اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

vendredi 8 mai 2009

عندما تصبح القفّة و القوادة (المجانية) فكرة و موقف و مبدأ

انا في بعض الساعات نظن انو السيد ديانا (صاحب مدوّنة القفّة الوردية) يستهبل و يسخر من قراء المدوّنة و يسخر من عقولهم و يضحك على ذقونهم (الحليقة و الغير حليقة), وفي احيان اخرى نظنّ انو فعلا هذاكة حدّ نيتو و انو بفضل الرقعة الحديدية اللي اكتسبها ماعادش يهمو اش يكتب و اش يقول.
و هاذي الحقيقة ميزة (مقارنة) يتميّز بيها على البقية متاع المدوّنين بما فيهم المدوّن التجمّعي الوحيد (نوفل) , ميزة الرقعة الفولاذية و الموهبة متاع الخرجات و الطلعات و المواقف الغريبة , المتناقضة, المَرَضية , اللي لا يمكن ايجاد تبريرات لها سوى الاصرار على المواصلة في (درب ) هزّان القفّة...

يقلّك شنوة المانع انو ولد الماطري ياخذ دار و الا كرهبة , و هو حرّ يشري اش يحب و يبيع اللي يحبّ. و من حيث المبدأ انا متفق معاه 100%, ما فمة حتى مانع انو ولد الماطري يتزوّج (يستحسن) و يصلح في روحو , بالعكس شاب و صغير و نفرحولو كي يحقق حلم كل شاب و شابة تونسية, ...
هذا في حالة انو شرى دار في حي متاع السنيت و الا برتمان زوز بيوت و صالة في اريانة و الا بن عروس..., اما تقلي يشري دار في امريكا الشمالية بــ 4 مليارات , نقلك سامحني ...و من فضلك ... احترم نفسك..

باش تقلي عايلتو ؟ و المرسى و شركة الدّواء؟؟ في ظرف 5 سنين باش يشريو شركة النقل و يعملو نيابة حصرية متاع الكراهب الامريكان (الفورد و الشفرولي) و نيابة اخرى لشاحنات السيمي رومورك الفرانساوية (رينو) و نيابات البورش و الـ أودي و مجموعة شركات متخصصة في السياحة البحرية و مجموعة مؤسسات مالية (بنوك و ليزينغ و غيرها) و مجموعة اعلامية متكاملة (دار الصباح و غابة متاع زيتون )
مرّة اخرى نقلّك سامحني فيك ... و راهو موش باهيلك و ما يطلعش عليك و نقّص شوية راك عملت العار.

و في التدوينة الاخيرة تقلي اللي يلزم نقبلو الديمقراطية . و هذيكة هي الديمقراطية ...كاينو السذاجة و التخلّف الذهني هو من شروط الديمقراطية ..لكن لهنا شنية الديمقراطية ؟؟ وين هي الديمقراطية ؟؟ وين تشوف فيها ؟؟
الديمقراطية انك تدفع الاداءات و الضرائب و الاتاوات مقابل خدمات سيّئة او منعدمة من اصلو ...الديمقراطية انو تدفع الضرائب باش تتفرج في اعلام موجّه و متخلّف و عايش لتوة في عهد قوبلز و تمجيد الحزب الشيوعي و اللجنة المركزية ...الديمقراطية انو في 2009 مازلنا تخلّصو في فاتورة التاليفون الفيكس , و مازالنا ندفعو في 60 مليم حق الاس ام اس , الديمقراطية انو في 2009 و مازالت عباد تخدم (عند الدولة) بأقل من السميق و من غير تغطية اجتماعية ...الديمقراطية انو الحزب الحاكم يتبرّع بماله الخاص لاحزاب المعارضة ... الديمقراطية انو في الوقت اللي العالم الكل يمرّ بازمة و في الوقت اللي تعاني فيه برشة قطاعات من اقتصاد البلاد من صعوبات , ما تنتعش كان افاريات السيّد المذكور و افاريات اقارب زوجتو (اخوالها) , كأن الازمة زادة ولات تعترف بالأكتاف و ما يوحل فيها كان قليل الجهد و الحيلة...



باش نقرّبلك الصّورة تصوّرني انا (الكلاندستان) نحلّ عطرية و بعد 5 سنوات (بفضل الديمقراطية )نولّي مولى الكارفور
كان هاذي هي الديمقراطية اللي تحبنا نقبلوها السّماح (مرة ثالثة) و اعطيني ديكتاتورية نزيهة و نظيفة (!!!)و ما عينيش بـ ديمقراطية الاربعين حرامي


في الختام نأكدلك انو كلامك صحيح ...فعلا عندى عمى الألوان , انا تربّيت في اللون الواحد و كبرت في بلاد تحمل نفس اللون ...الا انو (و الحمد لله) , بريت و شفيت (من غير دواء) و نحّيت المرايات و رميتهم و كسّرتهم و حتى اذا كان في الفترة الحالية منخلطش نشوف الالوان الكل بفعل مظلة الديمقراطية اللي تظلل و (تـضلل) البلاد الا اني نطمح اني نكتشف كل الوان الطيف .

فالفرق بيني و بينك سي ديانا اني شفيت من عمى الالوان , فهو مرض ككل الامراض يمكن شفاءه و معالجته.
وهو خير و اهون من عمى البصيرة و عمى الضمير و عمى الغرور (والحمق) و عمى البقرة التي تُحلب في اليوم مئات المرات وهي تغنّي حماة الحمى .

17 commentaires:

AntikoR a dit…

أنا ماذا بيّا لوكان ديانا يعمل استفتاء ديمقراطي جدّا حول رأي المدوّنين لنظريّاتو و لأرائه.. و يشوف مدى "شعبيّة" مواقفو.. أما نخاف عليه لا الديمقراطيّة تجيبلو إحباط و تطيّحلو من معناويّاتو..

و نخاف زادة لا يطلعلنا بطلعة ستيل "الأغلبيّة متاعكم ماهمش فاهمين و ماهمش واعين و ماعندهمش المستوى".. و من بعد يولّي عندو هدف وحيد في التدوين.. ألا وهو توعيتنا و يطيح لمستوانا باش يفسّرلنا علاش و كيفاش و وقتاش نولّيو في المستوى

Hamadi a dit…

انتيكور السماح الجهل خير من هالشي محلانا هكة. حمد الله يا ربي قلبنا خايب و حاسدين الراجل على دويرة اش عمل المغبون ؟ غيرو جار رونالدو

Legend Of The Fall a dit…

@Antikor: ما عنديش أعلاش باش نعرف شعبيتي بين المدونين لأنها مش الهدف متاعي. ما اتقلليش انت زادة من هاك الجميعا اللي يلوجوا على الشعبية؟؟؟ راك كبير في عيني

@Clandestino: آش تحب باب؟ التلفون بلاش؟؟؟؟ بالكشي راقدين على بحر متاع بترول في تونس و ما في بالناش؟؟؟؟؟

توا هاذيكا اتسمي فيها مطالب انت؟؟؟؟ كي فاش تحب تخلص الفيكس؟؟؟

ظاهر فيك انت من جماعة اليسار. انا انسان عندو الفلوس بأي حق تطلب مني باش نسكن في دار متاع سنيت؟؟؟ و تحرمني باش نسكن في سيدي بو و إلا قرطاج و غلا نملك طيارة و إلا دار البرّا؟؟؟؟ بأي حق؟؟

ما عندك حتى حق باش تحكي في مواضيع تتخطاك و ما عندك بيها حتى علاقة و لا علم بمجرياتها

شكون قاللك اللي هالناس اللي تحكي عليهم ما يخلصوش الضرايب؟؟؟

و شكون قاللك الي شخص كان يملك عطار و الا يملك كارفور؟؟؟ تعرف انت شكون وراء كارفور؟؟؟

قبل ما تحكي على حاجة، حاول باش تجمع معلومات صحيحة مش هزّان و نفضان و من بعد تنجم تحل فمك

Clandestino a dit…

@Lady D:
u missed the point :(

Sarah Ben Hamadi a dit…

je suis d'accord avec tout ce que t'as dit et relevé dans ton post, mais y'a un truc que j'ai pas compris: l'épicier du coin qui est devenu Carrefour, je vois pas le rapport avec la démocratie!!

Anonyme a dit…

"و شكون قاللك الي شخص كان يملك عطار و الا يملك كارفور؟؟؟ تعرف انت شكون وراء كارفور؟؟؟"
Il vaut mieux que Diana arrête de jouer au con. on va le croire

Sarah Ben Hamadi a dit…

autre point, le sms à 60 millimes (et plutôt 50 millimes) et démocratie, je vois pas non plus le rapport, ce n'est pas une question politique, mais une question de concurrence là, et puis dans les pays les plus démocratiques, ils paient aussi leurs factures de téléphone! la démocratie ce n'est pas vivre gratos non plus

Anonyme a dit…

Clando y'avait ton mail sur le blog?
tu l'as enlevé??? y a t'il un moyen de te contacter sans paser par les commentaires. merci.
Hatem

tunisianblogger a dit…

يقول القائل الفلوس اللّي شرا بيهم صخر هذا الكلّ منين جات في يوم وليلة؟! باش تقلّي عائلتو عندهم ادوية صحيح اما شِرْكَة فيهم هوما وأَعْمُومْتُوا ثمّ المربوح ما يعملش هذا الكلّ!! ولو كان جاء يعمل راهم عملوه قبل! ثمّ الوليّد صخر خالطّوا شخصيّا ونعرفوا عاقل ونيّة وانا متأكّد انّوا النّسب الجديد والحاشية المزمّرة اللّي دايرة بيه (كيف كيف برشة منهم اصحابي قدم) هوما اللّي وصّلوه لهل الحالة على خاطر من النوع اللّي يزينولو كلّ شيء موش يفيقوه على الغلط...! حاجة اخرى صحيح هوّ يعمل في البزنس اما الفلوس اللّي داخل بيها في البزنس منين جابها؟ ساهل برشة:

تسهيلات من الدّولة (مثلا كيف فرّطولوا في بنك الجنوب وباعوا للمغاربة متاع الوفا بنك يعني هو في الاخر حطّ الفلوس في مكتوبو عوض عن الدّولة (يعني فساد وتلاعب بممتلكات الدولة...)، مثلا خذا ارض فلاحية فيها قدّاش من هكتارعلى ملك الصّوناد في موقع استراتيجي في سيدي بوسعيد لاصق اقامة سفير امريكا وشيّد قصر يسوى قدّاش من مليار مع العلم انّوا الارض هذي هي امتداد للخزنتين متاع الماء يعني لا مجال في التفريط فيها و مع ذلك تمّ ذلك...)

محسوبيّة ومحابات وعقود حصرية بدون وجه حقّ (مثلا: بايّ حقّ يعطيوه حقّ التّصرف في ميناء حلق الوادي حصريّا مدة 99 سنة علما وانّوا يدخّل مليارات في الشّهر؟؟؟! ثمّ باي حقّ يعطيوه رخصة حصرية باش يبني رصيف لحسابوا الخاص يعني ملكو!!؟؟....)

والامثلة عديدة واللّيستة مازالت طوييييييييييييلة...وهذا مالاخرّ يعني انّوا البزنس هذا من فلوس الشّعب رغم انف مرتزقة اللّون البنفسجي والطّاحونة اللّي يلقطو في فتفات اسيادهم اللّي ياكلو في قوت الشعب

Werewolf a dit…

فيما يخص الكارفور علاش ما تعتبروهوش مجرد مثال بيداغوجي؟! الفكرة توصل بغض النظر على مولاه

@Diana Mag:
فيما يخص الفيكس ما نرى حتى مانع أنو يولي بلاش موش على خاطرنا راقدين على بحر بترول و إنما بفضل التطور العلمي معناها فورفيتارمون، تسمعشي بال
VoIPو بالطبيعة موش باستعمال الأجهزة التقليدية متاع الفيكس

باهي حاجة أخرى فيما يخص مواقفك اللي يعتبروا فيها الأغلبية غريبة، لحكاية هاذي تفكرني بموضوع الدين في البلوغسفار...الملحد يهزأ بالمتدين و العكس صحيح و كل واحد يتهم لاخر بقلة البحث و الاطلاع...يا أخي كان انتي ضميرك مرتاح و ماكش تضر في غيرك ما عندي كان كلمة وحدة نقولهالك، واصل

Werewolf a dit…

@Tunisianblogger:
صدقني أمنية حياتي كان جيت عاقل ونيّة و مبعد يدورو بيّا أصحاب السوء و نولي نلعب بالمليارات بالله شنية تعريفك للعاقل و النيّة؟!!! جيناهاشي العاقل في البقر نطّاح

Clandestino a dit…

@hatem
تنجم تلقى المايل على صفحة البروفيل متاع بلوقر
نحّيتو على خاطر فمة شكون قاعد يقيّد فيه في القايماتت متاع السبام و مواقع اخرى غريبة متاع اشهار و غيرها
انزل على
afficher mon profil complet
توة تلقى المايل هوتمايل

@sarah:
عندك الحق
ما فماش رابط ظاهر
لكن النوت هاذية جات ردّ على نوت اخرى متاع ديانا

قالك اللي البحث في افاريات و عمليات البيع و الشراء و مصادر الثروة يتعارض مع الديمقراطية

@sidiboublogger:
ايه هذا الكل جابو بالنسبة متاعو في رأس مال شركة الأدوية

توة هذا كلام ؟؟

tunisianblogger a dit…

@ clando:

لا بالعكس ابدا انا ما قلتش جابهم من شركة "ادوية" يا كلندوا وها مقتطفات من تعليقي
"يقول القائل الفلوس اللّي شرا بيهم صخر هذا الكلّ منين جات في يوم وليلة؟! باش تقلّي عائلتو عندهم ادوية صحيح اما شِرْكَة فيهم هوما وأَعْمُومْتُوا ثمّ المربوح ما يعملش هذا الكلّ!! ولو كان جاء يعمل راهم عملوه قبل!"

"حاجة اخرى صحيح هوّ يعمل في البزنس اما الفلوس اللّي داخل بيها في البزنس منين جابها؟ ساهل برشة:

ـ تسهيلات من الدّولة...
ـ محسوبيّة ومحابات وعقود حصرية بدون وجه حقّ...
وهذا مالاخرّ يعني انّوا البزنس هذا من فلوس الشّعب..."

انشاء الله تكون فهمتني خويا

:-)

@ werewolf:

أمنية حياتك كان جيت عاقل ونيّة و مبعد يدورو بيك أصحاب السوء و تولي تلعب بالمليارات بالله من فلوس الشّعب؟؟؟؟؟ توّه يجي منّوا هكّة؟!


ثمّ نقصد بعاقل ونيّة يعني وليّد عادي، متربّي برشة، عاقل يعني ماعندوش مشاكل والاّ هزّان ونفضان، يعاون النّاس باللّي ينجّم، شبعان ولاباس عليه ماديّا... والله هذي الحقيقة!

لكن المشكل اللّي نشوف يلزّوا للمداخل هذي هوّ اوّلا النّسب الجديد (علما وانّوا الطّفلة كان صحاب معاها ثمّ قصّوا... وهوّ في بلجيكا رجعّلها...) يعني العائلة متاع مرتوا يحبّوا يضمنوا مستقبل بنتهم وعاملينو هوّ قنطرة باش كلّ شيء يجي في وجهوا (شوفوا اسم الشّركة: مجمّع الاميرة... (اشكوني الاميرة؟؟؟!!!)) ثمّ الحاشية متاعوا اللّي فيها برشة تكمبين ونفاق و ماكم تعرفوا التوانسة... وبرشة ناس ماللّي دايرين بيه اللّي يلوّجوا في الفتفات و يزيّنولو في كلّ شيء في عوض يفيقوه على روحوا اللّي راهوا ماشي في طريق غالط... وقال شنوة هاو يعاون في النّاس ويصدّق...

و ياخويا ربّي يهدي النّاس الكلّ

Werewolf a dit…

@Tunisianblogger:
شكرا على التوضيحات و الإضافات...أنا اللي نقصدوا اللي موش معقول اللي السيد نيّة لها الدرجة...على كل فكرتك وصلت و اتهنّى التمنّي متاعي هو في صيغة إنكاريّة
:))))

Anonyme a dit…

j'ai laissé le message suivant sur le blog de diana , mais elle ne semble pas très enthousiaste ni pressée à me répondre ...

Anonyme Anonyme a dit...

le problème dans tout ce que tu as dit , c'est de savoir quelles affaires il avait avant son mariage et celles acquises après ....cela résoudrait toute cette polémique et youfa el klem !!!!

Clandestino a dit…

bravo, ca résume tout, ou hedha elli mahebbech yefhmou esseyed

btw, Diana est un mec (lol)

Anonyme a dit…

il est peut être un mec ...mais pour moi Diana jusqu'a preuve du contraire est une femme ...donc je respecte sa féminité ...

Powered By Blogger