اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

jeudi 17 janvier 2008

الكاباس : الشطر توّة و البقية بعد النتيجة


بطل اليوم هو انس من خيار الزنس , شخصية حقيقة و واقعية موش من وحي خيال الكلاندستان...هو مسؤول متوسّط في ادارة التعليم, مسؤول ممغنط و جذّاب... عندو قدرة غريبة على اصطياد القادمين من المناطق النائية و الارياف , القادمين مما يسمى اصطلاحا ما وراء اللافتات .... الباحثين عن الخيط الموصل... الراغبين في شراء الوظيفة...
السيّد هذا , اسس لنوع جديد من الاستثمار المربح و المضمون و الخالي من الضرائب و الاداءات وقاعد يساهم في اعادة توزيع المداخيل و خلق مواطن الشغل... الاستثمار هذا ما يتطلبش برشة مجهود و الا برشة ذكاء بل يعتمد اساسا على الحظ و الوقت.

المرحلة الأولى: ماعون الخدمة

- السلام عليكم
- و عليكم السلام.... مرحبا مرحبا... اقعد ارتاح
- يعطيك الصحّة ( يسكت شويّة زعمة حاشم) ...انا يا سيدي جيتك من الابعاد و معمّل على ربي و عليك...
-ايه تفضل تفضل...
- انا ما نقلك و انت ما يخفاك... عندي الطفل... ولدي... توة عندو 5 سنين يعدي في الكاباس, و نحنا ناس زواولة ماك تعرف... و هاو ربي يعلم قداش تعبت و قداش صرفت عليه و مرمدت في جرتو العايلة باش يوصل ياخذ الشهادة...
- امممم...(تنهيدة)... فهمتك
- ايه عاد سألت بعثوني ليك... قالولي نفس مومنة و انسان ثيقة و يخاف ربي ....و يقضي..... هاني جيتك
-(تلمع عينيه) باهي توة ناخذ الشطر و البقية بعد النتيجة... هذا الكتابي... الأورال مبعد حسبة اخرى و مفاهمة اخرى
- يا ولدي مايسالش هات الساعة ينجح في الإيكري و من بعد يا حي
- مالا تفاهمنا, هات اعطيني الاوراق و هز القضية للأدريسة هاذي.... و على الضالين آمين
- هذا هو ...على الضالين آمين
-و كيما قتلك ما نوعدك بشي انا نعمل اللي عليا و البقية عند ربّي
- نعرف نعرف.... برة انشالله ربي يفتحها في وجهك و يصلحلك في الذرية... انشالله ربي يعطيك ما تتمنى .....الخ الخ الخ

الثقة هي راس المال:

بتكرار هذا المشهد (مع بعض الاختلافات الضئيلة) طيلة الاسابيع الموالية, تتكدّس الملفات و المطالب في قجر المسؤول... و تتكدّس الباكوات عند مرتو في الدار.
ثم يحرص على الاحتفاظ بالاموال الى غاية صدور النتائج ليبدأ في المرحلة الثانية و الاهم وهي جني الارباح.
يتصل بالحرفاء: اللي ولدو ما نجحش يرجّعلو فلوسومع كليمتين اعتذار ( الله غالب السيد اللي معمّل عليه جبد بيّا) وهو بالطبيعة ما كلّم حد, اما الناس اللي نجحت اولادها فيتصل بيهم باش يكملو بقية الفلوس و يبداو جولة المفاوضات متاع الامتحان الشفاهي...

النتيجة:

-
المسؤول الممغنط يربح برشة فلوس ( حسب نسبة العباد اللي تنجحلو , العام اللي فات نجحولو 5 و السنة متوقع الدوبل نظرا للعدد الكبير متاع المطالب اللي قبلها و الدورة الجديدة متاع الكاباس ) و يعمل رصيد متاع ثقة طالما انو "موش قلاب" و يرجع فلوس الناس اللي ما نجحتش

- اللي نجح يقلك انا بشوية فلوس دخلت ولدي للخدمة و رتحتو مالبطالة

- اللي ما نجحش ولدو يقلّك على الاقل انا طحت بواسطة باهية "لفوق" و يزيد يعملو اشهار في الدوار او الدشرة متاعو , و اذا كان ذكي بالنسبة الكافية فإنو هو بيدو ينجّم يدخل دائرة الاستثمار المربح اللي تولّي تاخذ شكل لعبة القمار ذات الشكل الهرمي


ملاحظة اخيرة: الكلاندستان يعرف السيد هذا مليح و ينجّم يديكلاري عليه لانو مكانو الطبيعي هو وراء القضبان, لكن على مراد الله, احنا في تونس اللي يتصل بالحاكم (حتى في حالة اجرامية كيما هاذي) يقولو عليه قوّاد و انتوما تعرفو انّي ما نرضاش لروحي نكون قوّاد حاكم
لذلك خلّيه السيّد **** يقعد يمرح في الطبيعة و شايخ في البشرية طالما مافمّاش شكون باش يقوّد عليه

14 commentaires:

cactussa a dit…

et si tu m'envois son nom,je serais une cactussa 9awed9a!!
ca me ferait plaisir de le balancer!!:):)

Tarek Kahlaoui a dit…

ملا لعب... كان عندي فكرة عامة على النماذج هذية... أما كي نشوف التفاصيل نحس روحي نية بالقوي... أشخص كان الخيال الخصب متاع الغشة و التسوقيط كيف هكة يتوظف في المكان الصحيح

Clandestino a dit…

cactussa:
حاشاك يا بنتي
علاش ما لقيت ما تستفايل لروحك
خليه بينو و بين مولاه
اتوة يطلع في صغارو الشي

tarek:
ماهو في مناخ ضبابي و مافيه حتى شي واضح تكثر النماذج هاذي
و للاسف العباد اليائسة تتعلق حتى بقشة باش تسلّكها

حصيلو السيّد هذا مقارنة بالمرتشين على الطريقة الكلاسيكية يعتبر مبدع
على خاطر المرتشي العادي على القليلة يقضي او يحاول يتدخل ... تنجم تقول عندو ضمير
اما هذا فيدجل على العباد و اللي ينجح بمجهودو يقلك نجّحني فلان

Slouma a dit…

52,350 DT c le montant sur la foto !!
je sais pas ce qui m'arrive mais javais envie de le compter et de vs donner l'info
Ena je voi que le capess haja behia tarfou alech car elle donne un espoir dans la vie des chomeurs
brabi imaginez en tunisie pas de capess et les café sont non fumeurs
ti rahi la plupart amlou courda et il se sont suicidé

kmr a dit…

wallahi s7i7, mawjoudine la3bèd hedhouma, w allah ghaleb mawjoudine bkathra... ama za3ma ech wasslou howa il ha trafic, w ech wassel amthelou...?
fi bo93tik kif kif, man5abberch 3lih, ama mouch 5aterni 5ayef lè y9oulou 9awed "5alli y9oulou ech yhemm, illi yochker wela ydhemm...", azma plutot 5ater n9oul irrajel bou sghayrat, il n'arrive pas a joindre les 2 bouts, mballa3 feha... ech bech ya3mil?? echnowa il 7all...?? ti ya3mil kif la3bed, w echan9a m3a ejme3a 5le3a...

no93dou hakka?? w chay zayed 3la 9oddem?? lè! mouch hedha il7all!

illi fet mèt, w lè yanfa3ou il3a9ar fi mè afsadahou addahr, ama n7awlou manrabiwech awledna 3al les principes il fesda hedhouma, n7awlou n3almouhom ykounou 5ir minna, hedheka illi najem n9oulou...



@ slouma: maha2ah! thamma 49,765 DT! zid thabbet! :p héhé

Anonyme a dit…

يا كلاندستينو البيسطون متاعك رهو قلاب متاع زواولة..
البيسطون الصحيح راهو يحوس بفاليز ديبلوماتيك و معروف
عسكري مكسر وخوه ولى وزير
الطاريفه ياجوره معناها عشرة باكوات و النتيجة مضمونة
راهو في الكاباس الإخر جماعة جيهتو هزوا 60 في المية من البلايص و ماعليك كان ترجع للنتائج.
القشارة برشه راهم أما الصحيح واحد أحد

Clandestino a dit…

anonyme:
انا خوك ما عنديش ثقافة الياجور
النوعية الوحيدة متاع الياجور اللي نعرفو و مخالطو بالقدى هو الياجور الاحمر المعروف بلون الاحياء الشعبية

julian Sark a dit…

@KMR :

famma 7all , yetlammou groupe we ya3mlou contract killer (normalement yelqaw offre ces jours ci) khater ca ne coute pas bp en Tunisie => AND THE MAN IS HISTORY !

3amrouch a dit…

كام ر
الي نفهم من كلامك انك قاعد تقول في شي ماكش مقتنع بيه
من شيرة تلقالو في اعذار(بو عايلة الخ الخ) وهوني نقلك رب عذر اقبح من ذنب...املا نوليو نعذرو السارق والمكبوت والقاتل ...هذاكه المبدأ متاعك وين يهز، ومن شيرة اخرى تقلي فات الفوت ونربيو اولادنا على غير ماتربينا عليه...ريت وين يجي التناقض متع حديثك
كلندو
الامر ساهل برشة وموش حكاية قواد ولا ط***ن كل ماهناك هو عدم ثقة في الهيئات المختصة في انو باش تتخذ الاجرات اللازمة وتتابع الموضوع لانو الخنار الي باش يتجبد والعباد الي باش يكركرها معاه تولي امن دولة...وانا مانقلك وانت مايخفاك ونختم بمثال في الحومة متاعي، على قد ماجراو سرقات ديار ولا شرايط ولا علالش جامي باش واحد بلغ الشرطة لانهم بعمرهم ماشدو سارق(عمركش سمعت جملة بعد التحريات لقينا بلاصة العصابة...)ولات لعباد وحدها وحدها تتناقش مع السراق الي يكونو معروفين في غالب الاحيان وكل واحد وعلى حسب وزنو في الحومة اش باش يسترجع.

Clandestino a dit…

@3amrouch:
صحيح
توة السراق ولاو شايخين
ما يكلمهم حد

kmr a dit…

@ 3amrouch, wallahi, ech bech n9ollik, maritch! ;)

au fait, j'ai dit que le bonhomme a certainement ses raisons, (peut etre que non, mais je lui accorde quand meme le bénéfice du doute). donc, moi, au moment de décider de le dénoncer ou pas, c'est un jugement que je dois faire: le dénoncer, et le condamner et ses enfants a la misère et la pauvreté (la moindre des choses c'est qu'il soit mis a la porte) en vu de débarasser la société d'une vermine qui corempt son système, ou lui laisser libre cours, afin de sauver sa famille d'un chatiment qu'il est le seul a mériter, et au même temps, faire de sorte que de telles vermines n'aparaissent plus, mil louel! commetn le faire? une meilleure éducation à nos enfants, de meilleures valeurs a leur inculquer, etc...

je ne vois aucune contradiction la-dedans, je dirais meme que ce n'est pas contradictoire avec ce que toi tu penses: chacun de nous voit une tarre dans la société, et chacun tente de la combattre comme il peut. seulement, toi tu cherche a l'éliminer aujourd'hui, sans y penser plus que ca; alors que moi j'essaie de comprendre ses causes, afin d'éviter de la revoir dans le futur...

j'espère m'etre fait comprendre...

ps: dsl de ne pas ecrire en arabe, c'est pas que je m'y exprime mal, mais que mon clavier n'est pas muni des lettre arabe, c'est donc plus facile d'ecrire en français.

3amrouch a dit…

@kmr
en partant du principe qu'il ne faut pas conndané sa famille avec lui je te reponderais que nous leurs ferons plus de tort que du bien on faisons en sorte que ce genre de situation perdure,et genreralement ce genre de personne ne sont pas dans le besoin,vue qu'il a deja un poste lui permettons d'intervenir.
au contraire moi je pense qu'on candanera sa famille a vivre avec l'argent sale si on ne fait rien.
ton idée d'agir sur le long terme et d'investir dans les generations futurs est plausible et j'y adhere mais je suis aussi pour le fait d'agir a cout terme et de demandé un jour des comptes a tout ceux qui ont profité du systeme.
il n'y aura plus l'excuse de'j'ai obei au ordre.

Anonyme a dit…

same7ni fik Si clandestionou si chacun fait comme toi et y9oul "yetla3 fi dhorritou" khlet et jlet akthar mahi kalia

البرباش a dit…

الصّبر و برّه...