اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

mardi 8 février 2011

تنحّيلي شرعيتي انّحيلك شرعيتك




روضة السايبي: في ابعاد الجلسة الاخيرة لبرلمان الدّمى المتحرّكة
ما لقيتش حتى عنوان آخر للجلسة التاريخية لمجلس الأمّة بتاريخ 7 فيفيري 2011، الا أني نسميها بإسم الشخصية الأبرز و اللي برزت بصراحتها الكبيرة و الرجولية اللي هبطت عليها فجأة بعد ما كانت هي و أسرتها يمثلوا نسخة مخبرية مصغّرة عن عائلة بن علي و زوجته الطرابلسية . تبّعوا مليح:
روضة السايبي سيّداتي سادتي هي حرم السيّد منذر ثابت. وهي كذلك نائبة في مسرح الدّمي المتحرّكة ( اللي كان بن علي يحبّ يسمّيه برلمان ) عن الحزب الاجتماعي التحرري. علما و أنّ السيّد منذر ثابت هو نائب في نفس البرلمان المذكور كممثل عن الحزب الاجتماعي التحرري ، و هو في نفس الوقت رئيس الحزب الاجتماعي التحرّري. يعني أنّ الأسرة التحرّرية المحترمة كانت تتمتّع بمنحة شهرية قدرها 5 آلاف دينار من فلوس دافع الضرائب التونسي زيادة على الامتيازات العينية الأخرى و الاستدعاءات الخصوصية لقصر قرطاج لسي المنذر من طرف بن علي ، و الحضور الدّائم في نشرات الاخبار.
من ناحية أخرى ، السيّد منذر ثابت هو الوحيد بين قادة الأحزاب الطفيلية اللي كان يحفظ عن ظهر قلب دوره في مسرحية الدّمى المتحرّكة متاع بن علي و كان الآداء متاعو فوق كل شبهة بل أنّو في كثير من الأحيان يخرج عن النّص و يرتجل. من اهمّ ابداعاته في هذا المجال هو تقدّمه بمشروع تنقيح جديد للدّستور يمكّن رئيس الجمهورية من سقف آخر للعمر الاقصى للترشّح. علما و أنو يعرف بينو و بين روحو انّو بن علي وفات الصلوحية متاعو عندها مدّة، الا انّو ككل تاجر غشاش يتعمّد بيع الياغورت الفاسد على انّه صالح، واصل المناشدة لآخر يوم من ايام بن علي.
يقول القائل شكونهم افراد العائلة التحررية و علاش افامهم مسكّرة طوال المدّة الفارطة ، و علاش هبط عليهم الوحي فجأة. للتذكير السيّدة روضة هي نائبة عن ولاية سيدي بوزيد، الولاية اللي شهدت انطلاق الثورة و كانت الاوضاع فيها محتقنة منذ سنوات ، علاش السيّدة الفاضلة ما تكلمتش على جهتها ؟ علاش السيّدة الفاضلة ما ورّاتش فصاحة اللسان اللي عندها (و اللي بالمناسبة تذكّر بحارزة الحمام ايام زمان) ؟ وين كانت طوال شهر ديسمبر وقت اللي المظاهرات كانت يومية في سيدي بوزيد و كان الاهالي يتحمّلو لوحدهم ضغط القوة البوليسية متاع بن علي تحت التعتيم الاعلامي المعهود في مثل هذه المناسبات.
الاسئلة هاذي و غيرها موش صعيب برشة الاجابة عليهم، لانو في شهر ديسمبر الامور لاباس و النظام واقف على ساقيه و الأمن شادّ روحو و التجمّع لاباس و المنحة موجودة و ربي يخليلنا بن علي.
مبعد وقت اللي هرب بن علي ، اتضح انو سي المنذر ثابت في وضعية تسلل، لأنّ اعضاء الحزب متاعو حبّو يتبرّؤو منّو و ينظفوا ملابسهم الداخلية بمسحها في رئيس الحزب، و رحم الله شهداء الثورة و ديما يمشي.
حتى في المرحلة هاذي، السيّدة روضة ما كانتش عاطية اهمية للموضوع. يكفي انّها متمتّعة بالمنحة البرلمانية . و بقلة للباقي.
لكن البارح السيّد رئيس المجلس نطق الكلمة السحرية اللي فيّقت جماعة التحرّري ، و خلاتهم ينطقوا كيما البرابول مبعد الباتش..
رئيس المجلس قال اللي المجلس باش يتحلّ ... مما يعني .. المنحة البرلمانية .. الامتيازات .. الحصانة .. الحزب .. لكلو يمشي في خبر كان..
خمسة ملاين في الشهر تمشي هكاكة ؟؟ مهبول اللي يعتقد انّ جماعة التحرّري سوف يسكتون .. كلا و الف كلا ..
يلزم نطلعو لفوق هههههههه كيما جماعة لي مونتانيار متاع الثورة الفرنسية هههههههه ، و طلعت السيّدة روضة في المقاعد العليا ، و عملت عركة و صياح و تقطيع شعر ...
ملا برلمان و ملا احزاب و ملا مواقف يحطو في ارواحهم فيها ..
حاصيلو ناس بكري قالو اللي اذا كان الكلام فضة فالسكوت ذهب ، و الجماعة عملو استعراض بهامة من الطراز الرفيع.. استعراض قلابس من غير مؤطر.. من غير نصّ.. من غير مخرج
انا تمنيت لوكان قدمو استقالة جماعية و كفى الله المؤمنين القتال .. على الاقل تبقى الصورة المبهمة و الضبابية متاعهم كمعارضين وهميين، قفافة وقت السلم و قوّادة زمن الثورة...خارجين من الحكومة وقت بن علي و مقصين من كل تمثيل بعد الثورة.
و يقعدلهم ما يستروا بيه انفسهم، اما للاسف.. البارح سقطت ورقة التوت و كافة اوراق الاشجار و اوراق السلق و المعدنوس و الكلافز و الخضروات المعروف منها و المجهول .. قعدو عرايا من كل شيء..
يهددوا في بعضهم بنزع الشرعية ..
و كيما قالت المدوّنة سنية مخلوف:
وين القبقاب يا و سيلة عيّط للحارزة روضة ايجا يا خديجة نشفلو شرعيته. حماة الحمى. ايّا الثورة شاحت البس دبشك. روّح

فنقوللهم اللي شاح يلبس ...اللي شيّح شرعيتو يمشي يروّح... مع تحذيرنا لكافة قرّاء المدوّنة للحفاظ على شرعيتهم


12 commentaires:

Sonya a dit…

و كلّوا كوم و تدخّل بو جمعة كوم
بعد ما نطق كلمة خبز هريسة و زيت اطرشق بالبكاء و بدا يصهل و يدّيك
تقول ثور مسيّب :)))
داه في كرشو كيفو كيف البرمائين الكلّ

Clandestino a dit…

هاهاها
هذاكة اللي يحكي على 80 الف و الخبز و السردينة قاللك عندو ديبو شراب في قفصة هههه
انا سخفني وقت اللي قال ديما يصورو في صخر الماطري و ما يحبوش يصوروه.. حتى وقت اللي طوّل شعرو ما حبوش يصوروه لعزى

Anonyme a dit…

c'est honteux ce que j'ai vu et entendre hier des membres du parlement, ils veulent ns convaincre qu'ils étaient victimes du pouvoir de ZABA. Qu'ils dégagent ns ns voudrions pas de vs.

هيكل بن جعفر a dit…

Une petite rectification mon frère, monther thabet est dans la chambre des conseillers ^^
hawka bel amara ybannék wra riadh zghal mta3 el 2adhén 9ala9ni na9sou fih chwaya :p

Hamadi a dit…

Ce n'est pas la première fois que Boujomaa Yahyaoui demande d'être filmer à la télé. Il l'a fait déja lors des débats sur le budget de 2011. ça montre tout l’intérêt qu'il a au peuple. Cependant, L’intérêt n'est pas partagé.

Anonyme a dit…

hah magnifique

Anonyme a dit…

après 23 ans de 7 ème art et de 7 partout la révolution a eu la réponse sous la forme d'un 4 ème art c'est à dire des pièces de théâtre on dirais un festival. Alors juste une question quand est ce qu'il vont faire quelque chose de réaliste, véridique et tangible???

Unknown a dit…

السلام
إن الثورة لم يأت بها شباب تونس (شباب الجال و الدجين المملوخ و الميوعة المعلوماتية...) و الدليل حال البلاد اليوم (مشاكل لا حل لها) إن الشعب التونسي تربى على القذارة و تاريخه يشهد له
الله وحده أنقذ هذه البلاد من الظلم
إن أردنا الخير فعلينا الإبتعاد عن كل المحرمات التي تفشت في البلاد و صارت تونس تعرف بها و العمل للمستقبل البعيد و الإبتعاد عن الأنانية و ...
يجب أن نبدأ بأنفسنا حتى ننشأ جيلا في المستوى
الله الموفق للصلاح و السلام

Anonyme a dit…

Wallah malkit man rodd 3alik ya IM, khanatni el fassaha, wal hourouf essamina kif maygoul "mahmoud darwich", Esmahli engoullak si IM, "Enta Ettahhez we bladek ba3ida", wella "Enta behtha sabbatek" (à coté de tes pompes" kif maygoul el gawri

Anonyme a dit…

هناك اشخاص انانيين يريدون ان يركبو على الحدث و ان يتحصلوا على امتيازات لم يكونوا ان يحلموا بها من قبل على حساب الطبقة المحرومة و اللتي تعيش في الفقر المتقع فمن العار في هذه الضروف الحساسة و بدعوى الحرية ان يطالب البعض بزيادة الاجور او الترسيم فهذه المطالب سينظر اليها لاحقا بعد استشارات مع النقابيين وليس بطريقة مباشرة و فردية. بل على العكس علينا المطالبة بانشاء صندوق للتبرعات لاعانة العائلات الفقيرة و اللتي قدمت الشهداء لا ان نفتك منها ما تبقى في الميزانية ان تبقى بها شيئ فالرجاء عدم استغلال هذه الثورة العظيمة

Clandestino a dit…

@IM:
أين كنت يا صاحب الجيل في المستوى ؟ اين سيفك و راحلتك ؟؟ أين كنت عندما كان البوب يقنص شباب الجال و الدجين المميّع ؟؟
و الا نقلّك .. هلمّ لـنهبّ هبّة رجل واحد و نغزو بلاد الروم فنفتحها و نغنم منها الأموال و الغلمان و الجواري ينالنا من ذلك أجر عظيم

Anonyme a dit…

معلم يا كلندو والله معلم

Powered By Blogger