اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

dimanche 18 janvier 2009

تدوينة وطنية

إعانات تونسيــــة


أنا بصراحة ضد انو بلادنا المحروسة تحرّك حاملات الطائرات متاعها في الحوض الشرقي للمتوسّط و الا تعلن التعبئة العامة في سلاح الصواريخ متاعها و الا تعمل جسر جوي لمدّ المقاومة الفلسطينية بالسلاح , هذا الكل زايد ... و هاو الصحيح , باش نستعرض معاكم تفصيل الإعانات اللي تبعثت في الاسبوع الاول للهجوم على غزة :

1- دارك طايحة؟؟.. راقد في الشارع؟.. مطر؟؟ ريح؟؟ قنابل ؟؟أف 16 ,. اباشي ؟؟ نورمال ... بطّانيات قصر هلال و الجم ...الدّفا و العيشة
2- هريسة الوطن القبلي : ضربة ضربة للفوسفور الأبيض , و يمكن زادة استعمالها كسلاح بيولوجي ضد الجنود و المدنيين في اسرائيل ...فعالية مضمونة بنسبة 100%
3- شكارة (على ما يبدو) سكّر ...شكون يعرف بالكشي اخيّاننا في غزّة يحششو على كاس تاي و الا قهيوة ززوة بالهيل
4- بسكويت سيّدة اللي كبرنا معاه و انشالله نكبّرو عليه صغيرات غزة و ايتام القصف ... كيف كيف فاعلية 100% و بعد 40 سنة نسمعو الشباب الغزاوي يصيح دحلان 2009
5- دبابز جافال و دينول باش الشعب الفلسطيني يغسل ايديه للـ "منكعين" (قال عادل امام) مالعرب و شعوبهم و جيوشهم و حكوماتهم و ما يعمّلوا كان على أرواحهم.

آلــــة زمـــن ...للعرب فقط
(زوز متقاعدين)
-لوكان يرجع بيا الوقت و يعطيني ربي و الزمان...بالحرام الا ما ناخذ مرا أخرى
- عليك بـزيبــي ليــفني
- أعوذ بالله من هاك الزنس
- ماقتلكش خوذها ... أما دواك على إيديها , في 2006 قالتك رجّعنا لبنان 200 سنة لتالي و في 2009 قالتلك رجّعنا غزّة 60 سنة لتالي...برّة انتي زادة جرّب حظّك بالكشي ترجّعك 20 سنة لتالي

مظاهرات تونسية

الغريب في بلادنا انو في كل مناسبة تتلم فيها حضبة اكثر من 10 من ناس خارج مدارج الملاعب ماتسمع كان الهتافات بحياة "المُعلّـم" و تمجيد الحزب الواحد الاحد.
و في مظاهرات التضامن مع غزّة , كيف كيف, ديما علم تونس و علم فلسطين في الصفوف الاولى مع الشعارات البنفسجية و صور البورتري العملاقة.
لبارح السبت, (في المسيرة اللي نظّمها الإتّحاد) , جاء سيّد هازز في يدّو تصويرة المعلّم و وقف في الصفّ الاوّل متاع النقابيين...
دزّوه و جبدوه لتالي و بعّدوه...
مافهمش روحو
الناس تصيح لنصرة غزة و هو يغني " المعلّم يا بطل و التجمّع هو الكل"
جاو جماعة نقابيين حبّوا يضربوه, تدخّل الامن, قالولو قدّم لقدّام و انشالله يكلّمك واحد...
و دخلت بعضها و قريب تتقلب المظاهرة و تفسد و يولّي فيها ضارب و مضروب و ربّما تتطوّر الامور لما لا يحمد عقباه,فـ طاح التجمّعي و تمدّ على طولو في الكيّاس و بداو اعوان الامن (السيفيل) يصيحو اشكون عندو طابع سكّر زعمة زعمة مريض ( وهو فعلا مريض) ...و لقاولوا صيغة باش يفصّعوه من غادي
من الشيرة الاخرى , كان فمة زادة جماعات الاحزاب المعارضة بكل الوانها و أطيافها , من المعارض برشة للمعارض هكاكة و برّة... للي يحسب على كرسي زايد في الانتخابات الجايّة ,و اللي يغنّي و جناحو يردّ عليه و اللي يحبّ يوحّد و اللي يحبّ يجـدّد و اللي يتلوصق لجموع النقابيين يكبّر بيهم في الحضبة متاعو , زعمة زعمة معارض صحيح, و هوما كيفهم كيف التجمّعي المتمارض , لا يهمّهم لا غزّة لا فلسطين لا بطاطا ...
يا لندرا وقتاش ياقفوا على ساقيهم ؟؟ لوقتاش يقعدلهم الإتحاد ؟


Naturists
النهارين نلقى مجموعة في الفايسبوك -مجموعة تونسية- تدعو لـ تخصيص شواطئ لهواة التعرّي في تونس.. بصراحة عجبتني الفكرة.. شبيه؟؟ ماهو نبداو بالتعرّي للي نوصلو للأقمار الصناعية و المحطّات الفضائية و البيوتكنولوجيا...
دخلت للقروب نلقى أكثر من 90% من الأعضاء ذكور ...


5 commentaires:

تانيت، عبق التاريخ a dit…

شر البلية ما يضحك! لا تعليق آخر...
شكرا على هذا المقال الممتاز...
تحياتي...

Tarek طارق a dit…

ههههههههه... الله يتولاك يا كلندو... بالمناسبة التصويرة مش واضحة... مثبت هذيكة هريسة؟

ETC...ثم a dit…

مش مشكل يا طارق رقم 2 موش هريسة انظنها زيت و رقم 5 ماء
على كل نهار السبت هبطت لتونس و ما اسمعتش بالكل و في حتى بلاصة بالمظاهرة متاع الإتحاد أما خلطت عليها ، ما هو معروفة لحكاية ، ولاّ عنّا في تونس شارع المظاهرة إلّي كان اسمو قبل شارع محمد الخامس الحاصيلو حبيت ندخل بعد ما انطلقت المظاهره ، شيىء البولسية ما خلاونيش نتعدى الشارع الكل مسركل ، قررت باش نروح لأريانة ، حبيت انروح في الميترو رقم 2 في اتجاه أريانة و كان وقت خروج المظفين تقريب ، يخي نلقى ورقة مكتوبة بالفوتر على القيشي متاع القصاص ، يعلمونا فيها بتوقف الميترو عن العمل و ابدات المتاعب ، لا مترو لا كار لا تاكسي
امشيت للكار الخاصة "بريفي" هاك اللي عملوها باش تحسن النقل العمومي و سعرها أكثر من ضعفين "دوبل"
و كانت مليانة أكثر من الضعفين زادة و الوسخ و العرك ، و الكار هذه عملوها كيف نحاو الكار الصفرة باش يخففو على مسط العاصمة من السركولسوين ،
أما ما فهمتش نحاو الكار الصفرة و حطو و حدة أخرى لشركة خاصة أغلى و معبية واقفين و قاعدين
و في الأخير نزلت في نص الطريق و كملت على ساقية، كيف الإعانات كيف الكار كيف المترو الكلهم يعكزو

Clandestino a dit…

@tanit:
مرحبا بيك في كل وقت
@tarek:
لا لا هريسة هذيكة
و بالمجد راهو حكاية الفسفور الابيض غير تونس ماتحبّش تخرّج المعلومة خايفة من أمريكا تحتل نابل و تخطف العلماء التوانسة اللي يخدمو في معامل الهريسة

@3onsor:
ملا كيفاش يجي هو التضامن مع اهالي غزة ؟؟؟
ماهو يلزمك تتعذب و تحس بالذل و تكره روحك
برجولية يعطيهم الصحة جماعة المترو

Venom a dit…

Plages nudistes en Tunisie ? :-/

Jawna kbir ! :-/

Powered By Blogger