اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

mardi 2 octobre 2007

نعمبو الفلوس



مجموعة من الاطارات الجامعية المفشوشة (او العاطلة عن العمل ) في القهوة:
- انا و الله لقيتلو حل القلق
-كيفاش؟
- شريتلو صحبة, وليت اصحاب انا و ياه و متعاشرين بالحسنى , ما يسمع مني كان الخير و انا كذلك
-عندك حق ما جيتش لحومتنا...هاهي كعبة القلق (بيديه) هاهي كعبة الوكس...
(يسكتو شوية)
-تتذكرش هاك اللاعب من السيراليوني اللي جاباتو الترجي اش اسمو ؟؟
-انا في بالي من ليبيريا مش السيراليوني
تي لا عاد هذاكة جورج وياه اللي من ليبيريا-
- اشنية عاصمة ليبيريا
- منروفيا
- مممم ... منروفيا

(يسكتو شوية , واحد منهم يحرّك راسو و يعقّب )
-منروفيا

بعد دقائق
- اشكون عندو نكتة جديدة
-عندي برشة ما سمعتش نكتة جديدة
- انا ما نحفظش النكت ...الله غالب
- انا نعرف نكتة الليبي و دبوزة القاز
- تي قديمة هذيكا
- باهي نكتة البوليس و شوفور الكار
- مش منين هبطو في محطة المترو؟؟
(يضحكوا)
- ايه هذيكة هية
- ايا احكيهالنا
- هاكم تعرفوها
- تي ميسالش احنا قاعدين قاعدين

(يتعدى حنش سيفيل بحذاهم, يقلبوا الهدرة)
- خالد بدرة وين يكوّر توة ؟؟

(يفوت البوليس)
-ملاّ ميزيريا
- قدمت في الكونكور؟؟
- تي قدمت ماخذة في الخاطر متاع الدار , عارف روحي مللول موش ناجح
- انا غاظتني العشرة الاف متاع التنبري متاع المطلب
- و الله واحد قاللي تحبش تخدم في معمل الحليب ؟؟
- هي اشبيه ماهو اخدم و شد ايديك حتى يجيك ما خير
- تي الشهرية ميتين الف و زيدهم الاس ايفيبي , حكاية فارغة و ينجم يقلك روح في كل لحظة
- هانا قاعدين مالا حتى يفتحها ربي

(يتعداو مجموعة من شباب الليسي و الطلبة شايخين يلعبو و يبزنسو في بعضهم حطايط و سبادريات و الامبي 3 في الوذنين )
-مساكن يجهلو الحقيقة
- ما يفيقو الا ما يتحشالهم كيفنا احنا
-اش خص لوكان نرجع لعمرهم راني شديت صنعة و تعلمت الميكانيك و الا النجارة راني معلم توة و لاباس عليّ
- يا حسرة

(ياقف بحذاهم واحد من الشلواشة و القوادة اللي تراهم في لجان الحي و التلصيق و الشعاب المرجانية و مكاتب الاعتماد على الذات)
- الله يعينكم , ماهو تعرفو اللي احنا ديما نخممو في البطّالة , شغلنا الشاغل هو البطال اينما كان و حيثما وجد , ما تخافوش احنا معاكم قلبا و قالبا , و ننصحكم بالمثابرة و الكد و العمل المتواصل و خاصة و خاصة وسع البال , الفلوس؟؟ اشكون مازال يلوج على الفلوس ؟؟
وسخ دار الدنيا , نعلبوها الفلوس ....
ة


13 commentaires:

Skydancer a dit…

Abda3t el youma 5ouya el clandestino!

heyel barcha.

..ya3ambou el flous.

Marsoise a dit…

Ce que tu dis est très vrai, moi je dirais encore plus:
ya3ambou el flous wel diplomet zéda!

SAFOne a dit…

wallahi ya3tik éssa77a...machHéd 7ay qui refléte trés bien él mou3anét mta3 barcha chabab :/

3amrouch a dit…

rien a dire
merci pour la vérité
sympa ta visite ce soir

M.o.u.l.i.n a dit…

همم ... منروفيا ...
:-)

علاش ما تكتبش لالتّياترو يا كلاندو؟
خير مالنّصوص بلا طعم ولا رائحة الّي نعانيو فيهم

Anonyme a dit…

@ 3amrouche visite chnouwa ? viste technique ? :)

@ clando wa7dik yé weldi blastik mich houni :D

3amrouch a dit…

@nostra:lee visite nocturne.

Anonyme a dit…

3leh me tiktebech kteb : koll youm 2 pages , nqoulou 6 mois ella enty kammeltou !

taw nsponsorihoulek !

Clandestino a dit…

@skydancer:
اشنية "ليومة" ؟؟
توة هذا كلام ؟ انا في بالي بروحي نعبر على الدوام
و حتى يوم الاحد
حاجة اخرى ....ايا جيب الصحيح
يعمبو الفلوس , زعمة من قلبك؟


@bent elmarsa:
parcontre
ما نعرفش علاش انتي مصدقك و نزيد معاك
ينعمو الديبلومات و جد بوها الاول

@M.o.u.l.i.n:
TA suggestion je vais la considerer comme compliment
:))) merci

@saf1:
بالطبيعة مشهد حي و لو انو ابطالو مدفونين بالحياة

@julian sark:
اهو عندي اقتراح اخر, طالما انتي تحب تعملي سبوسورينغ و طالما انتي متفق معاي في ينعمبو الفلوس
فماذابية تمدهملي اسباس المصاريف متاع الكتاب و نضربو عصفورين بحجرة

@amrouch:
choufli sana3 mte3 7ajjem fi 7oumtek looooooooool

@nostra: hedhia visite nocturne entre copins
winti o93ed cheded garde 3la 5ater mate3refch mnine bech yjik echay

Unknown a dit…

Une belle transcription d'une réalité que chacun de nous a vécu à sa façon ...

FREE-RACE a dit…

بث مباشر من قلب تونس 20 عام من التغيير

Clandestino a dit…

@free race:
بالله يعيّشك من غير ذكر اسماء
يهديك ربي
الاحداث و الشخوص و المواقف اللي تصير في مدونة غدوة نحرق راهي من الخيال البحت لصاحبها و لا تمت للواقع باي صلة
و انتوما تلزو فينا باش ندخلو المحضور و يحتمل ترصيلنا الكل مقرطسين في عقاب رمضان

yes_in a dit…

bravo bravo
Tres créative comme imagination !!!
Ca l'air de la vrai Fiction ...
Ingénieuse méthode pour éviter la culture du 404 baché!
En un seul mot ABDA3TA!

PS Mon blog sur la blogsphère en Polande

Powered By Blogger