اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

mardi 21 juillet 2009

ابشروا ...يا أهل قفصة


حسب صحيفة الشروق متاع نهارة الاحد (19/07/2009)، قالك السيّد وزير الشباب و الرياضة عمل رحلة مكوكية في ربوع ولاية قفصة و تجوّل بين مختلف المعتمديات و المناطق ، جايب معاه "حقيبة مالية" بـ 5 مليارات مليم ( اينعم خمسة مليارات بالتمام و الكمال مليم ينطح ملّيم) لإنجاز عدد من المشاريع لفائدة شباب الرديف و المتلوي و المظيلة و أم العرايس ، و بناء "دور شباب عصرية و ملاعب معشبة و مسابح " ... و قالك كذلك اللي المشاريع هذية حقيقة موش مجرد كلام خاصّة أنو وقتنا توة ماعادش وقت "دار الشباب الجامدة" اللي "تطغى على انشطتها الصبغة الرسمية و الخطابات الصعبة الفهم" و الشاب اليوم في حاجة "للانترنات و القنوات التلفزية العالمية و الرياضات الأنيقة مثل التنس و السباحة" ، و لذلك باش يتمّ توسعة دور الشباب و تعصيرها و تجهيزها بشاشات بلازما من الحجم الكبير و توفير الارتباط لكل القنوات التلفزية بما فيها المشفرة ، و باش يتمّ توفير الانترنات (متاع زوز ميغابيت في الثانية) بـ100 مليم الساعة...
و تم الاعلان كذلك عن انتداب كل خريجي شعبة التربية البدنية اصيلي الجهة بداية من السنة الدراسية القادمة ، و هاذية بصراحة و بدون (درجة ثانية) بشرى حقيقية للعديدين .

فمة بعض الحاقدين اللي يصطادوا في المياه العكرة اللي ربما يقولوا اللي الخمسة مليارات - لا قدّر الله -شويّة و ما تكفيش لإتمام كل المشاريع اللي ذكرتها ، هذوكم ما نجّم كان نوجّهلهم نصيحة من نصائح الدكتور عبد العزيز الجريدي باش يمشيوا يتمسّحوا على عتبات السفارات الاجنبية و يمارسوا الدعارة الحقوقية بعيد على بلادنا .



فـبالرغم من كون ّ جمعيات متاع كورة كيما الترجي او النجم عندها ميزانيات تتجاوز الحقيبة المالية متاع الحوض المنجمي ، و رغم ما يشاع عن بعض الناس اللي (و العلم لله) يصرفوا الخمسة مليارات هاذم في تبحيرة في جزر المحيط و شويّة كراهب ، او ما بلغنا من بعض الاطراف المشبوهة اللي فمة واحد تونسي شرى دار في امريكا الشمالية بـ 2 مليارات و نصف بحساب الدولار ،
فالخمسة مليارات مبلغ معتبر و كبير ، انا مثلا - و العياذ بالله من كلمة انا - مانتذكرش نهار مشيت للبانكة نلقى في الصولد متاعي مليار ، و نتحدّى اي من المدوّنين او القرّاء عاش التجربة (الرهيبة ) هاذي و كذلك الامر بالنسبة لغالبية الشعب الكريم ..
المليارات هاذية لعبة كبيرة برشة تتجاوزنا و تتجاوز اهالينا في الحوض المنجمي المساكين اللي خرجوا يصفقوا و يزغردوا (دائما حسب الجريدة ) احتفاء بالـحقيبة التاريخية .
لهنا عندي ملاحظة ربما تبدو للبعض شكلية و هي علاش يخليو 4 معتمديات في خمسة مليارات ؟؟ كيفاش باش يحسبوها ؟؟ كيفاش باش يقسموها ؟؟ لذلك نقترح اضافة معتمدية خامسة لاقتسام الحقيبة المالية ، لتسهيل الحساب و اضفاء مزيد الشفافية ... بحساب مليار لكل منطقة و ربي ينزّل البركة ... خاصة و انو الحكاية موش باش تفرّق برشة لعباد عاشوا اكثر من خمسين سنة في الميزيريا المزمنة.



5 commentaires:

Amal Koala a dit…

chya3mlou bihom dour ichabéb kén ma iwafroulhomch des débouchés?? .. bléd bkolha battalla .. fi 3oudh yo93dou fil 9ahwa yo93dou fi dar ichabeb? bkollou slata!

Gouverneur de Normalland a dit…

yessar bsarra7A 5 .. ou kima 9olt tou yet3arkou 3lih el 4 wilayat ... ykhaliouhom 4 .. el melyar elli fdhol .. ya3lnou en el machroub khaaless fil 9hawi el kol min hna 30 sna el 9oddam .. ou tou tchouf ..ellama el battala tchikh :p

لاعب النرد a dit…

هي الحكاية باينة راهي غير انتم تعقدوا فيها...علاش خمسة مليارات؟
أولا: خمسة، هذيكة راهي على عينين الحساد كيف الشباب متع البلدان الاوروبية و الا المريكان اللي ينجموا تتخبث خواطرهم و يحسدوناـ خمسطاش مثلا ما تقيش من العين و من الحسد أما خمسة ضربة ضربة و هذي حاجة معروفة
ثانيا: خمسة مليارات: على خاطر كافيين باش يكتبوا بيهم لافتات :" شكرا يا سيادة الرئيس على احداثكم دور شباب عصريةو ملاعب معشبة لشبان الحوض المنجمي، ما ظاهرلي كان خمسة مليارات ما تكفيهمش قماش و دهن للافتات
و أخيرا خمسة، ببساطة على خاطر موش سبعة.

البرباش a dit…

تو يغشوهم، الاكثر الملاعب يعملوهملهم حشيش اصطناعي... على خاطر يظهرلي الخمسة مليارات ما يكفيوش بش يكون العشب طبيعي، من ناحية الفلوس و الوقت زادة

تو ترصّيلهم مساكن يقاسيو جرة الإصابات

@ Gouverneur:
ههههههههه... يتولاك ربّي

palmier a dit…

après tout c'est une bonne chose mais l'important dans les détails: répartition budget, délai, fonctionnalité, etc..

Powered By Blogger