طار الكعبي ... و قعد طارق يبحث

حقائق (العربية)29 سبتمبر 2008

توة واحد كي يقرأ المقال المختصر (و الغير مفيد) اللي لفوق و يبدا موش من جمهور الكورة و مافيبالوش بشنوة صار في الفينال متاع الكأس بين طارق و الكعبي(الوزير موش الملاعبي) , اكيد انو يمشي في بالو اللي طارق داخل في قضية رشوة الله اعلم بحجمها و ابعادها ... و الاكيد زادة انو باش ياخذ فكرة مزمرة على الملاعبي الاول متاعنا ... و ربما يربط بينو و بين مجموعات المافيا الغير ايطالية و ربما يحاول يلقى صلة بينو و بين افراد بعض العائلات المالكة (اللي معندهاش امراء و لا ملوك) المعروفة بضلوعها شبه الدائم في قضايا الفساد و الرشوة و التلاعب و الاختلاس و كل مافيه قلة الخير و المعروف ...
فخبر من النوع هذاي يفقد طارق ذياب برشة من الاحترام الشعبي اللي يتمتع بيه و يتشوّهلو سمعتو في الداخل و الخارج... و الله اعلم اشنوة ينجّم ينجر عليها آخر...

بالطبيعة الناس الكل تعرف انو المشكلة بدات من منصة التتويج متاع ملعب رادس , وقت اللي طارق ذياب جبد بالوزير (السابق) متاع الرياضة و ماحبّش يسلّم عليه , و هذية حكاية عادية في بلدان القانون و حقوق الانسان كيما في فرانسا عمناول وقت اللي المزارع جبد برئيس الجمهورية و بعثو يسيّق قدام العالم و الصحافة و المصورين و المراسلين ...و بمقارنة بسيطة يتضح الفرق بين رئيس فرانسا و وزير الرياضة (المخلوع*) و بين الفلاح الفرانساوي و طارق ذياب صاحب الكرة الذهبية الوحيدة في تاريخ بلادنا ... و بمقارنة اخرى تفيقو بالفرق بين نهاية الفلاح الفرانساوي (اللي اكيد مازال عايش كيما امس كيما ليوم و يسرح بالبقر و الا بالمعيز في بعض الولايات الريفية في فرانسا) و البنقة اللي دخل فيها طارق ذياب توة عندو شهر لتالي.

المشكلة اننا في تونس وقت اللي نحبو نشدو واحد نعطيوه حسابو , مانستنوش في الدورة, بالعكس نجيبوها عريانة و واضحة تعيط...
معارض سبّ الحكومة في القناة الفضائية ما يلزمش يروح يشيلوه رأسا من المطار, واحد حكى نكتة على المدير و قوّى فيها الدوزة شويّة يلقى روحو في الحبس على طرف زطلة في القجر متاع الكرهبة الله اعلم حق و الا باطل, لاخر عمل تصريح في منظمة دولية يلقى روحو مشدود في قضية اختلاس اموال عمومية فيها 5 و الا 6 سنين حبس بخلاف الخطايا...
بحيث انو في بلادنا مانجموش نشدو البونتو و مانجموش نضبطو مشاعرنا ... و هذيا ربما تكون حاجة باهية على خاطر الناس اللي عندهم الاندفاع و التهور هذاية عادة ماتكون قلوبهم بيضا و فيسع ما يرجعو ... ربي انشالله يحنن القلوب على بعضها...
لا انو بمقالات كيما اللي لفوق ياذنوبي... مقالات من النوعية هاذي ياما مسّخو عباد و قضاو على مستقبل و مصير عايلات باكملها ...
و حتى كيف الحاكم يعفّ و مبعد ما يقضي قضيتو بالشخص المعني, عادة يسامحو و يخرّجو من الحبس قبل انقضاء العقوبة, زعمة زعمة حسن سيرة و سلوك, و يرجّعلو حقوقو كاملة كاينّي لا كان و لا صار ( كيما صار للسحباني متاع الاتحاد و التليلي متاع الموانئ الجوية و المستوري متاع المطبعة الرسمية (استاذي في الجامعة) و ولد باب الله متاع نكتة رئيس غانة) , تقعد الكلمة الخايبة و المقالات متاع تطييح القدر و تشويه السمعة في الذاكرة و الاذهان, و ما فمّاش حتى صحيفة تتجرّأ و تقول راهو فلان اللي حكينا عليه المرة الأخرى في القضية الفلانية طلع بريء و خرج سلامات و استرجع كامل حقوقو و...و العرعور اللي تتعمّد الصحافة اثارتو في اول القضية ما يقابلوش عرعور مضاد في النهاية...
فطارق ذياب توة يعتبر مخالف للقانون و مرتشي و باش يبقى كذلك حتى اذا خذا سماع دعوى في المحكمة.


* عبد الله الكعبي طار (كي الساشي) , و حسب اخر الاخبار توة ولّى سفير في روما

صداقة بالمليم الرمزي

زويّز اصدقاء يحوّسو عقاب العشية
الاوّل(يتنهّد): الدنيا فسدت و المادة هي كل شيء...
الثاني: اييييييه ايه, يا حسرة على القيم الانسانية و المشاعر الصادقة و الاحاسيس النبيلة...
الأوّل: ماهو قالك هذا آخر الزمان , و الدنيا جابت ماعندها... توة عندك دينار تسوى دينار , ماعندكشي تقعد هكاكة, تشوف بعينك و تموةت بقلبك..
الثانـي: ايييه ايه , اللي عندو الحب يلعب كيما يحب ...
الأوّل(يتلفت لصاحبو): امّا جاب ربّي مازالت فمة عباد تقدّر و تراعي الصداقة ... الحمدو لله...

(مازال ما كمّلش يشوف ورقة بوعشرة الاف مرمية قدامو فوق المادة... يعطي لصاحبو كتف اقوى من كتف الجعايدي و يدزو قريب يفشخو على الكياس و ينقّز على الـ10 آلاف)
- يااااا عشرة آلاف
صاحبو (مازال طايح في الكياس) : عشرة آلاف ؟؟؟ امون ماني خوك , اعطيني حتى حق باكو دخان ...
- هههههه انا لقيتها الأول
-ياخي موش كنا ...
- لا كنّا لا سنكون , و برّة تعمل مزية ابعدني...قالو كنّا هههه
-

خيارة اخرى في السلاطة الجمهورية

اضغط لتكبير الصورة

الحُرّ هذاية موش هو بيدو الحُرّ اللي نعرفوه الناس الكل ...و اللي استانسنا بيه و حبّيناه و اعتبرناه خيارنا الوحيد (و فمة شكون كبر معاه كيما بسكويت شوكوطوم). الحُرّ هذاية غني عن التعريف و افارياتو "الديني-اقتصادية" معروفة لدى الجميع , و الناس الكل تعرف زادة اللي هو ولد ناس و من عايلة كبيرة و عندو شركة الدواء متاع المرسى من قبل ما يناسب الحكومة ...معنتها انو عايش في العز مالأوّل (موش كيما برشة ناس) و تربّي شبعان و المثل يقول خوذها من يد الشبعان اذا جاع و ما تاخذهاش من يد الجيعان اذا شبع , الله يبعّد علينا الشر و وجوه الشر و المجاعة ...
بالطبيعة موش هذا موضوعنا لأنو نسيب الحكومة مازال ما جاعش و مافماش احتمال انو يجوع على قريب ...ربي نشالله يزيدو و يرشّنا بشويّة ماللي عندو...

موضوعنا اليوم هو المقال اللي يحمل نفس عنوان التدوينة و اللي نشرتو صحيفة الشروق البارح ... مقالة طحينية (دقيقية) من النوع الممتاز...في صحيفة تحترف شرب الحليب من تحت الرغوة اي انها تضرب تحت حسّ مسّ ( عكس جماعة الصريح و الاعلان و الحدث اللي ما عندهمش حتى مشكلة من ضرب البندير امام انظار الجميع و التباهي ببنادرهم علنا).

السيّد قالك اللي "بفضل السياسة الاقتصادية الحكيمة" السيد الرئيس المدير العام شركة النقل لمّد المسؤولين الألمان متاع الفولسفاقن و الأودي و البورش , و اكّد عليهم باش ياخذو قطايع الكراهب اللي يصنعوها من الشركات التونسية ... و قالك زادة اللي الكرهبة كي تشريها مالخارج تتكلف بـ 58 مليون و كي تاخذها من ولد المـ ـاطري تتكلف بـ47 مليون (10 ملاين فارق يا بوقلب), و هذاي الكل حسب السيد مولى البندير يرجع لكون شركة النقل تخدم فقط لتحسين قطاع النقل في البلاد و تطويره ... و موش كيما تتصور برشة عباد من اجل الربح المادي....

يا والله حـــال

انا لهنا موش باش نشكك في النوايا الخيّرة متاع ولد المـ ـاطري ...
و موش باش نطعن في نزاهتو و رغبتو في النهوض بكراهب البلاد ...
و موش باش نركّز برشة في اساليب استيراد السيارات ( علاش الكرهبة من تونس تتكلف اقل من سومها مالخارج ) و علاش الاداءات الديوانية تتطبّق على الكلاندستان و بقية الشّعب الكريم و تختفي بقدرة قادر من حسابات العباد الاخرى ...
و باش نحاول نصدّق انو مدير الشراءات متاع الفلسفاقن و "ثلّة من ممثّلي " الشركات ( اللي ما يحكم فيها كان ربّي و لا تسمع كلام حكومات ,لا كلام امم متحدة ,لا كلام كوندوليزا رايس بيدها) , ياخذو التعليمات من مدير النقل و يطبّقو استراتيجيات اللي يقول عليها ...

انا هذا الكل ما يعنينيش و ما يهمنيش... خاطرني مش من اصحاب الكراهب و مانيش من اصحاب الشركات
انا فدّيت من اللغة المضروبة , فدّيت مالـ"السياسات الحكيمة" و من "خدمة المواطن التونسي" و من " تدعيم الاقتصاد الوطني" و من "النهوض " و التحسين" و التطوير" و من "الحوافز المادية و المعنوية" و من الاجراءات التي من شأنها...
ان تضيف خيارة اخرى الى السلاطة الجمهورية

,

القوادة الجماعية في سمفونية البلاغات المحلّية

الصفحة 3 من جريدة الضريح متاع اليوم (09/جوان/2008)

حسب البلاغات اللي خرجت نهارة الأحد قاللك اللي الجماعة خايفين من "تعمد المواطنين تصنيع زجاجات حارقة" , و اجمعو على انو اهالي الرديف هوما اللي غالطين و يلزمهم يعتذرو على اخلالهم بالأمن العام و تشويههم لسمعة البلاد, و لاستعمالهم الماطراك و الكريموجان و الكرتوش ضد قوات الأمن ... قالك يلزم " تظافر الجهود لكسب رهانات التنمية و دعم الاستقرار و الامن و السلم الاجتماعية" ( ههه ) و برشة لوح ( حسب الأصول و القواعد متاع مدرسة اللوح العتيقة) تنجمو تشوفوه في صورة المقالة المصاحبة...

و كي العادة, احزاب المعارضة متاعنا تُعبر و تبرز و ما تفوّتش الفرصة باش تدعّم رصيد الولاء و مخزون الطاعة لولي النعم ... من مادة "الطحين الغذائي " ... اللي الناس الكل تعرف انها مادة استراتيجية و حياتية في بلاد الكنتول و ضرورية في عملية التنمية و الانفتاح الديمقراطي ... الا انو كثرة استهلاك المادة هاذي و التحوّل من مرحلة الاستهلاك الى مرحلة الانتاج( من طرف الاحزاب المعارضة الموالية اللاشرقية و اللاغربية و اللا علاقة ) تسبب في تواجدها بكميات ضخمة في الأسواق , مما أثّر على جودة المنتوج و تسبب في أضرار كبيرة على صحة مدمني الحلاوة الطحينية

أما الجانب المشرق و الإيجابي في الحكاية هو انو على القليلة ارتاحو جماعة الحزب الاوحد ( اللي يعتبرو هواة في ميدان ضرب اللوغة مقارنة بمعارضيهم) من مشقة اصدار البلاغات و كيما تعرفو راحة الناس هاذي هو هدف من اهداف المخطط التنموي و اولوية من اولويات سياسة بلادنا ...
و اكاهو
باش نحرق

التغطية الاعلامية و سياسة الساشي الاكحل

اليوم الصباح , و انا داخل للتاكسيفون باش نشري حاشاكم الدخان, عرضوني زوز من ناس, واحد في الثلاثينات و الآخر في الخمسينات و
الا اكثر, يتناقشو على ما يبدو على كارطة متاع تليفون, واحد يقلو تصبّت و الآخر يقلّو لا ما تصبّتش , خايفين لا تمشي عليهم الكارطة و تضيع الخمسة آلاف . قربلي واحد منهم و سألني على رقم مصلحة الحرفاء متاع التونيزيانا ... و أنا في الصباح قل و ندر وين نبدى في مزاجي - وخاصة المدة الأخيرة- ديما متغشش و ديما عاقدها مع الناس الكل... لكن المرّة هاذي برّدت دمي, و قتلو اللي مانعرفوش باش يقيلني هوا و الزنس اللي معاه...
و تفكّرت علّوش العيد...
اللي يقعد لآخر لحظات في حياتو ياكل و يبعبع و يجترّ و يعاود في اللي كلاه البارح ... ما فيبالوش لا بالسكّينة لا بشكارة الفحم و لا بالساشيات متاع الكنجيلاتور اللي يستناو فيه...
لكن هذيكة هايشة بكماء , ما نجموش نلوموها , موش بني ادم كيما الزويّز الحرفاء الأوفياء متاع التونيزيانا ... (اللي من ناحية اخرى ما يفرقوش برشة على معشر الاغنام الا بماكلة اللبلابي و الهرقمة )...

حاصيلو موش هذا موضوع التدوينة, موضوعنا اليوم هو التغطية الاعلامية للاحداث اللي قاعدة تصير في قفصة, من طرف وسائل الاعلام متاعنا .
انا الحقيقة نعرف اللي عندنا الامكانيات المادية و البشرية باش نغطيو الحوض المنجمي بالكامل ... موش الحوض المنجمي بركة , بل نجّمو نغطيو الساحل و الوسط و الشمال و الجنوب بما فيه جزر جالطة و زمبرة و مليتة و قوريا و حومة السوق تغطية كاملة و شاملة ... بساشي أكحل ...باش ما يتعدّى شي...ما يتسرّب شي ... النفس لا
و هذاكة اللي صار...
فاتّضح و انو كاميراهات التلافز متاعنا و حافلات النقل المباشر, و ميكرووات الاذاعات الوطنية و الجهوية و الخاصة متاعنا, و الأقلام الجافة (من قلة الاستخدام) متاع الصحفيين , ماتصلح كان لتصوير مقابلات الكورة و نقل المباريات و تسجيل اغاني و اهازيج الفيراج ... و رصد الشماريخ , و مطلقي الشماريخ , و احصاء الشماريخ , شمروخا شمروخا...

اما القنابل المسيلة للدموع و الرصاص الحي من بنادق اعوان حفظ النظام و الاضرابات و الاعتقالات و المداهمات و اعمال الترهيب و التنكيل بالمواطنين - و حرقهم احياء - فهي ليست من مشمولات وسائل الاعلام , المختصّة في "التغطية الاعلامية "... بل هي من المشمولات وسائل الاعلام المتخصصة في الكشف و التعرية (كشف و تعرية الحقائق) , و اللي للأسف نفتقدولها في بلادنا و حتى المواد هاذم على ما يبدو ما يقريوهمش في معهد الصحافة و علوم الاخبار متاع منوبة.

نعرفو اللي الصحافيين في العالم الكل يستغلّو الاحداث الكبيرة باش يسجّلو بيها نجاحاتهم المهنية و تلقاهم يتسابقو شكون يعمل السكوب و شكون يبعث مراسل يعملو التغطية اللازمة من موقع الحدث. فالاحداث بالنسبة للصحفي هي محور النشاط متاعو و مورد رزقو و فمة احداث تنجّم تكون سبب شهرة الصحفي و ضربة الحظ اللي تدخّلو للتاريخ (كيما الصحفيين متاع الجزيرة و الصحفي متاع السي ان ان اللي خلاه صدام يصوّر الحرب من بغداد عام 1991)...

احنا للأسف في بلاد الكنتول (المعشش في الافئدة و الجاثم على الصدور) و بحكم الغياب الكامل لاي نشاط مهني حرفي نجمو نطلقو عليه صحفي , و بحكم انقراض فصيلة الصحفيين منذ زمن , فمازلنا لتوة نلقطو في الاخبار من الداخل و الخارج و نتحايلو على الفيلتر متاع الانترنات باش نشوفو فيديو و الا باش نقراو برقية او خبر الله اعلم شكون اللي نشرو و الشنية خلفية اللي خرّجو , و نعيشو على البلاغات الرسمية و التصريحات متاع المسؤولين , ونجّمو نشوفو غرائب ما تصير كان عندنا ... و بالنسبة للعباد اللي تخدم في الحقل الصحفي في تونس ( ديما يتشكّاو من الاوضاع المادية و من قلة الموارد و عدم اقبال القراء على شراء الصحف ) فتغطية احداث قفصة بطريقة حرفية ربما كانت تكون حل لاسترجاع ثقة المواطن و المصالحة بينو و بين الصحافة المكتوبة و للنهوض بمستوى الصحف و تحسين الموارد المالية... لكن اللي صار كان مهزلة و كيما العادة لعبت الصحافة لعبة السياسة و طبّقت تعليمات امنية ربما وصلتهم ربما لا , و قامو بالواجب و اكثر من الواجب ...
في تونس سبعة -عندهم جمعة توة- كل ليلة بعد الاخبار يعديو برنامج النباتات و غرائب البحار , و ساعات برنامج الشوط الثالث متاع و الكورة, قناة 21 كيف كيف من العيادة التلفزية لبرنامج الكورة متاع البنية ندرى شسمها و حنبعل دورتها باست أوف لبرامج معز بالغربية و شلة بالمكشوف و ما فماش كلمة على اللي صاير في اخياننا اهالي الرديف... قال شنوة قاللك كشف خفايا الساحة الكروية و "تسليط الضوء على المدرّب الجديد للمنتخب"

حصيلوشي يخرج البشر من ملة محمد

قراءات في المشهد الاعلامي الوطني ( الجزء الثاني): يعطيك دودة يا صلاح الدين الايوبي

رغم اني مش مغروم برشة بالبرامج الرياضية الا اني كي نخلط على سويعة سبور و الا بالمكشوف نقعد نتفرج , موش محبة في الكورة و الا حرص على معرفة النتائج و الترتيب لكن لسبب واحد هو انو المتنفس الوحيد و شوية الاكسيجان متاع حرية التعبير في التلفزة هوما الزوز برامج هذوما.

و هاي فرصة باش نتفرج في ميزيريا الملاعب داخل الجمهورية, كيما هاك الستاد-الكوري (متاع بقر) اللي لعبو فيه ماتش الكاس بين المحمدية و قلعة الاندلس ... الارضية تراب مع شوية المطر و شوية قلت , و لاو الملاعبية تقولشي يلعبو في فور بوايار و الا "الحصن" (البرنامج الياباني متاع الالعاب) , و تمبك الميزيريا انو بعد الماتش او طرح التزلج على الطبعة ما فمة كان دوش واحد في كل فستيار (اللي هي بيدها ما تنجم تجي كان بافيون متاع حبس و العياذ بالله).

ايه عاد انا شايخ في حرية التعبير الكروية و قال بن غربية "نعود بعد فاصل اشهاري قصير..."
ضريبة اتصالات تونس... شوية يغورت ندرا شسمو... ضريبة جبن الحومة على شوية شكلاطة و شوية كاك...
و مبعد جات انونس متاع مسلسل تاريخي:
سيوفة و خيل و ليل (كيما متاع خونا ازواو) و ناس لابسة الصليب و اسوار و منجانيق و الدنيا ماكلة بعضها بالدمومات...
و تكلمت المذيعة...
بكل ما في اللهجة التونسية من تزعبين و ركاكة ( باش نقرب الصورة, هي بيدها الطريقة اللي يقولو بيها بعض البنات "يعطيك دقة " و الا " يعطيك عصيدة" و الا "او لا لا امبوسيييييبل" ) و قالت : "تابعو مسلسل صلاح الدين الايوبي يوميا على قناة حنبعل" و زادت " صلاح الدين الايوبي الذي حرر القدس و وحّد العالم العربي" (و الله هكة , وحّد العالم العربي).

باهي حرر القدس, صحيح , متفقين انو حرر القدس, اما وحّد العالم العربي هاذي ما فيباليش بيها, هذا اذا كان فمة حاجة في الوقت هذاكة اسمها العالم العربي على خاطر يظهرلي توة توة كي طلعت القومية العربية و وحدة العالم العربي, و فازة شعب واحد لا شعبين من مراكش للبحرين ( حتى كان ندخلو حديث في حديث, الشعار هذا مقرف ياسر , اخي اللي طلع بيه لولاني ما يعرفشي اللي فمة فوق العشرين طائفة في العرب و كل طائفة فيها 5000 ملة و كل ملة فيها ديار و عائلات و عروش و القاب و بلدية و قعار و جبورة و قافزين, بحيث انها الشكشوكة العربية يلخصها في شعبين ماهياش واقعية حتى طرف حتى اذا اقتضت القافية و الضرورة الشعرية متاع الشعار )

نغلق القوسين و نرجع لحكاية الاشهار متاع المسلسل و صوت المذيعة, موش باش نحكي على جهلها المطبق على خاطر هذاكة امر مفروغ منو اما باش نجبد حكاية اصوات المذيعين في الاذاعة و التلفزة التونسية هاذم اللي يتسماو

voix off

توة المتعارف عليه انو الصوت متاع معلقي البرامج الوثائقية و الاشهارات و الريبورتاجات يلزم يكون نوتر - محايد , عميق و رزين و يشد المشاهد, انا نتذكر قبل البرامج الوثائقية متاع ترنستال الالمانية المدبلجين في الاردن و لبنان و سوريا كانو يجيبو في معلقين عندهم موهبة غريبة و سحر خاص ,يعملو نوع من التنويم للمشاهد , يكفي انو الواحد يبقى يسمع اصواتهم باش ما يحسش بالوقت , و يركز مع كل كلمة و كل صورة في البرنامج , و نفس الشي للمذيعين متاع القسم العربي لاذاعة لندرة اللي اذا نقارنوهم بمقدمي الاخبار في الموزاييك , هذا اذا تجوز المقارنة, مانجمو كان نبعثو جماعة بوطار يعلقو على عرك الحوم و الا يعملولنا نقل حي لجماعة يسكرو تحت الحيط ...

Boudourou sur un journal tunisien

تحية للمولود الجديد في الصحافة الوطنية على الحركة الباهية و المقالة الجيدة اللي تلخص وضع المدونات التونسية و تستعرض بعض الأمثلة, حركة باهية بالطبيعة و مستحبة خاصة انها قدمت الصورة الصحيحة (او الاقرب للواقع) على عكس بعض المقالات اللي تنشرت سابقا حول نفس الموضوع.

و مع الشكر و التنويه نحب نوضّح انو رادار بودورو ما يرحمش , و اللي يحصل ليا و ليه ربي , و الحركة هاذية و التقديم الجيد للمدونات ( بودورو , هوهوبلوق, زيزو فروم جربة , الكلاندستان , ونورمال) ما تشفعش للمجلة اذا وقع المحضور و اصيبت بعدوى لغة الكنتر بلاكي.

فـ انشالله يطلع المولود الجديد ملقح ضد فيروس اللغة الخشبية و بكتيريا البندير المعششين منذ عقود في الصحافة التونسية, و نتمناولو كل التوفيق و نرجو انو مانلقاوش اسم الـ

(L'expression)ـ .

في يوم من الايام في سباق الحصول على احد الدوارة الثلاث