اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

jeudi 22 novembre 2007

بالله صوّتولي...

اثر مبادرة "حب العزيز" التي اعلن عنها السيد حاكم اراضي "و نورمال" , و شدانه الصحيح لمغادرة الكرسي قبل مضي ربع قرن على الأقل ... وهو امر موش نورمال (حتى طرف),
فإننا "الكلاندستان" نعبّر عن بالغ تأثرنا بهذه المبادرة و فائق تقديرنا لهذه اللفتة الكريمة , و نهنأ السيد الحاكم على هذا القرار الشجاع و هذه الحركة النبيلة للي بالمناسبة نثمّونها و نسبعوا عليها بالكمون الاخضر, و ندعو باش ما تكونش سحابة صيف (او باراصول) عابرة , بل تؤسس و تمهد و تهيّأ الاجواء و المناخ لسنة الحوار و التداول على الكرسي ...
وهو ما يطلق عليه السياسيون و خبراء الجيوبوليتيك "نظرية قاعة الحلاقة للرجال" , حيث يتم التداول على الكرسي بانتظام و دون فوضى خلاقة كانت ام عقيمة, ففي قاعة الحلاقة لا يخشى الجالس على مقعد الانتظار شيئا , بالعكس تلقاه يقرأ الجريدة و يتكيف و يحكي بكل حرية و اريحية و يستنى الدور متاعو من غير خوف و لا قلق , اما السيّد اللي قاعد على الكرسي ففيسع ما يكمّل و ما يكبشش برشة , يغسل راسو بالماء و شمبوان ليبيا و يخرج انظف ماللي دخل...
الله مصلي على النبي... انشاالله ربي يخرجنا خفاف نظاف ... ( هذا اذا دخلنا بالطبيعة)

فنحن الكلاندستان , و بعد تجريدنا من كافة مهامنا (وزير المقاهي و البشكوطو , الناطق بودورو باسم الحكومة , منظم عمليات الحرقة , و المستشار الخاص لدى السيد القوفرنور) و صعود بعض الاطراف الاخرى على الساحة السياسية و اضطلاعهم بمهام كبيرة و تآمرهم على شخصنا كيما فري رايس , ارابيكا و اللصة رقم واحد و نوفراج, و ذلك باستعمال القمع و الاقصاء و فرض العزلة ( كيما عملو يوم الأوووووش والدوش و البكوش ) , فإننا نعلن رسميّا نيتنا الاستيلاء عفوا الترشّح للكرسي اللي باش يفرغ على قريب انشاء الله
و حق الجلوس هو حق تكفله القوانين و التشريعات السماوية و الوضعية و المواثيق الدولية بما فيها ميثاق الفيفا و الكاف ( مقعد البدلاء) و قوانين شركة المترو و الكار و اللوائح المهنية لسيارات التكسي و اللواج اللي تعمل على توفير كراسي بالعدد الكافي دون اعتبار السائق, و ذلك لتمثيل الإئتلاف المتكون من : حزب " الكنتول و الطوب", حزب" اخطى راسي و اضرب ", حزب " اضرب و راسي يسد" , حزب "غدوة نحرق "(المهد الاول) , حزب "الخبزة" , حزب "الديك ", حزب "بدّلي الكابوسان لا نعمل اضراب", حزب "ماكش معايا راك ضدي ", و حزب "ميحي مع الأرياح وين تميح", وهو تجمع يضم معظم التيارات السياسية في البلاد و اللي رغم اني ما نتفقش معاهم الكل في الافكار و التوجهات فانا نشكرهم على الثقة و نوعدهم باش نكون عند حسن الظن.

و قبل ما نحط البرنامج متاعي باش نقدم الشعار و الايديولوجية متاع الكلاندستان في كليمتين باش ما تفدّوش وهو "الطبرنة محلولة و الجامع محلول و انتي دليلك ملك... أما ما تكسرلي كرايمي باش نجي معاك"

و في ما يلي برنامج العمل و المخطط الثلاثيني الأول اللي باش يغري السادة الناخبين باش يصوّتولي :

أولا باش نوفّرو اسطول من الفلايك و البالانسيات المجهزة بالجي بي اس و الانترنات و اللبلابي و الهرقمة و احدث انظمة الملاحة و اللي ما يكتشفهاش الرادار باش نحرّقو الشباب من اللي بلغو سن الحرقة , على خاطر الحرقة حق و واجب على كل الشباب النورملندي .

ثانيا ليترة متاع الايسنس باش تولي بـ 1500 مي خاطر بصراحة شوية علينا 1200

ثالثا الخبزة باش تولي توزن 25 قرام فقط و تنجم تاكلها في قدمة وحدة و تباع في الباكوات , كيما باكو المشوار او باكو القوشو , خفيفة ظريفة باش نحيّو المشهد المزري متاع العباد اللي هازة خبزة طولها 60 صانتي او اكثر, عيب قدام التوريست.

على ذكر التوريست باش نعمللولهم صندوق خاص نلمّدولهم فيه الفلوس باش اللي يجي يصيّف عنا يلقى اش يصرف و ما يعيشش على الخبز و السردينة و ماء السبّالة.

في الجانب الاقتصادي باش نأسسو لتقليد جديد قديم , وهو "هات آش عندك خير " وهو ما يعرف بـ "قر تجيك خفيفة" اي انو كل رجال الاعمال و الكرز و اصحاب المشاريع القوية مدعوين باش يعطيو (لــ ذاتنا الكريمة بطبيعة الحال) مما رزقهم الله , حلاله و حرامه و ذلك بالحسنى و من غير عمليات ضرب او قسمة, و اللي عندو بزايد ميسالش نقبلو عليه ما زاد على النصاب و ما فاق الحاجة.

في نفس السياق الحليب باش يولي بـ 2000 فرنك فقط , و هذا قرار لفائدة البقر اللي وكلناه و شربناه و زرقنالو و صرفنا عليه , و قريناه للي تخرّج , ما يجيش منو تقعد الليترة متاع الحليب بـ800

و دائما مع الابقار و المواشي فالابقار المتخرجة و اللي بلغت السن القانونية لمغادرة المراعي المجانية و ما نجمتش تدبر راسها في خدمة و الا حرقة و اللي مافاقتش على وضعها و ارتقت بروحها و حاولت تخرج من القطيع و تحل جلغتها على الملأ و ما عندهاش باش تفيدنا فنأمر بارسالها للبوطوار حفاظا على كرامتها و رأفة بها من التمرميد و الميزيريا المزمنة

و في نطاق توفير اسباب العيش الكريم للمواطنين , نعلن عن اعتزامنا استيراد نساء من عديد البلدان ضمن برنامج المرأة الشعبية حيث يتولى صندوق خاص تمكين الراغبين في الزواج من قروض ميسرة و مرأة شعبية حسب الشروط اللي باش يقع تحديدها فيما بعد و ذلك لتكريس مبادئ تساوي الفرص و المنافسة (خاصة انها المراة التونسية ماعادش في متناول المواطن البسيط و الشهار الزوالي)

باش نعلنو عن بعث اقليم امازيغي يتمتع بالحكم الذاتي و نخليو مسالة تحديد رئاسة الاقليم للسادة ازواو سومنديل الاوراغ و السيد قصة اون لاين , و نوصيهم إذا باش يولي فاها عرك و ضارب و مضروب , راهو نقصّها الحكاية من توة..

و في النهاية نطمّن الناس الكل انها حرية التعبير باش تكون موجودة بكميات كافية و في الاسواق و المغازات و المقاهي و المساحات الكبرى , كما نطمنهم انوّ العصا متوفرة دائما و ابدا, و اجهزة اولاد الحومة الامنية بالمرصاد لكل من يتجاوز الحدود و من لا يتجاوز الحدود...

; لذلك , بالله صوّتولي و ناشدوني ...أمّـا ما تقرقوش بيا برشة على خاطر فيسع ماناخذ بالخاطر

و السلام

ps:
ما تترددوش باش تقولولي مشاكلكم و مشاغلكم و مطالبكم , و استغلو الفرصة من توّة على خاطر مبعّد الخدمة هاذي باش تولي بالفلوس اي
payante


14 commentaires:

cactussa a dit…

ti7lim!!9alo mra cha3bia!!!ti homa "irjel " bech yonsbou bihom fi nasbit l brique,winti tlawjilhom 3la nsé!!!!!
bara a3mil mo5atit tanmia famech matnami irjoulia wala 7ata tistasla7 achbeh arijel ili m3abin zne9i.
(desolée pour les vrais hommes rani ma9saditkomch).

FarFar a dit…

كلندو
وصلت للمقطع متاع البنزين ، تفكرت شكون نعرف مشي لليبيا الأسبوع الفارط ،قلبي و جعني،نكتب التعليق هذا و نمشي علي روحي

طلبني من بن قردان قالي تعرف لسونس غلا في ليبيا زادة ، طلع قداش ولا لبلان le plein
قداش-
سبعلاف-
ليترة بميا و ستين فرنك
قالي الليبية عاملين مضاهرات ، الليترة غلات كانت بميا و عشرة

FarFar a dit…

لقلق يعمل هاني جيت كملت الباقي توة
المطالب ؟؟؟
والله أنا شاهي يبداو عنا زوز أحزاب بنفس المستوي ، كيما نقولو تلكوم و تنزيانا و يبداو الزوز يتعاركو باش يفرهدونا احنا المواطن
واحد يقلك نشد أنا ليترة بنزين تولي بدينار ، لاخر يقلو تسعميا و هكذا دواليك، كمثال
ونحب زادة مثلا ، يعملو رافل لجماعة الي مزالت معرستش ، نساء و رجال ههه
هذي توة فكرة جاتني ، يولي واحد خايف يخرج مالدار يشدو يعرسولو بالسيف، ههه

هناء a dit…

عجبتني فكرة المرأة الشعبية بصح لازم تستورد زادة راجل شعبي باش تتحقق المساواة

Sonya a dit…

لتحقيق الإكتفاء الذاتي فإني أقترح كذلك أن يصطحب كلّ حارق تونسي بمحروقة أو محروقتين تونسيتين
و يمنع منعا باتا زواج الحارق التونسي بقاورية أو أجنبية
يحيا هذاكا هو يحيا هذاكا هو( مازلت محفظتش إسمك يا جديد)

FREE-RACE a dit…

هذه التدوينة مخالفة للدستور
و فيها إخلال بنصوص المجلة الإنتخابية النورمالاندية:
http://free-race.blogspot.com/2007/11/blog-post_22.html

Sonya a dit…

ولتكريز مبدأ التقفيف فإنّى أعلم سيادتم أنّي ورأس أمّى و النبي و الجاحظ لاتآمرت معاهم ضدّك
إلِي قالّك يكذب أعليك
:p:p:p

Stupeur a dit…
Ce commentaire a été supprimé par l'auteur.
Stupeur a dit…

wzir el 7ar9a dharbouh bel extincteur!
mouch kont kelib 3al 7ar9a? tawa hak kelib 3al korsi!


malla 7ala fi hal bled!
yokhrej ra2ishom mcheou
ca me rappelle :

إنماالأمم النعاج ما بقيت
إن هو ذهب حاكمهم, ذهبوا

Houssine Choyakh a dit…

ما تنساش تعمللنا صندوق للحرقة باش تسهل عملية الهجان و ترتع فيها وحدك

Anonyme a dit…

ع السلامة خويا الكلاندستان
باللازمة عجبني برشا برنامجك الإنتخابي. تقبلش تعملني ناطق رسمي باسمك
حبيت نقولك اللي أنا تسلفت صورة من مدونتك لقيتها معبرة على موضوع كتبت فيه
يا خويا شرفنا بالزيارة الله يرحم والديك

Mariouma a dit…

mra chaabya?
bellehi walah????
chnoua hel 5ounar?
ichayah ri5ek, ma 3jébtekch ena ou sonya?
alors les femmes tunisiennes aussi veulent des hommes chaabiyn kima naa3ref
walla c'est la révolution!!!
:)
mais bon j'ai grand coeur je vote pour toi quand meme, faut bien que qqun nous gouverne sinon on est dans la merde!

Gouverneur de Normalland a dit…

يا جماعة شبيكم مدخلين شعبان في قعبان ...اش مدخل الشقيقة تونس و التوانسة في نورمالاند و النورماليين ؟

Anonyme a dit…

"الطبرنة محلولة و الجامع محلول و انتي دليلك ملك"
Norfoth Si El Kafi!!!

Powered By Blogger