اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

mardi 21 août 2007

J - 7 التلفزة

في الفترة الممتدة بين أواخر السبعينات و اواسط الثمانينات كانت الدنيا صعيبة, لا سيارات شعبية لا حواسيب عائلية لا قروض شخصية لا اس ام اس لا انترنات لا دانات لا حت شيء . فم شكون يرى اللي الدنيا كانت اسهل من توة , و فمّ شكون يقول توّة خير ... لهنا الحكم صعيب على خاطر يلزم دراسة مفصلة لتطور مستوى دخل المواطن التونسي بالقيم النسبية و الحقيقية و نحسبو معاه نسب التداين و معدلات التضخّم و تطور مستويات الاجور و الاجر الادنى المضمون مع فوارق الاحصائيات التونسية اللي دائما ما تكون بعيدة جدا عن الواقع .

نرجع لحكاية اول الثمانينات , في الوقت هذاكة بو الكلاندستان تخلّص من "الكرتاج " (النوار اي بلان) القديمة و شرى تلفزة تومسون بالكولور , العزّ , اللوكس , عفسة قوية برشة , خير من تلافز البلازما متاع توة : صندوق بني كبير و رزين , إيكران طالع على برة , باب صغير على جنب (يتسكّر بالمفتاح) , روشارش مانيال ...
في وقتنا توة العباد تبدل في التلافز و اللي شان ستيريو و البورتابلوات تقولشي واحد يبدل في السورية و الا مريول الخلعة اما وقتها الشهار مسكين و في غياب التسهيلات في الدفع و البروموسيونات و الصولد كان ما يحلمش باش يعمل كرهبة و الا يبدل الموبيليا و الاليكترو ميناجي.
بحيث اللي يعمل تلفزة بالكولور في تلك الظروف العصيبة يعتبر جاب الصيد من وذنو و الا فتح مكة مرة اخرى.

ايا جات التلفزة , تصدّرت وسط الدار كيف العروسة (وقتها التلفزة و التلفون الفيكس كانو مصدر فخر و اعتزاز )
الانتان القديم مشى يشيّت و جاء الأنتان الجديد و معاه واحد ظريف باش يجبد الـ " يو هاش اف" متاع الراي اونو ...

دوّر الانتان , ركّح الانتان , لوّج على تونس , لوّج على الراي اونو , شد هكاكة اتو نشوف , باهي هكاكة ؟ لا زيد شوية , اااه خلي هكاكة خلي هكاكة ماعادش تحرّك ...
و العباد مستنفرة اللي في السطح و اللي في الدار الداخل و واحد يقول لواحد باش يوصل الميساج ... عشوية كاملة و الحومة غاطسة في المرمّة متاع التلفزة.

ايا خدمت التلفزة و يا خيبة المسعى , اه نسيت باش نقلكم اللي التلفزة وقتها تحل الـ5 متاع العشية و تقص في نص الليل, الكلاندستان اكتشف انها التلفزة الملونة ما تفرقش برشة على التلفزة القديمة على خاطر تونس (مازالت ما ولاتش سبعة) تعدي اكثر من شطر البرامج بالابيض و الاكحل , امي تراكي ناس ملاح , الحاج كلوف , توجيهات السيد الرئيس, "كليبات " لسيد على الرياحي و احمد حمزة و عز الدين إيدير و ساعة ساعة يحطّو تصويرة فيكس متاع واحة في جربة او توزر قال شنوة "انقطاع خارج عن نطاقنا" و ما فماش لا مسابقات لا اشهارات لا موزع صوتي ...

اما زادة فمّ حاجات مهمة كيما المسلسل المصري متاع السهرية (الارض الطيبة ليلة القبض على فاطمة...), المسلسل الامريكي متاع عقاب الليل (دالاس ديناستي ) , الفيلم الوستارن متاع اخر الجمعة , و الصّور المتحرّكة...

ساسوكي , قريندايزر, الرجل الحديدي , الشيخ كهفان دائما الى الامام , النقار الزهواني و قرينط الشلواش و فار بوتميرة و يقظان الفضاء و افتح يا سمسم و الضفدع كامل و حسون الملعون و بال و سيباستيان و جونقر البطل الجبّار و القصص العالمية و خرافات عم رشيد قارة و برنامج اخر نسيت اسمو متاع لطفي البحري و امينة الصرارفي و حصة البراعة اليدوية متاع عبد الرحيم اليانقي

في الوقت هذاكة و في غياب سبايس تون و تيينز و ديزناي كانت الفسحة الوحيدة للفروخ هي السويعة من الـ5 الى الـ6 متاع العشية و كانت وقت اللي تجي المذيعة و تقول "و ننتقل الان الى فقرة الاصدقاء الصغار ..." يبدى الواحد ينقّز من الفرحة و ناقص كان يقوم يشطح و ماعادش يتحرك من بلاصتو لوكان تقوم القيامة ,

لهنا تذكرت حكاية , الكلاندستان و اخواتو و اولاد عمتو قاعدين يتفرّجو جميع في الرجل الحديدي , و الحلقة هذيكة كيف العادة , حلقة مشوّقة و قويّة , و الفروخ مركزين كلمة لا كان النفس يدخل و يخرج بحيث وقت اللي وفات الحلقة قعدو شادين بلايصهم وماهمش مصدقين اللي البرنامج فعلا وفى و يلزم يستناو غدوة باش يعاودو يتفرجو في الرجل الحديدي ...
تكلم ولد عمة الكلاندستان قال اللي في دارهم الرجل الحديدي مازال ما وفاش و لوكان يزربو ارواحهم توة يخلطو عليه...
و كان الامر كذلك , دار الكلاندستان و دار عمتو في نفس الحومة و يبعدو على بعضهم زوز انهجة ,
خرجو الفروخ للكياس و شدوها جري , كورس صحيح , للي وصلو للدار و حلوّ التلفزة .. يلقاو الرجل الحديدي وفا عندهم زادة.
فاكتشف الكلاندستان يومها انو البث يتم بصفة متزامنة عند الناس الكل .

و

25 commentaires:

Anonyme a dit…

باهية حكايتك كان تزيد فيها أكثر عربية فصحى تكون أحسن

kmaira a dit…

w kila kritha hadhi fi commentaire kdim:)))
ama barra barka leyem kif errih fil barrima hili hili lili lil

FarFar a dit…

كلندو بوست رائع ، أول مرة راهو نقول لبوست رائع ، حتي لبوستواتي مقلتش الكلمة هذي :ب
تعرف تقول تحكي في ذكرياتي مع التلفزة و الصور المتحركة..يا حسرة علي تلفزة
كرتاج ، كانت عندنا وحدة في دار مماتي لازم كل درجين نعطيوها ضربتين علي جنب باش ترجع التصويرة..
كل شيء كيما قلت انت في المقالة.. أما نتفكر شرينا تلفزة طومسون بالكلورفي أول الثمانينات و بالتقسيط.. ثمة تقسيط قبل، لكن موش كيما توة
و زادة يظهرلي افتح يا سمسم و نقار الزهواني بعد الستة متاع لعشية ، خاطر أنا نكمل قرايتي مع الستة و دوب ما نوصل للدار نحل التلفزة

كلندو ياخي باش تحرق في اليوم 'ج'؟

Bouhaliya a dit…

Kenet essouwar el mot7arka tji ba3d el9or2an el karim..
ena tal9ani 9oddem el talfza nestanna.. howa y9oul 'sada9a allahou al 3adhim' wena nejri na3mal annonce feddar, ensi7 wen3aya6 'sada9allahou al 3adhim!! sada9a allahou al3adhim' bech enballagh b9iyet a5wati w awled 3moumti elli jew asdi9a2 essighar..
:D

Tarek a dit…

كانت عنا تلفزة تيليفنكن بالفلسة ونقعد أنا ماشي جاي نبدل في الشانات للكبار
grrr...

والتليفون زادا كان بعجلة النوامر. ما تخلط اتدور نومرو كان ما وجهك يولي في قفاك
..
أما كانت الحياة أبسط والناس مستكفين برواحهم
..
توا قريب ياكلو بعضهم ماكلة

FarFar a dit…

بوهالية
لووووووووول

Téméraire V5.0 a dit…

MDR, on a le même historique ::)).
Il ne faut pas oublier surtout les Dossiers de l'Ecran, tous les mardis soirs avec Armand Jammot dont les films m'ont vraiment marqués.

Clandestino a dit…

@anonyme:
ياخي قالولك عليا سيباويه و الا الخليل بن أحمد
والا العربية الفصحى شربة و الا قازوز باش نزيد منها شوية
@kmaira:
:)))
لا يا بنتي
البوست هذاية اينيدي
و انا من عادتي ما نكررش الحكايات
@farfar:
يعطيك الصحة هذاية لقب باش نعلقو في المدونة
و حكاية السامية راهي تطيب وسع بالك شوية و برة
@bouhalia:
صحيح الواحد كان ديما يفرح كيف يقول المقرئ صدق الله العظيم
حاصيلو كلو داخل في العلمانية
@temeraire :
انا وقتها صغير ما عنديش الحق باش نسهر بعد الثمانية متاع الليل
باش الصباح نقوم بكري نمشي للمدرسة
البرنامج اللي تحكي عليه ما نعرفوش

FarFar a dit…

كلندو ، هاني نستني المليح يبطي
أنا محبيتش ننبزك ملول، أما صحة الراس موش باهية :د
كلام قميرة صحيح في حكاية الرجل الحديدي حكيتها قبل
أما مسامحينك خاطر في الصيف حالة عادية نعاودو نسخنو البوستوات
وقتاش ترجع تكتبنا حاجة الجديدة
:p

Elyes a dit…

ana 9bal ma tjina il telefza "couleur" kont nakhla9 fil alouan min rassi... :-p

bourjoulia akhta "asdi9a2i essighar" il "itètè" kenit kobbi mouch normal!

Ana kont maghroum bil Rai Uno! Big, Fantastico, Domenica In, Novantesimo Minuto (ayyamettes Platini ou Maradona). Kanou famma zéda il aflem fil essif m3a essa3tin: Bud Spencer, Hercule, Toto etc...

Clandestino a dit…

@farfar & kmaira:
ايا ما تفضحوناش عاد
و برة راهو ديتاي صغير تعاود هذا ياكد انو القصة صحيحة و ماهياش من وحي الخيال

FarFar a dit…

بون كلندو المعترف بذنبه كما لاذنب له
أنا كي تجي تشوف منيش متأكد الي
قريتها قبل حكاية الرجل الحذيدي
أهوك نسلكلك فيها :د

kmaira a dit…

machi haja cland, taw ndhom fommi w narja3 nched blogui

Massir a dit…

Wil filim el masri mta3 nhar irba3a!!!

Sonya a dit…

يبدى الواحد ينقّز من الفرحة و ناقص كان يقوم يشطح و ماعادش يتحرك من بلاصتو لوكان تقوم القيامة"

de nos jours tt est accessible tt est disponible ... sauf cette joie !!!

j'adore te lire

Clandestino a dit…

@massir:
:)))marhbé bik
el aflem kanou mamnou3ine 3leya
@sonya:
aya 3la slemtek
t'es tjrs la bienvenu

mart chi5 kahfen a dit…

nyahahahahahaha!

nostra a dit…

je me rappl mamti 9a3din netfarjou ala tv é 3ammi kén maghroum b ommi traki. ki jét ommi traki 9altina sakrou tv 7atta yji 3akom é yetfarj m3akom ! vs voyez l'intelligence est héréditaire fil familya looool

Clandestino a dit…

مرت الشيخ كهفان:
ياخي وقتاش عرستو ...؟
وقت اللي تفرّجت فيه الشيخ كهفان كان عويزب و مادد ايديه للحنّة

nostra:
looooooooool
:)))))
أهو طلعت كي خوك
الذكاء وارثو اب عن جد

Azwaw soumendil awragh أزواو سومنديل آوراغ a dit…

ثنية حلوة تجيب فيها يا كلاندو تحل غقد اللسان و الشبيبة يرجعو في فلاش ياب مزيان و يوليو صغار ببراءة هاك الوقت. برشة حميمية و حنة و تلقائية يعطيك الصحة و زيد بربش في المخبل في كبة.

kmaira a dit…

chkounou saha kih?

gouverneur de Normalland a dit…

ya3tik essa77a ya clando ..c'est etrange combien les souvenirs d'enfance se ressemble ... moi je me suis retrouvé dans le post du martire du pain et celui de la télé ..en dirait que c moi qui parle !
c fort en nostalgie ..rajja3tni el 20 ...heu ..20 jom3a el tali (bech ma y9oulouch el gouverneur chibani)

Clandestino a dit…

@gouverneur:
mezelet el barka ya rajel :))))

kmaira a dit…

HAYA J-5

ZiedAriana a dit…

Nitthaker fi novembre 87. kont mitsammer 9oddem il R.T.T (A.T.T faute de clavier arabe) nistanna fil koomik. Ya3mlou hakka.. ee7ottou ZABA fi blasit il koomik. 9al echnouwa !! 5itab ila eccha3b :" rahou Bourguiba ma3adich". Min nharitha bghodht il nidham.

Nitthakker en plus ayamat essif il balass ewalli kif il rotisserie et a7na maksabna ventilateur 5adhra, tboss 3leha thibbena, tou9if.
Ana et o5ti (n7issou fi rwe7na wallina barbecue) fi tombik il 9ayla nitfarjou fi aflam antica 3al Rai uno. Sout il rabbi la2. 3ala 5ater il walid et il walda m9ayleen fil bett lo5ra. manithakkirsh 9addech min marra la7mi zre9 min ettharb 3ala 5ater 3allit fil volume et 9awemthom. walla il walid fi a5er essif sakkir il boita mta3 il volume bil miftah.

Fi darkoum kanou ysakrou 3ajlit il talifoun bil tel el kouba ? willa hadha kan juste i5tisas il walid mta3i?

Merci ya Clandestino 3la in3ach il thikrayat.