J + 1 في بلاصة J : اول عيد ميلاد بين الاخوة و الاخوات في البلوقوسفار

إينعم , العدّ التنازلي كان بمناسبة الذكرى الواحدة و الثلاثين لميلاد الكلاندستان ... أما نظرا للظروف المناخية و النفسيّة في النهار "جي" و الغير مواتية للمناسبات السّعيدة فتمّ تأجيل الاحتفالات الى الجي +1 (و نرجو انو الشيء هذا ما يمسّش من السمعة الممتازة اللي تتمتّع بيها القدرات التنظيمية للكلاندستان).

لهنا فمّة برشة عباد و خاصّة من الشّباب اليافع يتساءلو (و عندهم الف حق يتساءلو ) شنوّة الطّقس في النّهار الاولاني متاع الـ31 ؟؟
و شنيّة المتغيّرات و التحوّلات اللي تجدّ على شخص عاش ثلث قرن ؟؟
انا مانجمش نجاوبهم لاني فعلا مش فاهم بالضبط شنوة اللي قاعد يصير... و ساعات نستغرب و ما نفهمش ردود الافعال متاع الناس’ على سبيل المثال وقت اللي نتعدّى وسط فروخ يلعبو في الكورة في وسط الكياس نسمعهم يقولو لبعضهم "استنى خلّي الراجل يتعدّى "
عجايب... شكونو الرّاجل ؟؟ زعمة انا هو الراجل ؟؟ انا ولّيت راجل ؟؟ يا ناري على روحي... ياخي الراجل مش تتقال على واحد عندو 5 صغار في جرّتو و في يدّو قفّة معبية بالخبز و الحليب و الخضرة ؟؟
و الا نتعدّى قدّام بوليس يرفّل في الشّباب باش يهزوهم للجيش (على خاطر الرافل رجعوه) يخزرلي و ما يكلّمنيش ... و يقلّي تعدّى خويا على روحك ... زعمة على خاطر انا ظاهر مسنّ للدرجة هاذي, لدرجة اني تجاوزت عمر الجيش ؟؟

و إلا و هاذي الاخطر و اللي تحز في النّفس اكثر من الكل أنّو تشوف بنيّة حلوة و مسرارة في ربيع العمر ما تناديكش باسمك , و تعيّطلك كيما فروخ الحومة "عم الكلاندستان"... و هاذيكة غلبة اخرى انو فروخة التسعينات و ما بعدها يعيّطولي بـ"عمّي", و الناس الكبار يعيّطولي بـ"سي" حتى خارج الخدمة , و النّسا متاع الحومة يحشمو وقت اللي يقابلوني و انا اللي كنت قبل ندخل لديارهم و نلعب مع صغارهم و يبعثوني للعطار و دخلت معاهم للخياطة و الحجامة و للحمام (في الطفولة المبكّرة بيان سور).
حاسيلو هذا ملخص للوضع الجديد و اللي بديت نتأقلم معاه حبّا في الناس مش على حاجة , على خاطرني الداخل مازلت كيف ما انا...من وقت اللي كنت نلبس 28 في ساقيّ و نغني انا الفتى النظيف و نبكي من الزرّيقة .


و كيف ما قال ادم فتحي "لابأس إن شاب شعري فلي شباب الشعور " فانا اؤمن بأنو الشباب هو شباب الروح ...
و رغم انها العشرية الذهبية متاع العشرينات تعدّات فمازال الواحد يتعلّم من الحياة و يخوض تجارب كل يوم و يعرف عباد و ناس جدد ...
و المسيرة متواصلة رغم كل شيء... و المشاريع و المخططات المستقبلية متواصلة و خاصّة مخطط الهجرة ... و اللي شادد فيه صحيح المهم نهجّ و نقلب فوقيرتي خلّي القورّة يمصّولي دمّي خير من الميزيريا و تكسير البطاطا متاع بلاد الكنتول.
و انشالله في العام الجاي وقت اللي تدخلو للمدونة تلقاو جو اخر و لوك جديد, في بلاصة "غدوة نحرق " باش تولي

El Clandestin from****** *

على طريقة المدونين التوانسة اللي يركّزو برشة على المكان ,
from jerba, from tunis, from US, from the moon, from mars

و في النهاية نشكر المدونين اللي حبوني و يحبّوني و المدونين اللي يبخرو بريحتي و المدونين اللي حضرو للميتاب و تشرفت بمعرفتهم و المدونين المضروبين في ارواحهم و المدونين اللي يحكيو لغة صعيبة و المدونين اللي يضربو اللغة و اللي يبزنسو في البلوقوسفير و المدوّنين اللي خرّجهم الحاكم من مدوناتهم و المدونين اللي ما يفرقوش بين الصديق و العدو و المدونين اللي يسبو و يقشقشو و اللي يقولو كلام زايد و المدونين اللي ياكلو الملاوي و المطبقة و المدونين اللي ياكلو الكراب و البان او شوكولا و المدونين اللي يسكرو كل يوم و المدونين اللي يستناو في الفرج و المدونين اللي طايحين من السلوم و المدونين اللي يخجّو و يسيبو في الهبل و المدونين اللي يلوجو على خدمة و المدونين اللي ما نجحوش في الكنكور و المدونين اللي يحكيو عليهم في لابراس و اللي يعديو فيهم في قناة المعارضة و اللي يلعبو في المسابقات و اللي تحرّك فيهم اطراف اخرى و اللي يحبّوا يطبّعو علاقاتهم مع اسرائيل بالطبعة متاع الكياسات.

و في ما يلي أغنية رايعة للحمائم البيض يتلوها ريبورتاج تاريخي لاهم الاحداث اللي تزامنت مع ميلاد الكلاندستان :

شعر ادم فتحي , لحن الشاذلي الخمسي , الكلمات في موقع ادم فتحي

ولادة ليون تولستوي 28/اوت/1828


















في 28 اوت 1965 ولادة شنايا توين
















في 28 اوت 1917 مظاهرة نسائية امام البيت الابيض
يحبّو المساواة في حق التصويت















28 اوت 1963 مارتن لوثر كينغ
يخطب في واشنطن الخطبة الشهيرة
I have a dream !!














28 اوت 1990
صدومة الله يرحمو و ينعّمو يعلن الكويت مقاطعة عراقية









في 1976:





وفاة اغاثا كريستي















وفاة الفيلسوف هيديقير
















وفاة ماو تسي تونغ

































ولادة المغنّي الفاشل متاع المجموعة الفاشلة لينكن بارك
















القمة العربية تجتمع لوضع خطة سلام في لبنان
و وضع حد للحرب الاهلية














خويا الباهــي جوزي بوفي : (بعد العمروش بطبيعة الحال

Trouble...

Oh no, I see,
I spun a web, it's tangled up with me,
And I lost my head,
The thought of all the stupid things I said,
Oh no what's this?
A spider web, and I'm caught in the middle,
I turned to run,
The thought of all the stupid things I've done,

I never meant to cause you trouble,
And I never meant to do you wrong,
And I, well if I ever caused you trouble,
O no, I never meant to do you harm.

Oh no I see,
A spider web and it's me in the middle,
So I twist and turn,
Here I am in love in a bubble,

Singing, I never meant to cause you trouble,
I never meant to do you wrong,
And I, well if I ever caused you trouble,
Although I never meant to do you harm.

They spun a web for me,
They spun a web for me,
They spun a web for me.

Coldplay - 2003


Aujourd'hui c'est le jour J ,
un jour comme les autres, Merci Arabbica...

J - 1 بنـيّـة première main

يوم 9 أفريل 2003 , الاربعة متاع العشيّة :
الكلاندستان مروّح من المستير في التران , شاد الشبّاك , يتفرّج في الزيتون و الهندي ...
شعور كبير بالمرارة ... طعم الهزيمة و الخيانة المضاعفة...


قبل برشة شهور:
الكلاندستان كان يعرف بنيّة تقرى في الجامعة في المستير , بنية متربّية , عاقلة , شبابة تعمل الكيف ... وقتها كان قلبو ارهف من توة , فيسع ما يحب و فيسع ما يتكب على راسو ...

ايا تضرب فيها و تضربت فيه و قال هاذي هي,
هاذي اللي باش نكمّل معاها حياتي , هاذي اللي باش نعطيها اسمي و اسم العايلة , هاذي اللي باش تجيب الكلاندستان جنيور , هاذي اللي باش تحقق تواصل السلالة العريقة متاع الحرّاقة ...

النهار على طولو و التليفون خدّام ... نحبك و تحبني و توحّشتك و يا عزيّزة و نمشي معاك فين تحب و وقتاش تجي تخطبني يا خايب و يا قطّوسة يا عزيّزة ...الى اخره
كي يتقابلو تقولشي جماعة الكتب و قصص الحب و الغرام و الف ليلة و ليلة , علي ولد السلطان و ليلى بنت السلطان , العالم كلّو وردي و معبي بالنوار و الازهار و الفراشات و العصافير تغرّد بين الاغصان و هيا نتامل الغروب على شاطئ البحر ... شايف البحر شو كبير ... ادايش كان فيه ناس ... حبيتك تنسيت النّوم...
كادوات ماشية جايّة , قهاوي دورة تطلفيح في الكياسات و الجرد ...

ايا مشات الايامات و الاشهرة و العلاقة تتطور و الامور عال العال... للي جات القراية و يلزمها تكمل تقرى في المستير .

مشات للمستير.

البنيّة بدات تتبدّل... هذا شيء مفهوم على خاطر الحياة مراحل و لكل مرحلة متطلباتها و يلزم الواحد يتاقلم مع الظروف الجديدة.
الطفلة يا سيدي ماعادش هاك البنية الضامرة و الحشامة , و الكلاندستان ماعادش ماليلها عينيها و مافي بالوش , باقي ماشي بالنّية الصافية و مافاقش بانها المشامية تقلبت و المعطيات تبدّلت و الحسبة ولات مادية : فرق بين وحدة تقرى في شعبة متاع "استكراز " و ثراء سريع و واحد يخدم بزوز صوردي كل راس شهر.

بعد الحجج الواهية و الكذب و التمثيل و التعلات متاع التحضير و التركيز على القراية و الامتحانات قرر الكلاندستان انو يمشي للمستير في زيارة خاطفة لإعادة المياه الى مجاريها و تمتين حبال المودّة . و كان الامر كذلك و مشى للمستير .

.....


برة يا زمان و ايجى يا زمان , الكلاندستان ما تربّاش , و عاود الكرة مرة اخرى ... يلقى بنية اخرى , عاقلة متربية ....و قال هذي هي (حلوة الشامية) الخ...
المرة هاذي الامور خذات منحى اخر...

ماي 2005 في مقهى راقي باحدى الضواحي:

الكلاندستان في مع موقف تراجيدي و جدير بافلام الحب و الحنان و قصص ماء الورد :
"برّة على روحك , زايد باش تضيّعلي وقتي و الا نضيّعلك وقتك, برة تلقى الخير..."

و مشات البنيّة على روحها و هذاك نهار و هذا نهار , مشات قصص الحب و ماعادش حتشيء كيما قبل ...

و رغم الاغراءات و العروض اللي تتقدملو كل يوم : " اهو عندنا سهرية نهارة الخميس ايجا و شوفها" ... " هاي بنت فلان شقولك فيها بنية ماعادش تلقى كيفها"... " ياخي وقتاش ناوي تعرسلنا , اهي فلانة حاذقة و متربية و تخدم " ...

فالكلاندستان بقى محافظ على اعصابو من العلاقات المثيرة للاعصاب و المشاعر و مكتفي بعلاقات بودورو من النوع الجوتابل.

........

خلاصة القول انها مقولات "الراجل ما يتحقرش يبات في حال و يصبح في حال " ماعادش تاكل على بنات توة , اللي يؤمنو بنظريات يقوّي سعدك في الان و الحين و "كن فيكون" و اش عندك انتي باش تكلم بنات الناس .

و فمّة زادة مقولات الكلاندستان مستحيل يؤمن بيها او تدخل طاستو الدقة القديمة وهي مقولات على اللاموضة و تلقى رواج كبير و نجاح عملي غير مسبوق :
'المرا كي التّمرة امسح و كول " "و المرا يخطبوها ميا و تبات عند واحد " وهي مقولات ترسّخ مبدأ التعدّدية اللي ما ترباش عليها الكلاندستان و ما يعرفهاش كان في التلفزة , فالتعددية و الروح الرياضية و تفسيخ الـ إيستوريك , قيم مغلوطة و ما منها حتى فائدة ...
بالله كيفاش الواحد يجيه النّوم مع طفلة رقدت مع شطر الجمهورية , كيفاش الواحد يعتز و يفتخر بانو مرتو كانت قنبلة و سكس سمبول في الفاك , كيفاش الواحد يفرح و يقول الحمد لله اللي كانت مصوحبة فلان و فلان على خاطرهم ناس نظاف... و الا يبدى شايخ على خاطر مرتو تعملو العاب كبيرة و قوية برشة و تعملو برشة تنشيط و انيماسيون على طريقة "البنقبروس "و "الأونيون بوتي" ...
هاذم بالنسبة للكلاندستان ناس تاعبين على خاطر هو مع الوسطية و كيما هو متوسّط في كل شيء و ماهوش لا سكس ماشين لا الرجل الخارق يحب زادة بنيّة متوسّطة تتفاهم و تتجاوب معاه على قد الجهيّد اما يلزم تكون و هذا الاساس "برميار مان"

ة

j - 3 ها قد أتى الخريف

قفوا , اجلسوا
الكلاندستان الى السبورة ...
"اعوذ بالله "


الخريفو
ها قد أتى الخريفو ...
.......
الخريفو
ها قد أتى الخريفو...

- يا خي حافظ و الا مش حافظ ؟؟
- و الله حفظتها انيسة, اما نسيتها
- باهي يالله اعرض اش حفظت

الخريفو
ها قد أتى الخريفو...

-وقف حمار الشيخ في العقبة , تحب نجيو ندزو معاك ؟؟ اشنية الانشودة اللي حافظها
-انستي حفظت نشيد العود الى المدرسة
-باهي تبارك الله عليك ايا سمّعنا العودة الى المدرسة

العودة الى المدرسة
عطلة الصيف انتهت وانتهى وقت الكسل
فلنـســـــارع للدّرس ولنـــبادر بــــالعمل
شهر اكتوبر أتــــى مرحــــبا يا مرحبا
عاد طلاب العلوم حامــلين الكــــــــتب

- احسنت, احسنت , عد الى مكانك .

هذية بالطبيعة ماهياش القصّة الاصلية لانو الوقائع التاريخية و اخر الحفريات تقول اللي الكلاندستان كلا ما تيسّر من ضرب المسطرة يومها و روح بخطيّة في جيبو (نشيد الخريف مكتوب عشرين مرّة في ورقة مضاعفة)


الحقيقة التاريخية هو كون الضرب كان عنصر اساسي من العملية التربوية و الكل مرّ بتجربة الضرب بدرجة متفاوتة, و الكلاندستان رغم التفوّق الغير عادي متاعو تعرض الى مظالم تحكيمية كبيرة و خذا نصيبو من عصا المعلّم و من ضرب الزملاء و الزميلات (لهنا العملية متبادلة في نطاق سياسة تعاونية حكيمة)
فالمعارك بين الفروخ كانت رائجة برشة في تلك الايام , و على عكس العالم الوردي متاع كتاب القراءة فعالم الصغار وقتها كان يطبّق قانون الغابة , القوي يفك ارزاق الضعيف (بيس و تصاور و فلوس و لمج و اقلام الزينة و الغوم بارفيمي و البرّايات على شكل كرهبة) حوت ياكل حوت , و كيما في مجتمع الكبار فعند الصغار كانت القاعدة الذهبية هي انصر اخاك ظالما او مظلوما ...
و الكلاندستان بحكم غياب كتف صحيح على خاطرو كبير اخواتو كان في اكثر الاحيان يواجه مصيرو بكل شجاعة و يتصدّى للعدوان متاع بقية الفروخ ببسالة غير عادية. و عادة ما تتطور الامور للضرب بالحجر و الجري في قلب الكياس بين الكراهب,
و اسوأ سيناريو هو انو يروّح للدار بحوايجو مغبرين و مطبّعين و جيب الطبلية مقطع , و إلاّ يلقى بو زميلو سبقو يشكي , و هذاك سيناريو الله لا يوريه لحبيّب ...الله يسترنا


و في المدرسة فمّ زادة البنات ....و فم البنيّة الصفاقسية (اشبّ وحدة في القسم) اللي تضرب فيها الكلاندستان و كان يجبرها باش تقعد بحذاه في القسم رغم سخرية بقية الفروخ اللي يشوفوها عقوبة انو وليّد يقعد بحذا بنيّة في القسم, و حتى اللي يجبرو المعلم باش يبدل بلاصتو و يقعد مع طفلة فيشد اقصى الكرسي و يخزر خزرة تهديد و وعيد لشلة السوء اللي يتبولدو عليه من اخر القاعة .
و الاكيد انو الطفلة الصفاقسية كانت مضروبة في الكلاندستان لانها كانت تقعد بحذاه في ساحة المكتب و ساعات تضربلو الكرتابل و تطيحها من يدو باش يبدى هو يجري في جرّتها و يشدّها من الطبلية و ساعات يشدها من شعرها و في القسم يركحوها عركة بالسبابط تحت الطاولة , اما المعزّة كانت موجودة والمحبّة واضحة ...يا حسرة عل المحبّة, ...*


الباهي وقتها أنو الناس الكل كانت كيف كيف, ما فمّاش شكون جاي يقرى ببوتابل متاع 500 الف , الناس الكل تكتب بالاردوازة و
بالطباشير, الناس الكل وجوهم و ايديهم مغبّرة بالطباشير , ارفعو اللوحة انزلو اللوحة
الناس الكل يستعملو كراسة نومرو 8 و نومرو 12 و نومرو 24...غلاف اخضر و غلاف ازرق... اوراق ملوّنة و أقراص و أعواد و نقود مزيّفة ,
ما عندك الحق الا في استعمال ستيلو البيك الازرق اللي كان دمّو سخون و فيسع يفيض و يمشّي الدنيا بالحبار... و ممنوع استعمال الستيلو الاحمر و الاخضر ( بداية التدرّب على اللعبة الديمقراطية و زرع العادة الحميدة متاع اللون الواحد).

و فمّة زادة التدريب على الاقتصاد , ففي كل مرّة يمشي الكلاندستان باش يشري سبّاط او سبادري كان يروّح بسبّاط اكبر منو , على خاطر السيّد الوالد كان يقنعو انو نظرا لسرعة النمو التاي (قياس) متاع ساقيه باش يتغير في شهر و الا في شهرين , و يدخّلو فيها اعتبارات الشتاء و الكلاسط الخشينة ...فاذا شرى حاجة "قد قد" يحتمل بعد مدة ماعادش تجي قدّو .
وهي في نهاية الامر اعتبارات واهية بالنسبة للكلاندستان , اش مدخلو في سرعة النمو و تطور حجم ساقيه , الاعتبار الوحيد عندو هو انو سباط يكون ملائم لحياة الجري و العرك و التكوير في الكياس , و وقت اللي يشوط الكورة ما يتنطّرش السبّاط من ساقو باش الفريق الاخر ما ياخوش كوفران.


*=البنيّة الصفاقسية حسب اخر المعطيات تخرّجت صيدلية و تزوّجت ...ربي يهنّــي

يكذب كذبة...و يصدّقهــا

"اكذب, اكذب دائما فلابدّ ان يبقى من كذبك شيء"

قاعدة ذهبية دخلت التاريخ (ما نعرفش عاد من الباب الصغير او الكبير), و انتجت كوارث و مصائب زرقة في القرن 20 , القاعدة هاذي مازالت تصرف لتوة و تثبت صحتها لحد الساعة . و حتى "قوبلز" مدير دعاية هتلر ماكانش واعي بالعبقرية الشيطانية متاعو و ما توقّعش انو باش يبدّل التاريخ و ما تصوّرش فين باش توصّل نظرية الكذب و التدجيل و الدعاية الموجّهة.

نظرية الكذب المعاصرة تنبني على خلق واقع موازي , عالم افتراضي , و خلق حقيقة جديدة و تسويقها و زرعها في رؤوس خلق ربي لإحلالها مكان الاولى , و ليس من الضروري ان تكون الحقائق الجديدة منطقية أو عقلانية فالعارفون بالحقيقة قلائل و حتى بعض الاصوات الخارجة عن السرب (او القطيع) اللي تتجرّأ و تاقف في وجه التيار باش يتكفّل بيها الإعلام و ابواق الدعاية لتغييبها و تهميشها و بعثها وراء الشمس .

تاخذو مثال احداث 11 سبتمبر...
المسلّم بيه حاليا أنّو اسامة بن لادن و تنظيم القاعدة هوما اللي ارتكبوها ,لكن وقت اللي نثبّتو , المحققين الاماريكان ما قدموش ادلة واضحة و حجج دامغة و اقنعونا بقوة التكرار و الدام اللي ينقب الرخام انو محمد العطا و جماعتو هوما المنفذين.
و الرواية الرسمية او المهزلة الرسمية تستند على ادلة واهية و بعيدة عن الواقع: كتاب قيادة طائرات و مصحف فيه تصويرة بن لادن في كرهبة لوكاسيون قدام المطار, و رقة بخط اليد منعت باعجوبة من تحطم طائرة بنسيلفينيا, كاسات لبن لادن يفتخر فيها بغزوة منهاتن , و لحد الساعة ما فمة حتى متهم ضالع جديا في التخطيط و التنفيذ و حتى المغربي الفرنسي و خلية همبورغ و الاف الاسرى متاع قوانتانامو و سجون الـسي اي اي ماهم الا ديكور للمسرحية.

هذايا الكل موش موضوعنا.
الموضوع الرئيسي هو السّامية و اشكون الشعوب السامية و علاش اليهود ما ينجموش يكونو من الجنس السامي, و ذلك استجابة للطلب الملح لصديقنا فرفر صاحب مدونة الكريمة الملونة.




أولا ما نجموش نصنّفو حاملي الديانة اليهودية بانهم عرق او جنس او شعب لان الدين موش خاصية وراثية و تناسل و دم موروث,, و لكنو اعتقاد و فكر (" الدين مجموعة مجردة من القيم والمثل و الخبرات التي تتطور ضمن المنظومة الثقافية للجماعة البشرية")
لا دم له و لا اجناس.

و يمكن ملاحظة ان اليهود هم فسيفساء من الاجناس و الاعراق اللي يرجعو اساسا لزوز مكونات رئيسية :
يهود الغرب (الاشكيناز) و هم من الخزر اي من شعوب اسيا الصغرى اللي هاجرو و استقرو في اوروبا و بصفة خاصة في روسيا و بولونيا .

يهود الشرق (الصيفاراد) و هم يهود الشرق الاوسط و شمال افريقيا و هاذم خلّصهم الاسلام من الغطرسة الرومانية و البيزنطية و اعطاهم حقوقهم السياسية و الدينية و الاقتصادية و اندمجو في الحضارة العربية الاسلامية و ساهمو في التطور متاعها و على عكس يهود اوروبا فاليهود في البلاد الاسلامية عاشو معززين مكرمين وماتعرضوش للتقتيل و للمجازر .

و فم مجموعات يهودية اخرى كالجماعة الافريقية المدعوة فلاشا اللي تعيش في اثيوبيا و تدين باليهودية و مافماش اجماع حول اصولهم او كيفية وصول اليهودية للمنطقة.

توة كيف نشوفو التنوع العرقي لليهود من الصعب الاقتناع انهم ينتمو لعرق واحد , و بدرجة اقل يصعب تصديق نظريات الجنس اليهودي و الدم اليهودي و الشّعب اليهودي اللي تفرّق و تشرّد في العالم في هجرة مفروضة عليه (دياسبورا) , و الروايات اللي تحاول خلق رابطة عرقية موحدة بين اليهود هي روايات بائسة و ما تجدش على العقل (رواية الاربعة نساء او ان اليهود الاثيوبيين هم في الاصل يهود هربو من مصر و شبه الجزيرة و تزاوجو مع السكان المحليين .)


فالسامية اذن بالمفهوم المتعارف عليه (نسبة لسام ابن نوح) هي ابعد ما تكون عن اليهود , و اصل القصة هو اصطلاح اطلقو احد المنظرين لتفوق الجنس الاري وهو احد مؤسسي رابطة معاداة السامية في المانيا خلال القرن 19.

اما الله غالب, احنا ( العرب )توة في عصر الفضائيات و وكالات الانباء و مواقع الانترنات لقينا ارواحنا كي الاطرش في الزفة, ايتام في مأدبة اللئام , ضحايا الاكاذيب و الاساطير المخرجة باحكام , و اصبح اليهود ساميين و اصبحنا متهمين بمعاداة السامية...
و صدّقنا ان فلسطين هي ارض بلا شعب لشعب بلا ارض , و ان اليهود هم اصحاب الارض و انهم الشعب الوحيد المستمر الوجود منذ 3000 عام و انهم شعب الله المختار و شعب العبقريات و حامل مشعل الديمقراطية و حقوق الانسان, و فلسطين هي ارض الميعاد و انو الرب وعدهم بها. و حكاية الوعد هاذي مهزلة اخرى لانو في التوراة بيدها الوعد موجه لابناء ابراهيم , و من المعروف ان الخلائط العرقية اللي تكون اليهود ليس لها علاقة بابراهيم و نسله .0

أنــشودة الحراق

نقول حرق يحرق حرقا و حرقانا و احتراقا و احراقا بالنار الحامية , و نقول ايضا حرق السيّارات و حرق الأعصاب و حرق الكنائس و المساجد و حرق الدهون و حرق الكتب و الاوراق , و نقول احترق بالنار اي اكتوى بلهيبها و احرق و حرّق و تسبب بالحريق (الله يجيرنا من الحرائق)
و يقال ايضا حرق فلان اي فتحت له سبل الحياة و اسباب العيش الكريم و سلّكها و اصبح من الأعيان , أمّا المحروق فهو الذي يشهق و ما يلحق و ينظر بعينيه و يموت بغصّة في حلقه.
و فعل الحرقة مرتبط ببلادنا منذ القدم فهي بلاد المليون حرّاق و حرّاقة و لا فرق في الحرقة بين غني و فقير و بين حاكم و محكوم و بين جاهل و متعلم.

قصيدة وطنية بقلم رصاص

إييه يا بلادي
حبّك, أحرق فؤادي و جعله
رمــادا

الى بلادي حرقت المرأة, الوليّة
ثمّ أحرقت جلد الثـــّور
يا لكيد النّساء
من بلادي حرق الفاتحون
لــوضع قدم في الجنــة
أسد بن الفرات يكتشف صقلّية
طارق بن زياد يحرق مضيق طارق
ليحرق المراكب
البحر أمامكم ...
و بلاد تركت وراءكم , لتحترق ... بصمت
و من بلادي عبر عبد الرحمان العدوة


الى بلادي حرق الرومان
ليحرقوها
و من أقاصي الشّمال ...
حرق الوندال ...
ليحرقوها
حرق الاسبان الينا
ثمّ حرق الاتراك الينا ثمّ الاسبان
ثمّ الاتراك
ليخرجو منها خائبين
يا لقوّة المومسات

في بلادي ,
حرق خزندار الخزانة
و احترق الوزير الأول
المزالي تحت جنح الظلام
و ككلب وضيع
يحرق المسؤول
و على ظهره كيس
و يحرق الوزير
و على ظهره كيس
و يحرق اقارب السّلطان
يجرّون الاكياس

في بلادي توضع الناس في صناديق الدقلة
و علب البرتقال
و في حاوية مصنع النسيج يسافرون

و يحرق الطالب
في رحلة التخرّج
و يحرق البطــّال و الموظــّف الحكومي و عون الأمن
و كمنتخب أثيوبيا
يحرق البطل الاولمبي من المطار
و يحرق المدرّب و الحكم و مسعف الفريق
و يحرق عامل المصنع
و بائع الملاوي
و التلميذ , قبل حلول العطلة
دون وداع يذهبون

بابور زمّر خش البحر

في بلادي
ننتظر
الجميع ينتظر
ضربة الحظ
شباب ينتظر
يحتضر
حياة مع تأجيل التنفيذ

في بلادي تتحوّل الاحلام الى...
جوكارات و راميات
فرشات سهلة
و توضع الاحلام
داخل علبة الدخان
داخل قهوة الكبوسان
و قوارير البيرة الاسبوعية

في بلادي , الشعب
يقوم صباحا
لمتابعة النشاط الرئاسي
و أهداف المخطط
ثم يجلس على المفترق
يراقب الحياة...
تمضي
و يرقب نفسه

و كالغبي الاحمق
يغادر العالم في أول محطة
ليشعل قارو الكريستال
و يلعن ابو الفقر
ثمّ يرمي بنفسه في البحر




الى سيء الذكر الصحفي في جريدة الصريح اللذي يستمتع ببلاد الامن و الامان و يعوم و يغطس في جودة الحياة

J - 7 التلفزة

في الفترة الممتدة بين أواخر السبعينات و اواسط الثمانينات كانت الدنيا صعيبة, لا سيارات شعبية لا حواسيب عائلية لا قروض شخصية لا اس ام اس لا انترنات لا دانات لا حت شيء . فم شكون يرى اللي الدنيا كانت اسهل من توة , و فمّ شكون يقول توّة خير ... لهنا الحكم صعيب على خاطر يلزم دراسة مفصلة لتطور مستوى دخل المواطن التونسي بالقيم النسبية و الحقيقية و نحسبو معاه نسب التداين و معدلات التضخّم و تطور مستويات الاجور و الاجر الادنى المضمون مع فوارق الاحصائيات التونسية اللي دائما ما تكون بعيدة جدا عن الواقع .

نرجع لحكاية اول الثمانينات , في الوقت هذاكة بو الكلاندستان تخلّص من "الكرتاج " (النوار اي بلان) القديمة و شرى تلفزة تومسون بالكولور , العزّ , اللوكس , عفسة قوية برشة , خير من تلافز البلازما متاع توة : صندوق بني كبير و رزين , إيكران طالع على برة , باب صغير على جنب (يتسكّر بالمفتاح) , روشارش مانيال ...
في وقتنا توة العباد تبدل في التلافز و اللي شان ستيريو و البورتابلوات تقولشي واحد يبدل في السورية و الا مريول الخلعة اما وقتها الشهار مسكين و في غياب التسهيلات في الدفع و البروموسيونات و الصولد كان ما يحلمش باش يعمل كرهبة و الا يبدل الموبيليا و الاليكترو ميناجي.
بحيث اللي يعمل تلفزة بالكولور في تلك الظروف العصيبة يعتبر جاب الصيد من وذنو و الا فتح مكة مرة اخرى.

ايا جات التلفزة , تصدّرت وسط الدار كيف العروسة (وقتها التلفزة و التلفون الفيكس كانو مصدر فخر و اعتزاز )
الانتان القديم مشى يشيّت و جاء الأنتان الجديد و معاه واحد ظريف باش يجبد الـ " يو هاش اف" متاع الراي اونو ...

دوّر الانتان , ركّح الانتان , لوّج على تونس , لوّج على الراي اونو , شد هكاكة اتو نشوف , باهي هكاكة ؟ لا زيد شوية , اااه خلي هكاكة خلي هكاكة ماعادش تحرّك ...
و العباد مستنفرة اللي في السطح و اللي في الدار الداخل و واحد يقول لواحد باش يوصل الميساج ... عشوية كاملة و الحومة غاطسة في المرمّة متاع التلفزة.

ايا خدمت التلفزة و يا خيبة المسعى , اه نسيت باش نقلكم اللي التلفزة وقتها تحل الـ5 متاع العشية و تقص في نص الليل, الكلاندستان اكتشف انها التلفزة الملونة ما تفرقش برشة على التلفزة القديمة على خاطر تونس (مازالت ما ولاتش سبعة) تعدي اكثر من شطر البرامج بالابيض و الاكحل , امي تراكي ناس ملاح , الحاج كلوف , توجيهات السيد الرئيس, "كليبات " لسيد على الرياحي و احمد حمزة و عز الدين إيدير و ساعة ساعة يحطّو تصويرة فيكس متاع واحة في جربة او توزر قال شنوة "انقطاع خارج عن نطاقنا" و ما فماش لا مسابقات لا اشهارات لا موزع صوتي ...

اما زادة فمّ حاجات مهمة كيما المسلسل المصري متاع السهرية (الارض الطيبة ليلة القبض على فاطمة...), المسلسل الامريكي متاع عقاب الليل (دالاس ديناستي ) , الفيلم الوستارن متاع اخر الجمعة , و الصّور المتحرّكة...

ساسوكي , قريندايزر, الرجل الحديدي , الشيخ كهفان دائما الى الامام , النقار الزهواني و قرينط الشلواش و فار بوتميرة و يقظان الفضاء و افتح يا سمسم و الضفدع كامل و حسون الملعون و بال و سيباستيان و جونقر البطل الجبّار و القصص العالمية و خرافات عم رشيد قارة و برنامج اخر نسيت اسمو متاع لطفي البحري و امينة الصرارفي و حصة البراعة اليدوية متاع عبد الرحيم اليانقي

في الوقت هذاكة و في غياب سبايس تون و تيينز و ديزناي كانت الفسحة الوحيدة للفروخ هي السويعة من الـ5 الى الـ6 متاع العشية و كانت وقت اللي تجي المذيعة و تقول "و ننتقل الان الى فقرة الاصدقاء الصغار ..." يبدى الواحد ينقّز من الفرحة و ناقص كان يقوم يشطح و ماعادش يتحرك من بلاصتو لوكان تقوم القيامة ,

لهنا تذكرت حكاية , الكلاندستان و اخواتو و اولاد عمتو قاعدين يتفرّجو جميع في الرجل الحديدي , و الحلقة هذيكة كيف العادة , حلقة مشوّقة و قويّة , و الفروخ مركزين كلمة لا كان النفس يدخل و يخرج بحيث وقت اللي وفات الحلقة قعدو شادين بلايصهم وماهمش مصدقين اللي البرنامج فعلا وفى و يلزم يستناو غدوة باش يعاودو يتفرجو في الرجل الحديدي ...
تكلم ولد عمة الكلاندستان قال اللي في دارهم الرجل الحديدي مازال ما وفاش و لوكان يزربو ارواحهم توة يخلطو عليه...
و كان الامر كذلك , دار الكلاندستان و دار عمتو في نفس الحومة و يبعدو على بعضهم زوز انهجة ,
خرجو الفروخ للكياس و شدوها جري , كورس صحيح , للي وصلو للدار و حلوّ التلفزة .. يلقاو الرجل الحديدي وفا عندهم زادة.
فاكتشف الكلاندستان يومها انو البث يتم بصفة متزامنة عند الناس الكل .

و

J - 9 : يا شهيد الخبزة رجعت

الكلاندستان الصغير يروّح من المكتب , تمدلو أمّو ميات فرنك باش يمشي يشري خبزة من الحانوت ...

(الكلاندستان كيف العادة يمشي فرحان على خاطر الخبزة بثمانين و باش تفضلو العشرين يشري بيهم شينغوم (اللي مصوّر فيها جمل ينفخ ), و ساعات يشري بيهم حلوى و يبدى يتعارك هو و العطار باش يعطيه دراجي و الا حلوى كافي و ما يعطيهش الحلوى الحارة , و ساعات يشري الشينغوم اللي على شكل سيقارو و يمكن هذاكة علاش كيف كبر الكلاندستان ولىّ يتكيّف الليجار على خاطرو يشبّه ياسر في المنظر و الطول للشينغوم سيّئة الذكر...حاصيلو العشرين هذيكة كانت راس مال الكلاندستان و سبب من اسباب فرحتو بالحياة.)

يوصل لوليّد للعطار يمد الميات فرنك

-كمّل سبعين فرنك ولدي , الخبزة بميا و سبعين
-باهي اعطيني بعشرين حلوى

من بعد , يروّح للدار يقرمش في الحلوى , يدخل للدار يلقى بوه روّح من الخدمة و يستنى في الفطور (ظاهر عليه الستراس )
و يلقى امو مفجوعة , بالرسمي مرعوبة , بالطبيعة الكلاندستان ما فهم شيء و مش عارف اش فم و علاش ها الحالة ...
اما توة فهم اللي ردة فعل والديه عادية , على خاطرهم من الناس اللي عانت الميزيريا متاع اوائل الاستقلال و الميزيريا متاع التعاضد و الي بقى عندهم رفلاكس متاع الخوف من الفقر و الحاجة و عدم توفر الخبز و السميد و المواد الغذائية عامة .

ايا مدلو بوه الفلوس , رجع للعطار و جاب الخبزة .

و من نهارتها مشات على روحها ايامات العشرين و ولى يلزمو ياكل طروف الخبز الكل و ما يرميش نعمة ربي و ماعادش ينجم يخرج وحدو من الدار بحيث انها الحياة خذات اتجاه جديد و ماعادش كيما قبل ...


و من الطاف الله انو الوضع ما طولش برشة ...


للي جاء بورقيبة في النشرة الرئيسية و قال "نرجعو كيما كنا " .

لهنا الكلاندستان حار في حاجة : توة الشايب التاعب هذايا بكليمتين و بتحريكة متاع ايدين يرعشو يحكم في بلاد و يبدل الموقف متاع الشعب. بورقيبة اللي كانو الصغار في المكتب يطلعو عليه في النكت و يقلّدو في حركات ايديه و مشيتو و كلامو , "تحسن معناها " يثبت انو عندو قدرة كبيرة على حكم الشعب التونسي المضروب فيه و اللي يعتبرو الاب الروحي ...

العايلة الكل فرحانين و ناقص كان يهنو بعضهم , الناس الكل تحمد في ربي "الله يعيّشلنا بورقيبة و نعل بو المزالي الكلب" .
و عمت الافراح و الليالي الملاح و طلعت فتحية خيري في التلفزة "يا سلام يا سلام يا غالي علينا , نفديك بارواحنا و عينينا "


و خرجت البشرية تصيح في الكياسات
يحيا بورقيبة يحيا بورقيبة
يا سيد الاسياد يا حبيب البورقيبة الغالي



و تقلب الموقف و رجع الشعب اللي كان يسب و يقشقش في المجاهد الاكبر يصيح بالروح بالدم نفديك يا بورقيبة ...
اما اللي ماتوا بالكرتوش و في الكياسات و في المظاهرات ... اللي غنّو عليهم " يا شهيد الخبزة " ... فطواهم النسيان و صعيب كان مازال شكون يستعرف بتضحيتهم او يتذكرهم اصلا.

Bourguiba discours du pain
envoyé par rsprod

Aux AAAAArmes .... Les Tatars sont là

Troupes Américaines US en Algerie

envoyé par hchicha

Il est révélé par abc news qu’il y’a des troupes de l’armée américaine qui opèrent dans le Sahara algérien. Et dire que nos dirigeants se déclarent officiellement hostiles à l’intervention d’aucune force étrangère sur le sol algérien?

La réalité est biensur toute autre, et les militaires US et leurs services de renseignements ont largement pris place sur tout le térritoire. C’est à se demander si l’Algérie ne ferait-elle pas partie de ces pays qui hebèrgent des prisons secrêtes de la CIA au Maghreb ?

… heu …pas très belle à voir, n’est ce pas? surtout quand on est algérien et convaincu que l’armée US est une machine à détruire partout où elle passe. Une armée avec laquelle il est HONTEUX de collaborer en quelque manière que ce soit…

Comme le disait notre ami "Hchicha", cette video n'est pas belle à voir, ca rappelle beaucoup de mauvais souvenirs ... au 19éme siècle les français ont débarqué d'abord en algérie ...

خلصني نخلصك

في القرن 21 ...
مازلنا نخلّصو التلفزة مع الضو ...
و نخلّصو الاوناس مع الماء ...

و في 08 ديسمبر ... نخلّصو زكاة العيد

و فـي الأزمات تعـرف الرجـال

و انا نتفرج في نشرات الاخبار , انتبهت لخبر في عقاب الموجز (يعني موش مهم برشة ) وهو يخص الكارثة اللي تعاني منها موريطانيا , وهي كارثة انسانية بكل المقاييس , الاف المشرّدين في الخلاء, حجم دمار هائل (منازل و مدارس و طرقات ...) , و عجز حكومي عن التدخل و اغاثة اللاجئين (اللي حسب رايي امر طبيعي نظرا لمحدودية الامكانيات و طبيعة البلاد الصحراوية اللي تخلي كوارث من النوع هذا نادرة جدا و بالتالي مافماش استعداد مسبق لمواجهاتها ).
اكثر حاجة تحز في النفس و تشعر الواحد بالخزي هو النداء الي توجهت بيه الحكومة الى المجموعة الدولية للمساعدة على تجاوز مخلفات الأزمة .
رد فعل طبيعي و مسؤول من حكومة تشعر بالعجز و في نفس الوقت تعجز على الوقوف موقف المتفرج من معاناة الناس في المقاطعات المنكوبة , انا اللي حزّ في خاطري مش النداء في حد ذاتو , اما النفاق متاع المجموعة الدولية , اللي تخزر للوجوه و تفرق اللحم و تسحلل ديما للواقف :
علاش تبقى موريطانيا تواجه مصيرها للاخر, علاش توصل باش تصيح من الغلبة "بااااع راني ماعادش انجم لله يا محسنين يا ذوي القلوب الرحيمة ",
فيني الاخوة العربية المغاربية , فينهم منظمات الاغاثة , فينو الاتحاد الاوروبي و فرانسا اللي تحسب موريطانيا و افريقيا عامة تابعة رزق الوالد .
علاش في 2005 بعد اعصار كاترينا , ما بقاتش حتى دولة في العالم الا و قدمت مساعدتها لأمريكيا, حتى من كوريا و كوبا و فينيزويلا و ايران قدمو مساعدات (اكثرش من افغانستان المنكوبة خلقي و المصابة بالكوارث المزمنة عطات 100 مليون )
توة زعمة امريكا مستحقة للزوز صوردي متاع الشعوب المحتحتة , زعمة في حاجة للطيارات متاع فرانسا و الا البطانيات متاع الصين و الا كراذن الدواء متاع فيدال كاسترو.

محسوب هو العالم مطلوب في الويصفان * متاع لويزيانا اللي امريكيا بيدها مش مستعرفة بيهم ,
باهي .. . اهو فمّ ويصفان اخرين منكوبين في موريطانيا , فينهم الي يتشدقو بالانسانية و اغاثة اللاجئين و المشردين و المهجرين و ضحايا تسونامي و حقوق المراة المنكوبة...

الحاصيلو هذيا كلها حكاية ما تعنيناش برشة و احنا ماناش معمّلين اصلا على الاوروبيين و الامريكان اللي ما يخدمو كان مصالحهم و يعرفو فين يحطو المليم ...اما انا نتعجّب لرد الفعل متاع المغاربة و العرب , هاذم اللي هبّوا هبّة رجل واحد و لم يدخروا الغالي و النفيس لاعانة امريكا و دفعو ملايين الدولارات و ملايين براميل النفط باش امريكا تسترجع عافيتها و فورمتها المعهودة (و بالتالي تزيد تشيّخهم)
توّة عاملين مولى الدار موش هوني , و يحتمل راهو فيهم شكون متشمّت و فرحان بالكارثة " اييه يستاهلو ماهم زعمة زعمة لاعبينها ديمقراطية و محاربة فساد و قائد الانقلاب يخلي بلاصتو للرئيس المنتخب بالانتخابات المنظّمة , زادو حلّو عينين النعاج اللي عندنا , خليهم محالاها فيهم باش يعرفو كيفاش يتصرفو مستقبلا"(2)




* كلمة وصيف كلمة دارجة و عامية و ما عنديش حتى نيّة عنصريّة وراء استعمالها
(2) هذية اقوال مسؤول حكومي عربي رفض الإدلاء باسمه

Discrétion

قام في الصّباح تاعب , وجهو أصفر ,عينيه محوّقين ,اللحية عندها جمعة ما شافتش اللاّم

- سايي قررّت نمشي للطبيب
* ماهو مالأوّل ما كاركش ستنّيت لتوّة
- انا باش نمشي على خاطرك انتي, تعرفني نكره الدوايات و الطبّة
*ميسالش ربي خلق الداء و خلق الدواء و هذيكا سنّة الحياة
- باهي مدّلي الكارني و حطّلي الفطور في السّاك باش تنتعدّى مبعّد ديراكتمان للخدمة


يدخل للسبيطار يشد الصف قدام القيشي متاع القصّان
يستنى دورو
يمد الكارني و ثلاثة الاف فرنك
ياخذ التوصيل متاعو و يمشي يقعد قدام قسم الامراض الجنسية (باش يموت من الحشمة)

يخرجلو فرملي , (طبلية يحتمل كانت بيضاء في يوم من الأيام , اللحية معتوقة , السنّين صفر من الكريستال , شعرو عندو مدّة ما تمشطش)
يتبسّملو تبسيمة تفجع و يسالو شنوة عندو
الراجل المسكين بدى يفسّرلو في الوضعية الحرجة متاعو ... يكلّم فيه بالسياسة باش ما يسمعو حدّ وزاد حطّلو في جيب الطبلية 1500 فرنك باش يدخّلو قبل العباد على خاطر يلزمو يمشي للخدمة قبل نصف النهار
شاخ هاك الفرملي و قالو اقعد اتوة نعيّطلك

مبعّد حكاية درجين , يخرج الفرملي من بيرو الطبيب , ياقف في وسط الكولوار و يصيح على قوة جهدو :

" ايّا ايجا ايجا , فينو هاك اللي ما يـوقـّ....ش "

م

ملاّ تلوّث ...

في المكتب:
كمشة فروخ :مسيو مسيو مسيو مسيو

في القهوة:
السرفور: تفضّـل يا مسيو تحب حاجة؟؟

في بوتيك الحوايج:
الفندوز: جو بو فو سرفير مسيو؟

في البوسطة :
عون متاع قيشي: وسّع بالك شويّا يا مسيو

في الخدمة:
حلقة متاع موظفات مترسّمات: و المسيو ما قال شيء ؟

في الاذاعة التونسية الفرنساوية :
مذيع متاع اخبار: monsieur le ministre, monsieur le chef de l'Etat

عند الخضار:
خضّـار برانشي: يا مسيو يا مسيو ما تفرزليش السلعة خلي توة نوزنلك

في تونس 7 :
المسلسل : مسيو الازهر عرّوش , مسيو جاك

في السبيطار:
الطبيب : تره حل فمّك يا مسيو


في الشّـارع:زوز مواطنين)

-يا خويا
-. . . . . .

-يا سي محمد
- شنوّة ؟؟شنوة قلت ؟؟

- يا سي محمد العربـي
- اشبيك ؟؟ تحب نكسّرلك خليقتك

- ياخي تغششت من محمد و الا من العربي
-برّة ولدي اعمل دورة انتي فارك يلعب على الزبيب

- بالله وسّع بالك , يا مسيو , جو مكسكيوز
- :) باهي شنوة تحب

- نحب نفيّس
- برّا فيّس بعيد

- لا لا نحب نفيّس
- اه تحب سيقارو

- تي لا ... نحب نتنفّس راني تغصرت و قتلني التلوّث
- بدّل السكنى و برّة اسكن في الريف

- التلوث اللي نعاني منّو هو تلوّث العباد , البشر الناس, المجتمع
- انتي صار من الجماعة اللي معقّدينها على أرواحهم , ربي يلطف بينا و بيك

- روحي طلعت من مسيو و مادام اللي مللي حلّيت عيني لـ الدنيا و انا نسمع فيها
- عندك مشكلة مع المسيو و المادام ؟

- لا انا مشكلتي معاكم انتوما ... مع الشعب اللي يحب يطير مين غير جوانح, اللي يحب يكابري اللي يتقوّى على بدنو اللي يورّي السلوك الحضاري متاعو في الصولد , اللي شايخ على العرب و اللغة العربية , اللي هازو الواد و هو يقول العام صابة , اللي غاطس في الوسخ للعنكوش و هو يقول ابتسم إنها الحياة ...


ز

MeetUp استدعاء رسمي لحضور فعاليات ملتقى المدونين

ايها السيدات و السادة

السلام عليكم و بارك الله يومكم

يسرني ان اوجه لحضراتكم دعوة رسمية (مفتوحة ) لحضور الملتقى التدويني (العاشر) , الذي سينعقد يوم الأحد القادم على الساعة العاشرة صباحا في مقهى البيوا الراقي على ضفاف البحيرة الراقية (عكس ضفاف السيجومي تحية لاهاليها الطيبين)
و قد صرّح أحد المنظمين( رفض كشف هويته ) ان اختيار صيغة الملتقى الصباحي لم يكن بمحض الصدفة ,
ذلك ان الاكتظاظ الذي تشهده العاصمة هذه الايام بمناسبة مهرجان التسوق جعل العثور على مقهى قادر على استيعاب الجموع الغفيرة للمدونين مهمة عسيرة.
لذلك فالرجاء من المدونين و المدونات النوم مبكرا هذا الاسبوع استعدادا لإنجاح هذه التظاهرة الهامة, و التي تؤكد مرّة اخرى سعي بلادنا للصعود الى مصاف الدول المتقدمة و تعزيز السمعة الجيدة التي تتمتع بها في المحافل الدولية.
كما اكد مصدرنا ان النية تتجه نحو التعجيل بالفعاليات و الأنشطة و ذلك لإفساح المجال امام الجميع للتمتع ببقية يوم الاحد و التسوق و التبحير و التقييل الخ.

و السلام عليكم و رحمة الله و بركاته

جمهورية نورملند
وزارة القهوة

الادارة العامة للملتقيات و الانشطة التدوينية- قسم المقاهي الراقية