اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

mardi 7 avril 2009

صدفة ...افسدت الميعاد

خزر للمنقالة ... مازالت ربع ساعة ...جبد الجريدة متاع الصباح عاود قراها ... شعل سيقارو ...خرّج التاليفون من جيبو و بدا يلعب ... لعبة ماسطة ...قام و بدا يمشي و يجي في الكولوار ...البيروات الكل فارغة ...الناس الكل خرجت...حتى العرف الكبير خرج من التسعة متاع الصباح (عندو اجتماع)

صار الوقت ...خرج يجري
موش في الاتجاه متاع العادة (وين مستانس يفطر) ...المرة هاذي تعدّى في الطويل , الثنية الاخرى , الثنية اللي تتعدى منها كل يوم ...البنيّة

بنية تخدم في المعمل ,كل يوم تعرضو في الوقت هذاكة, في النهج هذاكة بيدو ...عندو مدة مالقاش الفرصة باش يتعرّف عليها , و اليوم بالذات قرر باش يستناها ... يكلـّمها...و موش لازم يفطر ...انشالله يموت بالشرّ.

هو متّكي على البوتو متاع الضو و يشوف واحد يشاورلو من بعيد ...تلفت وراه في بالو موش هو المعني, الا انو السيّد (الغريب) أكـّدلو بصبعو انو هو المعني ...
يا والله حال...اشكونو هذا ؟؟؟

ايا قصّ الكياس و مشالو

-اهلا عسلامة
-معرفتنيش ؟؟؟
-سامحني ما عقلتكش
- انا فلان ولد حومتك
- اااه اهلا , وينك ؟؟ لاباس ؟
- الحمد لله
-ياخي موش في السويد ؟؟ في بالي بيك معرس لغادي
-ماعادش في السويد ...
-روّحت ؟؟ و و قتاش راجع انشالله ؟؟
- ماعادش راجع ...هاني بـْركت في تونس توة , طلقتني المرا و بعثتني
- يا والله حال ... اش تعمل توة , و اشبيه فمّك ؟ لاباس ماهو ؟
- (متقلّق) لا حتشي, المرة لخرى طاحتلي سنّة...في عركة

(تظهر البنيّة متاع المعمل من بعيد)

- يا لطيف ...
- و انتي اش تعمل توة ؟؟
-نخدم...ديجا توة كي خرجت و ماشي نفطر ماعادش عليا بكري
-تذكرتو فلان ؟؟ ماهو طلع طـ**** موش راجل
- اشبيه زادة ؟؟؟
- قتلو شوفلي كنترا بحذاه في ايطاليا خذا من عندي الفلوس و ماعادش شفت منظرو

(بنت المعمل تقرب )

- يا لطيف...
-هاني نعسّ عليه...انشالله يهبط لتونس...نـ****** ***** **** ***** في **** ****** بـ****** ***** لـ****** و نسيه في حليب امو
- لا عاد ...وسع بالك شوية , هذاكة تلقاه مازال يفركسلك في خدمة , منتصوروش ماركة قلبة ...
- حصيلو ريت خوك فاش يعاني

(البنيّة توصل بحذاهم , ترمي بخزرة للسيّد الموظف , و تتعدى)

-موش كان انتي تعاني ...
-ماعادش خير في الدنيا...الناس فسدت و حتى الاصحاب و اولاد الحومة ماعادش فيهم الرجلة كي بكري
- نعمبو الوقت الكلب و الزهر المشوم الاحرف ( في قلبو:اللي طيحني بيك ليوم) ...الدنيا اتخذت
-اسمعني ولد حومتي ...نلقاش عندك شوية صرف...ماو تعرف ....
-(يدخل يدو لجيبو يجبد ألفين يمدهملو فوق من قلبو)صلي على النبي ... اخيان راهو ... باهيشي...



يتلفّت ... يلقى الطفلة ضاعت (في الزحام) و اختفت وراء الافق ...يخزر للمنقالة ...

زعمة مازال عندو الوقت باش يمشي يفطر ؟؟؟

8 commentaires:

abounadhem a dit…

عجبتني متاع البندير والقفة اما زيدها قفة الحبس حتى تستثنى من التقفيف

kmr a dit…

مزالت عندو شاهية باش يمشي يفطر؟؟؟ هههههه

MeTaLLisTiC a dit…

حق باكو ليجار مشى حرام، و ضاع الوقت متاع الفطور و زيد ما حكاش مع الطفلة....
ملاّ احرف !

24Faubourg a dit…

ouhh 3la edommar lazra9!

Clandestino a dit…

abu nadhem:
ca yé, 9offet el 7abs vien d'etre exemptée du premier "Lé"

kmr:
la3sab we charr min fou9 ??!! au moins yerba7 7aja^^
metal& 24 faubourg:
ritou ech y3aniou les amoureux chez nous ?? ou fi 2009 ??

explosiv a dit…

de toute façon, même s'il n'avait pas rencontré weld 7oumtou, il n'aurait pas abordé la fille... à moins que c'est elle qui lui aurait parlé en premier :p

Clandestino a dit…

explosiv:
très intéressant ton point de vue

Clandestino a dit…

il n'avait certainement pas le courage