اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

lundi 9 juillet 2007

"صوت تونس في الوطن العربي" و صوت الوطن العربي في تونس"

صحيفة "الصريح " هي صحيفة يومية مستقلة جامعة, تصدر 7/7 , و لكم معها موعد يومي بما في ذلك يوم الاثنين... و هي "صوت تونس في الوطن العربي" و صوت الوطن العربي في تونس" و هي منبر صحيح للاعلام الحر و النزيه ...و الرخيص (بـ450 مليم فقط).

رغبة مني في ايصال المعلومة للغير قادرين على الحصول عليها و في نشر راية الصحافة التونسية عاليا في المحافل الدولية (و محفل جرجيس) باش نستعرض العدد متاع اليوم (رقم 1908) و اللي قمت باختيارو بطريقة اعتباطية و باستعمال تقنية الأيادي البريئة للسحب.

في الغلاف نلقاو العناوين الأولى بالاهتمام و اللي تستقطب الرأي العام ففي الزاوية العليا نجد خبر حادث المرور اللي تعرّضلو "الياس برينيس ". و سي الياس هذا (ربي يلطف بيه) من رجالات البلاد و من الناس اللي قاعدة تغير في التاريخ و مانيش نبالغ اذا قلت انو الجيران و الحومة في حالة تاثر قصوى (ما فطروش ) و قررو تنظيم رحلة لفرانسا لتتبع حالتو الصحية و يهزولو بالمناسبة شوية برودو و كعبات دانون باش يبرى فيسع.
بقية الصفحة عادية : كاريكاتور مسروق من صحيفة عربية , انترفيو للسياح من ليبيا الشقيقة و مراسلة لسي صلاح الميستاوي (يقدم برنامج ديني نهارة الجمعة على تونس 7) من موقع الحدث اي من عين المكان و هو المغرب الاقصى.

في الصفحة الثانية نلقاو السيّد المحترم "وليد الزرّاع" و "الفكرة" متاعو....انا يعجبني وليد الزراع, يا خويا انا مضروب فيه و في الضمار متاعو , لأنو بصراحة يطلّعلي المورال , و يعطيني الثقة في إمكانياتي, و بكل تواضع نقول بيني و بين روحي إذا كان سي وليد الزراع عندو "بطاقة" يومية في صحيفة كبيرة و يعتبر روحو صحفي ناجح... انا مالا نجّم نولي عبد الباري عطوان .

من بعد ندخلو لـ"الصالون" و نلقاو تشكيلة من خيرة الأقلام التونسية و تنجّموا تحكموا على مقالاتهم من عناوينها:" دز جوابي لجربة" "خزنة الماء " "دور يا كلام على كيفك دور" و "برقيات" و تغطية لسهرة في مهرجان ماطر الـتي" ...سوف تظل راسخة في ذهن سمير الوصيف الذي فلت منها بطلوع الروح..."

نقلبوا الورقة ,
لهنا ما تسمع كان "كشفت صحيفة مصرية..." "كشف مكتب التحقيقات..." "كشفت احصائية عراقية..." " اورد الموقع الرسمي لحكومة كردستان...." "نقل مراسلون ..." "تونس استماع ..."
و ندخلو منطقة الكوبيي كوليي ... وهي صحن تونسي متاع فضائيات و صحف و مواقع انترنات و هز الروبة بألف و زيدو كاس بلاش و سعدك ياللي تحب التناوش ..

في الصفحة 11 نلقاو سي الحبيب الهمامي اللي يتابع المسلسل المكسيكي و يرصد حكايات العائلات التونسية و اش عملت فيهم ماريا كلارا (فلسفة وجودية)
و للشعب الكريم اللي مازالت تاكل عليه حكايات " اللذة الجنسية", و "صديقتاي في علاقة الشاذة " و "هل انا شاذة " , تقدملو الريداكسيون طبق دسم من "هاك اللاوي" مستورد خصيصا من المحروسة و من غير لا تحوير و لا تحريف ...
توة نورملمون انتي قدّر ربّي و سرقت ارتيكـل , و نشرتو من غير ذكر المصدر , على القليلة استر ما ستر ربي و حاول تضيّع الجرّة...
لا يا سيدي نحنا في الصريح يسرقو و ينشرو و ساعات ينسبو الحكاية لتونس لكن الداخل تلقى المقال هو هو , توّة نقولو في تونس "طالبة في الثانوية" و "محافظة كفر الشيخ" و "مديرية أمن الجيزة "؟؟

ما نطوّلش عليكم ان برنسيب اكاهو... وفات الجريدة, (مازالت اخبار الكورة و شويّة متفرّقات (كل يوم منامة, سودوكو, ملاحظات و شواغل, حكاية امرأة ,كواليس الفنون, جرائم من العالم , احذر ممارسة الجنس و معدتك ممتلئة , من عجائب المخلوقات , قميص لمراقبة حالة القلب )اما ماهاش حاجات مهمة اللي الواحد ياقف عندها).


توّة السؤال الفلسفي اللي يطرح نفسو و يحطّنا امام ثنائية شكبيرية:
عندك 450 مي , اما خير تشري بيهم جريدة الصريح , و إلا 4 سواقر ليجار.

انا شخصيا مع الخيار الثاني.و السلام ايّها الأنام الكرام

11 commentaires:

klem ellil a dit…

khoudh bihom chtayir "zebda chemya" anf3a

bizguellif a dit…

moi je refere ka3ba momento

FREE-RACE a dit…

صوت تونس في الرداءة و صوت الرداءة فى تونس :)

nasr a dit…

تونس جابت الرجال
و الرجال هجت من تونس

Tarek Kahlaoui a dit…

oh.. essari7... 3ala 7add 3ilmi il taqim al-su7ufi ma yzidich 3la ra'is etta7rir (Sali7 7ajja) wa zuz sa7afiyyin okhrin... chuftlichi il bayan waqtach wallat tukhrij? rani man7ib yfutni chayy...
:)

Clandestino a dit…

@nasr:
هات يا خويا ورّينا كيفاش نهجّو , جيبلنا خيط صحيح و توة تشوف , كيما يقول المثل "سيّب الذيب ترى عجاجتو " ...من ناحية الفلوس ما تخافش صاحبك راجل راهو
@tarek kahlaoui:
:))
انا معاك, جماعة الصريح كلهم صحفيين بالمناسبة.
صحيفة البيان نطمنك انها تصدر بانتظام
يوم اثنين
و اللي مغرومين بالسجع عندهم الحق في عنوان كروي موزون و هي عادة "بيانية" حميدة

nasr a dit…

@clando : radditni 7arra9? t7ibb tbilekni? leh ya ouildi? :D
non, plus serieusement, je pensais à Mohemed Krichén (jazeera), Hbib el Gharbi (mta3 jaouéz safar, ya 7sara..), ou 7atta jmé3it el koura fi 9anét 21 hajjou! (hethouma ma nchiddech assémihom)

MetallicNaddou a dit…

ya wallah 7oule, wallina birrasmi chaddin goal lil jarayed :D

7atta houa chay ynatta9 le7jar !

Joy... a dit…

A9ra مجلة الوطن العربي اللبنانية الصادرة من لندن, passe par toutes les rubriques et surtout par "akhbar magharibya", w ba3d 9olli.

Clandestino a dit…

@joy:
هاي زارتنا نسمة الصيف
:)))شيء كبير

merci pour le clin d'oeil,
by the way khemmemtch fil proposition mte3 elmarra lokhra ( la periode du promotion risque de s'écouler vaut mieux en profiter :))))) )

brastos a dit…

والله محتوى صحفي شي كبير..اون ديري علاش ماهيش هي اللي كاتبة من فوق : الاولى انتشارا في تونس..انا مع الخيار لولاني..خاطر بيناتنا.. ساعات هكّه تنفحلي باش نعذّب روحي..