اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

jeudi 31 juillet 2008

حالة البلوقوسفير ... صيف 2007 الى صيف 2008

قلت عاد اللي اثناء فترة الغياب عن البلوقوسفير كنت ساعات نعمل زيارات خاطفة و نمرّ (مرور الكرام ) على بعض المدونات و(مرور اللئام) على البعض الآخر أي اني نتعدّى رأسا للمربّع الأحمر في الزاوية العليا من الناحية اليمنى للمتصفّح و نسكّرها حفاظا على نفسي و على صحتي الفكرية و المعنوية .

و كيما يقولو - مصائب قوم عند قوم فوائد- فحالة النفور الارادي و الالزامي من البلوقسفير بعثتني إلى أحضان الصريح و الكائن الورقي سي صالح الحاجة ( يذكرو بالخير) , و ولّيت كل يوم ندفع الـ450 مليم حق الجريدة طائعا مستسلما , و من بعد نعتكف بالجريدة ساعة و الا ساعتين في بعض التراكن ...و اتضح من خلال الخلوات الروحية (للتأمّل) هاذي انو جريدة الصريح ماهياش سيئة بالدرجة اللي كنت نتصورها , بالعكس ,السادة بوبكر الصغيّر و علي بن نصيب و الهمامي و وليد الزراع -رغم الرداءة الموصوفة اللي يتميّزو بيها - يقعدو ديما خير من أغلب المدوّنين في الفترة الحالية.

فالمواضيع و النقاشات الكل ولات مركزة على الدين (الاسلامي) , و اللي بدأ كحوار جدي بين بعض المدونين حول العلمانية و اشكاليات الدين و الديمقراطية في المجتمع , تحوّل الى موضة... مهزلة , و ولات فمة مزايدات , اشكون يهبط اكثر من صاحبو , اشكون يوصل للحضيض الاول, و اشكون يتعدى للمستوى الموالي في و التمنييك و تكسيرالكرايم في السخرية من معتقدات الناس (و قريت بعض التدوينات في الموضوع هذا اللي اقل ما يقال عنها انها تثير الغثيان - من غير مبالغة-)... ولى نقل مباشر لأجواء يوم القيامة و وصف للخالق و تمثيله في عدة صور اقل ما يقال عنها انها ماسطة و ركيكة.

زعمة هاذي هي حرية التعبير ؟؟
شنية العلاقة بين حرية الدين والمعتقد و نقل أجواء يوم القيامة ؟؟ وينو الابداع في السخرية من الرسل و الانبياء و التهكم و السخرية من الخالق؟
في الفترة اللي فاتت كانت فمة برشة مدونات (ذات توجه معين و معروف) تحمل نفس الافكار هاذي لكن بعمرها ما طاحت للمستوى هذا و كان عند اصحابها الحد الادنى من الاحترام و مراعاة المشاعر, اما توة فلا مستوى و لا جمالية و لا لغة و لا ابداع ... فقط التكرار و اجترار الكليشيهات الفائت عليها الأجل... و الكوبيي كولي... و من جملة الكليشيهات انو يقلك "انا على القليلة مانشربش البول باش نداوي" و الا " الدين اللي يبيح الزواج من طفلة مازالت ما بلغتش" و الا "الدين متاع القنابل و قتل الابرياء"....

و الموضة الجديدة زادة انو فمة ناس تفتخر و تتبجّح بالإدمان على الشراب , و في بالهم آفار انو يحط كرذونة سلتيا في كرشو و يبات الليل الكل وهو ماشي جاي للتوالات...و المعروف في المجتمعات الكل انو الادمان على الكحول هو مرض مزمن ينجم يقضي على مولاه ... و أنا نعرف في الحومة و عند العباد اللي تسكر بالرسمي (ناس زوز و ثلاث شراب ما تعملهم شي و فمة شكون يعاون بالالكوول باش يوصل يشيخ شوية) الشراب ماهوش مصدر متاع فخر بالعكس يقولولو "محنة" و يقولو زادة "فلان صاحب محنة" اي انو مدمن على الشراب...
و في نهاية الأمر انا ما يهمنيش فيهم يسكرو و الا يشعلو, المهم مانخرجوش على الحد الادنى من الاحترام و نحافظو على الحد الادنى من المستوى "التدويني" , موش يجي واحد يحل مدونة , السلام عليكم ... انا نحب نسكر و ما نحبش تضيقوهالي و الدين متاعكم هذا دين كعبة لا على خاطر يأمر بشرب البول و مفاخذة القاصر, و يكبّش (كي محيط قرقنة) في القلم هذا, و مع شوية تصفيق منا و منا و "يعطيك الصحة" و" يرحم والديك " يزيد يغلط في روحو و يولي عيرود اللي يكلمو يوحل فيه.

المجموعة الثانية اللي نحب نحكي عليها هي في العموم مجموعة بعيدة ياسر على المجموعة الأولى , من جميع النواحي, الا انها كيف كيف , شادة في قلم واحد زادة.
هاذم يحبو يحولو الفضاء التدويني الى نادي (ملتقى) للي ما يمثلوش المجتمع (و ربما ما يمثّلوا كان ارواحهم) , و فرحو كيف لقاو بعضهم و تقابلو افتراضيا ,و خذاو الثقة في افكارهم و تصوروا أرواحهم قادرين (بكمشة تدوينات) باش يحققو افتراضيا الاحلام (الاوهام) الايديولوجية لاللي طالما حلموا بيها ...المجموعة هاذي ما نجّم نوصفهم كان بالأيتام ...كيما هاك الوليدات اللي خلاوهم والديهم في الغابة, و هربو عليهم , قعدو "لا دار و لا دوار" , لا اصل لا مفصل , لا ساس لا مرجعيات ... ناس -في 2008 - تحكي بالكومنتارن و الكوميكون و الرفيق و الرفيقة و الله يرحم خروتشيف.... و من بعد يسبو السلفية...

و البلوقوسفير التونسي (نسخة 2008) تحول الى "ملجأ" لأفكار عفى عليها الزمن, و "أرشيف" لنظريات فقدت المصداقية متاعها منذ سنوات و تعفست كل مرجعياتها الايديولوجية تحت الساقين ... و مرتع لقطعان الرعاع ... نتاج العولمة و ثمرة حرب الارهاب ... ...

حاصيلو حال و احوال , و ربي يهدي ...
و اللي يحب يسكر يسكر و اللي يحب يصلي يصلي و اللي يحب يمشي على راسو ... حر في فكرو...الفائدة في الاحترام...
و للناس الكل نهدي غناية جيفرسون اربلاين اللي تعبّر اكثر مني على الحالة هاذي

boomp3.com

I think it's time we stop, children, what's that sound
Everybody look what's going down

There's battle lines being drawn

Nobody's right if everybody's wrong
Young people speaking their minds
Getting so much resistance from behind


8 commentaires:

titof a dit…

يعطيك الصحة و الله
تدوينة عالمية برجولية
مرحبا بك من جديد

Tarek طارق a dit…

ههههههههه

ركحت مالا لشسمو هو بـ450 فرنك... الله يتولاك

أما يلزمك تفسر لبعض الفرنكفوليين العنوان على خاطر معارفهم في الميدان متوسطة

state of the union's speech

Anonyme a dit…

قاسم قاسم
خــــــــلي كل فول زاهي في نوارو ...
يا سي الكلندو :
دعه يكتب ! دعه يدّون !
دعه يعـــبر ّ
لا بد لنــــــــــا من المرور بكل المستنقعات ! كما لا بد من خوضها ! سنرى من سيمرّ ...من سيعبر؟
قاسم

Bachbouch a dit…

كلندو، راهي حرّية التعبير حاجة جديدة علينا و مزّلنا مجوجمين بيها... رانا لا تعلّمناها لا في المدرسة و لا في الدّار، على ذالك لازم باش نخلّصو الجباية قبل ما نتمتّعو بيها... ولّي حكيتو لكل داخل في إطار الجباية إلّي نشاله تتعدّى فيسع...

Clandestino a dit…

@titof:
رد بالك المرة الجاية تقلي تدوينة محلية و الا جهوية
@tarek:
هههه
اينعم ركحتلو
ما خير نركحلو هو و الا نركح للاخرين؟
@kacem:
ريت محلاك كي تعمل تعليق "قابل للقراءة"
كليمتين معبرين خفاف نظاف...
و الا فرّغت الشي في المدونة و ماعادش عندك ما تقول؟ ههههه
@bachbouch:
مرحبا بيك في المدونة
الديمقراطية مازالت بعيدة على ريوسنا ( و نعرف اللي انا زادة موش ديمقراطي حتى طرف)
لذلك انا واحد من ناش موش باش نستنى حتى تخلص الجباية اللي تحكي عليها لانها يمكن تقعد لاولاد اولادنا باش تتبدل الامور
...

Clandestino a dit…

@bachbouch:
btw ,
سلملي على كاليفورنيا ;)

Bachbouch a dit…

@klando
Slamek wsel :)
"يمكن تقعد لاولاد اولادنا باش تتبدل ا" Au moin, yetfakrouna bil 5ir :)

Anonyme a dit…

what I was looking for, thanks