اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

mercredi 17 mars 2010

زعمة نرجع و الا نواصل ؟؟




بعد اجتماع السيّد وزير المالية مع ممثلي وكالة التبغ و والوقيد و ممثلي نقابة المالية ، تمّ الاتفاق على سحب كميات الدخان المضروب من الاسواق و وقف استيراد التبغ من الهند و العودة الى المورّدين السابقية (من سويسرا أساسا) ..
و في نفس الاجتماع نفى الوزير الاخبار اللي تقول اللي ازمة الدخان كانت مفتعلة ، و الخسائر الكبيرة اللي عرفتها الوكالة في 2009 (اكثر من 15 مليار) كانت كذلك بفعل فاعل، باش تنخفض قيمة الشركة كمقدّمة لخوصصتها و التفريط فيها للبعض من (رجال الاعمال) الصّحاح اللي نعرفوهم الناس الكل.
انا هذا الكل ما يعنينيش في شيء..
ربحت الوكالة .. خسرت.. تباعت باختف.. و الا بالكريدي .. شراتها فلانة و الا فلان ..
مريومة ليلى سنية فاطمة حفصية خديجة بلقاسم ..ما يهمنيش في اساميهم ..
هذا الكل خاطيني
انا كمدخّن سابق .. عندي قرابة العام ماللي بطلتو جرّاء رداءة السجائر التونسية و عدم قدرتي على المواظبة على السجائر الامريكية و الاوروبية ...
اش يلزمني نعمل ؟؟
نرفع قضية في الوكالة و مسؤوليها اللي عملو الصفقة المشبوهة متاع التبغ الهندي ؟؟
نطالب بتعويض على الاشهر اللي قعدت ندخن فيها المارس (عادي و خفيف) المضروب؟؟
و الا .. وهذا الأهم ...اشكون باش يعوّضني على العام اللي عديتو من غير دخان ؟؟



13 commentaires:

سيجارة a dit…

واليـــــــــــــــــــــــاي
هاو رجع الليجار

WALLADA a dit…

عندك عام ملّي بطّلته و مازلت تسأل آش تعمل؟ و تحب تعويض على عام من غير تدخين ؟؟؟ تي حقّك تخلّصهم و تخلّص لنا المبروك ، تي أنت تتسمّى منعت قالّو نرجع .. فين ترجع ؟ تعاود تشعّل حريقة في صدرك ؟؟؟

Clandestino a dit…

يا ولادة
و الـ25 كيلو الي نزادولي اش نعمل بيهم ؟؟
توة تجاوزت العتبة الرمزية متاع الميا

bacchus a dit…

عندي سؤال بريء تو اللي عمل الصفقة مع الهند أكيد ثمة الهندي المقشر والهندي بالقشور لكن إذا المارس ليجار ظهر كلو قشور شكون كلا الهندي؟

Hamadi a dit…

أعمل جرية كل يوم ما فيها باس.
25 كيلو صحة و عافية ان شا ء الله.
ما تخممش تطيح في الميزان ترصيلك حاير في الحوايج.

WALLADA a dit…

شويّة رياضة و إعادة تنظيم لعاداتك الغذائيّة و اخرج حوّس و تمشّى توّا الرّبيع عالأبواب توّا تشوف قدّاش تخفّ و ترجعلك حواسّ الشمّ و التذوّق و الدّنيا تحلى و الّي باش تشري بيه دخّان رجّعو على روحك و خلّي شعارك : نقتله قبل ما يقتلني

Hada Ana! a dit…

الله غالب صديقي, ربّي يعطي الفول للي معندوش زروص, عندي جاري يبيع في الدخّان الموش مضروب بالوجوه و من حسن حظي أني في السليم معاه, أما خوك بطله من 3 سنين, كان جيت تسكن بحذيا , كنت نجم نوفرلك الكمية اللي تحتاجها :))

Anonyme a dit…

ya ouldi arja3 ou mouleha rabi, taou brabi matouachtech cigaro essbé7 m3a 9hioua express ou la cigaro ba3d loftour m3a kas thé ou la khali 3ad cigaro ellil oua9telli mayjikech noum ou tebda tokhzor mechoubek ou la kif tebda tekteb fi post, oula ouinti 7assel fi feu rouge oula oula , ya oueldi elmout bid rabi ou balekchi mena loua9tha ytal3ou doué :))

Clandestino a dit…

على كل حال نزيد نستنى
حتى يثبت كلام الوزير و يرجعلنا دخان زمان
و قتها نقرر

توة مانبيعش الافار متاع عام كامل بوعد متاع وزير تونسي

@bachus:
هو الهندي بيدو (الثمرة المعروفة بالتين الشوكي)
ولاو يصدرو فيه
@wallada:
بخلاف الربع قنطار شحومات.. ما صورت شي
الحواس اللي تحكي عليها ماتت منذ سنوات

@hada ana:
توة جاي تقلي نوفرلك الكمية ؟؟
عمناول وقتللي ريقي شاح في جرة الليجار و مكاتبي تنقبت في جرة الميريت و اللايت

للي تلزيت و نحيتو جملة و مالقيتش شكون يقلي نوفرلك

@hamadi:
خممت فيها فكرة الرياضة ..عندي بيسيكلات ديكاتلون خذيتها في الصيف الفايت للغرض

نتصور ما مشيتش بيها 10 كيلوماتر
توة عندها 7 شهور راقدة في القاراج حتى العجالي متاعها فسدو

Anonyme a dit…

ça fait bientot 7 ans que j'ai arrêter de fumer et jusqu'à à ce jour je ne suis se sure que j'ai pris la bonne décision.

Anonyme a dit…

ça fait bientot 7 ans que j'ai arrêter de fumer et jusqu'à à ce jour je ne suis se sure que j'ai pris la bonne décision.

Clandestino a dit…

@anonyme: pour les femmes , cesser de fumer est impératif pendant les grossesse, donc tu n'a pas a regretter ta décision.

Anonyme a dit…

non je n'été pas gros :) lorsque j'ai arreter je l'été devenu après que j'ai arreter. c t un coup de tête et j'ai arreter d'une façon "extremiste"

Powered By Blogger