اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

lundi 28 avril 2008

شباب العزّة بالملايين...يرفع الراية البيضاء

اليوم ما لقيت ما نعمل , قلت خلى نعمل طلّة على الفوروم الجديد متاع استشارة الشباب , و بحكم انا ماعادش شاب و مانيش معني بالموضوع اصلا حبيت ندخل نهارة الاحد, على الاقل ما فماش شكون يعس ... شكون يعرف يشدنيش رادار و يتعدّالي محضر ولوج منطقة محجّرة ولا قضية في استعمال تكنولوجيات الاتصال لاقتحام محل الغير عنوة و عدم الالتزام بـ تحديد سن الشباب التي يضبطها القانون ...

(و "تحديد سن الشباب" او "تعريف الشاب بالاقل من الثلاثين" بالمناسبة يعتبر فريد من نوعه في العالم ...في البلدان الاخرى تنجّم تكون شاب و عمرك سبعين و الا ثمانين سنة , أمّا احنا فالشباب متاعنا يوفى قانونيا و يمشي دون رجعة من النهار الأوّل متاع الثلاثين ... رغم انو في حالات اخرى ما نعطيوش اهمية لعامل الزمن, فثمّة احداث وقعت عندها اكثر من العشرين سنة و مازلنا لتوّة نعتبروها جديدة و عندنا حاجات وفات مدة الصلوحية متاعها عندها قداش لكننا لتوة نعتبروها انجازات و مكاسب و نفتخرو بيها بمناسبة و بدون مناسبة, فعلى ما يبدو الحاجة الوحيدة اللي فيسع ما توفى الصلوحية متاعها هي الانسان و ماذابينا العباد ما تطوّلش برشة فترة الشباب متاعها , قصّر و دلّل , و اللي حج حج و اللي عوّق عوّق... )

ترجع لموضوع منتدى الاستشارة ,
دخلت , و قعدت نستكشف في الموقع .... 3500 عضو مسجّل , 1500 توبيك , حوالي 3400 تعليق و مشاركة (وهي تنجم تكون احصاءات باهية لبلاد فيها 500 مدونة على 10 ملاين بشر ), و بانر بنفسجية من فوق ....

نلقى زادة اعداد كبيرة من ناشطي دور الشباب و الجمعيات الشبابية و الكشفية و البيئية و نوادي دور الثقافة و حتى اعضاء لجان الأحياء ... و النوعيات هاذي رغم صغر سنها الا انها - و نظرا لاستهلاكها المفرط لقناة تونس سبعة و اذاعة الموزاييك و قناة حنبعل و ادمانها صحف الصريح و الحدث و الاعلان و للبرامج التربوية الطيّارة - ولات تعبر في اللغة الخشبية و ما ينجّمهاش لا بن نصيب لا بسيس لا الجريدي , لانو فرق بين اللي حل عينيه يلقى روحو يعوم في قفّة (سعف) و شرب الحليب في البندير و بين اللي تعلّم الصنعة هاذي في الكبر

و لهنا تنجمو تشوفو بعض الامثلة موش متاع الغة خشبية على خاطر هكاكة يحتمل ترصّيلي جايب الفوروم الكل لهنا , اما امثلة متاع رداءة و ضحالة و فيها برشة ابداع و عبقرية تظهّر مليح نتائج الاصلاح التعليمي :

قاسم امين , شاب تونسي عضو في المنتخب الوطني للرياضيات يرى انو من اولويات تونس الغد انها توفّرو تسكرة الطيارة لباريس
الآنسة رحمة , تحب شهرية للبطّالة ... اما ماقالتش قدّاش
زياد (التعليق الخامس), في اجابتو عن سؤال " أنت التونسي، ماذا يميّزك عن الآخر؟ وماذا يجمعك بالآخر؟" قالّك انو التونسي يتميّز بالعلم (درابو) و دينه الاسلامي ....( ما فمّة كان احنا مسلمين و عندنا علم)؟؟؟
أيمن و في اجابتو عن نفس السؤال السابق قالك اللي التونسي يتميّز بالقوة و الشجاعة و الابداع.... ( يظهرلي السيّد تفرّج برشة في داي الشجاع)
و دائما على نفس السؤال يردّ خزندر بقوله انو التونسي يتميّز ببلاده التي لا حرب فيها و انه فرحان كون مشاكله لا تعني شيئا امام مشاكل الشاب الفلسطيني...

اما اكثر حاجة تلفت الانتباه هو الاستفتاء اللي حطو شاب تونسي مقيم في شتوتغارت , قالك يحبّنا نبدّلو علم تونس بالعلم الابيض...
برجولية يعطيه الصحّة سي أيمن على الاستفتاء , انا واحد من ناس عجبتني الفازة , تصوّرو علم ابيض في القرن 21 ؟؟ في طمبك حرب الارهاب و محاور الخير و الشر و الكفار و المسلمين , في عصر موضة احتلال الدول ... نبدّلو علمنا بالعلم الابيض... وقيّت باهي و مناسب , هو العراق و ما ادراك ( بلاد حمورابي و نبوخذنصر) بدّل العلم , اخنا زادة , و رغم انو صدّام مازال لاباس عليه, نجّمو نبدّلو العلم , و هاو باش نورّيكم ايجابيات العلم الأبيض:

الراية البيضاء حسب اتفاقيات جنيف هي رمز السلام و الهدنة و الاستسلام , و بالنسبة لينا ماعادش تولي عندنا حتى مشكلة : اللي يقوى عليه الضرب موش لازم يلوّج في شوليقة بيضاء , يكفيه انو يرفع العلم و كفى الله المؤمنين القتال , و اذا نهار فاقت امريكا و الا اسرائيل ببلادنا و قررت انها تحتلها , ساهل ياسر , العلم ديجا حاضر و من غير ما نستحقو للبيانات و البلاغات الرسمية متاع الاستسلام ...


بعد ثورة اكتوبر و لجوء القيصر و جماعتو للراية البيضاء (موش للاستسلام و لكن للحرب و هذا امتياز آخر للراية البيضاء - دوبل فنكسيون) , قعد العلم الابيض رمز للإقطاعيين و النبلاء من حاشية القيصر ... احنا زادة اذا ولات عندنا طبقة من النوع هذا (على خاطر توة ماعناش) نبداو بقدرة ربي حاضرين باش...


اللون الابيض هو لون العذرية و و ثياب العروس في معظم المجتمعات هي عادة بيضاء , و بناتنا زادة كانو يلبسو الابيض ليلة افتضاض العذرية , و كانت الرجال تفتخر بالسورية البيضاء اللي فوقها الدم ... و احنا بالعلم الابيض نحضّرو في السورية البيضاء باش نسيّلو فوقها الدم ؟؟
الله اعلم دم شكون

9 commentaires:

Walid ben omrane a dit…

hakaka m3a libya ywali 3endna drabu Jam3iyet Jerba hahahahaha

FarFar a dit…

ahla clando
à propos de l'age, marra nahki m3a tfol saheb tfol sahbi mchina nwassli fih lel matar maichi lel canada..
9allek elli ghadika , aya fel canada, mamnou3e a3lihe i9addem CV wey7ott fihe l'age mtai3ou.. khater l'age yetsamma 3and8om critère discriminatoire.. w9allek eeli fi ay 3mor tnajjem tebda 7yaitek , ghadi,.. chay ya3mel el kife..
sinon cha5sien haidhi esticharet echabaibe na3refha ken fettalfza wa9telli yes2lou fihom whouma ijawbou.. lai na3ref chnia hkayet8a , lai mnine jet , lai fine i7eb youslou.. aina ma devise ds ma vie, akhtawni barka, et ken thamma haja 7atta 7add mai ya3tihelek , laizmek tchammer 3ala dhra3atek wetjibha biyidiek ..et kima i9oulou les excuses se sont les languages des faibles..
wassalaime

mandela a dit…

wallahi 7lowa hedhi 7keyet tabdil edrabo...eka l3am doctour lmarzougui 9alek nbadlou drabou wnroudouh vert wfih ka3bet degla 3la jnab wsboula 9am7 wka3ba sbaress
wsna fi doc a tunis fi film wled lenine tata nadia lfanni baddlet nejma wel hlel bmtar9a wmenjel...
chkoun zed...

FarFar a dit…

صباح الخير
تعرف يا كلندو أنا في غالب الأحيان الي نمشيلو للمدونة متاعو و ميجاوبنيش ما نرجعلوش ..لكن انت ناس ملاح و حتي كي اطفيني حالة عادية
اسمع ليوم الصباح وانا باخل باش نقوم و كل مرة نزيد درجين في الجوال متاعي جات المخي برشة أفكار..
من جملتها قلت هذومة الجماعة المتعصبين ضد الاسلام ..و حك راسك قول الي يجيء ..وكأنهم يحبونا بالسيف نؤيدوهم في أفكارهم ثماشي ميحسو ببعض الاطمئنان في أفكارهم..
بون موش هذا موضوع حديثنا..دونك مالدين ..تفكرت البوست متاعك و تساؤلت علاش في التلفزة في القنوات الرسمية و الخاصة ماثماش متدينات يسؤلو فيهم في الومضة الاشهارية متاع الحوار مع الشباب..ياخي هوما ماهمش مالمجتمع التونسي و ميكونوش شريحة مهمة ياسر فيه..
نختمها بالطرفة متاع فوكس الكلب.. وفي آخر النكتة و قتلي قال فوكس *** نقول أنا حوار**** ههه

Clandestino a dit…

صباح الخير سي الفرفر
توة بيناتنا احنا طفيني و ما تطفينيش
ساعة علّقت عندك يحتمل مئات المرات و انت كذلك
بحيث انو حكاية التطفية هاذي تجاوزناها عندنا مدة

فيما يخص الحوار ماهو قالك الشباب هو الحل موش المشكل
و الشباب اللي تحكي عليه هو من جملة المشاكل اللي يحبو يحلوها

FarFar a dit…

ههه
وهو كذلك
كلندو توة مازلنا نحكيو بمبدأ أنا جيت علقت عندك و انت جيت علقت عندي ..نتصور كبرنا علي الشيء هذا
:p
بربي جيست نحب نزيد كلمتين عجبوني علي المقدمة متاع التعليق متاعي الي فوق هذا..
حبيت نقول الي الجماعة الي حكيت عليهم عندهم الاجتهاد و تفعيل العقل قرين الالحاد..
و الايمان قرين الجمود..
ياخي مخطرش في بالهم الي ثمة ناس تخمم ولقات الي الايمان هو الحل ههه
بربي باش ما نحكيش علي روحي.. المرة الي فاتت جابو واحد في الجزيرة في لقاء خاص رئيس المؤسسة الفلكية و الا جامعة علم الفلك تي حسيلو دكتورو باحث أصلو فرنساوي وغول ياسر ..
..
الراجل أسلم و يحكي معاك بالحجة و بالعلم و البرهان و قفلي مخي.. و الغزالي و ابن رشد و آخر ما وصلت ليه البحوث العلمية..
باش يجيني واحد عامل مدونة لبارح و يقلي وصلت للحقيقة ههههه
اي جنابي ههه

Clandestino a dit…

هههه
اللطف على اجنابك

الــبوهــــالـــي a dit…

خارج عن الموضوع
اقترحتك للعبة هاذي : http://roufrouf.blogspot.com/2008/05/blog-post.html

mandela a dit…

bordel de bordel de bordel de merde
un diplomé chomeur en greve est mort hier electrokuté a redeyef!
des confrontations se sont eclaté o bassin minier...