اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

samedi 8 décembre 2007

اليوم الابيض و الزيتون الاخضر

action note blanche

بعد دعوة الزملاء المدونين للحركة الاحتجاجية ضد الحجب المتواصل للمدونات و ممارسة الرقابة و الوصاية على الانترنات , و التمقيص العشوائي و المجاني , و ممارسة القمع و الارهاب الفكري , فنضم انا زادة صوتي لبقية الأخيّان يوم 25 ديسمبر 2007, و نهدي التدوينة البيضاء لصديقي و زميلي فري رايس آخر ضحايا المقص و لبقية المدونين اللي تمقّصو هوما زادة العام اللي فات ( كيما آدم الصالحي ).

و استجابة للأخ الـ ب ت ب , و باعتباري كنت طرف في عركة بالاسطلة, نحب نشير زادة عن توقف العرك بالاسطلة ( من جانبي على الاقل) , و كيما كانو يعملو الهنود في اتفاقيات السلام ( يردمو فأس الحرب و يدخّنو غليون السلام) , فـإني بمناسبة اليوم الأبيض باش نردم سطل الحرب ( او كاسة الحرب لانها عركة في الحمام) و نشعّل سيقارو خفيف من سجائر يوم الاستقلال... و نهدي للجميع شقالة زيتون متاع سلام على القليلة ينفع , خير من غصن الزيتون اللي -حتى كان ندخل حديث في حديث- جرى في جرتو عرفات و من بعدو فتح و حماس و مصر و الاردن و البقية , و سلّمو على خاطرو في البندقية و هاكم تشوفو الحالة المكربة اللي وصلولها... لذلك انا مع احلال مبدأ السلام عبر شقايل الزيتون و صحافي العصيدة البيضاء بالزيت.

فلا فائدة من العرك في بعضنا و العدو الفعلي متاعنا (المدونين) هو عم الشيفور متاع الـكات كات , المقص , الاخ الاكبر , المحايصي متاع الانترنات (كانو انس من خيار الزنس و الا ماكينة متاع فيلتر) اللي كل ما نقولو هاو ساييي, وصلنا لسن الرشد و بلغنا , هاهم باش يسيبو خناقنا , هاو باش نرتاحو من الرقابة الابوية الا و يزيد الشي على قدام.
ة

7 commentaires:

FarFar a dit…

كلندو
ياخي مش كلي صارت عمناول هذي تدوينة بيضاء ، و لات سنة حميدة كل عام ؟
بون واصلو ، الدوام ينقب الرخام و لو أنو مريتش الي عندها مفعول
عندهاممكن مفعول أبيض هه
عجبتني هذي غليون السلام ، منعرفهاش قبل ، لكن عجبتني
تفكير عميق
حاجة اخري ، ياخي انت فيبالك عم لمقص يتبع في سياسة فرق تسد مبين المدونين ، باش تقول هدنة الخ
نورمالمون موش حاسبكم بلكل
لكن هذا لا يمنع الي الحركة ديما خير من الاشيء ، أهوكة يدور الدولاب من توة حتي نهار خمسة و عشرين هه
علاش خترتو خمسة و عشرين ، زعمة خاطر بابا نوال يرمز لحرية الرأي هه
،

Clandestino a dit…

و الله نهار 25 ما اخترتوش
اما ميسالش

ماهو راس شهر و الناس الكل شبعانة
بالعلوش
اتوة تشوف, هي جاب ربي جات تدوينة بيضاء لوكان جات بالكلام راك ريت العجب

و شفت الكوليستيرول اش يعمل

FarFar a dit…

و الله أنا نري الي تدوينة بيضاء حاجة سلبيةأي
passif
نري كان تتفقو علي بيان هه بيان 25 ديسمبر مثلا ، تبارك الله عندكم مبدعين في الكتيبة ، بيان تحطو فيه طلباتكم بصراحة
أيها المقص ، أيها المقصة
الخ الخ
و الناس لكل تبوستي البيان هذا و لازمة بطبيعة الحال يكون صريح و محرحر ، باش سي المقص تولي عندو زوز حلول
يا، يخلي البيان هذاكة و هوني ندخلو لمرحلة جديدة / التحول في حرية الرأي
ياترصيلو ملزوم يمقص و يسكر المدونات لكل و نتصور هوني حاجة صعيبة بالنسبة ليه ، أو بالأحري تدعوه للتفكير و ترصيلو يختار الفرضية الأولي

نري الي الفكرة هذي قمقومة ياسر و أكثر شجاعة من تدوينة بيضاء لا تبل لا تعل و هوني ممكن نراو روح التضامن نبين المدوين باش ياخذو الريسك الي التدوينة نتاعهم تتسكر
و ثمة حاجة أخري هي ضاهرة الفول ، فول برشة عباد ، الي تساعد تحقيق الفكرة هذي و السلام
ندعوك كلندو باش تتبني الفكرة هذي للمصلحة العامة
و السلام ،

Clandestino a dit…

و الله فكرة طيبة
معنتها الناس الكل نهزو ارواحنا للصيد
"يا صيد كولني "
هههه
بالطبيعة ما ينجمش ياكل الناس الكل فيسيّب االناس الكل
اما ما نتصورش باش يسيّب مولى الفكرة
اللي هو في الحالة هاذي انتي
و منفذ الفكرة اللي هو العبد لله
فتمنع الناس الكل و تمشي في ريوسنا ان وياك
و نوليو كي اللي في كليلة و دمنة اللي يرى المشورة لغيره و لا ينفع نفسه
هههه

FarFar a dit…

ههه
أنا نعترف الي أنا جبان و منحبش لمشاكل و علي رأي المقولة الشهيرة صيد جبان و لا قرد شاذ ههه ، لكن فكرتي و بكل صراحة تهرب ببرشة بهذي تدوينة بيضاء
الجماعة الي لاعبين فيها مكافحين لحرية الرأي نتصورها محك باهي ليهم..
....
أي أنستو توة ، يوفي لحديث ،
الي باش يتقال قلناه ، الكرة عندكم ههه

Big Trap Boy a dit…

برافو كلاندو على شجاعتك في ما يخص مبادرة السلم

والله شهيتني في شوية زيتون أخضر. على كل حال ندعو الناس الكل، ونعني لهنا الكل الكل، باش تتجاوز الخلافات العرضية اللي صارت ونمرّو لما أهم.

وكيما يقولو، خيار بنادم قلبو صافي

Manourix a dit…

slt tout le monde cela fait un bon moment que je lis les blogs tunisien et certains d'entre eux m'attire plus que d'autre mais en general celà me fait enormement du bien de les lires et par la meme occasion de savoir ce que pense ouled bledi des differents sujets que pose la vie dans notre belle tunisie . c'est la 1er fois que je sors de mon role de simple lecteur et de poster . " la liberté d'expression " qui n'en veut pas et qui ne la reclame pas sauf que nul n'est vraiment sincere pour l'arracher. oui je dis bien l'arracher , la liberté ne se donne pas sur un plateau mais sa se merite et pour la meriter il faut batailler, lutter pour l'avoir et la garder et pour ce faire il ne faut pas avoir peur de presenter des tribues sur l'autel de la liberte " ma famach hjama min ghir dam " comme dit bien un proverbe bien de chez nous. blogger blanc le 25 dec est une bonne initiative, c'est une manifestation virtuelle sur internet contre la censure mais Mr 404 faché sa ne lui fera ni chaud ni froid, pour lui, si insensible que lui , la caravanne passe ( il faut plutot lire la censure frappe ) et les chiens ( hachekom ) aboient. pour moi je soutient la proposition de hausser la voie tous ensemble et de montrer aux censseurs d'internet que la generation montante exige la liberté en general et elle est prete a tout les sacrifices pour l'avoir. mais dans le respect et la responsabilité - c'est mon opinion wa lakom sadid el nadhar