اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

samedi 22 septembre 2007

محـاكـمـــة الـبـي تــي بــي : الجـلـسة الختاميــّـــة

بعد شهادة أزواو صومنديل
دخلت الشّابة الرقيقة آمنة بانجي
"انا امنة بنجي نقرا بالفرانساوية و تعجبني, و تعجبني العربية أما ما نقراهاش و ما نفهمهاش,
تونسية فرنساوية أو فرنساوية متونسة بالـ أر أس , نركّز برشة على المنهجيّة و غلاف الكتاب و نموت و نفدّ من أغلاط الأورتوغراف"

الوزير: " keski ti ponçe di el BigTrap?"
آمنة بنجي: " أممممم ...بصراحة بصراحة ...البيق تراب مبدع و فنان و فيلسوف و التدوينة متاعو باش ندخّلوها للتاريخ مع معلّقات الإبداع الغير عادي في الخيارات (من الخيار متاع السلاطة) و المؤخّرات و الآيات البيّنات ".

*******

"انا ميلز متاع مدوّنة الشو شو شو شوبيتو "

الوزير :"شنوة رأيك في البيق تراب ؟؟"
ميلز: " شبيه البيق تراب ؟؟ اش ثما ياخي, انا جوست سمعت اللي ثمّا ناس ما تعرش تحكي بالسّوري و حبّيت نضمّ صوتي لصوت آمنة ونقترح انّو نعاودو نقرّيوهم دروس الفرانساوية متاع المكتب"

******

الشّاهد الموالي :
"انا الـ أوريجينال برانكستر صاحب مدوّنة - الحياة جميلة لكنهم لا يفقهون - نموت في الرّوك و الأوف سبرينغس و انشالله بعد عمر طويل لا تقراو عليّ لا تحلّو إذاعة الزيتونة لا زمّـارة.. نحبّكم تحطّولي كاسات نيرفانا متاع "الراجل اللي باع الدنيا و الآخرة" و تفكّروني كل ليلة جمعة بالزنزانة متاع كريم بن عمر".

الوزير: "شنوة تقول في الاحداث الأخيرة ؟؟"
"أنا وصّلت المعلومة و فهّمت الناس الغافلين انني مؤمن بالقرانج و بـ كورت كوبان اكثر من القرآن و دين الإسلام , وهذا شيء نفتخر بيه و نتميّز بيه على سائر الأغنام و الماعز من الأنام في المملكة و فيما يخصّ البيق تراب كل حدّ حر في محلو و اللي شاهي حاجة يعملها في توالاتو "

******
الشّاهدة الموالية:
"إسمي سنية نوفراج و يتربّجو بيّا سوني و لا سون سون , , نحوّس في البياجو الحمراء و نحرق الفو روج "

الوزير: "انتي بنت المعز لدين الله ؟ تطلعشي من بقايا الشيعة الفاطمية اللي يقدّسو السيّد علي و أولادو اكثر من الرّسول و السّنّة؟؟"
سنية: " انا يا سيدي من عائلة إصلاميّة نحب الرسم و النحت و نموت في الصالامي و خاصّة في رمضان لذلك أوجّه إلى المصلّين من المصلمين و أكلة الصلامي برجم البيق تراب و ضربه على شاهد النّعمة لا بالحجارة و بيران الحديد و لكن بالاسكالوب و شحوم الدجاج و السوسيسون البقري"

********

الشّاهد التّاسع :
" اسمي تيميرار صاحب مدوّنات الميراج و تونس أيام زمان , نحبّ التاريخ, نعمل في أبحاث في تاريخ المدينة و البلاد و لست مؤمنا بنظرية التطوّر "

الوزير (يتثاءب) : " شنوّة رايك فيه ؟؟""
تيميرار:" انا عشت نفس وضعيّة البيق تراب فقد اتهمت بمعاداة السّامية و الجهل و كراهيّة اليهود و تعرّضت للعصا و الزلاط من الجميع و قد شعرت يومها اني طحت كما في مثل البقرة... و الادهى و الامرّ أنها العباد اللي مشات لمدونة العمّ يعقوب لسبّـي علنا و لتقديم فروض الطاعة و لإستجداء فطور قراتوي على حساب المطعم هم من المدوّنين المعروفين و مش من الانونيم المجهولين...
البيق تراب تجرّأ و خرج على الموضوع, فالقران ليس بالموضوع الكاريكاتوري و لا يحتمل الكوميديا لذلك وجب عليه الإعتذار احتراما للأخوية البلوقوسفيرية و للمشاعر الدينية."

********
الشّاهد الاخير
"إسمي الكلاندستان , زوّالي , عامّي من عامّة العامّة , و لي رجاء لدى سيدي السلطان انو يبعثني في احدى سفنه الذّاهبة الى الآستانة ترميني في أحواز جنوة أو ضواحي بالرم أو يرسلني مع احد سفرائه الى شرلكان ملك الاسبان فالتمس الهجرة او الاقامة و يكون لي من ذلك خير كبير و نفع عظيم "

الوزير الاكبر: (بصوت خافت :" إيييه يا حسرة .... لوكان جيت انجم نحرق راني حرقت من هاك العام و ارتحت من خلطة السلاطين و عوجهم "):
" ماذا تقول في فتى التّراب و افعاله و هل هو من النبيئين ام من الكذّابين الدجّالين ؟؟".


(جلبة و ضوضاء كبيرة تقترب من القصر )

(أصوات إنفجارات هائلة و صياح ... الاف الاقدام تقترب... و مئات الهتافات:

صدق بيق العظيم ... يا ناتن ... يا أسقط من الحيوان ... البيق يا بطل ...البيق يا بطّــال ,

و مع تساقط اول المقذوفات على النوافذ متاع القصر , الحرس الخاص يتلم في القاعة الرئيسية متاع المحاكمة و الاجتماعات لحماية السلطان و ضيوفو و يبقى القصر في متناول الجموع الغاضبة من المـلـثـّـمين اللي فيسع ما حاصرو القاعة و اقتحموها ...)

و تبدى الهتافات مرّة اخرى :
تفوه على ازواو و مصير
البيق يا سوكارجي ... يعطيك وهف
براستوس (من وسط الجموع ): أعصابي يا ناس ... ما تنساوش المشاعر اللادينيّة...
بن كريشان شادد فيدو شقف من شقوفات البيق تراب : يا جهلوت يا بهايم أتؤمنون بهذا الإله الخرافة ,
عماد الحبيب في جرّتو : إينعم عرفي إنّــه إله خرافة..

حضبة : مرحبا بكم في جمهورية الهاشمي الحامدي و إمارة الغنّــوشي
حضبة أخرى مقابلتها: لتسقط جمهورية الهاشمي الحامدي و إمارة الغنّوشي ....
بيق يا مبدع يا فلتة الدهر زيد أتحفنا يا طقطوقة...هذا القرآن و لا لوّح ...
( و يبداو يتعاركو و تاكل بعضها )

(نادية الميتالليك تتخبّى وراء ستيبور )
ستيب ( يدزّ في الملثّمين ): "الخيل و الليل و البيداء تعرفني..."
أزواو يتفرّج في المشهد , يجبد سيقارو يشعّلو و يقصد ربّي بعد ما يحيّي الجميع " تحيّـاتي الحارّة"
مصير : tant pis

و يتواصل الصياح و العياط:
أقتلوا البطـاطـا بوي...
ربنا لا تؤاخذنا بما فعل السفهاء منا
سارّة: محلاه سمسوم و محلى تربيتو ماصابو مازال عازب
يعيش سيّد القمني ...
يا كافر يا زنديق يا شلاكة ...
يا اعور ....أعرف تقمّر مستقبلا...
أما زلتم تؤمنون بإلاه الرّمــال الخرافة ؟؟
واحد في التركينة : من كان يعبد محمدا فإنّ محمدا قد مــات...
ناديــة: صلاة الظهر ...صلاة الظهر ..يا ناري فاتتني صلاة الظهر
العمروش ( في جمع من اولاد رادس مليان) : وينو عماد الحبيب ؟؟ وينو ليجند أوف ذي فول ؟؟؟
النسر الاسود (بالصّوت العالي):"دافعوا عن عقولكم كما لو كنتم تدافعون عن حصون مدينتكم "
الكلاندستان : يرحم هاك الأفيّــيم...
ستيب (شايخ): أمورك فيزيقــا يــا بيقا ...
واحد منقّي حواجبو : القرآن هو ماقال بن كريشان ...
(يهبط عليه واحد لحيتو أطول من شهر مارس بـ داودي): إلى جهنّم و بأس المصير ...
المواطن التّونسي شادد كرشو من الضحك ...
آمنة البنجي: t'est douée bigue Trappe
واحد شايل سيفو و هازز دلاعة مفخخة :"عليكم بأمّه فنـ....... علّها تأتيكم بمن هو خير منـه"

السلطان المسكين بعد اللي هزّوه الحرس بعيد عن العركة قعد شاد الباب متاع الخزنة , المفاتح في يد و السّيف في اليد الأخرى ... يعس على تحويشة العمر....
جاء الوزير الاكبر (ريقو شايح و حوايجو مقطعين ) : يا سيدنا ملا حكاية حيّرها البيق , إذا ما نوقّفوهاش توّة راهو باش تطيح فيها الأرواح".
السّلطان :" توّة تلمّدلي العسكر الراقدين في القزرنات و اللي يصطادو في عصفور الزيتون في السّواني و اللي يكيّسو في القناطر و الكياسات باش يجيو للقصر ."
الوزير الأكبر (يتفقّـد مكاتبو): "سيدي حتّـى البورطابل سرقوهولي "
السّلطان :" شد ..خو... هاو التلفون الملكي أيّــا خف روحك"

*****

(هبط العسكر من القشل متاع بوشوشة و باردو , و دخلو للقصر يلقاو النّاس فشلت من العرك و دموماتها شرتلّة , فبداو يشيلو فيها حي و ميت , مسلم و كافر , مدوّن و غير مدوّن )

و خرج السلطان من المخبأ متاعو يغلي ...
" هذا البيق تراب يريد بي الشرّ و يبث الفوضى و البلبلة بين الرّعية و يجنّد لي الاعوان و الميليشيات و ينوي تحويل البلاد إلى الأنبار و يزرع فيها بذور الفرقة و الطائفية... عليّبالسيّاف ليضرب رقبته في الآن و الحين"

الكلاندستان:" سيّدي لا تتسرع و تكن من النادمين و اسمع منّي بقية شهادتي و لك فيما بعد سديد النظر و دونك و ما تراه في شأنه"
السلطان يتبادل النظرات مع الوزير الاكبر ثمّ ياذن للحرّاق بالكلام.

الكلاندستان :"أنا يا سيّدي لست من المدّاحين المجاملين و لا من السّاخطين الغاضبين كما لم أكن يوما من مؤمني أو ملاحدة المتطرّفين, و قد جئت اليوم لأعبّر و أبلّغ لا ان أشهد او ابرّئ او أدين...فلحرّية التعبير نظما و نواميس و قوانين , و من غير المنصف القول أنّها تبيح المحضورات و تجيز الممنوعات دونما إعتبار للحدود و للخضراء و الحمراء من الخطوط.
فذاك لغو مبين حفظناه و شربناه من غاسلي العقول و المدمغجين , و اصبحنا من السذج المتخلفين بالشعارات الزائفة متعلقين و بذلك اللاوي متمسّكين , يحسبنا البعض للعبة منتبهين لكننا من الغافلين و لمزبلة التاريخ باذن الله متجهين و سنبقى مسخرة الشعوب و الامم من الارجنتين الى الصين.
فقيود التعبير موجودة في كل الامصار و البلدان بما فيها بر الفرنسيس و الامريكان, و ليحاول البيق تراب في باريز ان يسب اليهود من بني اسرائيل, أو يندد بجرائم الصهاينة في فلسطين ,حتى يصبح من النازيين ,أعداء السّامية و الساميين, و في طائرات الترحيل من الراكبين ,مع بني قومه من الحراقة و غير المقيمين.

و البيق تراب بوي صديقي و اخي ,و لم ار منه الا ما احب و اشتهي , و انا معه في انّ الزيتونة المشؤومة ماهي الا قناع و واجهة و فترينة لمن فسد أمره من الاهل و الاحباب و الحاشية, فلا هي بالحدث الجديد و لا هي بالإنجاز المجيد, و لنا في البارابول و الانترنات مئات من الاذاعات و القنوات , يتلى فيها القرآن دونما تشفير و لا اشتراكات, فلماذا يفتخر ولد الماطري و يتبجّح و كانه جاب الصيد من وذنو ؟ و لماذا يتنفرز البيق تراب و يحرق دمّو و يفقد اعصابو ؟
ثمّ و هذا الأهم لماذا يصطنع القرآن في ردّه على السّاخطين وهو يعرف ما للقرآن من قدسيّة عند المسلمين من المدوّنات و المدوّنين ؟
يقول الشّهود أنّه ردّ من الدّرجة الثّانيّة , لكني اقول اننا لسنا في دوري الكأس أو البطولة , حتّى نتكلّم عن الدرجات الثّانية و الأولى.
فلتفادي المحظور و الشّبهات و الوقوع في اللبس و الإلتباس , ينبغي التحرّي و التروّي و التثبّت في ما يكتب او يقال , فالخطأ في مثل هذه الأمور لا يستقال.
و الحمد لله أننا لسنا في إيران أو تحت حكم الطالبان , لكانت رأس البيق تراب الآن في خبر كــان و لذهب ضحيّـة مزحة و زلــّة لسان.

و في الختام أرجو أن يطوي أخي البيق صفحة الكشطة و يكفيه ما وزّع منها و ما أعطى , و أن لا يتعرّض للاعراض و الحرمات و خاصّة الدّين و المقدّسات فليس في ذلك شيء من الابداع أو من جراة و قوة حجّـة و إقناع.
و أرجو السّماح له بالعودة لبيته على أن لا يعود و يدّعي النبوّة من جديد و يصبح أداة في يد ملاحدة المدوّنين و هدفا للمتخونجين ممن كانو للناس مكفّرين ."

السلطان : "لك ذلك يا كلاندستان فليعد صديقك من حيث أتى و له علينا ان لا نغلق له النّصبة فهي انفع لنا من غلقها و أصلح للصّالح العام من سائر المدوّنات على ان يلتزم بما ذكرت و يكتب ذلك و يعلنه على رؤوس الاشهاد و الثقات".
ة

23 commentaires:

MetallicNaddou a dit…

brabbi les histoires de "pour et contre la liberté d'expression et ses limites", parlez-en quand il y a une vraie raison d'évoquer la question, mais cet épisode ridicule n'a au fond rien à voir avec ça à la base, puisqu'à mon sens la tension est apparue entre ceux qui ont une sensibilité exacerbée vis à vis de tout ce qui a trait de près ou de loin à la religion au point de voir dans tout vocabulaire approchant l'islam une insulte grave et une violation des droits des croyants d'une part, et ceux qui n'ont vu dès le départ dans une métaphore qui se voulait humouristique qu'une simple parenthèse sans aucune gravité. Monsieur le clandestin, figurez-vous toi et tous ceux qui se sont sentis offensés par BTB et ceux qui ont souri à sa sortie humouristique que vous n'êtes pas les seuls à avoir du respect pour le livre saint, pour la religion, et pour les croyants, et que si vous aviez fait un peu plus attention vous vous rendriez compte que parmi tous ceux qui se sont faits traités d'islamophobes, il y a aussi des gens aussi soucieux que vous de préserver ces valeurs et de leur porter le respect qui leur est dû. Et même ceux qui n'y prêtent guère d'attention ont le souci de respecter ceux qui le font. Le problème n'était qu'un problème d'appréciation et d'interprétation, comme c'est tjs le cas dès que quelqu'un fait la moindre illusion à la religion dans cette blogosphère. sans parler de l'incapacité chronique de la plupart de manifester leur désaccord sur un ton serein et calme. Donc il 7dith he4eya mouch lezem nzidou nka3rerou fih sbe7 w lil 7atta lin youfa sidi romdhan. Ken jet kilmit 7a9 tit9al fi domaine la liberté de l'expression bil7a9, rahi ennes ilkol hezza 4il jbeyebha w herba tijri, wa li4a yezziouna 3ayyechkom mil machakil wil les jugements fil houa. jebden ennes b sbab w min ghir sbab mouch behi, ma demkom ta3rfou rabbi, tab9ou 9oue3dou, w i9lbou 3lina hess7an yehdikom

Sonya a dit…

Bravo pour ton imagination
Malgré que des fois elle dépasse ses limites …
wetwali t5albiz ou tbalbiz :D

Salami ?? ou studio 9 ou 7 ???

Pourtant Tu connais d’autres informations sur ma vie privée !! T’aurais du les poster comme un témoignage !... 
Un témoignage la izid la ina9es ou la idha7ek en plus !!

Dima hakka enti !!
Dima etghafess
lool

Infinity a dit…

Et dire que j'ai râté tout ça :D .. Merci pour cette lecture .. ce fût un pûre plaisir

Clandestino a dit…

@Nadia:
انا مانيش قاعد نجبد في العباد بالمجان و للرغبة في ذلك , كل ما في الامر انّو ظهرلي الموقف و التعاليق متاع برشة مدونين كاريكاتورية و هزلية و عطات بعد اخر للبوست متاع الب ت ب
يحتمل الشيء هذا ما يعجبش برشة ناس أما نحب ناكدلك انو مافيهش مس من علاقات الاحترام و المودّة اللي تجمعني بعديد المدونين و منهم انتي و بقية المذكورين في البوست
اما نلوم على بعض المدونين الاندفاع و المبالغة في المدح و الثناء و السّب و الشتم العلني و الغير معلن في محله و غير محله سواء منهم اللي فهمو التدوينة او ما فهموهاش

@sonya:
ردة الفعل متاعك فاجاتني خاصة اني كنت نستنى في ردود افعال غير ايجابية و لكني ما توقعتهاش منك انتي
اناما جبتش حاجة من عندي و الجزء اللي يخصّك في البوست عملتو بناء على التعاليق متاعك و المعلومات اللي قدمتها في مدونتك .
و في نهاية الامر نشكرك على الردّ نفروجة و نقلك اللي الغفاصة ساعات من شيم الرجال و التخلبيز و التبلبيز من المقومات الاساسية للمدوّنات

MetallicNaddou a dit…

@clandestin; wallahi kaoun etta3ali9 illi 9rineha fiha barcha indife3 w moubelgha bil behi walla bil 5ayeb, he4eya ana nouef9ik 3lih, ama ettka3rir ba3d bjem3a la feyda minnou, tawa chkoun ya3ref tzid t7el 3lina beb e5er w na7na ma sadda9na wfina minha hel 7al9a

7assilou la 3alayna tawa ...

charismatic a dit…

Bravo..une fiction très sympathique !
Heureusement que ménich fi hél 3ijja !
Mais je remarque que c'était toi qui a eu le dernier jugement et BTB te doit beaucoup du fait que tu l'a sauvé des griffes du sultan !
Sympa !

MetallicNaddou a dit…

ah 7a99a, tawa kont na9ra fil post illi 9ablou :D malla 7keya ana tawa 9olt sallit e4ohr 9oddem mojtama3 il blogosphère wallit fi 7el worbot, ye5i à ce point eddahhech le7keya ? :))

7assilou, 4a7kitni en tout cas la description :)

Tarek Kahlaoui a dit…

أيا جماعة ما تاخذوش حكاية كلاندو بجدية في تفاصيلها الكل تبقى في النهاية حكاية... على كل حال بالنسبة للحكمة من الحكاية أنا واحد من الناس نتوافق مع الراي متاع كلاندو كيفما قلت في التدوينة الصوتية متاعي حول موضوع الزيتونة... يبقى يظهرلي خونا البيغ تراب بوي مايتقارنش ببعض المتحاملين بشكل مجاني و شعبوي على الدين و إلي عايشين خارج التاريخ كيف الأمثلة المتوسطة إلي ذكرهم كلاندو... و هذاكة علاش أنا نشكك في المحاكمة من الناحية الأصولية كيفما يقولو جماعة القانون... زيد بصراحة سيدنا السلطان ماهوش المؤهل للمحاكمة هذية
:))

resiros a dit…

ياسر حلوّة حكايتك, ومعاك ميا في الميا في رايك, حرّية التعبير عندها ليميت.
نستنّاو فالحلقة الجّاية من 1000 حرقة و حرقة

nostra a dit…

encore ???!!!
ayya o9toulou btb é armou raasahou lékilab :D 5allina narta7ou men les posts mta3 clan :D

Clandestino a dit…

@nostra:
انتي سلّكتها و باقي مش عاجبك الحال ؟؟
أمالا يا سيدي نعلمك انّك موجود في العركة و تحديدا في الحضبة متاع اولاد حومة العمروش
:))

Anonyme a dit…

ya clando ce serait dommage si tu "brules"....

fawez

3amrouch a dit…

@clando:رد بالك ماتجبدش اولاد حومتي بالخايب,راهو ماتلقاهم كان هوما في بر الطليان،كلها كابوات غادي.

Mils a dit…

ey tawa .. yilzimhom i3awdou ya9raw francais wala lé ? :)

Azwaw soumendil awragh أزواو سومنديل آوراغ a dit…

Hors Sujet: Invitation au meetup du 29 09 2007 : je vous propose l'espace d'art Ben Abdallah dans la médina juste en face du musée des arts et des traditions populaires pas loin de tourbet el beyets. J'ai eu l'accord pour qu'on ai l'espace à notre disposition. Pratiquement : les boissons et raffraichissements seront servis par la cafetteria du lieu, pour l'intendance concernant les grignotages faites des propositions soit que chacun ramène quelque chose ou bien quelqu'un s'occuperai de tout et on fera les comptes après. côté musique faites vos playlist, de mon côté j'espère pouvoir vous réserver une bonne surprise.

gouverneur de Normalland a dit…

أيا يا جماعة السلام عليكم ...انا كنت غايب عن مجال التدوين الايامات الي فاتو...وقريت من بعد هالحرب التدوينية الاول ...حضرت روحي باش نعطي رأيي في الحكاية و تناقشت في الامر مع بعض المدونين مثل فريرايس و انفينيتي...لكن بعد الي كتبو كلاندوا ما عندي ما نقول...ما نتصورش روحي نطرح الحكاية خير من الطرح الي طرحو كلاندستينو. برافو عليك يا صديقي ...أنا نضم صوتي لصوتك و نزيد نقول لكل المدونين من كل بر راهي الدنيا ما هيش كيفما يصورها جورج بوش ...الي معاه و الي ضده,الباهيين و الخايبين, الابيض أو الأسود...فبالله عليكم اقبلوا الاخر و احترموا الاخر

النسر الأسود a dit…

لول تي هاي مسرحيّة وشخصيّات ..وحتّى اسمي موجود..ماقريتش كلّ شيّ..أمّا ظاهر فيها ضامرة
:-)

باقيها بالله واحد من الوخيّان يعمل طلّة على المدوّنة متاعي ويقول لي اذا مازالت مفتوحة من تونس والاّ حطّولها القفل
http://taht-el-yessmina-fillil.blogspot.com/

وماذا بيكم تعملوا طلّة على آخر مستجدّات اضراب الجوع متاع ميّة الجريبي ونجيب الشابّي كان مازلتم ماسمعتوش بيه
بعد اذنكم، باش نعمل شويّة

"بروباقندا" ..من أجل تونس

للّي في تونس: هذي 3 روابط لازم واحدة منهم باش تخطف:

http://www.youtube.com/watch?v=xbffCn6DO_A

http://www.dailymotion.com/video/x31n6s_les-dirigeants-du-pdp-en-greve-de-l_politics

http://smawebdesign.com/mcgallerypro/show.php?start=0&id=225&video=1

شكرًا

Clandestino a dit…

أهلا بالحاكم
رمضانك مبروك

@aigle de carthage:
مرحبا بيك
اهو باش نعملك نقل حي من عين المكان
الياسمينة في الليل تخدم 5/5

الفيديوات فم كونشي الثالثة تخدم
تي هاو علاء الشّـابي ؟
اشبيه زادة ؟؟
:))

AhaouA a dit…

vraiment chapea lik 5ouya lil clandestin, post fi mé7allou. Il ne faut pas dépasser ses limites au nom de la liberté d'expression, tel est le message. Mais tu l'as décrit d'une manière fantastique.

Anonyme a dit…

Bravo aalik clando c'est la bonne conclusion I totally agree, la manière est excellente. Je voudrais aussi dire que vous bloggeurs vous appartenez desormais a la chose publique. Tous vos posts concernent tous vos lecteurs et vous n'avez plus le droit de dire que vous moquez de leurs reactions. En tout cas, ne vous arretez pas wa ila alamam.

FarFar a dit…

سلام
بون انا قريت العناوين و الجمل الاولي في المقالات هذوما و ما و اصلتش

أنا نري الي رغم الي النيةمتاعك باهية كلندو ، لكنو مقال يدخل في النوع الهزلي و نتصور الي حكايات مالنوع هذا مفيهمش تفدليك

الحاصل خلي عزاها سكات

Téméraire V5.0 a dit…

Bravo pour cette piéce théatrale que je viens de découvrir aujourd'hui.
Une belle synthése des Blogueur Tun.

Clandestino a dit…

témé:
:)))