fait qu' il stigmatise les autres qui ne pensent pas comme (bien des fois je ne comprend pas trop ce qu'il pense), exerçant un "terrorisme intellectuel" ... 7aldouba kif eddouda...mé touktilch ama daouer lakhouater