انا باعتباري من مستعملي الانترنات الداخلي او الانترنات المعالج و المصفى و المكرر , اللي تعدى على الديوانة و الريون اكس و تحل و تشاف و تقلّب وتغسل بالشايح و تشلل و تعقّم قبل ما يوصل لكمبيوتر مكتب الحرقة , فالنشرية متاع تونس نيوز نسمع بيها من بعيد لبعيد , و الا ساعات كي ندبر بروكسي اهوكة نعمل حرقة الكترونية و نشوف الانترنات (الانترنات بالفم و الملا , هذيكة اللي يقولولها الشبكة العنكبوتية اللي يعرفها العالم الكل ,موش النسخة المحورة جينيا اللي عندي ) و من جملة الحاجات اللي نسمع بيهم و نحب نطلع عليهم هي النشرية هاذي .
مؤخرا سمعت اللي الجماعة متاع تحرير تونس نيوز قررو الانسحاب و إيقاف العمل بالموقع لـ "أسباب قاهرة" و " اعتبارات شخصية" بعد 7 سنوات و 7 اشهر من العمل المتواصل ( ما نعرفش اذا هاذي صدفة و الا صدفة مقصودة ) و قالو اللي الارشيف متاع الموقع باش يقعد للي يحب يطلع عليه , الا انو نهارين لتالي تضرب الموقع بكلو , بأرشيفو و مقالاتو و حشيشو و ريشو ببونية من الصحّ للصح - تنجمو تشوفوها البونية المذكورة في اعلى التدوينة - و تنجمو زادة تشوفو اسمو السيد البوكسور متاع الانترنات اللي على ما يبدو مغروم بنيو و موفيوز متاع المتريكس .
انا بحكم فكرتي المحدودة على هذا الموقع و اصحاب الموقع ما نجمش نوضّح اكثر.
لكن عندي شوية تساؤلات حول الموقع هذاية , علاش توقف في الوقت هذا بالذات ؟؟ و علاش ما تمت قرصنتو كان بعد السنوات الكل من العمل ؟؟ و زعمة عملية القرصنة هاذي عادية كيما يصير للمواقع الكل ؟؟ و الا هي عملية قرصنة مدبرة ؟؟
