قصص دموية

قصة دموية 1 - الشقالة الطائرة:
حدّث التاكسيست قال :
نهار من نهارات وقفتني حريفة - حاشا خليقة الرحمان- ... هي في الواقع موش حريفة بالمفهوم السائد ، بالعكس ، كلمة حريف ربما تأدي المعنى اكثر من كلمة حريفة ...ميترو و خمسة و ثمانين طول على ما يعادلها في العرض ... واقفة على زويز عرص عيار 45 ......غلطة فادحة متاع هندسة وراثية ... فوضى متاع هرمونات ...عجّة (أو تسطيرة) متاع جينات مجهولة الهوية ... نسبتها لجنس الإناث جريمة في حقو (و قد يكون في حقّ جنس الذكور كذلك و الجنس البشري عموما ) ...
قلت "يا فتّاح يا رزّاق ... سترك يا ربّ " و وقفت الكرهبة...
حلّت الباب التيلاني ، قلتلها "سامحني اختي ، كان ما تراش مانع تطلع مالشيرة اليسار ، عندي المورتيسور اليمين طايب في حالة "
قحرتلي قحرة شككتني في روحي ، (شكّيت اللي ربما نكون قتلتها واحد مالعايلة و الا تسببتلو في 10 سنين حبس )...
عملت روحي موش خايف و تبسّمتلها ، نزلت على الفلسة متاع الكونتور ، "وين نوصّل اختي ؟؟"
"برّة سوق ... انده.."
ندهت كيما قتلي و عملت روحي نغني مع الكاسات ...
انا نسوق و هي "دور على اليمين" "دور على اليسار " "امشي في الطويل " للي وصلنا لحومة شعبية" عندي فيها ذكريات أليمة ... و مانتذكرش روحي قبضت حق الكورسة في الانهج متاعها ...
أيّست مالكورسة و استخلفت ربّي في التعب متاعي و تعب الكرهبة ، الا انّو فات الفوت و ماعادش نجّم ناقف و نهبّط الولية اللي ورايا ، خاصّة و هي تكوّر في ميدانها و امام جمهورها ، و اي مغامرة غير محسوبة من شيرتي ربما تكلفني ما يتجاوز حق ّالكورسة ...

من نهج لنهج و من زنقة لزنقة ، وصلنا قدام الدّار ... هبطت وقتلي ستنى خويا توة نجيبلك الفلوس... حلت الباب (تلامحت ما يقارب الميتين شقف اخضر متاع بيرة مرميين في المدخل ) ، و دخلت ...
كنت باش نمشي على روحي الا انو ابليس (يلعنو و يخزيه) و الطمع طلعوهالي في مخي باش نستنى ...
ما فماش دقيقة و نسمع في الصيحة " شنوة الفطور ؟؟؟"
مبعد تسارعت الاحداث ، برشة صياح و سبّ ، و بكاء و اصوات غريبة ، ميّزت من جملتها صوت الآفة البشرية اللي كانت باركة على المورتيسور متاع كرهبتي تسبّ في شخص آخر "يا طـ***** ، يا ولد الـ******* ، ***** ****** ****** ****** ****** ...."
، و اصوات متاع ضرب و حاجات رزينة تضرب في الحيوط و تطيح على القاعة، تطرشيق متاع بلار و قزاز مكسر...و تجيني شقالة مقرونة (بلحمها) طايرة و تضرب الباربريز...
فـ من غير ما نمسح البلار من المرقة و السباقيتي اللاصقة فيه ... خدّمت الكرهبة و انطلقت و دفع الله ماكان اعظم.



قصة مدمية - خيبة أمل:
هاذية قصة متاع مواطن تونسي مقيم في اوروبا ، تعرّف على زميلتو (الاجنبية) في الخدمة ، قاللها نحبّك قاتلو وهو كذلك ، شافتو نهار يصلي قاتلو فاش تعمل ؟؟ فهّمها في الاسلام و حدّثها على الاسلام و القيم متاعو، فعجبها الكلام و لقات اللي الاسلام هو الدين اللي يناسبها و لقات فيه برشة حاجات كانت تفتقدها.
ايا عرّسو و عاشوا جميع للي جاء الصيف و قالها نروّحوا لتونس ...فرحت و قالت هاذي مناسبة نزور الاسلام في ارض الاسلام و نشوف المسلمين و نعاين الدين هذا في ارضو و نشوف تأثيرو في العباد الغادي.
هوما في المطار يستناو ، قالها راجلها دقيّقة هاني راجعلك ...
بطى شويّة ياخي مشات تلوّج عليه ... تلقاه في الفريشوب يشوف و يقلّب في دبابز الويسكي و الفودكا...
" يا فلان شنوّة هذا ؟؟؟"
تبسّم تبسيمة صفراء " لا لا موش ليا ، هاذم كادو للاولاد في تونس ..."





قصّة دموية 3 - بكارة ناس بكري:
مبعد ما وفات السهرية و روّحت العباد ، هزّ العروس زوجتو و مشى بيها لعشّ الزوجية...
و في اسرع من لمح البصر كانوا في بيت النوم ...ديكور ليلة الدخلة نفسو من عهد عبد الحليم حافظ ... نصف اضاءة ... موسيقى خافتة ... ريحة متاع ورد حطتو امّ العروس على الفرش ...
انطلق الزوج في تطبيق التعليمات بالحرف الواحد، حسب توجيهات الاصدقاء و الاصحاب و حسب طريقة الاستعمال متاع الليلة الاولى الواردة في الكتب متاع دار الفنون و في صفحات الاعلان و الصريح..
اعاد تجربة التعليمات عديد المرات الا انو في كل مرّة ما تحصّلش على النتيجة المرجوّة ، و ما صارش اللي يلزمو يصير حسب كتيّب التعليمات...

قام من الفرش جبد باكو الدّخان ، شعّل سيقارو ، قعد يخزر لزوجتو ...مازال موش فاهم الوضعية ...يستنّى في توضيحات
زوجتو قعدت متخبية في الظلام متاع البيت ...ساكتة
سألها :" شنوة اللي صار ؟؟"
- "........"
- "شبيه مافماش؟؟"
- "شنوة الي مافمّاش ؟؟"
- "شكون عمل بيك هكّة ؟؟"
-" ماعمل بيا حدّ ... انتي يظهرلي فيك امورك ماتعجبش ... تراه مدّلي سيقارو ..."
- " و تتكيّف زادة ؟؟"
-"...امالا تتكيّف وحدك ؟؟؟"

حلّ فمّو... جبد سيقارو مالباكو ...مدهولها في الظلام ...
-" بريكية ..."
جبد البريكية و شعّللها السيقارو و قعد يخزرلها تتبسّم على ضوء البريكية

- "توة كيفاش باش نعمل ؟؟؟ اش باش نقول و اش باش نحكي ؟؟؟ نقللهم مرتي راهي طلعت مكـسّـ.... ؟؟؟ تي مانجّم حتى ننطقها الكلمة ..."
-"لا قولها ميسالش ...قولها و انتي على دينك..."
- " شنوة يكون موقفك وقت اللي بوك و خوك و امك يسمعوا ، شنوة موقفي انا قدام الناس و العالم و المجتمع ؟؟؟ كيفاش باش نعمل ؟؟
- تحب نقلك اش باش تعمل ؟؟ انتي بيك على الدّم ؟؟ تحب على الدم برّة تفرّج في الجزيرة ... و الا نقلك اضرب راسك على الحيط توة يطلع الدّم..."

فكان الامر كذلك ، خرج الرويجل من بيت النوم و قعد قدام التلفزة يتفرّج في الجزيرة.

مثل معبّر : المـــاء اللي ماشي للسّدرة

السدرة مسكينة عطشانة ... مذمومة ...محرومة ...الماء ماشي للزيتونة قاللك الزيتونة اولى بيه...و الخير ...و الهناء ...
الماء مشى للزيتونة ...زيتونة ماترواش ... زيتونة ماتشبعش...زيتونة ما تحشمش ... زيتونة كرشها اكبر من بحورات نابل و قليبية و المهدية و بنزرت و قابس و جربة و جرجيس و قرقنة , زيتونة يدّها اعلى من جبل الشعانبي ... و جبل عرباط و جبل وسلات ...زيتونة مشحاحة ...ديما تاخذ و ما سمعناش بيها مرّة اعطات حاجة و الا خلات ... الجراد ساعات يسخف على العباد، و يخليلهم حاجة في جرّتو.

سّدرة مسكينة ... ديما راضية... ديما ساكتة ... مسلّمة مستسلمة ...سلّمت في الماء ...سلّمت فالنسمة ...و نسات طعم الماء و نسات طعم الكلمة ...يا حسرة منين كانت خضراء و يقولولها يبارك في ترابك يا الخضراء

تأمّـلات مواطن امام نوافذ الكنام...الخالية

تصوير: حلـمي الهانــي

و هاذي وحدة أخرى باش تعرّس

علاش البنات الباهين فيسع ما يجيهم المكتوب ؟؟؟ و علاش ما تقعد كان التاعبة و أختها ؟؟ و علاش البنات اللي عرفهم الكلاندستان في فترات سابقة لكلّهم عرّسوا ؟؟؟ زعمة علاش؟؟ حكاية زهر ؟؟ نواصي و عتب ؟ شهيلي يطيّب لغيرو ؟؟ علاش ما تولّي الطفلة عزيزة و غالية الا مبعد ما يسمع بيها باش تعرّس؟؟ علاش ما تقدملهاش مالأول ؟؟ وينهي شجاعتو و رجوليتو ؟؟ علاش ما يفيق كان بعد فوات الأوان؟؟ عقم هجومي ؟؟ انعدام ثقة ؟؟؟ مشكلة مادية ؟؟ نفسانية ؟؟
وقتاش ينوب ربي؟ وقتاش تتفرهد لومور ؟؟ لوقتاش نبقى نستنى ؟؟ لوقتاش نبقى نكوّن ؟ فاش نكوّن ؟؟ و لاشكون نكوّن ؟؟ وقتاش توفى رحلة التكوين؟؟
ملا كلمة... تكوين... قداش كرهتها الكلمة ... تكوين ... ماهو كوّن على روحك ...تكوين ..فلان يكوّن في مستقبلو ... تكوين...مهني .... تكوين ... قطاعي ... مكوّنون ... مكوّنات ... المجتمع المدني ... ههههه

الحاصيلو العالم الكل يكوّن و يتكوّن و ياخذ و يقرأ الفاتحة و يشري في الصياغة و يعرّس و يخطب و يشري في الموبيليا و يجيب في الصغار ...أفواجا أفواجا ... اطارات, المستقبل و ياخذو في الكراهب ... يحوّسو - يلوّثو في البيئة ... يصبّو في مازوط 1250... و انا نكوّن...

- علاش انتي عندك كرهبة ؟؟
-لا عندي برمي
- عندك دار ؟؟
- لا
- عندكش تراب, أرض رزق ملك ورثة قديمة؟؟
- لا
- طبيب ؟ مهندس؟ استاذ في الجامعة ؟ مسؤول في شركة ؟؟
-ههههههه
- امّالا باش دازز على الدنيا
- عندي مدوّنة
- ؟؟؟
- بلوق و تصويرة 10 كيلو بيت من عند يسرى
- شنية ؟؟
- جائزة
- هههههه برّة حل كتاب على روحك
- كتاب البخلاء؟؟ كتاب الأغاني و الا سفر التكوين
- ما قعدت قوي كان في الشفاهي... على كل حال كان نجمت اعمل طلةّ نهارة الخميس

وهو كذلك ... نهارة الخميس الجاي باش نمشي ... مرّة أخرى ... نحضر عرس الكلاندستان ... أما بحضور ملاعبي آخر ... لاعب معوّض تحوّل لأساسي ...
و كيما يقول لومير ,
«Si certains sont en mal d'image, d'autres sont en mal d'efficacité, »

قولة كبيرة ياسر و عميقة ياسر و فيها معاني فلسفية ..اما نجّم نلخّصها في كليمتين خفاف نظاف : " الفائدة في الرجولية ..."
ة

ثمّة حبس ... و ثمّة حبس

أكيد انو الناس الكل سمعت بولد باب الله كيفاش قرطسوه و كيفاش شالوه من الكرهبة اللوكاسيون رأسا للجيور ثم ّ للمحكمة باش يضرب عام حبس في محاكمة حطمت الرقم القياسي متاع اسرع محاكمات قضايا المخدرات في البلاد.

و الاكيد زادة انها الناس الكل في بالها بقضية الفنان الحساس الرقيق متاع الزيوانة و عطشانة هيييه, سي شريف علوي, اللي عمل فيلم من اخراجه و من بطولته و كذب على البوليسية و وكيل الجمهورية و الصحافة و طبيب الاستعجالي و قال اللي تعرض لمحاولة اغتيال , تقولشي الراجل راسو مطلوب كي اسماعيل هنية و خالد مشعل و الا حسن نصر الله, و مبعد دورها عملية سطو مسلّح ... باش في النهاية تتشد الطفلة اللي حب يغتصبها في دارو و تعترف بالحقيقة ... و بانت الـعملة القذرة و الحيوانية متاع السيد اللي ينسب روحو للفن و يدعي الرفعة و سمو الاخلاق و رقة الاحاسيس, محاولة اغتصاب و قضايا اخرى غامضة متاع عملة و مخدرات ... و ضرب هو زادة عام حبس.


و من المعروف زادة انها الاحباس انواع و أصناف و درجات , ( موش كيما حبس بوخذير كيما حبس محمد القطوس المعروف بعمليات التسور و التجوال الليلي فوق السطوحات ) و تختلف حسب نوعية الخدمات المتوفرة , ثمة حبس توت ابسيون فيه التلفزة الفضائية و فيه الكتب و السبور و التكوين المهني ...و ثمة حبس 5 نجوم معروف بسرعة الخدمات ( كيف تطلب شربة ماء يبعثولك دبّوزة (كاملة)) و الاجواء الكبيرة وحفلات الترحيب اللي ما توفاش و بالسهريات اللي تتواصل حتى مطلع الفجر و برشة امتيازات اخرى ...

ففي وضعية الزوز فنانين فمة اختلاف , يمشيش في بالكم اللي عام حبس هو عام حبس ...فعلى ما يبدو عام الحبس متاع شريف علوي خير من عام الحبس متاع بلها,
على خاطر حسب ما قريت في الصحافة شريف علوي ما تشدش مع المجرّمة و النشالين و حثالة المجتمع و ما يليقش نصنفوه معاهم , زعمة زعمة عدى عام في دار الثقافة و الا في القسم الثقافي متاع مصلحة السجون على خاطر عملتو عملة محترمة و شي دوفر فني موش جريمة اغتصاب و هذاكة علاش الاخبار متاعو تتعدى في الصفحات الفنية و الثقافية ...

و كي خرج ولّى بطل و لقى الصحافة تستنى فيه بالاحضان, حوارات و لقاءات و مقالات و تصريحات و حصص تلفزية و سمير الوفي يتحي و علاء الشابي يزكي... و سي الشريف علوي من غير حشمة و الا جعرة و بكل صحة رقعة يتبكّى و يحكي على "المحنة" و الايامات و الليالي اللي عدّاها في الزنزانة , و كيفاش قوّى ايمانو بربي و كيفاش أدى الرسالة و ثقّف برشة مساجين في الموسيقى بل حضّر غنايات ملتزمة باش يطلعها مبعد ما يخرج... ناقص كان يقارن روحو ببورقيبة و منديلا و يتحول لمناضل دخل الحبس من اجل فكرة و قضية و مبدأ ...

حاصيلو شي يفدد و نفاق يكسّر الكرايم اما الحاجة الباهية انو ولد باب الله تعلم الدرس , و المرة الجاية يعرف مع شكون يفدلك و يتعلم يمشي على المادة و يرد بالو كي يجي يقص الكياس و ما يدخلش للزناقي المظلمة وحدو...

ة

قراءات في المشهد الاعلامي الوطني ( الجزء الثاني): يعطيك دودة يا صلاح الدين الايوبي

رغم اني مش مغروم برشة بالبرامج الرياضية الا اني كي نخلط على سويعة سبور و الا بالمكشوف نقعد نتفرج , موش محبة في الكورة و الا حرص على معرفة النتائج و الترتيب لكن لسبب واحد هو انو المتنفس الوحيد و شوية الاكسيجان متاع حرية التعبير في التلفزة هوما الزوز برامج هذوما.

و هاي فرصة باش نتفرج في ميزيريا الملاعب داخل الجمهورية, كيما هاك الستاد-الكوري (متاع بقر) اللي لعبو فيه ماتش الكاس بين المحمدية و قلعة الاندلس ... الارضية تراب مع شوية المطر و شوية قلت , و لاو الملاعبية تقولشي يلعبو في فور بوايار و الا "الحصن" (البرنامج الياباني متاع الالعاب) , و تمبك الميزيريا انو بعد الماتش او طرح التزلج على الطبعة ما فمة كان دوش واحد في كل فستيار (اللي هي بيدها ما تنجم تجي كان بافيون متاع حبس و العياذ بالله).

ايه عاد انا شايخ في حرية التعبير الكروية و قال بن غربية "نعود بعد فاصل اشهاري قصير..."
ضريبة اتصالات تونس... شوية يغورت ندرا شسمو... ضريبة جبن الحومة على شوية شكلاطة و شوية كاك...
و مبعد جات انونس متاع مسلسل تاريخي:
سيوفة و خيل و ليل (كيما متاع خونا ازواو) و ناس لابسة الصليب و اسوار و منجانيق و الدنيا ماكلة بعضها بالدمومات...
و تكلمت المذيعة...
بكل ما في اللهجة التونسية من تزعبين و ركاكة ( باش نقرب الصورة, هي بيدها الطريقة اللي يقولو بيها بعض البنات "يعطيك دقة " و الا " يعطيك عصيدة" و الا "او لا لا امبوسيييييبل" ) و قالت : "تابعو مسلسل صلاح الدين الايوبي يوميا على قناة حنبعل" و زادت " صلاح الدين الايوبي الذي حرر القدس و وحّد العالم العربي" (و الله هكة , وحّد العالم العربي).

باهي حرر القدس, صحيح , متفقين انو حرر القدس, اما وحّد العالم العربي هاذي ما فيباليش بيها, هذا اذا كان فمة حاجة في الوقت هذاكة اسمها العالم العربي على خاطر يظهرلي توة توة كي طلعت القومية العربية و وحدة العالم العربي, و فازة شعب واحد لا شعبين من مراكش للبحرين ( حتى كان ندخلو حديث في حديث, الشعار هذا مقرف ياسر , اخي اللي طلع بيه لولاني ما يعرفشي اللي فمة فوق العشرين طائفة في العرب و كل طائفة فيها 5000 ملة و كل ملة فيها ديار و عائلات و عروش و القاب و بلدية و قعار و جبورة و قافزين, بحيث انها الشكشوكة العربية يلخصها في شعبين ماهياش واقعية حتى طرف حتى اذا اقتضت القافية و الضرورة الشعرية متاع الشعار )

نغلق القوسين و نرجع لحكاية الاشهار متاع المسلسل و صوت المذيعة, موش باش نحكي على جهلها المطبق على خاطر هذاكة امر مفروغ منو اما باش نجبد حكاية اصوات المذيعين في الاذاعة و التلفزة التونسية هاذم اللي يتسماو

voix off

توة المتعارف عليه انو الصوت متاع معلقي البرامج الوثائقية و الاشهارات و الريبورتاجات يلزم يكون نوتر - محايد , عميق و رزين و يشد المشاهد, انا نتذكر قبل البرامج الوثائقية متاع ترنستال الالمانية المدبلجين في الاردن و لبنان و سوريا كانو يجيبو في معلقين عندهم موهبة غريبة و سحر خاص ,يعملو نوع من التنويم للمشاهد , يكفي انو الواحد يبقى يسمع اصواتهم باش ما يحسش بالوقت , و يركز مع كل كلمة و كل صورة في البرنامج , و نفس الشي للمذيعين متاع القسم العربي لاذاعة لندرة اللي اذا نقارنوهم بمقدمي الاخبار في الموزاييك , هذا اذا تجوز المقارنة, مانجمو كان نبعثو جماعة بوطار يعلقو على عرك الحوم و الا يعملولنا نقل حي لجماعة يسكرو تحت الحيط ...

من قوة العام : إتحاد الشغل حزب معارض

بعد المقالة متاع سي طارق الكحلاوي فيما يخص الانتخابات متاع هيأة المحامين , تذكرت حكاية صارت عندها مدة.
انا كنت نعرف بنيّة , عاقلة , بنت عايلة و كل شيء ... تخدم مدرّسة في الثاناوي :)
نهار قاعدين نحكيو على مشاكل الأساتذة (في الفترة هذيكا فمّ اضراب) و نقنع فيها بضرورة المشاركة, خاصّة و أنّو المطالب المطروحة وقتها هي مطالب مهنية بحتة و تهم مشاغل القطاع (اي ماهياش سياسية) , تفاجأت بردّة الفعل متاعها

- يا بنتي هذا إضراب شرعي ما ينجّم حتى واحد يناقشك ولاّ يحرمك من حقّ الإضراب
- لا لا فكّ عليا
- راهو ما يجيش هكّا , زملائك يضربوا و يتنقبلهم النهار و انتي تجي مبعد و تتمتع بالمكاسب اللي تحصلو عليها , هاذي انانية
- ياخي قلتلهم انا تكلمو عليا , انا هكة ساف , حتى الزيادة يخليوها عندهم ماعينيش بيها
- معناها انتي داخلة في الربح خارجة من الخسارة كان جابو حاجة هاك معاهم سينون هاك قاعدة تتفرج

ايا بقيت نحاول و كل مرة نجيب حجة جديدة لكن الطّفلة بقات خايفة من الإضراب و ما حبّتش تقتنع ...

اخر حاجة وقت اللي فدّت و فددتني معاها قالتلي (بكل فصاحة و صحة رقعة)

"أنا بابا قالّي ما تدخلش في المعارضة "

و