اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

jeudi 25 octobre 2007

Il était une fois رأس الشهر



قعد فوق بيروه, خزر للأوراق مكدسة و داخلة بعضها...شيء يعيّف... جمعة كاملة ما مسّ شيء و موش باش يمس شيء... خلي عرفو يخرنن عليه , هو من ربي عابدو و مكرهو في حياتو...

في الاطرف متاع الطاولة فم كأس مسّخ فيه عقاب قهوة البارح... يقعد يتامل في الكاس و يفكر... مازال على الخواء ما فطرش ما شربش قهوة...ماعندوش حق قهوة...ملا عيشة ,ملا حياة ,ملا دمّار... بالله العظيم لوكان يلقى كيفاش الا ما يحرق ... يحرق للجزيرة يحكيلهم على الميزيريا الكلبة و الزهر الأحرف اللي حطو في ها الخدمة.

يجبد الاعلان متاع الجمعة اللي فاتت, يقرأ و يخمم, "ينشل حقيبتها و قلادتها و يلوذ بالفرار على دراجة نارية" " موظف يستغل ثقة مؤجره و يختلس 30 الف دينار" " يقتحمان مكتب البريد بالغاز المشل للحركة و السكاكين "...

يجبد شطر باكو ليجار من جيبو (خذاه الصباح كريدي من عند العطار), يشعّل سيقارو...
زميلو سمع صوت البريكية تلفّت وفرح و بعثلو خزرة حبلى بالمعاني...
عمل روحو ما شافوش , تعوّذ من الشيطان و خرج.

شق الباركينق , فارغ يشقشق, ما فم كان كراهب المدير و الشاف سرفيس...

وصل للباب البراني متاع الادارة و عرضو زميلو...
"صباح الخير"
"صباح الخير , هاك جاي على ساقيك ... وينهية الكرهبة؟؟"
" لا لا اليوم الطقس طيارة قلت نتمشى شوية على ساقي, منها دورة و تفرهيدة منها شوية سبور.."

"ملا حالة , الطقس ما يولّي طيارة كان في عقاب الشهر ..."

قعد يخمم فين باش يمشي , ماعندوش وجهة واضحة في مخو , يمشي للقهوة ؟؟ يمشي يتلاوح على الابناك متاع البلدية و الا فوق القازون متاع الجنينة...

*******
من غير ما يشعر يلقى روحو ماشي للبانكة... ياقف قدام الموزع...يحط الكارطة , يكتب كلمة العبور و المبلغ ...
يسمّل بسم الله...
و ينزل على البوتون...
و كيما كان يتوقع , طلعتلو تصويرة الراجل اللي يضحك عليه " نأسف لتلبية طلبكم, رصيدكم غير كافي"

يدخل للبانكة ,
"السلام عليكم "
ما يردوش عليه
"بالله توة حبيت نجبد بالكارطة ياخي ما حبتش تعطيني فلوس..."
"قداش نومرو الكونت؟" "تي هاو الصولد في الروج , ماعادش تنجم تجبد راهو "
"امون يعيش اختي, نجمش نجبد 20 دينار , و الله مغصور ..."
"ما عندي ما نعملك , اذا ما عطاتكش الكارطة معنتها راك تجاوزت البلافون متاع السحب"
"في بالي في بالي تجاوزت, اما نحب ديباناج لراس الشهر, تسبقة"
(بالصوت العالي) " قول من الصباح راك تحب آفانس , يا خويا برة شوف مع الشاف داجنس (رئيس الفرع) امور التسبقة و السلفة كلهم عند الشاف دافانس "
(و تكمل بالشوية لكنو سمعها) " شنوة الهموم الجامدة و ملا حالة مكربة على صبحة ربي"

تلفت منا و منا, يلقى الناس الكل تتفرج فيه, و خاصة من غير الشهّارة من صبابي الفلوس و ذوي الحسابات المكتنزة,
عمل روحو ما فيبالوش ...

و هز ما تبقى من كرامتو و مسح ماء الوجه المكبوب في القاعة بالبابيي موشوار, و مشى للبيرو متاع رئيس الفرع...

ة
A suivre

12 commentaires:

cactussa a dit…

yistéhil!!!mala rajil!!!t9olou hakéka wyosktilha 7ata howa rajil ili yji ysataklou w howa sekit!!!!

al_moudir a dit…

héka 7al 90% mil fonctionnaires fi tounes, 3aychin 3ichet kléb we heka 3lech doub yokhrjou retraite yal9aw rwe7hom amradh 9alb we sokkor we tension wemba3d fel jallez !

Tarek Kahlaoui a dit…

طلعتلو تصويرة الراجل اللي يضحك عليه


LOL

arabicca a dit…

كلندو الباهي
المرّة الجاية أعلمنا خويا بالتوقيت متاع العرض متاع الحلقة هكة توة أنا آخر من يخلط لهنا بصراحة تنبزت
لا بالحق كى العادة أفحمتنا .....ربي معانا

Sonya a dit…

ابدعت يا صديقي...
ضحكتني الخزرة الحبلى بالمعانى و الراجل إلى يخرج من التلفزة يظحك و يقول ما عنّااااااش
,و أحزنني المشهد المأساوي الاخير
نصّ يعمل الكيف
قبلى حبلة... في التاسع
:D

Clandestino a dit…

@cactussa:
الراجل ما يعيبو كان جيبو يا آنسة
@el moudir:
رغم اللي اسمك مدير اما يظهرلي فيك عكس المديرين اللي ما يعرفوش الراجل متاع الموزع الآلي و بعمرو ما كلمهم و الا تعدى قدامهم
@tarek kahlawi:
آخي منين باش نجيبلو تصويرتو
انا ديجا كيف يطلعلي ما نجمش نخزر في عينيه
نجبد كويرطي و نمشي على روحي من غير ما نتلفت ورايا
@arabbica:
انا كيما تونس سبعة
ما نستعرفش بالمواعيد

اما فم مواعيد اخرين نحترمهم و ساعات نستناهم بفارغ الصبر
lool
@naufrage:

loooool
انتي زادة تعرفو السيد متاع الداب ؟؟؟
هانا طلعنا كيف كيف
عندك باش تصب الايسنس و الا ؟؟؟

تحبش نسلفك فلوس ؟؟

Clandestino a dit…

@arabbica:
انا راهو كيف تقلي "ابدعت كالعادة"
نحس روحي في المكتب و الا في الليسي وقت اللي الاستاذ يرجعلنا الامتحانات و يعطينا ملاحظات من النوع هذا
حسن جدا
رائع
متميز
متوسط
ضعيف
هزيل

arabicca a dit…

شنوة ازح
كيفاش باش انعبّر امالا
أنا متاع أبدعت و أفحمتنا ويا فتى و الههههههههههههههه
شنوة ها القمع المعرفي توة كيفاش اتحبني انجاوب امالا ماهو كل اناء بما فيه يرشح
والله عهلى خاطرك وعلى خاطر صباح الخير المزيانة توة نلقى حلول بديلة أما غير مضمونة النتائج
اى صباح الخير في حوشكم المرة هاذى
هههههههههههههههه

Clandestino a dit…

لا مالا خلينا في المضمون
و اللي نعرفوه خير من اللي مانعرفوعش
هي ماهياش خايبة راهو اما كيما قلت ترجعني للدراسة و الغصرات متاع الشفاهي و التمارين و شبيك ما جبتش الكتاب

حلوة هاذي "كل اناء بما فيه يرشح"

ة

AgoraTn a dit…

تحفون برشة المقال متاعكِ نستنّوا البقية بفارغ الصبر...

takamaka a dit…

la suite svp. ;-)

Clandestino a dit…

الصبر يا جماعة الصبر

اتو نكملوها الحكاية راس الشهر الجاي
:)))))

توة ماعنديش مخ باش نكملها القصة