جيمي .. لعنة فراعنة القرن 21

مبروك لتونس و لشباب تونس (اينما كانوا) بالانتصار التاريخي على منتخب فراعنة القرن 21 .. الفراعنة الفالصو أي فراعنة الحصار و الاسوار التحت ارضية موش فراعنة الاهرامات و المسلات و المعابد العملاقة

و بالمناسبة نهدي الانتصار هذاية للسيّد (في التصويرة لفوق) المادد يدّو للحنّـة و يمنّي في روحو باش يورث عرش المحروسة

نفس هذا الوجه الاحرف حضر مباراة الخرطوم الفاصلة مع منتخب الجزائر و كانت النتيجة انسحاب مصر من تصفيات كأس العالم. و اليوم تعاودت نفس اللعنة و انهزمت مصر هزيمة مذلة على أرضها .. (على ايدي لولاد يعطيهم الصحة)

انا ديما نتساءل ، زعمة شعب المحروسة يقبل يسلـّم مستقبله و مصيره لهذا الفرعون المشؤوم ،اللي اثبت فشله حتى في جلب الحظ لمنتخبات الكورة في المباريات (المصيرية) فما بالك بمباركة اراضي النيل للثلاثين سنة الجاية

صدفة ...افسدت الميعاد

خزر للمنقالة ... مازالت ربع ساعة ...جبد الجريدة متاع الصباح عاود قراها ... شعل سيقارو ...خرّج التاليفون من جيبو و بدا يلعب ... لعبة ماسطة ...قام و بدا يمشي و يجي في الكولوار ...البيروات الكل فارغة ...الناس الكل خرجت...حتى العرف الكبير خرج من التسعة متاع الصباح (عندو اجتماع)

صار الوقت ...خرج يجري
موش في الاتجاه متاع العادة (وين مستانس يفطر) ...المرة هاذي تعدّى في الطويل , الثنية الاخرى , الثنية اللي تتعدى منها كل يوم ...البنيّة

بنية تخدم في المعمل ,كل يوم تعرضو في الوقت هذاكة, في النهج هذاكة بيدو ...عندو مدة مالقاش الفرصة باش يتعرّف عليها , و اليوم بالذات قرر باش يستناها ... يكلـّمها...و موش لازم يفطر ...انشالله يموت بالشرّ.

هو متّكي على البوتو متاع الضو و يشوف واحد يشاورلو من بعيد ...تلفت وراه في بالو موش هو المعني, الا انو السيّد (الغريب) أكـّدلو بصبعو انو هو المعني ...
يا والله حال...اشكونو هذا ؟؟؟

ايا قصّ الكياس و مشالو

-اهلا عسلامة
-معرفتنيش ؟؟؟
-سامحني ما عقلتكش
- انا فلان ولد حومتك
- اااه اهلا , وينك ؟؟ لاباس ؟
- الحمد لله
-ياخي موش في السويد ؟؟ في بالي بيك معرس لغادي
-ماعادش في السويد ...
-روّحت ؟؟ و و قتاش راجع انشالله ؟؟
- ماعادش راجع ...هاني بـْركت في تونس توة , طلقتني المرا و بعثتني
- يا والله حال ... اش تعمل توة , و اشبيه فمّك ؟ لاباس ماهو ؟
- (متقلّق) لا حتشي, المرة لخرى طاحتلي سنّة...في عركة

(تظهر البنيّة متاع المعمل من بعيد)

- يا لطيف ...
- و انتي اش تعمل توة ؟؟
-نخدم...ديجا توة كي خرجت و ماشي نفطر ماعادش عليا بكري
-تذكرتو فلان ؟؟ ماهو طلع طـ**** موش راجل
- اشبيه زادة ؟؟؟
- قتلو شوفلي كنترا بحذاه في ايطاليا خذا من عندي الفلوس و ماعادش شفت منظرو

(بنت المعمل تقرب )

- يا لطيف...
-هاني نعسّ عليه...انشالله يهبط لتونس...نـ****** ***** **** ***** في **** ****** بـ****** ***** لـ****** و نسيه في حليب امو
- لا عاد ...وسع بالك شوية , هذاكة تلقاه مازال يفركسلك في خدمة , منتصوروش ماركة قلبة ...
- حصيلو ريت خوك فاش يعاني

(البنيّة توصل بحذاهم , ترمي بخزرة للسيّد الموظف , و تتعدى)

-موش كان انتي تعاني ...
-ماعادش خير في الدنيا...الناس فسدت و حتى الاصحاب و اولاد الحومة ماعادش فيهم الرجلة كي بكري
- نعمبو الوقت الكلب و الزهر المشوم الاحرف ( في قلبو:اللي طيحني بيك ليوم) ...الدنيا اتخذت
-اسمعني ولد حومتي ...نلقاش عندك شوية صرف...ماو تعرف ....
-(يدخل يدو لجيبو يجبد ألفين يمدهملو فوق من قلبو)صلي على النبي ... اخيان راهو ... باهيشي...



يتلفّت ... يلقى الطفلة ضاعت (في الزحام) و اختفت وراء الافق ...يخزر للمنقالة ...

زعمة مازال عندو الوقت باش يمشي يفطر ؟؟؟

الكلاندستان و الأزمة المالية ... الجزء الأوّل

الساعة تشير الى منتصف الليل و النصف , التلفزة تبثّ منوّعة من النوعية المتوسّطة المسببة لامراض القلب و الشرايين و ضغط الدم و آلام المفاصل , الكلاندستان يغطّ في النوم العميق (كعادته بعد وجبة الكسكسي بالدجاج الحكومي و النصف لتر من الكوكا كولا) ...

فجأة يرنّ الجوّال ...

الكلاندستان يتثاءب و يتحسس مكان الهاتف
- الووو ... عسلامة
(صوت استغاثة باللهجة الخليجية ) - الحقني يا ابن الحلال ... الحقني الله يرضى عليك ... انا في ورطة ...
- تي اشبيك يا شسمك ...اش تحب ؟؟؟
(الخليجي) - و الله رحت في داهية يا اخي الكلاندو , و ما فيش حد يقدر يساعدني غيرك...
(الكلاندستان يظن الامر مجرّد دعابة "ماسطة" من اصدقاء المقهى ممن يقومون الليل و ينامون لما بعد الضحى )
- يا رسول الله... علاش هكّة ... كان انتي ماعندك ما تصنع انا نخدم غدوة ...
(الاستغاثة تتحول الى ما يشبه النواح)- و الله ما قعدلي المليم و الله مشيت ... يا ناري على روحي
(الكلاندستان يستفيق تماما و يدرك انه نسي جهاز التلفزة يشتغل , فيسبّ المنوعة ومنشط المنوّعة و مخرج المنوّعة و منتجها و المشرف على الانتاج و يلعن اشجارهم الأسرية من الجد الأوّل الى اليوم ثم يطفئ الجهاز )
- اعمل عقلك يا راجل و يزّي مالبكاء ...
- اسمع يا أخي ,انا و الله مستعد من الآن اني نركب معاك البحر و نروح لإيطاليا و الا لليونان و الا جزر الكناري ...
- هههه تحب تحرق ؟ تحكي بجدّك تحب تحرق ... سعودي و تحب تحرق ؟؟؟
- ماني سعودي انا اماراتي
- اماراتي ؟ نعرفك انا قبل ؟؟ شكونك الساعة ؟؟ شكون معاي ؟
-انا راشد... راشد آل مكتوم ...
- شكون راشد ؟؟؟ الشيخ راشد ؟؟ آل مكتوم ؟ متاع دبي ؟؟
- إيه و الله انا هو راشد, راشد المهبب , راشد المتاخذ راشد المفلس اللي ما قعدلو لا الكثير و لا القليل
- انتي فالس ؟؟ ههههه مالا اش نقول على روحي ؟؟؟ ...
- كل شيء راح كل شي طار في الهواء الحسابات الارصدة الودائع المدّخرات ... كل شيء ... ما بقالي اي شيء
- الساعة البرميل متاع البترول توة بميات دولار و الريح مواتية و الطقس جميل و الدّنيا زاهية ... اش تحبّوا زادة ؟؟
( يتذكّر الكلاندستان انه سمع البعض يتحدّث عن ازمة اقتصادية و يتذكّر ايضا انه شاهد سي بكّار محافظ البنك المركزي في النشرة الرئيسية و قد ظنّ وقتها انهم سيطرحون قطعة نقدية جديدة من فئة الـ10 أو الـ20 دينار التي "طاحت من عينين العباد" و سقطت بالضربة القاضية في الاسواق و السيبارات و السيبار مارشي و في نصبات الخضارين )
- ااه تذكرت يا شيخ ... ياخي انتوما زادة عندكم ازمة ؟؟ ما تقلّيش انتوما زادة وصلكم الطّش ؟؟
- ايش ؟؟ طش ؟؟؟ ايه لحقنا الطش و الرش و ضاع مال البترول و ضاع رصيد الاجيال و راح رصيد العيال و ضاعت سنداتنا و ماعادت اسهمنا تسوى فلس و قروضنا اللي اعطيناها للشعب الامريكي راحت كيف ما راح الشيخ الزايد و ماعادت ممكن ترجعلنا...
(الكلاندستان بلهجة الشماتة) - ههه اعمل ربي في بالك يا شيخ, انتوما تبعتو اماريكيا و راهنتو على بوش و بوه و عرشهم في التكساس ... نتصوّر ربي ما يخليهاش بيكم ... الراجل قالك مجاهد في سبيل الله و يجيه الوحي ... تبّعوه تربحوا في جرّتو الأجر و الثواب ....
- شو يا ولد ؟؟؟ يعني تسخر مني انا في عمر ابوك ...
- و الله لا يا شيخ , فاش قام نتبولد عليك ... نحكي معاك بكامل الجدّية راهو ... ثمّ انو شوف, انتي يا ذنوبي كان تنجّم السفر في البحر و الفصعة في اللمبادوزة و الخدمة في سواني الطماطم في سيسيليا , فـ آش قوّلك ؟؟ تجي لتونس و اتوة ندبرلك 5 و الا 6 نعجات و زوز و الا 3 بقرات باهين , تسرح بيهم في الفحص و الا في تاكلسة و الا في جبل عرباطة في قفصة ... فينالمون انتي اصلك عربي من عرب البادية و اكيد عندك خبرة في دومان الاغنام و الماشية ... عمّل على ربّي و ما تخافش عام السنة انشالله عام صابة , و انشالله ما يجي العام الجاي كان تولي لاباس عليك خيرلك من البورصات و الحسابات و القروضات و العملة و اسعار الفائدة ... خلّي البلاء لأهل البلاء و فكك منهم ...
- بارك الله في تونس و اهل تونس و الله ماكنت عارف شو أسوّي من غيرك أخي الكلاندو...
- ايا خلّيني نرقد توة ... تصبح على خير يا شيخ

a suivre*********