اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

vendredi 10 octobre 2008

الكلاندستان و الأزمة المالية ... الجزء الأوّل



الساعة تشير الى منتصف الليل و النصف , التلفزة تبثّ منوّعة من النوعية المتوسّطة المسببة لامراض القلب و الشرايين و ضغط الدم و آلام المفاصل , الكلاندستان يغطّ في النوم العميق (كعادته بعد وجبة الكسكسي بالدجاج الحكومي و النصف لتر من الكوكا كولا) ...

فجأة يرنّ الجوّال ...

الكلاندستان يتثاءب و يتحسس مكان الهاتف
- الووو ... عسلامة
(صوت استغاثة باللهجة الخليجية ) - الحقني يا ابن الحلال ... الحقني الله يرضى عليك ... انا في ورطة ...
- تي اشبيك يا شسمك ...اش تحب ؟؟؟
(الخليجي) - و الله رحت في داهية يا اخي الكلاندو , و ما فيش حد يقدر يساعدني غيرك...
(الكلاندستان يظن الامر مجرّد دعابة "ماسطة" من اصدقاء المقهى ممن يقومون الليل و ينامون لما بعد الضحى )
- يا رسول الله... علاش هكّة ... كان انتي ماعندك ما تصنع انا نخدم غدوة ...
(الاستغاثة تتحول الى ما يشبه النواح)- و الله ما قعدلي المليم و الله مشيت ... يا ناري على روحي
(الكلاندستان يستفيق تماما و يدرك انه نسي جهاز التلفزة يشتغل , فيسبّ المنوعة ومنشط المنوّعة و مخرج المنوّعة و منتجها و المشرف على الانتاج و يلعن اشجارهم الأسرية من الجد الأوّل الى اليوم ثم يطفئ الجهاز )
- اعمل عقلك يا راجل و يزّي مالبكاء ...
- اسمع يا أخي ,انا و الله مستعد من الآن اني نركب معاك البحر و نروح لإيطاليا و الا لليونان و الا جزر الكناري ...
- هههه تحب تحرق ؟ تحكي بجدّك تحب تحرق ... سعودي و تحب تحرق ؟؟؟
- ماني سعودي انا اماراتي
- اماراتي ؟ نعرفك انا قبل ؟؟ شكونك الساعة ؟؟ شكون معاي ؟
-انا راشد... راشد آل مكتوم ...
- شكون راشد ؟؟؟ الشيخ راشد ؟؟ آل مكتوم ؟ متاع دبي ؟؟
- إيه و الله انا هو راشد, راشد المهبب , راشد المتاخذ راشد المفلس اللي ما قعدلو لا الكثير و لا القليل
- انتي فالس ؟؟ ههههه مالا اش نقول على روحي ؟؟؟ ...
- كل شيء راح كل شي طار في الهواء الحسابات الارصدة الودائع المدّخرات ... كل شيء ... ما بقالي اي شيء
- الساعة البرميل متاع البترول توة بميات دولار و الريح مواتية و الطقس جميل و الدّنيا زاهية ... اش تحبّوا زادة ؟؟
( يتذكّر الكلاندستان انه سمع البعض يتحدّث عن ازمة اقتصادية و يتذكّر ايضا انه شاهد سي بكّار محافظ البنك المركزي في النشرة الرئيسية و قد ظنّ وقتها انهم سيطرحون قطعة نقدية جديدة من فئة الـ10 أو الـ20 دينار التي "طاحت من عينين العباد" و سقطت بالضربة القاضية في الاسواق و السيبارات و السيبار مارشي و في نصبات الخضارين )
- ااه تذكرت يا شيخ ... ياخي انتوما زادة عندكم ازمة ؟؟ ما تقلّيش انتوما زادة وصلكم الطّش ؟؟
- ايش ؟؟ طش ؟؟؟ ايه لحقنا الطش و الرش و ضاع مال البترول و ضاع رصيد الاجيال و راح رصيد العيال و ضاعت سنداتنا و ماعادت اسهمنا تسوى فلس و قروضنا اللي اعطيناها للشعب الامريكي راحت كيف ما راح الشيخ الزايد و ماعادت ممكن ترجعلنا...
(الكلاندستان بلهجة الشماتة) - ههه اعمل ربي في بالك يا شيخ, انتوما تبعتو اماريكيا و راهنتو على بوش و بوه و عرشهم في التكساس ... نتصوّر ربي ما يخليهاش بيكم ... الراجل قالك مجاهد في سبيل الله و يجيه الوحي ... تبّعوه تربحوا في جرّتو الأجر و الثواب ....
- شو يا ولد ؟؟؟ يعني تسخر مني انا في عمر ابوك ...
- و الله لا يا شيخ , فاش قام نتبولد عليك ... نحكي معاك بكامل الجدّية راهو ... ثمّ انو شوف, انتي يا ذنوبي كان تنجّم السفر في البحر و الفصعة في اللمبادوزة و الخدمة في سواني الطماطم في سيسيليا , فـ آش قوّلك ؟؟ تجي لتونس و اتوة ندبرلك 5 و الا 6 نعجات و زوز و الا 3 بقرات باهين , تسرح بيهم في الفحص و الا في تاكلسة و الا في جبل عرباطة في قفصة ... فينالمون انتي اصلك عربي من عرب البادية و اكيد عندك خبرة في دومان الاغنام و الماشية ... عمّل على ربّي و ما تخافش عام السنة انشالله عام صابة , و انشالله ما يجي العام الجاي كان تولي لاباس عليك خيرلك من البورصات و الحسابات و القروضات و العملة و اسعار الفائدة ... خلّي البلاء لأهل البلاء و فكك منهم ...
- بارك الله في تونس و اهل تونس و الله ماكنت عارف شو أسوّي من غيرك أخي الكلاندو...
- ايا خلّيني نرقد توة ... تصبح على خير يا شيخ

a suivre*********

6 commentaires:

Anonyme a dit…

Hilarant :D

A quand la deuxième partie :) ?

kacem a dit…

وصلتك التّســــــــومني متع الفلوس !! دير ما في بالكش يا كلاندو ! عندكم صانع الفلوس توه إسلاّكها ....

Anonyme a dit…

chose bizare , hanou chez nous au pays de jasmin tout se passe bien , ni crise , ni faillite .
bref comme d'habitude , circulez , il n'a rien a voir.

les nouvelles des journaux boudourou sont toute en bonne humeur ce matin , le preuve ils chantaient la solide Dinar tunisien face a cette crise qui secoue la planéte toute entiére ,a les voir lire , écouter un jour notre Dinar va planter le Dollar americain.


ramzi

black dark a dit…

ya clando, dabber 3lih 9ollou ije ched blasti, wena nched blastou!! mani 5ouk!! loooooooooool

Anonyme a dit…

صراحة لازم يتعامل كيما يتعاملوا مع التوانسة وباقي العرب في الإمارات، أي لازموا كفيل تونسي يعطيه الباسبور متاعو عند وصولو للأراضي التونسية، وياخوا منو إذن سواء باش يحل كونت في البانكة أو باش يجيب أولادوا. وبالطبع كان يحب يعمل مشروع سواء في إطار رعي البقر ولا العلالش لازموا شريك محلي يأخذ 51% من رأس المال. وهذا بالطبع دون إعتبار الإجراء
ات الروتينية اللي لازم يقوم بها لدى وزارة الداخلية ووزارة الصحة ووزارة الخارجية والولاية والبلدية والإرشاد الفلاحي والعمدة والشعبة المحلية. وأهم شيئ أخ كلاندو لازموا تقلوا إلي يممض على الجنسية التونسية لأنو حتى ولو قعد مياة عام في البلاد مايحلمش بها.

Clandestino a dit…

كلامك صحيح خويا خالد
اما هات شكون يسمعك

Powered By Blogger