صداقة بالمليم الرمزي

زويّز اصدقاء يحوّسو عقاب العشية
الاوّل(يتنهّد): الدنيا فسدت و المادة هي كل شيء...
الثاني: اييييييه ايه, يا حسرة على القيم الانسانية و المشاعر الصادقة و الاحاسيس النبيلة...
الأوّل: ماهو قالك هذا آخر الزمان , و الدنيا جابت ماعندها... توة عندك دينار تسوى دينار , ماعندكشي تقعد هكاكة, تشوف بعينك و تموةت بقلبك..
الثانـي: ايييه ايه , اللي عندو الحب يلعب كيما يحب ...
الأوّل(يتلفت لصاحبو): امّا جاب ربّي مازالت فمة عباد تقدّر و تراعي الصداقة ... الحمدو لله...

(مازال ما كمّلش يشوف ورقة بوعشرة الاف مرمية قدامو فوق المادة... يعطي لصاحبو كتف اقوى من كتف الجعايدي و يدزو قريب يفشخو على الكياس و ينقّز على الـ10 آلاف)
- يااااا عشرة آلاف
صاحبو (مازال طايح في الكياس) : عشرة آلاف ؟؟؟ امون ماني خوك , اعطيني حتى حق باكو دخان ...
- هههههه انا لقيتها الأول
-ياخي موش كنا ...
- لا كنّا لا سنكون , و برّة تعمل مزية ابعدني...قالو كنّا هههه
-

اليوم الابيض و الزيتون الاخضر

بعد دعوة الزملاء المدونين للحركة الاحتجاجية ضد الحجب المتواصل للمدونات و ممارسة الرقابة و الوصاية على الانترنات , و التمقيص العشوائي و المجاني , و ممارسة القمع و الارهاب الفكري , فنضم انا زادة صوتي لبقية الأخيّان يوم 25 ديسمبر 2007, و نهدي التدوينة البيضاء لصديقي و زميلي فري رايس آخر ضحايا المقص و لبقية المدونين اللي تمقّصو هوما زادة العام اللي فات ( كيما آدم الصالحي ).

و استجابة للأخ الـ ب ت ب , و باعتباري كنت طرف في عركة بالاسطلة, نحب نشير زادة عن توقف العرك بالاسطلة ( من جانبي على الاقل) , و كيما كانو يعملو الهنود في اتفاقيات السلام ( يردمو فأس الحرب و يدخّنو غليون السلام) , فـإني بمناسبة اليوم الأبيض باش نردم سطل الحرب ( او كاسة الحرب لانها عركة في الحمام) و نشعّل سيقارو خفيف من سجائر يوم الاستقلال... و نهدي للجميع شقالة زيتون متاع سلام على القليلة ينفع , خير من غصن الزيتون اللي -حتى كان ندخل حديث في حديث- جرى في جرتو عرفات و من بعدو فتح و حماس و مصر و الاردن و البقية , و سلّمو على خاطرو في البندقية و هاكم تشوفو الحالة المكربة اللي وصلولها... لذلك انا مع احلال مبدأ السلام عبر شقايل الزيتون و صحافي العصيدة البيضاء بالزيت.

فلا فائدة من العرك في بعضنا و العدو الفعلي متاعنا (المدونين) هو عم الشيفور متاع الـكات كات , المقص , الاخ الاكبر , المحايصي متاع الانترنات (كانو انس من خيار الزنس و الا ماكينة متاع فيلتر) اللي كل ما نقولو هاو ساييي, وصلنا لسن الرشد و بلغنا , هاهم باش يسيبو خناقنا , هاو باش نرتاحو من الرقابة الابوية الا و يزيد الشي على قدام.
ة

Free 404 Race

تم صبيحة اليوم إغلاق مدونة زميلنا فري-رايس من طرف جماعة ال404 الي يعملو في رافل هالايامات.
مافهمتش شنية مقايس الي اتخذوها باش يسكروا هالمدونة و لوقتاش باش تستمر ها المهزلة , تقولشي في حرب كل يوم يطيح واحد , كل يوم يموت راي , تموت فكرة , تتقبر بالحياة ... لوقتاش باش تستمر الوصاية ؟؟ اخي احنا صغار نرضعو في صوابعنا باش السيد مولى المقص , شوفور الـ404 باشي يحافظ على صحتنا الفكرية و يحرص على النبض الروحي و النفسي للشعب ؟؟؟
اخي شنوة الارهاب ؟؟ ياخي الارهاب هو كان اللي يهز كرهبة مفخخة و يفجر روحو في وسط الناس ؟؟ ياخي الـ404 باشي مش اداة ارهاب نفسي و معنوي و فكري ؟؟؟
من هالمنبر نتهم هؤلاء (المقاصة) بتأويل كلام صديقي فريرايس ...هل أن أصحاب المقصات ولاو يحاسبوا في العباد على النيّات و على "ما يمكن ان يفهم من كلامهم؟" ... و الله عيب ... و شي يحشم ...

حشمتونا و فضحتونا يا جماعة ال404 و غيرهم (و اشباههم كثيرون)

و لو أن نيتكم فاسدة و تأولوا في المقالات حسب فهمكم و نيتكم المقعمزة فالمشكل مش في فريرايس بل المشكل فيكم يا مرضى. ننصحكم باش تبداو بحجب أمخاخكم الخامجة و نيتكم المقعمزة و ابداو بقصان بهامتكم و تهوركم.

حشمتونا ... والله حشمتونا