القوادة الجماعية في سمفونية البلاغات المحلّية

الصفحة 3 من جريدة الضريح متاع اليوم (09/جوان/2008)

حسب البلاغات اللي خرجت نهارة الأحد قاللك اللي الجماعة خايفين من "تعمد المواطنين تصنيع زجاجات حارقة" , و اجمعو على انو اهالي الرديف هوما اللي غالطين و يلزمهم يعتذرو على اخلالهم بالأمن العام و تشويههم لسمعة البلاد, و لاستعمالهم الماطراك و الكريموجان و الكرتوش ضد قوات الأمن ... قالك يلزم " تظافر الجهود لكسب رهانات التنمية و دعم الاستقرار و الامن و السلم الاجتماعية" ( ههه ) و برشة لوح ( حسب الأصول و القواعد متاع مدرسة اللوح العتيقة) تنجمو تشوفوه في صورة المقالة المصاحبة...

و كي العادة, احزاب المعارضة متاعنا تُعبر و تبرز و ما تفوّتش الفرصة باش تدعّم رصيد الولاء و مخزون الطاعة لولي النعم ... من مادة "الطحين الغذائي " ... اللي الناس الكل تعرف انها مادة استراتيجية و حياتية في بلاد الكنتول و ضرورية في عملية التنمية و الانفتاح الديمقراطي ... الا انو كثرة استهلاك المادة هاذي و التحوّل من مرحلة الاستهلاك الى مرحلة الانتاج( من طرف الاحزاب المعارضة الموالية اللاشرقية و اللاغربية و اللا علاقة ) تسبب في تواجدها بكميات ضخمة في الأسواق , مما أثّر على جودة المنتوج و تسبب في أضرار كبيرة على صحة مدمني الحلاوة الطحينية

أما الجانب المشرق و الإيجابي في الحكاية هو انو على القليلة ارتاحو جماعة الحزب الاوحد ( اللي يعتبرو هواة في ميدان ضرب اللوغة مقارنة بمعارضيهم) من مشقة اصدار البلاغات و كيما تعرفو راحة الناس هاذي هو هدف من اهداف المخطط التنموي و اولوية من اولويات سياسة بلادنا ...
و اكاهو
باش نحرق

المدونة = حفرة حجّام الباي...

ماهو يحكيو على باي من البايات , كان -و العياذ بالله - بـ قرونو ...
اي انو عندو زوز قرون كبار... تقولشي متاع جدع أو برشني او عاصي متاع بقر ... بون الحكاية هاذي ماهياش مقلقتو برشة على خاطر اهل الإيالة ما في بالهمش بالموضوع و كذلك الوزراء و الحجاب و الحرس متاعو...
و حتّى إلّي لاحظ أنو شاشية الباي كبيرة و ماهياش نورمال و لكنو قال هذاي الملك و إذا هو ما يلبسش شاشية كبيرة امال شكون باش يلبسها ؟ أكيد راسو كبير أو معبّي بالحكمة و العلوم كيما الملوك و الرؤساء الكل...
و الوحيد اللي مطّلع على الغلبة هاذي هو الحجّام متاع القصر , وهو الوحيد من الحجّامين متاع المملكة اللي حافظ على خدمتو و على حياتو على خاطر كان في مستوى ثقة الباي و تغلّب على غريزة الثرثرة الموجودة عند حجامة العالم أجمع ...
في نهار من النهارات وصل الخبر اللي فمّ شجرة متاع قصب في احد أرياف باجة أوالوطن القبلي (و يقال انها تاكلسة) وقت اللي ينفخ فيها الريح تبدى تقول و تردد "سييييدنا الباي عندو قرووون "...

ايا مشات بعثة من العلماء في البوطانيك و البيولوجيا و معاهم علماء اللغة و عازف النّاي متاع القصر باش يستقصيو و يثبّتو في الهدرة.
يلقاو حفرة (و يقال انّها بئر عميقة) داير بيها القصب من كل شيرة و مع كل نسمة يبدا هاك القصب يغنّي في لحن منتظم و اوركسترالي اغنية سيدنا الباي عندو قرون ... فنصبو الخيم و قعدوا يراقبو في الظاهرة ...
في ليلة من الليالي يشوفو الحجام متاع الباي جاي متخبي في الظلام ... يقرب للحفرة , يحط فيها راسو و يبدا يصيح عل قوة جهدو (سيدنا الباي عندو قرون)..
شدوه كـتـّفوه
و سالوه علاش يعمل هكاكة فقاللهم انو لوكان موش من هاك الحفرة راهو اطرشق من جنبو ...

corollaire:

انا يا سيدي البلوق هذاي هو " حفرة حجّام الباي" ...
عملتو باش نلقى فين نخجّ, نهز و ننفض, و نسب و نلعن (من غير ما نقول اسمي)
فـ هذاي هو المتنفّس و المنفذ و الريقولاتور متاع البرسيون ...
باش ما نطرشقش من اجنابي...

و انا ضد فكرة توظيف المدونة لخدمة بعض الاطراف و بعض التيارات سياسية , فبعد الدعوة المفتوحة اللي وجهها سي سفيان الشورابي "سوفينو"للمشاركة في ريبورتاج تلفزي يهم المدونات التونسية , حبيت نستفسر و نستوضح,
انا ما نعرفش شكون ياقف وراها القناة هاذي , لكن من اسمها تظهر قناة تتبع معارضينا العاملين بالخارج, و اللي للاسف ما ثماش اجماع او اتفاق حول نشاطاتهم و توجهاتهم و انتماءاتهم و خلفياتهم, بحيث انو ريبورتاج حول المدونات التونسية حاجة باهية , اما اذا كان تم توظيفو لخدمة بعض الحركات و التيارات السياسية , هذاي امر نرفضو شخصيا و سقف ما ندخلش تحتو...

د