اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

samedi 15 novembre 2008

حتى هي زادة شافت اللي عمرها ما شافتو


قالك فمة ثلاثة نساء يسكنو فرد بالاص في مدينة من المدن( في باريس و الا في لندرة و ربّما في تونس) , وحدة عربية و وحدة انقليزية و الأخرى فرانساوية...
اتفقوا نهار من النهارات باش ينسّقوا عملية مشتركة بيناتهم, و يعلنوا العصيان و يدخلوا في اضراب منزلي مفتوح (بما في ذلك اعلان حظر العلاقات الزوجية) باش ماعادش لا يطيّبوا لا يغسلوا لا ينظفوا و ماعادش يمسّوا حتّى شيء في الدار ,زعمة زعمة طريقة يختبروا بيها معزّتهم عند رجالهم و يورّيو بيها قيمتهم في الحياة الزوجية...
و من المعروف أنّو المرا تفهم المرا , و تتفاهم معاها مهما كانت جنسيتها أو ثقافتها أو أصلها أو معتقدها ...على عكس الرجال.

فنجح الاضراب و بدى يعطي مفعوله

المراة الفرانساوية , من النهار الأول, ولات تعيش في العزّ... خرجات و سهريات و عشاوات البرّة... راجلها ماعادش يرمي صبّاطو كيما جاء , و ولّى زادة يلمّد وحدو الحوايج و يحطها في الماكينة ... حتى الدوش اللي مستانس يخلّيه حالة مكربة , ولى ينظفوا و يخليه خير ماللي دخلّوا المرّة الأولى...
المرة الانقليزية ...كيف كيف... من النهار الأول متاع الاضراب بعث راجلها على فطور من برّة, و حضّر كل شيء حتى من التاي و الكايك, و خرج بيها في السهرية و شرالها كادو, و النهار و طولو وهو يبشبش بيها...فين نحطّك يا طبق الورد....حتى التلفزة سلّملها فيها , و ضحّى بالماتش متاع المنشيستار و الأرسونال باش تتفرّج هي في المسلسل القديم متاع عام 83...

فـ عدّات هي و جارتها الفرانساوية احسن ايامات حياتهم, و شافوا من ازواجهم اللي عمرهم ما شافوه (حتى في الاحلام)

اما جارتهم الثالثة (اي العربية) ...المسكينة ما شافت شيء... في النهار الأول زرّقلها راجلها عينيها الزوز ...و بعد نهارين (تحديدا) بعثها لدار بوها.

ة


11 commentaires:

abu arabi a dit…

مدونة نظيفة ومحترمة وما نقدرش نقعد نهار مانعملش عليك طلة...برافو..ونقشاتك حلوين..

misscook a dit…

we tnadhaflou,we tbachbech bih we tdalllou , we t9oumlou bommou we ebouh , we t3awnou 3la hamm eddenya we testahfedhlou 3ala charfou we 3ala floussou , we trabbilou awledou ,we sa3at tosref 3alih we tekhdim 3alih!!9allek beled hou9ou9 el mar2a mon oeil!!

Sofiene Chourabi a dit…

اضرب عندك يا حراق هاو جاك مسيو جفال جودي

abu arabi a dit…

Sofiene Chourabi كمية العلف المتوفرة لا تفى باحتياجات القطيع..نرجوكم مراجعة ديوان تربية الماشية وتوفير المرعى

abu arabi a dit…
Ce commentaire a été supprimé par un administrateur du blog.
Misscook a dit…

mouch mochkel si abu arabi (dhaher 3arbi, we 3arbi yasser zeda !) ana ghalta elli jit el moudawna fiha tatih le9dar!! samhouni ghlot ma 3adech en3awed!

Clandestino a dit…

@missCook:
فعلا المرى عندنا مازالت تعاني
انا نعرف شكون جاء باش يفطر اخي حرف لسانو على خاطر الشربة سخونة يشد مرتو يعطيها دقديقة يدخلها للسبيطار...قالك يلزم تبرّدلو الماكلة قبل ما تمدهالو..

@ابو العرب
مرحبا بيك
@sofino:
مرحبا بك كذلك أما مفهمتش اشبيك دخلت في الراجل جفال و اومو و جودي... ربما بيناتكم حسابات قديمة ماذابية لوكان تصفيوها عندك بحذى الفردة الأخرى
و هذاكة علاش ما نحيتش التعليق متاع العلف و الماشية... مادام انتي قتلو مسيو جفال هو زادة عندو حق الرد ..

abu arabi a dit…

Misscook ....قدرك عالى وما يطيحش وقدرك انتى اللى صنعتو لروحك ...مانحبوكش تتغشش على غلطة وتعرف اللى انتى موش مقصودة بالتعليق هذاكا..مع تحياتى

Anonyme a dit…

أحكي كان على روحك أنا عمري ما نضرب مرتي

Clandestino a dit…

صحيت سي الانونيم ...^^

ولد الفكرونة a dit…

J'ai le plaisir de vous annoncer que vous venez d'être taggué.
Merci de jeter un coup d'œil sur mon dernier billet "Never…Say Never!".
Amicalement.