اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

jeudi 29 mai 2008

آه يا بنفسج

قالك نهار من النهارات , بوش قاعد يتفرج في التلفزة و يتبّع في نتائج الانتخابات الأولية متاع الرئاسة, فوجئ باللي زميله الجمهوري ماكين ماعندوش برشة فرص باش يغلب مرت كلينتون و الا السيناتور اوباما... و فاق اللي عندو ضلع في المصير متاع حزبو و انو يتحمل مسؤولية الهزيمة اللي ممكن يتعرضلها حزبو في المستقبل ( بعمايلو الحرفة و بالتبلبيز متاعو و بالحروبات متاع العراق و افغانستان و شريان الشبوك مع سوريا و ايران) و يتحمل زادة مسؤولية العداء العالمي لامريكا و بأنو خلى امريكا مكروهة في العالم اجمع و ما خلاش للامريكان وجه يقابلو بيه خلق ربي...

فـقالك يا سيدي يلزم نفضّها (الحرب متاع الارهاب) , على الاقل نعمل حاجة تصلح قبل ما نخرج من البيت الابيض , على الاقل اللي باش يجي بعدي يذكرني بالخير و يترحّم على والديّ...
و قرّر يمشي يقابل بن لادن شخصيا في الجبل و يتفاوض معاه و يعطيه اش يحب و يقص الهدرة ...(بالمناسبة الامريكان يعرفو وينو بن لادن اما ما يحبوش يشدوه, ما نعرفش علاش)

و زادت دبّرت عليه كوندي, قاتلو بلزم تهز معاك واحد ما عملش الدوانة مع المسلمين, على القليلة ياقفو معاك و يقولو فيك كلمة خير قدام الراجل , و اقترحت عليه شيراك... و كان الامر كذلك , تم الاتصال بجاك شيراك و تفاهمو معاه باش يعديو جميعة في الاجبال بحذا بن لادن... هاو في الاثناء جاك شيراك اقترح عليهم باش يزيدو يهزو معاهم زعيم عربي مسلم ( يعمللهم الترجمة و يحاول معاهم التفاوض و اقناع زعيم القاعدة ) و اقترح عليهم صديقه العزيز , الزعيم المغاربي , رئيس غينيا بيساو ( غانة ولات مشلّقة ياسر ) ....

بعد 3 ايام
وقفت الـ4*4 قدام المغارة ... هبط الثلاثي و حب يدخل اخي تعرضولهم الحرس الخاص متاع القاعدة و قالولهم اللي ممنوع باش يدخلو الثلاثة جميع , على خاطر بن لادن يخاف من الاغتيالات و التفجيرات كيما صار لاحمد شاه مسعود هاك العام , و اجبروهم باش يدخلو بالواحد....

دخل بوش وحدو ... سوعتين من الزمان و خرج... يجري... عمامة على راسو و كلاشينكوف في يدو وهو يصيح "الله اكبر, الله اكبر"

خزر شيراك للرئيس الغيني و قالو " ههه هاكا بوش ماهو بوهالي فيسع ماعداها عليه بن لادن و شربلو مخو, اتوة نوريك الرجال اش تعمل" و دخل...
سويعة من زمان و خرج...30 كيلو قنابل مربوطين تحت الفيستة وهو يصيح -بالعربي- "الموت لأمريكا , الموت لاسرائيل"

قعد رئيس غينيا وحدو ... ضحك و قال " قعدت آني طوّة؟؟؟" , نحّى الفيستة و مشى جبد ساشي من الكرهبة...
"هاني جيتك آ بن لادن" و دخل...

نصيّف ساعة... و خرج بن لادن...كشكول خزامى في رقبتو و هو يصفّق و يعيّط كيما جمهور الكورة الايتوال
Allez Marseillais
Virage Marseillais
Virage va éclater
و 2009 بالفيوليييي
هههه

6 commentaires:

Bel Malwene a dit…

ضحك و قال " قعدت آني طوّة؟؟؟"
ههههههههههههههههه ... قتلتني بالضحك ... أما حتى هي بو شلوق أكثر من غانا ... هههههه
نقشتها يا كلندو يعطيك الصحة

Werewolf a dit…

يعطيك الصحة... هذاية كلاندو اللي استانسنا بيه... أما كوندوليزا باش تشيخ كي تسمعك تتربّج بيها و تقلها كوندي
:)))

chanfara a dit…

هههههههههههههههه

وحدك يا كلندو

Werewolf a dit…

فقط للأمانة الكروية... جمهور الافريقي معروف أنو فيراج لي مارسييي و بالتالي نقترح أغنية أخرى للإتوال:
allez ya louled jibouhaa
allez ya louled jibouhaa
allez ya louled jibouhaaaaa
2009 bel violet nlawenhaaaa

اللي ما يعرفش اللحن الله غالب عليه

:)))))

Anonyme a dit…

بالمناسبة علي حكاية بيساو
لهادي جاه عفو توة شهر و الا أكثر..و الي معاه مازال موقف..قالك طلع بالرسمي يتكيف ..ياكل فيها ماكلة..ألور لاخر ماركة شراب فقط

Anonyme a dit…

وكيما قال السيد وارولف..و للأمانة لغناية متاع المرسيا..غناية متاع الجمعية..نقترح عليك غناية لتوال
بريقاد روج آلي
بريقاد روج آلي
و 2009 بالفيولي..
حاجة هكة..تأدي نفس المعني

بون و فقط

Powered By Blogger