اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

vendredi 25 avril 2008

يا قفاصة كانكم توانسة يزيو مالغفاصة... و اصبروا لمولاكم


كيما الناس الكل كنت في المدة الاخرة نتبّع في أزمة قفصة و المشكلة اللي عملوها جماعة "الحوض المنجمي" (كلمة ماشية ياسر ها الايامات و على الموضة كيما المثلث السني في العراق), و قعدت باهت في الناس هاذي , اللي تلوج على الشغب و تشري في الشبوك راسين براس, الشرذمة الضالة, اللي تسعى لبث الفرقة و البغضاء بين افراد الشعب الواحد, و تنشر في الفوضى و تخل بالنظام العام في بلاد الأمن ...و الأمان.

توة بالله اشبيهم القفاصة كيما هكة ؟؟ علاش هكة ياسر أنتيباتيك و مكرزين ؟؟

ياخي فيهاش حاجة لوكان قعدت اولادك بطالة ؟؟ نهاية العالم ؟؟
برة راهو بتت ليلة و الا ليلتين و الا حتى شهرين بلاش ؟؟ حاجة عادية و تصير في اكبر العايلات... تي شوفو أثيوبيا يا رسول الله, كانت مضرب الامثال في المجاعة و الشر و الميزيريا,و توة ولى عندها جيش و ولات تحتل في الدول و يقولولها "الاحتلال الاثيوبي" كيفها كيف أمريكا.
شبيهم القفاصة ما يصبروش و ما يعرفوش يتصرفو ؟؟
ساهلة هي التنمية ؟ ياخي باقات ماجيك ؟؟ كن فيكون ؟؟ ماهو مرة عندك و مرات عند الاخرين ... و اقعد استنى المخطط الجاي ...
ياخي لازم الناس الكل تعمل كراهب ؟؟ لازمة هي الديار؟؟ لازمة هي الخدمة ؟ شوفو اليونان و الرومان بكري, شكون كان يخدم ؟؟ ما كان حد يخدم و الامور لاباس.
و علاش العرعور و الهرج و التهريج ؟؟ لازم يكسّرولنا روسنا بالسؤال على فلوس الشعب ؟؟ و من وقتاش الشعوب عندها فلوس؟؟

حاصيلو شي يفدد, عباد تتشكّى و تتبكّى و تنادي و تطالب , كأنهم مواطنين و عندهم حقوق ... كانهم ضربو عليه الاستقلال بالكرتوش ...ياخي حاربو فرانسا ؟؟ فماش قفصي مات في حرب التحرير ؟فيهمش شكون بعث ولدو لبنزرت ؟ باش يعاون البنزرتية اللي خرّجو فرانسا ؟؟ كيفاش يحبّو يخدمو و هوما ما عندهم شي يساهمو بيه في اقتصاد البلاد...كيفاش يحبو يكونو توانسة و هوما سمر ؟؟ يتكلّمو بالـ"ڨاء" و روسهم كاسحة و جمعيتهم اسمها القوافل...شي يعيّف

هي اشبيه كي يدخلو اساتذة متعاقدين يخدمو في بلادهم ؟؟ (ناس ماخذة الاستاذية في جوان و دخلت الخدمة في سبتمبر)
شنية المشكلة كي يدخلو اوليداتنا في الساحل باش يخدمو في الفسفاط ؟ ماهو كلو من عند ربي و إلاّ الفسفاط زادة حطوه القفاصة في قفصة؟
اش كان عليه اذا تعيّن شوية معلمين من ولايات الجمهورية الكل باش يقرّيو في مدارس المتلوي و الرديف؟؟ الفائدة ديما حاصلة مادام اولادهم باش يقراو عند ناس عندهم شهايد ما فماش حتى واحد قفصي عندو شهادة كيفها...

حاصيلو انا نرى اللي المشكلة لهنا هي في القفاصة ذاتهم في كونهم قفاصة و ما ينجموش يكونو حتى شي آخر... و يمشيش في بالكم اللي قاعد نستهزأ و نتركك عليهم و الا عندي نية السخرية ... حاشا و كلاّ , بالعكس ...
انا مع العباد اللي كلاها المطراك و الكريموجان و اللي تعاني حاليا في السيلون ... اللي يفتشو على الشهرة و دفعو الضريبة متاعها.... على خاطر كيما شفتو حكات عليهم تونس سبعة و 21 و حنبعل و عملو عليهم 5000 ريبورتاج و 300 ساعة نقل حي و تصريحات و بيانات و معلومات و اخبار فرشكة... تي اكثرش من هالة الركبي -يذكرها بالخير- عدّات حصّة كاملة على الوضع في معتمديات المناجم , و نقلت الحقيقة كيما هي و فهّمت الرأي العام اشنوة قاعد يصير لغادي بالضبط...

أما توة و بعد ما صار اللي صار - و اللوم بعد القضاء بدعة- , انا نرى انو الحل ساهل و بسيط, و نوجه كلامي لوخياني في قفصة,
و نقلهم اصبرولها اتوّة تعطيكم, المسألة مسألة وقت, انوّة يجيكم البث و يجيكم مدّ التنمية الشاملة...
فإذا مشات الأمور كيما يلزم, الولايات الكل باش تتريقل في ظرف 720 سنة فقط ... على خاطر احنا و الحمد لله في بلادنا التنمية الشاملة و المستديمة(او ما يسمّى بطوفان الاستكراز العام ) تمرّ اولا و اخيرا بمسقط الرأس...
فإذا كان كل مسؤول اول في البلاد يركّز مجهود التنمية اساسا في حومتو و بلادو... فإنه بحسبة بسيطة نلقاو انو 24 (عدد الولايات) مضروبة في 30 سنة ( متوسّط المدّة الضرورية لكلّ فترة رياسية) تعطينا 7 قرون و 20 سنة...
و ربي انشالله يكبّرنا في طاعتو و يوصلنا للنهار هذاكة لاباس.
و نعاود و نقول الصبر مفتاح الفرج.

مثال توضيحي:


ملاحظة: مالقيتش طريقة أخرى باش نصوّر او نمثّل معلّمية المستقبل الا بالتشكيلة هاذي من الوجوه (الحرفة), لأنو و للأسف تربة بلادنا و رغم استعمال الفلاحة العصرية و الاسمدة و البذور الممتازة و المستوردة و اللجوء ساعات للري التكميلي ما تنجّم تجيب كان النوعيات هاذي.
ة

30 commentaires:

Anonyme a dit…

تي هاو صانع التغيير اتخذ قرارات هامة لفائدة الجهة وخرجو القفاصة في مضاهرات ولاء وتأييد وشكر وتطبيل ,,,,,الخ

Profs Tunisiens a dit…

ربي يهديك يا كلاندو
توةهكة تتدكك على القفاصة
هوه صحيح روسهم صحاح و يحبو المشاكل و العرك أما قرصهم الجوع و الشر في هاك الربوع القاحلة
هاهو أحنا في قرنبالية... نفرحو بالضيف برشة ياخي احتلونا جماعة تطاوين و قفصة... قالو ما لقيناش خدمة ياخي جيناكم باش تعاونونا... رصاتلهم ضربو الخدم الكل و قعدنا أحنا بطالة.. لين ولات قهوة بالعيد تعرف بمقهى البطالة و تطلع منها المواهب في الهرج و الضمار و لعب mots fléchés
فيهم حتى اللي أصيب بوعكة نفسية و حلف ماعادش يخدم حتى يمشي المعلم مع الملك متع الموت... أما يضهرلي يبطا برشة
الصبر يا قفاصة و عليكم بالصوم و نقصو من ماكلة الزهومة باش ربي يخفف عليكم
و يا كلندو راهم الجماعة عندك بيهم عرفو بلاصة البوبلي نات اللي تبعث منها في الزرارق متاعك :-)

Samrouf a dit…

Yerhamm boukkkkkkkkkkk

Anonyme a dit…

soit je suis bête et j'ai pas compris ce que tu veux dire, soit je suis paranoiaque et je sens que tu t'attaque aux gens de Gafsa; donc à moi, me parents, mes frères et soeurs, mes cousins, voisins, amis, amies...
t'es jamais allé à Gafsa toi? je ne veux pas t'attaquer pcq j'ai tant respecté tes idées, mais là ça me choque que tu penses que tout ce qui définit Gafsa c'est "la peau brune" et "les esprits têtus"!
mala fi9 3la rou7ik, au sahel tu trouves beaucoup plus de bruns qu'à Gafsa!
et puis si les maitrisarts de toutes la tunisie viennent travailler à Gafsa, pourquoi l'inverse n'est il pas vrai?
et si l'argent du phosphate sert à équiper les hopitaux et les lycées de sousse et tunis pourquoi l'argent des cérélales et olives ne sert pas à promouvoir des projets à Gafsa!
ama inti yesser miskin kèn vraiment tu t'attaques à des gens qui défendent leurs droits.

Bel Malwene a dit…

يا كلندو شقولك كان نبيعوها قفصة للدزاير...أهوكا عالأقل نضربو فيها تفتوفة باهية و نرتاحو من هرجهم

samitriani a dit…

Moi je suis content qu'il y en a qui expriment leur mecontetement. Car la situation deviens castrophique. Honte plutot sur ceux qui la ferment et qui acceptent la corruption, l'arnaque le vol et la misère.

En lisant ce que tu as ecrit j'ai l'impression d'écouter l'extrème droite française parler des tunisiens qui leur pique leur boulot !!!

Hmayed a dit…

pourquoi j'ail 'impression que personne n'a compris ou veux venir clando !! basta

@anaonyme: il s'attaque au gfasa ! lloin de la la , basta ou bara

FarFar a dit…

نتثاوب...
طوالت ياسر هالعشية..
و البوست متاعك داخل بعضو..
اسمع كلندو علي حكاية قفصة.. صحيح الي كانو فيها الصيودة في قديم الزمان..
و الي الحضارة الأولي بدات من الشيرة هذيكة..
سينو لاحظت الي مكش حاطط تصويرة صدام..سي بيان

FarFar a dit…

طلعت حاطو..
ما ثبتش مليح ملول ..
موش مشكل..سي بيان زادة

Anonyme a dit…

hahahahaha ya clando
hak toht be gafsi yechri fi chbouk. tu avai raison de dir elli el gfassa eyhebbou el machakel we rousshom shah... ama je croi aussi elli khouna zid 3alla ennou gafsi ama il est en plus un peu stokouma (samahni ya gafsi... ama jebt el bla el rouhel). tu dois lire le post au second degré. notre frere el clandestinou ne se moqe pas de vous pas veut dir autr chose qe tu n'a pas compri. relis le post au second degré et essaye de comprendr le sens profond ;-)

Clandestino a dit…

الانونيم اللي بعد سمرووف:
انا عادة ما نعملش توضيحات اضافية للبوست لأنو عادة عندي ثقة في قراء المدونة...
الكلام اللي قلتو انتي الكل موجود في البوست ...انا معاك 100%...لذلك عاود ثبّت و اقرا البوست...

حكاية لون البشرة و اللغة ...موش انا اللي جبتها الحكاية من راسي

Clandestino a dit…

@prof tunisien:
في بالك توة اللي ما فيبالهمش بيا ؟؟؟
تي انا متاكد اللي كل شيء مسجّل و مقيّد حتى عدد الزيارات اليومية و الاسبوعية للتوالات

مراد a dit…

حاجه بركه فاتتك يا كلندو:
الجماعه اللي خلوضو الشمبري في قفصه و حشمونا قدّام البلدان الشقيقة و الصّديقية الأغلبية متاع الشيفان متاعهم يحترمو برشه ستالين. في هذه راك في التّوش

mandela a dit…

@ clando
3ib 3lik...

Profs Tunisiens a dit…

malla faza ya clando :-(((((
we za3ma naya zeda eykaydouli fi haraket we sakanet mta3i ? kan enta yehssboulek fi dakhlet el twalet !!
ama madama mazelt tekteb bekoll horriya rak fi dawla dimokratiya we enta ma fi balekch ;o)
kima el marichal gal "sara nay na3mel fil 'nthar we ma fi balich !!" :o))

Clandestino a dit…

@prof tun:
ايا ما تفرعسنيش ها العشية
و ما دخلنيش بعضي
اخي زعمة بالرسمي انا نقول في حاجات تهز لبو فردة ؟؟؟

Clandestino a dit…

@farfar:
ماحبيتش نعلق على التعليق متاعك على خاطرك تتثاوب
انشالله نهارة الاثنين كيف تبدى فايقلي بالقدى اتوة نجاوبك

فرفر a dit…

كلندو
لاسس تونمبا
كيما يقولو ناس بكري، حكاية فارغة
:)

Werewolf a dit…

ساعات نتهوّر و نبدا نقرى التعليقات قبل ... و بالزهر نطيح على خونا الأنونيم البارانوياك... دخّلني بعضي و خلاني للحظات نظلمك... الحاصل أنا نقرى في البوست و أنا نلوّج على أي حاجة نكبّش فيها... ربي يهديه... فيما يخص 720 عام يظهرلي فيك ياسر متفائل... ياخي هو ثمة ضمان بالتداول بين الولايات... و برة عاد آش يسلكها التعطيلة ما أقلش من 30 سنة أخرى

Anonyme a dit…

bon houma ismhom "gfasa" mouch "9fasa". w il gfasa chérkou fil 7arb contre il françis w talién kén inti mazilt ki jit lil dinya w tghafis fil klém. ana 3zizi chérik w hazouhom il sé9it sidi youssef yjéhdou.
barra 7il ktéb 3ala rou7ik
w 7oriyit ta3bir tji b des effets s7a7 mouch 7kéyét.

Profs Tunisiens a dit…

je suis avec toi qu'on a tous le droit de nous exprimer librement... mais sans nous insulter les uns les autres !
c'est bizarre. je n'ai vu qu'en Tunisie que les gens d'un seul et unique pays s'insultent tant.
le régionalisme est trop répandu dans ce bled ce qui est désolant.
ceci dit, je voudrais dire à celui qui propose d'aller "yhell el kteb" je lui dit qu'il aurait pu s'adresser à el clando plus poliment et plus gentiment.
etre poli ne nuit pas à la santé et ne tue pas rahou.

Akinol a dit…
Ce commentaire a été supprimé par un administrateur du blog.
Otherside a dit…

C´est pourtant clair ce que dénonce elclandestin dans son post.. D´ailleurs je trouve sa manière très subtile. Avec un peu de chance et en tenant en compte leur QI bas, les farouches gardiens du web comprendront le contraire :P

Anonyme de gafsa ("weld bledi" entre autre..): Relis le poste avec un peu moins de sang chaud et tu comprenderas la vraie position de l´auteur de ce blog...

Anonyme a dit…

just info=
a redatef >4000 bac+ chomeuuuuuuuuuuuuuuuuuurrr

gafsi 7or a dit…

سي كلندو تعرف إنك إنت قلت كلام يبعثك ورى الشمس وكان يقروه المسؤولين في الدولة وخاصة في قفصة تو تعرف حرية التعبير أش معناها
وأنا مانيش نعلق على اللي كتبته على خاطر مافيه حتى شي صحيح
وإنت ظاهر فيك لا جيت لقفصة ولا تعرف حتى بلاصتها وين فالخريطة ولاك داري علاها أش قاعدة تعطي لتونس وكانك على شوية الفسفاط رانا حنا مرضى بالهوا متعه وحنا المتضررين منه لذلك حنا أولى بالخدمة فيه وبرا شوف نسبة الفسفاط في إقتصاد تونس وكيفاش كيساتكم تتقد من فلوسنا شوارعكم تتزين من فلوسنا ماكلتكم تتشرى من فلوسنا....
وكانك على الشهايد والكفاءات عنا منها شكاير لين ولينا نبيعوا فاها للدولة باش يعطونا قروض باش نريقلوا أمورنا
وكاك على نظال الوطني أنا نأكدلك أنه مفمش ولاية ضربت قد قفصة والقصرين ووقت إنتم تاكلو فالقاتو وتشربوا فالصافية أحنا هنا الخبز ميوصلناش
وفي بلادنا عمرنا ما طردنا الكفاءات وليسيتاتنا معبيا كان بالبراني وخوه هذاكا علاش أساتذتنا الكل تضرب فالمرمة وتبيع فالفريب
وكانك على الكورة القوافل الرياضية بقفصة أرجل من برشا جمعيات ونلعبو بقليب والدليل على كلام سي عثمان جنيح كي قال "أنا نلعب مع بوكا جونيرز ومبعد نلعب مع قفصة وقابس" والدليل حبستهم قفصة وقابس على بطولة 2007/2008 أما خسارة أحنا رخاس اللي قايمين ال5 متع الصباح باش نشجعوا ليتوال على خاطر باش تمثل تونس كاملة...
وكانك على التلفزة الكلها كذب في كذب هذيكا يا خويا جايبة أحسن بلايص في قفصة ماهو ميساعدهمش باش يفسدوا الحلقة على جال ولاية الله أعلم باها وين...؟؟؟

(برة راهو بتت ليلة و الا ليلتين و الا حتى شهرين بلاش ؟؟)
إنت تنجم تبات شهرين فالشارع تنجم تقعد شهرين متكلش ولا متشربش خمم بشوي لوجيك يعيشك

وأعرف كيفاش تتكلم المرة الجاية على خاطر كان تولي فاها جهويات عمركم ما تقدونا على خاطر حنا أرجل منكم بألف مرة باهي خويا

gafsi et fier de l'etre a dit…

kan ma jetch gafsa w rjal gafsa rahi ma femmech rjal fi tounes w deja ma femmech rjal snadid ynajjem elwa7ed yetkallem 3lihom w yetcharref bihom .. 3alla9al elgfasa 3endhom tari5 s7i7 yetkallem 3lihom .. a3tini swa7liyya w elbanzartiyya w twanasa chnowa elli 3endhom a part ennhom ba3ou bladhom !!

Anonyme a dit…

أول حاجة يا سي المصلح الإجتماعي نحب نوجه كلامي للي قال يحب يبيع قفصة للديزار و يربح تفتوفة نفكرك إلا أحنا نتشرفو بالدزيرية أكثر منكم أما أنت خويا لو كان راجل بلحق أخرج البرة و أكتب في الجرايد موش تنشر أفكارك في بلوق
أما فيمايخص قفصة ما عندكش الحق تكتب عليها بالطريقة هذي إحنا في قفصة مازال صغيرنا يقدر كبيرنا و مازالت الجيران تحترم بعضها أما الفسفاط راهو قفصي و ما عداش خارج من قفصة و تو نشوفو السياحة متاع الساحل كيفاش باش تغطي العجز أما على الشهايد برة أعمل دورة في السبيطارات متاعكم تو تلقى أكثر من 30 بالمائة أطباء و شنية سمر أحنا هكة خلقنا ربي على خاطرنا توانسة وعرب و أغلبية العرب يتكلمو بالgè أما على القوافل صاحبي أرجع للتاريخ منين طلعت للرابطة المحترفة الأولى أشكون خرج الترجي من البطولة و أشكون السنة خرج النجم الرياضي الساحلي مل البطولة
و نجو لحرب بنزرت كان القفاصة ما شاركوش فيها ملا أشكون خرجها جماعة الشمال والساحل القنونوات القوادة (ماحبتيش نقول كلمة أخرى )
املا البشير بين سديرة و العربي ملايل كان بورتي علب باب الديسكوتات هاهاها أما أنتم تسخرو مل الجنوب و مالفلاحة متاع الشمال الغربي و التونسي قبل كان فلاح و راعي أغنام و هي مهن شريفة تجيب اللقمة الحلال الدزيراية يجيو للساحل في الصيف باش يشيخو في بناتكم ويشربو عندكم أما أحنا يخافو منا الديزيرية و معتبرين القفاصة دولة أخرى واحدها و حاجة أخرى في ماعناش كوبل راجل وراجل يا سي الراجل

gafsi ben gafsi a dit…

خويا الباهي قفصة الغالية ما تتشرفش باش يحكي عليها امثالك .. برا عيش خويا حل كتاب على روحك و شوف تاريخ بلادك قبل لا تبدا تتجلطم و تقول في كلام ما يجيش ..باهي يا باهي

قفصي فخور ببلاده a dit…

خويا في بالك اللي قفصة هي مهد الحضارات ؟ في بالك الي اول حضارة في البلاد هي الحضارة الكبسية!! قبل ما تجي الحضارات الاخرى الفينيقية والقرطاجية والبونية و البيزيطية و ال و ال وال ..
الكبير راهو ديما يبقى كبير

gafsi bil "gè" a dit…

//يا كلندو شقولك كان نبيعوها قفصة للدزاير...أهوكا عالأقل نضربو فيها تفتوفة باهية و نرتاحو من هرجهم// خويا الباهي رانا نتشرفو بيهم الدزيرية كان ما فيبالكش على الاقل هواما واقفين معانا و قت انتوما التوانسة تقلبتو علينا .. قاعدين يوكلو فينا و يشربو فينا و حاسين بينا موش قاعدين يتمقعرو كيما قاعد تعمل انت سي الشباب و سي كلوندو متاعك يا مقعارة