اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

vendredi 23 mai 2008

الاتحاد بين العهد السعيد و الشرق الاوسط الجديد


انا - و اعوذ بالله من كلمة انا - كنت دائما ننظر بعين الاحترام للمنظمة النقابية متاعنا, و لعلمكم انا منخرط و نخلّص في 1500 مليم شهريا عن طيب خاطر, و لوكان نلقى نتبرّعلهم بأكثر من هكة ( عكس الفلوس اللي نمدّها للصحاح نهارة 8 ديسمبر و اللي عادة يصاحبها دعاء -انشاء الله مستجاب- من قبيل انشالله مشومين عليهم و انشالله يطلع فيهم و في صحتهم و في صغارهم ...)
فالاتحاد رغم كونه منظمة نقابية عمالية ذات دور اجتماعي بالأساس الا انه يختلف عن باقي النقابات في العالم بدوره الهام في حركة التحرير و بناء الدولة المستقلة, و ببعده و وزنه السياسي في البلاد اللي طالما مثل الوزن المعادل او المضادللحزب الحاكم.contrepoids

لكن بما اننا نعيشو توة في وقت كلب , ما فيه ما يعجب, و كيما في برشة مجالات اخرين, مبعد الكبارات يطلعو البعابص ( حاشاكم) و بعد ناس كيما حشاد عاشور بن قدور البكوش و غيرهم... يطلع السحباني و اللي بعدو و جماعتهم...و بدأ عهد التفتح و الانفتاح و تحسنت الامور , و ولات فمة ميزانية للكراهب المضخمة و ميزانية لتوسيع البيروات و تكييفها ... و ظهر نوع جديد من التضحية و النضال في سبيل العمل النقابي, فواياجات , خرجات, هاي لندرة, هاي بروكسال, هاي جنوب افريقيا هاي طوكيو هاي نيويورك...

و كيما يقولو في ريا و سكينة " ناسبنا الحكومة و بقينا قرايب " , بعد قصة حب طويلة ,بدأ شهر العسل مع السلطة, تلقاه ممثل الوزارة يقلهم خوذو10% , و هوما يقولولو لا يا راجل عيب , 5% فيها الف بركة عندكم ازمة طاقة و دعم و ديون و عجز في الميزانية...فولات المفاوضات الاجتماعية توفي في شهر و اللي يتكلم على الخدام و الزوالي يولّي معارض و متسيّس و يحب يدخّل السياسة للاتحاد , و اللي يجبد كلمة اضراب تقولشي سب الدين , فالاضراب توة ولى كبيرة من الكبائر.
و ضاعت المصداقية و مشات اخلاقيات العمل النقابي , و حتى الديمقراطية و الشفافية اللي كانت تميّز المؤتمرات و انتخابات اعضاء النقابات و ممثلي القطاعات مشات على روحها, و طلعت فازة التزكية و التصويت بالاجماع من غير اقتراع, اي انو اللي يحب يشد المسؤولية , يجيب جماعتو في القاعة متاع الاجتماع و في الوقت المحدد ياقفو و يهزو ايديهم و يهتفو بإسمو فيتحط الجميع امام الامر الواقع و اللي يحب يحتج و الا حتى يطالب بالتوضيح يتحط في الخندق المضاد و في اول فرصة يجبدو عليه الساش ... و حتى الناس اللي تم انتخابهم ديمقراطيا من قواعدهم و من جهاتهم - في بالي ما ينجم حد ينحيهم - يقعدو ديما تحت المجهر و تحت الرقابة المباشرة لأصحاب البيروات المكيفة متاع بطحاء محمد علي, و مع اوّل اختلاف يلقاو رواحهم آوت, كيما يعملو جماعة الحزب الواحد وقت اللي يطيرو مسؤول و يقولو عليه في التلفزة ( دعي لمهام أخرى) , و هذاك اللي صار للسيد كاتب عام الاتحاد الجهوي متاع بنزرت المسكين اللي - بقرار من لجنة النظام - مدّ مفيتحات الميقان و مفيتحات البيرو للعسّاس و مشي على روحو , و يقال انو لتوة موش فاهم علاش... نفس الشيء للسيّد "عدنان" , النقابي في جهة قفصة, اللي تعرف اكثر بالخطابات متاعو اثناء ثورة الحوض المنجمي 2008 - تنجمو تشوفوه لهنا- اللي لقى نفس المصير , و ( بسرعة قياسية ) اصدرو فيه قرار تجميد النشاط لمدة 5 سنوات , رغم اللي ظروف اعتقاله فيها برشة تجاوز و فيها اعتداء واضح على حرمة المنظمة , بحيث قعد وحدو المسكين و الله اعلم اش باش يصير فيه بعد انتهاء الازمة...

و اليوم كيما تعرفو, بلادنا تستعد لاجراء عملية تجديد نصف الغرفة البرلمانية الثانية ( مجلس المستشارين ) , و كيما تعرفو زادة انو الاتحاد كان قاطع المجلس هذاية بعد تردد كبير وبعد تضارب في التصريحات و القرارات...و كانت برشة عباد راهنت على الموقف هذاية , و تصورت انو موقف باش يرجّع الاتّحاد متاع بكري و يرجّعلو الهيبة و الوزن متاعو في البلاد خاصّة اذا تطبّق القانون اللي ينظّم عملية التمثيل في مجلس المستشارين و اللي يفرض وجوب مشاركة المنظمات الوطنية (فلاحين عمال اعراف) و اللي - على حد علمي - ما فيهش صيغة لمواجهة وضعية المقاطعة , و يخلينا قدام برشة فرضيات حول مصير المقاعد متاع الاتحاد توصل حد ابطال عملية الانتخاب لعدم استكمال النصاب .... حصيلو الحكاية وقتها تفضّت سلميا و هذاية من ميزاتنا في تونس , ما يوقف قدامنا شي لا قانون لا دستور لا شي , وقت اللي نقررو حاجة يلزم تمشي مهما كانت الظروف...

و اتضح انها عملية المقاطعة اللي راهنت عليها العباد , ماهي الا مهزلة و اقرب منها للعب الفروخ, و مثلت جولة من جولات العرك على جني ثمار العمل النقابي... و حسب بعض المصادر في بطحاء محمد علي , قالك اللي صار هو أنو الناس الكل حبّت تكون ضمن قائمة الـ14 ( على خاطر عملية التمثيل كانت باش تم باقتراح الاتحاد لقائمة تقوم السلطة فيما بعد باختيار 14 اسم و المصادقة عليها) , و الناس الكل كانت طامعة في مقعد المستشار و الفرص اللي باش يتيحها (زوز ملاين شهرية , حصانة , تقاعد محترم , زيادة على القدر و الوهرة...)
الا انها الحصة المحدد موش باش تززي الناس الكل ... اشكون باش يززيو ؟؟ اعضاء المكتب التنفيذي؟؟ كتاب عامين الجامعات ؟؟ و الا ممثلي الجهات ؟؟

و كيف آيّسو من الهدرة قالك عليا و على اعدائي و في التراب و الا لأولاد الحلال ( ههه) و حرمت الحكاية و بطلت من اساسها... و هذاكة نهار و هذا نهار و قعدو الكراسي متاع الـ
فارغين , و اللي غاب غاب قسموUGTT ـ



13 commentaires:

Anonyme a dit…

حويججه بركه ما وضّحتهاش في هالنص التحفون
عدنان الحاجي الكاتب العام متاع الأتحاد المحلّي بالرديف اللي عصابة الأتحاد وقفتو عن العمل النقابي ’ عدنان يا سي الكلندو لا كانت عندو لا مقان و لا حتى بهيم
و راهو ما قعدش وحدو كيما تقول معاه الى الأن الاف الناس من الحوض المنجمي و من بقايع اخرى

titof a dit…

صباح الخير يا احلى كلندو
بوست عالمي يعطيك الصحة وبالنسبة للخدامة والله بالحق شي ياسف يخدمو ومن بعد يطردوهم نحكي على المعامل و الاستثمرات الاجنبية الي نهار كامل يذلو فينا بيهم ويقمعو فينا عليهم بحجة انو لا صوت يعلو على صوت المعركة
و الخدامة حد ميضمنلهم حقوقهم
وقتاش نخرجو من دولة العصابات لدولة القانون والمؤسسات والله شي يحشم 2008ومزلنا نخمو هكة ونتصرفو بالطريقة هاذي


خارج الموضوع
مبروك علينا البطولة

Clandestino a dit…

@ikbel:
للأسف الاف العباد اللي تحكي عليهم ماينجموش يعادلو الدعم اللي ممكن كان الاتحاد يقدمو ... و خاصة من الناحية الاعلامية
@titof:
انا الصباح نلقى اثار العركة متاعك انتي و المعلق المجهول لذلك لجأت للمقص لانو فمة برشة سب و برشة تطييح قدر من غير موجب

بالنسبة للبطولة, مانجم كان نباركلكم و للشعب الافريقي باللقب اللي و الحمد لله جاء بعد صبر طويل

Anonyme a dit…

يعيّش خويا رام ولّو يقصّو عليك في 2000 معناها زيادة بنسبة 30% موش مشكل على خاطر الجماعة كثرت مصاريفهم و حواستهم النضال لكل ولاّ في الخارج في فنادق و منتجعات في سويسرا و لبنان و..و.. تصوّر عندنا نقابيين ثروتهم بالمليارات و راجل كيما عدنان حاجي يجمّدوه لكنو ديما دافي بأهلو و ناسو في الرديف و شوي نقابيين مازالو يقاومو romdhane.maktoobblog.com

Clandestino a dit…

ههه
يبشّرك بالخير يا سي رمضان
انا ماهو عندي مدة ماشفتش
el bulletin de paie
ما فيباليش بالتطورات الجديدة

ps:
الجملة الاولى اللي في البوست (لوكان نلقى نزيدهم) نقصد بيها قبل موش توة
هه

titof a dit…

نحب نولي نقابي يا كلندو شنعمل
على الاقل توفى رحلة التكوين الي حكيت عليها انتي

Anonyme a dit…

@clando
Je suis désolé si j'ai fait de ton blog une tribune à un débat avec ce pauvre type. Mais j'ai pas pu lire sa reponse.
C un regret de ne pas avoir pu m'illuminer de ces idées certes brillantes mais quelque peu ridicules. Mais bon de toute façon ce n'est surement pas un texte de Jean-Paul Sartres. Ca doit etre une reponse a base de mots qui commencent par z. Manich mich nwassa5 withnaya biha.
Encore une fois je précise que je n'utilise jamais de gros mots ni dans ma vie courante ni dans mes commentaires. Donc je vous laisse le soin de lui expliquer à lui la politesse et les bons moeurs ainsi que les règles du débat civilisé.

titof a dit…

@anonyme
شبيك كبشت عادة اكهو قص علينا البارح هزينا البطولة وهانا تو وخيان ماو لازم شوية مشكسات
هيا مصار شي ايجا نبوسك

Anonyme a dit…

@titof
Je suis content que vous le preniez ainsi. Désolé si j'ai eu un ton assez fort hier. Mais comprenez que j'ai été un peu heurté par les mots "bhim" ainsi qu'un autre mot que je repeterai pas. Mais bon, ca fait rien on oublie tout. Rien ne s'est passé.
w inchallah ettitre hatha yjib d'autres titres.

Anonyme a dit…

http://triangledepanne.blogspot.com/ ياكلندستينو راهي الحكاية أكبر مما يتصور الناس...والعملية النقابية تحت ظلّ قيادتنا النقابية الرشيدة بالمال و الموالين والمتزلفين والجهوييييييين القراقنة...اصبح شبيها بعصابة المفسدين...ولا تصحيح نقابي و لا هم يحزنون...بل وقع توسيع دائرة اللصوص والمبتزين ليتحوّل من 6 لصوص في عهد الأمين العام السابق إلى عشرات في عهد الأمين العام القرقني الجديد...وهكذا التصحيح يكون...انظر الى العنوان في الأعلى...

Anonyme a dit…

تحياتي يا كلندو وياشباب
نرجع للشلة بعد غياب مطول
الحاصيلو يعطيك الصحة في ها التدوينة اللي تبرد على القلب في ها الوقت الأقحب اللي صار فيه النضال بكراهب الميقان
كيما قال صاحبنا يا كلندو راهو القصص ولى دينارين على خاطر مصاريف فريق 14 آذار زادت
عشنا وشفنا وقت اللي تحولت فيه النقابات إلى مجالس صحوة.. مجلس صحوة بنزرت.. مجلس صحوة باجة... مجلس صحوة قفصة... مجلس صحوة مدنين... مجلس نخوة تطاوين على غرار مجلس نخوة نينوى
alibabaa.maktoobblog.com

titof a dit…

@clondo
شنو خويا كلندو وليت تعمل في اجتماعات نقابية في المدونة متاعك متخافش لايفكولك رخصة الحانوت و تراسيلك تجري في نقابة المدونين

RedPrince a dit…

فما برشة حاجات غامضة في حكاية إنتفاضة الحوض المنجمي و علاقة اللجنة المفاوضة (على رأسها عدنان الحاجي) بالإتحاد, هو صحيح الإتحاد جمدهم مالنشاط النقابي يا كلاندو أما نزيدك حاجة, الأمين العام إتصل بالقصر بش أفرجو عليهم ليلة 10 أفريل, فما تيارات متصارعة في الإتحاد, الأمور ماهيش بالبساطة هاذي. عالعموم عدنان الحاجي و جماعتو ماهمش وحدهم, أهالي الحوض المنجمي الكل واقفين معاهم. و إذا الشعب يوما أراد الحياة فلا بد أن يستجيب القدر

Powered By Blogger