اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

vendredi 21 septembre 2007

محاكمة الـ بي تي بي

قلنا عاد اللي السلطان بعد الا ثارت عليه العباد من خدامة و موظفين و بالخصوص مدرّسي الكتاتيب , و بعد الاجتماع مع الاعوان و المستشارين ما وصل لشي بل قرر منح الاف الاف الدنانير الذهبية للمدارس الحديثة ذات الطراز الافرنجي و المحتوى المعولم و المعلمن... شماتة و تشفّيا في القوم ...في نهاية الامر هو لاباس ماكل شارب و اولادو و بناتو ياخذو في احسن تعليم , و خلي الشعب ياكل بعضو انشالله يفنى و ما يبقى منو حدّ.

على بركة الله نكمّلو القصّة متاع لبارح:

دخل الحاجب وجهو أصفر "سيدي ثمّ واحد يحب يقابلك بالسّيف"
السلطان :" قلّو يرجع غدوة مع بقية الشكاية و المتقاضين"
الحاجب : " سيدي راهو مسلّح و مخطر برشة ما ظاهرلي كان ناوي الخير"

هوما هكاكة و دزّ الباب و دخل راجل شادد بيدو اليمين حكّة الهريسة و بشماله سبعة شقوفات خضر (حاشا الشهر)

السلطان (في حالة غضب) : شبيك يا ولدي ياخي هبلت في مخّك ؟؟

الضيف المجهول :"تعملو كشطة...."

السلطان (يتحسس الساشي اللي فوق راسو ...زعمة في بالو بيا نصبغ في شعري ؟؟)
" ياخي واعي بروحك اش قاعد تقول ؟؟"

الضيف المجهول: "تعملو شريطة تعملو ربايط سبّاط, تعملو رالونج تعملو سندرية تعملو شاشية تعملو جبّاد تعملو كابل متاع انتان تعملو ززوة تعملو روج الافر..."

السّلطان : " شنوة ها الهم , وسّعت بالي ياسر , عليّ بالسّياف و النطع خلى يذبّلو راسو "

-"تعملو كرافات تعملو قربيطة تعملو سبادري تعملو موشوار ..."

الوزير الاكبر : "سيدي عرفتو , هذا ما يجي كان تراببوي اللي بلغتنا انباء النبوة متاعو ماهو قالك اصبح ياتيه الناموس الاعظم اللذي كان ياتي عيسى و موسى و ابراهيم "
السلطان : " هذا اللي حل فتارية في سوق البلوق ؟؟ و اللي دخّل الناس بعضها ؟"
الوزير الاكبر :" اينعم سيدي هذا هو ."

السلطان : " ايجا ولدي اقرب شويّة و هدّي روحك "
يحط يدّو على راسو " امالا انتي نبي و يجيك الوحي ؟؟ و تكتب في السّور البيّنات".
التراببوي "تعملو بوماضة تعملو فشفاشة تعملو زريقة تعملو فاصمة تعملو زربية تعملو شاك رستوران تعملو بوات فيتاس...."

السلطان: " يا كازي ياخي ماكش خايف على رقبتك من السّيف "
الوزير الاكبر :" انا نرى انو نستدعاو الشهود, نسمعو منهم و نفهمو القصّة باش نقيمو عليه الحجة و البرهان و اذا طلع التراببوي من المرتدين فقد استوجب الحدّ و علينا ان نطبّق عليه الشريعة من غير ما يجينا شكون يطالب بدمّو "
السلطان :" ايها الحاجب, برة لسوق البلوق و جيب اللي كتب من المدونين و المدونات خلي نستجلي الامر "

**********

ليدخل الشاهد الاول :
"انا اسمي نادية , شهرتي الحديدية , مؤمنة اكثر من رابعة العدوية,
نحب الصّلوات الخمس و خاصّة صلاة الظهر اللي نموت عليها و نتفنن في ادائها : نعمل الركعة الاولى بالفاتحة و -الأنفورقـيـفن 1-
و الركعة الثانية بالفاتحة و -الأنفورقيفن 2- و ساعات بعد التشهّد نعاود -تورن ذو باج - 7 مرّات للبركة."

الوزير الاكبر "شنوة تقول في التراببوي ؟"
نادية :" ربّي يهدي ما خلق , وليّد باهي و ناس ملاح اما الناس ما تفرّقشي بين *الصورة و المقصود* التيوري الجديدة متاعي اللي انشالله نخرّجها في كتاب على قريب, البيق تراب نفس مومنة كيفي انا , ديجا انا كيف شكرتو على المقالة المشهودة تعرضت للمسبط و اتهمتني قطعان البهائم بالكفر و التزنديق".

********

الشاهد الثاني:
"مصير امراة مصيرية مغرومة بيوسف شاهين حتى النخاع , نحب الشجاعة و الشجعان و البيق تراب هو شاب شجاع قل و ندر وجود أمثالو في بر العرب و العجم يعطيه الصحّة على كل شيء ".

الوزير الاكبر :" شنوة رايك في اقوالو و افعالو , تشوفشي اللي هو مرتد او من عبدة الشيطان او من ذوي المعتقدات الشاذة و المشبوهة ؟
"
مصير: " انا مانيش خبيرة في علم التيولوجيا باش نجاوبك على السؤال هذا , أمّا من منطلق خبرتي الشخصيّة في البسيكولوجيا الرجالية , نجّم نأكّدلك أنو البيق تراب راجل و سيد الرجال و ما فماش شكون كيفو في قوة الكلمة و الشجاعة -بعد مولاي السلطان بيان سور- لذلك أنا نعاودلو الشكر و الثّناء و انشالله ما تكونش نهايتو كنهاية كل رجل شجاع ."

*******

الشاهد الثالث:
" اسمي بالسّـوري ستيبور و بالعربي بهتة (قد تكون دفاعية او هجومية) نحب الصحراء و البوادي و الخيل و الليل و الخيم , ورثت الفصاحة من ابن عمي عنترة و سلاطة لسان الفرزدق و شجاعة الشنفرى و غرور المتنبّي ."

الوزير الاكبر : " شنوة تقول في البيق تراب؟"
ستيب :" بصراحة انا و البيق تراب فولة و تقسمت على اثنين , كيف كيف , هذاكة صاحبي و اكثر من خويا و انا مستعد نطيّح على خاطرو روح , "
الوزير الاكبر:"شنيّة علاقتكم بجماعة شاس , تطلعوشي من الجماعة اللي بدلو لحية بلحية و اللي يتعاونو مع التطرّف اليهودي ضد التطرّف الإسلامي ".
ستيب :" اما يهود و اما لحية ... انا نقصد الـسـّاش , الاختراع العجيب اللي يبعث الدنيا الكل للي زيقو في ظرف ثواني , و نصحت البيق تراب باش يلجألو باش يسيّـق المتخلّفين حضاريا."
الوزير :" ملّى رقي وصلتو الرعيّة و ملىّ اسلوب حضاري للحوار "

*******

الشّاهد الرابع:
"اسمي أزواو صومنديل أوراغ اي صاحب الراية الذهبيّة "

الوزير :" توّة انتي زادة حطّيت كومنتار استفزازي بدلت فيه " الكافرون " بالـمدوّنون و هذا تحريف واضح و جرم فاضح و اعتداء على حرمة الكتاب و قدسيّة النصّ القرآني "
ازواو:" صحيح حطيت كومنتار من الدرجة الثانيّـة و اللي بصراحة ما عنديش حتى نيّة للمس بالقرآن و الإسلام "

******

غدوة نواصلو مع بقية الشهادات (استناو شهادة الكلاندستان )
و


12 commentaires:

FREE-RACE a dit…

:)

Unknown a dit…

Excellent encore une fois...

Gouverneur de Normalland a dit…

:)))

la9ad af7amtani

Anonyme a dit…

أبدعت وأمتعت يا فتي باش حامبه
أعطيه 100ألف دينار من بيت مال المسلمين
ههههههههههههههههههههههههه اى ربي معاك

Anonyme a dit…

Bravo..
mes respects
Anis

Anonyme a dit…

:)

joli
ca me plait

samsoum a dit…

Excellent :))

Anonyme a dit…

tayyara :) j'adore le style du texte !

Big Trap Boy a dit…

فكرة طيبة، أما في بالي المحاكم الخاصة هاذي تلغات وشرعيتها مشكوك فيها.
:)
على كل حال إنتي على ما نعلم جيت علقت وما خذيت لا كشطة ولا هم يحزنون، ولا عملتو ربايط ولا قرابط ولهذا نتصور فما أطراف أجنبية تمول فيك وتستغل فيك لأغراض أخرى، أما خلّيني نسمع بقية أقوال الشهود ولائحة التهم الموجهة لي ومن بعد أتو نمارس حقي في الدفاع

M.o.u.l.i.n a dit…

هذي هيّا لعبة الحلّاب النّاس تسخايلها فداوي وحكايات خياليّة و هيّ ظهرت الحكاية بالرّسمي وما هاش باش تظحّك النّاس الكلّ

باش يجي يشهد متاع ارض الرّمال ولّا لا؟

3amrouch a dit…

شوفو سي كلندستان اش يطلع منو
هايلة منك.
خليني مالا نحضر ها المحاكمة الي نشكك في نزاهتها لعدم توفر الحد الأدنى من الحياد
ملاحظة:انا ماحبيتش ندخل روحي في المعمعة رغم ماقراته
لازم تكلف خلية اليقضة،وفرقة الأرشاد باش يبحثو على لأنونيم الي شاركو ويقنعوهم بالتي هي احسن انهم يدليو بشهادتهم.
للتاريخ فقط،اذكر ان القضية ماعندها حتى علاقة بحرية التعبير

Anonyme a dit…

ya clando wahdek

encore mille félicitations...

fawez

Powered By Blogger