اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

mardi 4 mars 2008

حديث فلاحي

فخّار بكري
معلّم من الجيل الجديد لاحظ تغير كبير في مستوى تلميذ من تلامذتو. ناداه قال
-" شكون يقري فيك في الدار ؟؟"
-" بابا عزيزي"
-"قلو يجي يطل علينا"
من غدوة جاء التلميذ مصحوب بجدّه -الشيخ الزيتوني- و عرضو المعلم بالاحضان " علاش هكة؟؟ الوليّد فسدتو و بهّمتو و صطّكتو, يا رسول الله في عوض تعاوننا..."
و يهبط عليه الشايب بالباكيتة على راسو... " تصطيكتي أنا خير من علومك انتي"


العادة... موش للنساء فقط
واحد سكران دودة, وقف قدام أفيش (بالحجم الغير طبيعي ) للـسبوعي , نحّى المريول و جبد لام
"فدّيت مالميزيريا فدّيت مالبطالة فديت من حياتي... يا دبرلي خدمة يا نشلّط روحي"
التصويرة قعدت تخزرلو بنفس الابتسامة...الساخرة
"هاو باش نشلّط روحي..."
و شد هاك اللام طالع هابط على صدرو اجنابو و ايديه و اكتافو... لا رحمة لا شفقة ...حوّل روحو للنمر المقنّع
في الصباح , اللي تعدى الأول قدام البوستار و شاف بقائع الدم:
"لا حول و لا قوة الا بالله...حتى السبوعي عندو الراڨل ؟؟ !!! "

فمة اللي تتشرب, و فمة اللي تتشرب و تتشم
موزع متاع كونوليا : يا حاج شنوة نهبطلك ليوم ؟؟؟
الدخاخني ( و يبيع البرفانات صبّة): هات اعطيني زوز دبابز مالخضراء و دبوزة من الصفراء
الموزّع : هاي الزرقاء موديل جديد و ماشي مليح ها الايامات
الدخاخني: لا وليدي , الزرقاء ما يشربوهاليش...

صنايعي
القهوة معبّية و الناس مكرّزين و السرفورات واقفين في بلايصهم, القهواجي متاع الماكينة ما يحبش يعصر القهوة
مولى القهوة: " تي شبيك يا اشسمك , فيسع سربي العباد..."
القهواجي : " سامحني عرفي , مانخدم كان بحليب دليس..."


اللجنة الفلاحية
وقفت الكرهبة في قلب السانية, هبطو منها جماعة (كيما بوليسية الأف بي اي) , مريات شمسية , كساتم كحل , محافظ كبار و برشة اوراق و دوسيات...
- احنا لجنة مشتركة متناصفة مدعمة من الصندوق العالمي و الامم المتحدة و الاتحاد الاورو متوسطي , تدرس مشاكل القطاع الفلاحي و تستشرف آفاق القطاع في خضم العولمة و المتغيرات الدولية عبر ابحاث و استشارات و دراسات ميدانية نعملوها على عين المكان... و هذاكة علاش جيناك.
الفلاّح (حال فمّو و ريقو سايل على جنب) - تفضلوا تفضّلو...مرحبا بيكم و ناي راني نحب نشكركم و نشكر الرئيس و سي فلان رئيس الجمعية المائية

بعد 4 سوايع...

- إذن نجّمو نقولو أنو مع موفّى سنة 2030 انتي تولّي مولى المشروع و الغراسات تبلغ سن الانتاج الفعلية و تضمنلك دخل سنوي لا يقل عن الـ100 الف دينار سنويا عدا المنح و التشجيعات و الامتيازات العينية الاخرى اللي تنجّم تستفيد منها , حاصيلو البلاصة هاذي باش تتحول لجنة على وجه الأرض.
الفلاح ( يبلع ريقتو) - الله يرحم والديكم ... ناي راني نحب نشكركم و نشكر رئيس الجمعية المائية و العمدة متاعنا و السيد المعتمد...
- مرسي مرسي , خلينا توة نمشيو و غدوة نرجعو نكتبو الاوراق...
الفلاح- كيفاش تمشو تو الفطور راهو حضر ايا اقعدو افطرو الساعة
- لا لا يعيّشك ماعادش وقت خلي مرة اخرى
- مالا و الله باليمين الا ما تهزو ها العلّوش ... حرام عليا حلال عليكم
- علوش ؟؟؟ ميسالش, يا سيدي ناخذو بخاطرك باش ما تتغشش علينا

و حطو العلوش في المان متاع الكرهبة و مشاو... و بقى الفلاح يستنى (باش يرجعو و يصححو الاوراق)... ليوم الناس هذا


7 commentaires:

Skydancer a dit…

:D
Yesser boulade2 :D
Surtout mta3 7lib délice :D

هناء a dit…

صح نفهم تونسي اما في حكاية الراجل الي شلط روحو كان لازم تحط
sous titrage

Slouma a dit…

Sous titrage tu peu dire amel un Code a barre fi son corp :)

Nourhene a dit…

:D la dernière ne peut être que tunisienne, une escroquerie bien ficelée!! Je crois même que ça peut marcher réellement :p

Clandestino a dit…

skydancer:
هذاكة قهواجي حريص على الجودة
و هذا المطلوب في المرحلة هاذي يلزم الناس الكل نوليو بشهايدنا الـ إيزو 7007

هناء:
الراجل شلّط روحو بمعنى جرح نفسه جروحا عميقة بشفرة الحلاقة

سلومة:
مرحبا بيك
انا نحب التبيهات بالصور المتحركة
فنشبّهه بالقط قارفيلد (اللي فيه برشة خطوط عرضية)

نورهان:

نوّرت المدونة يا نورهان
الحقيقة انو وجودك بين المعلقين في مدونتي المتواضعة يرفعلي من المعنويات

ps:
الكلام موجه كذلك لسكاي و هناء و سلومة ... باش ما تقولوش الكلندو يميّز و يحايل علينا
ps2:
يا نورهان شكوني البنية اللي في التصويرة ؟؟

Slouma a dit…

yezzi ya clando hedika rahi sa foto et zeda sans chirgie esthetique :).
10 kima norhene et bkodret rabby essami elalim ntaihou ala le Liban :)

هناء a dit…

حتى و لو فكرت تميز حقك ، انا نفهمك البنية الي في الصورة يجوز فيها التمييز و لا سلومة؟