اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

vendredi 2 novembre 2007

شراكة الفيل و النملة


الخبر:
لقاء بين وزير تونسي و رئيس هيأة استشارية عليا في الصين , تباحثا خلالها العلاقات بين البلدين و توطيد اواصر الصداقة بين الشعبين و تدعيم فرص التعاون في مجالات الطاقة و الاتصالات و التكنولوجيا و السياحة.
الحكاية:
ماهو قالك بورقيبة -يذكرو بالخير- مشى هاك العام للصين, عاد قاعد يحكي هو و رئيس الصين الوقت هذاكة, اخي سألو قالو "بالله تونس قداش فيها من ساكن؟؟"
قالو" 8 ملاين.."
ضحك رئيس الصين و قالو "هي شبيك خليتهم علاش ما جبتهمش معاك "

بحيث انو -حسب رايي- مانجمو نتكلمو على تعاون و شراكة و مصلحة مشتركة كان بين زوز انداد اكفاء متقاربين من عدة نواحي, اما تجي دولة كيما تونس بـ10 مليون ساكن و بـ دخل فردي متاع زوز ملاين في العام تعملي "شراكة" مع اوروبا ذات الـ200 مليون ساكن و الـ25 دولة ... و يحكيولنا في اخبار الثمانية على الوحدة الاورو متوسطية و الاهمية اللي يوليها الاتحاد الاوروبي للتعاون مع دولة كيما تونس و اعتبارها شريك اقتصادي و حكايات ماتركبش و كلام ماهوش منطقي
و كذلك الشان بالنسبة للصين اللي لوكان تسيب علينا زوز معامل متاع نسيج في زوز اصغر مناطق ظل عندهم الا ما تسكر معامل الحوايج اللي عامليلهم قاوق تقولشي نصنعو في البروسيسور و الا الاقمار الصناعية , و ما نحكيوش على استقطاب الاستثمارات اللي تتطلب برشة يد عاملة : الصيني يخدم بـ دينار فرنك في النهار و ما يلوجش على كونجيات و ما يعملش نقابات و اضرابات و ما يعملش برشة وجيعة راس للعرف في حين هاكم تعرفو العامل التونسي و خصالو الحميدة متاع الفصعة و التزرطية و دزان العجلة و التكركير و النوم و شرب القهوة , و اكيد فم شكون يعرف حكاية المقاول الشنوة اللي قصّ يد البالة باش خدامة الشانطي ما يتكاؤوش عليها و يشربو التاي, و حكاية الفرنساوي مدير المعمل في بن عروس اللي عمللهم توالات بلار باش اللي يدخل ما يحلقش للغادي ساعة غير ربع و يقعد يتكيف و يترشف في القهوة.

انا من رأيي انو في مثل هذه المواضيع نجمو نستعملو كلام كيما:
"اعانة" في بلاصة "تعاون"
هيمنة او سيطرة او استعمار او حماية في عوض "شراكة"
تلحيس و تملق في عوض "مصلحة مشتركة"
منح و هبات في عوض "استثمارات"
اقعد انتي طفي روحك في عوض "مبدأ التشاور "
القوادة و هزان القفة في عوض " التباحث و تبادل الخبرات"
ة


4 commentaires:

L'AsNumberOne a dit…

hihihihihih.....

FarFar a dit…

clando ,
sbeh el khire :)
yaikhi mouch asl8a nokta haidhi mta3 el guaddaifi ki mchai lessine yechki lra2iss mtai3hom kifech ettwansa dima ikharjou fennokat 3allibia ..
yaikhi ra2iss essine se2lou :
9addech ijiw ettwensa haidhom
gueddaifi 9allou : 7kayet 8 mlayen ( à l'epoke )
yaikhi ra2iss essine 9alou : faina 9ahwa yo93dou..

aina hia ennokta l'originale ????

Clandestino a dit…

ahla farfar
s7i7
femma ennokta elli 9olt 3liha
emma 7atta le7keya elli 7kitha ena zeda original

apres tout ena mé jibthech min rassi
hkeli 3liha we7ed hdhar lejtime3 ( wzir tounsi sebe9)

Anonyme a dit…

Bon belekchy el ijtime3 yiqsdou bih :

n7iloulhom nos marchés pour la consommation , c est a dire yzidou 10 millions de consammateurs pour leur exporter leurs produits.

yekhi Tounes mahy qwiyya 7achek fel consommation.

Powered By Blogger