تدوينة وطنية

إعانات تونسيــــة

أنا بصراحة ضد انو بلادنا المحروسة تحرّك حاملات الطائرات متاعها في الحوض الشرقي للمتوسّط و الا تعلن التعبئة العامة في سلاح الصواريخ متاعها و الا تعمل جسر جوي لمدّ المقاومة الفلسطينية بالسلاح , هذا الكل زايد ... و هاو الصحيح , باش نستعرض معاكم تفصيل الإعانات اللي تبعثت في الاسبوع الاول للهجوم على غزة :

1- دارك طايحة؟؟.. راقد في الشارع؟.. مطر؟؟ ريح؟؟ قنابل ؟؟أف 16 ,. اباشي ؟؟ نورمال ... بطّانيات قصر هلال و الجم ...الدّفا و العيشة
2- هريسة الوطن القبلي : ضربة ضربة للفوسفور الأبيض , و يمكن زادة استعمالها كسلاح بيولوجي ضد الجنود و المدنيين في اسرائيل ...فعالية مضمونة بنسبة 100%
3- شكارة (على ما يبدو) سكّر ...شكون يعرف بالكشي اخيّاننا في غزّة يحششو على كاس تاي و الا قهيوة ززوة بالهيل
4- بسكويت سيّدة اللي كبرنا معاه و انشالله نكبّرو عليه صغيرات غزة و ايتام القصف ... كيف كيف فاعلية 100% و بعد 40 سنة نسمعو الشباب الغزاوي يصيح دحلان 2009
5- دبابز جافال و دينول باش الشعب الفلسطيني يغسل ايديه للـ "منكعين" (قال عادل امام) مالعرب و شعوبهم و جيوشهم و حكوماتهم و ما يعمّلوا كان على أرواحهم.

آلــــة زمـــن ...للعرب فقط
(زوز متقاعدين)
-لوكان يرجع بيا الوقت و يعطيني ربي و الزمان...بالحرام الا ما ناخذ مرا أخرى
- عليك بـزيبــي ليــفني
- أعوذ بالله من هاك الزنس
- ماقتلكش خوذها ... أما دواك على إيديها , في 2006 قالتك رجّعنا لبنان 200 سنة لتالي و في 2009 قالتلك رجّعنا غزّة 60 سنة لتالي...برّة انتي زادة جرّب حظّك بالكشي ترجّعك 20 سنة لتالي

مظاهرات تونسية

الغريب في بلادنا انو في كل مناسبة تتلم فيها حضبة اكثر من 10 من ناس خارج مدارج الملاعب ماتسمع كان الهتافات بحياة "المُعلّـم" و تمجيد الحزب الواحد الاحد.
و في مظاهرات التضامن مع غزّة , كيف كيف, ديما علم تونس و علم فلسطين في الصفوف الاولى مع الشعارات البنفسجية و صور البورتري العملاقة.
لبارح السبت, (في المسيرة اللي نظّمها الإتّحاد) , جاء سيّد هازز في يدّو تصويرة المعلّم و وقف في الصفّ الاوّل متاع النقابيين...
دزّوه و جبدوه لتالي و بعّدوه...
مافهمش روحو
الناس تصيح لنصرة غزة و هو يغني " المعلّم يا بطل و التجمّع هو الكل"
جاو جماعة نقابيين حبّوا يضربوه, تدخّل الامن, قالولو قدّم لقدّام و انشالله يكلّمك واحد...
و دخلت بعضها و قريب تتقلب المظاهرة و تفسد و يولّي فيها ضارب و مضروب و ربّما تتطوّر الامور لما لا يحمد عقباه,فـ طاح التجمّعي و تمدّ على طولو في الكيّاس و بداو اعوان الامن (السيفيل) يصيحو اشكون عندو طابع سكّر زعمة زعمة مريض ( وهو فعلا مريض) ...و لقاولوا صيغة باش يفصّعوه من غادي
من الشيرة الاخرى , كان فمة زادة جماعات الاحزاب المعارضة بكل الوانها و أطيافها , من المعارض برشة للمعارض هكاكة و برّة... للي يحسب على كرسي زايد في الانتخابات الجايّة ,و اللي يغنّي و جناحو يردّ عليه و اللي يحبّ يوحّد و اللي يحبّ يجـدّد و اللي يتلوصق لجموع النقابيين يكبّر بيهم في الحضبة متاعو , زعمة زعمة معارض صحيح, و هوما كيفهم كيف التجمّعي المتمارض , لا يهمّهم لا غزّة لا فلسطين لا بطاطا ...
يا لندرا وقتاش ياقفوا على ساقيهم ؟؟ لوقتاش يقعدلهم الإتحاد ؟


Naturists
النهارين نلقى مجموعة في الفايسبوك -مجموعة تونسية- تدعو لـ تخصيص شواطئ لهواة التعرّي في تونس.. بصراحة عجبتني الفكرة.. شبيه؟؟ ماهو نبداو بالتعرّي للي نوصلو للأقمار الصناعية و المحطّات الفضائية و البيوتكنولوجيا...
دخلت للقروب نلقى أكثر من 90% من الأعضاء ذكور ...

علاش يتضرب المكتب التنفيذي؟؟ و علاش يمنع الكاتب العام؟؟؟

حسب بعض المصادر النقابية , تقدّر نسبة نجاح الاضراب العام متاع البارح في قفصة بأكثر من 85% ,اضراب جاء تعبيرا عن التضامن مع اهالي غزة من جهة, و للاحتجاج على اقتحام مقر الاتحاد في قفصة و الاعتداء بالعنف على عديد النقابيين و منهم اعضاء المكتب التنفيذي الجهوي... باستثناء السيّد الكاتب العام.

و يبقى السؤال لهنا , علاش الناس الكل تاكل بالمسبط و المتراك ؟؟؟ و علاش يمنع السيّد الكاتب العام ؟؟؟

انشالله يكون السبب هو الحصانة البرلمانية (على خاطر السيد عضو في مجلس النواب لعدة دورات) باش ما يخلّيش الباب محلول امام فرضيات اخرى... أنا نرجّحها شخصيا .

الاتحاد بين العهد السعيد و الشرق الاوسط الجديد

انا - و اعوذ بالله من كلمة انا - كنت دائما ننظر بعين الاحترام للمنظمة النقابية متاعنا, و لعلمكم انا منخرط و نخلّص في 1500 مليم شهريا عن طيب خاطر, و لوكان نلقى نتبرّعلهم بأكثر من هكة ( عكس الفلوس اللي نمدّها للصحاح نهارة 8 ديسمبر و اللي عادة يصاحبها دعاء -انشاء الله مستجاب- من قبيل انشالله مشومين عليهم و انشالله يطلع فيهم و في صحتهم و في صغارهم ...)
فالاتحاد رغم كونه منظمة نقابية عمالية ذات دور اجتماعي بالأساس الا انه يختلف عن باقي النقابات في العالم بدوره الهام في حركة التحرير و بناء الدولة المستقلة, و ببعده و وزنه السياسي في البلاد اللي طالما مثل الوزن المعادل او المضادللحزب الحاكم.contrepoids

لكن بما اننا نعيشو توة في وقت كلب , ما فيه ما يعجب, و كيما في برشة مجالات اخرين, مبعد الكبارات يطلعو البعابص ( حاشاكم) و بعد ناس كيما حشاد عاشور بن قدور البكوش و غيرهم... يطلع السحباني و اللي بعدو و جماعتهم...و بدأ عهد التفتح و الانفتاح و تحسنت الامور , و ولات فمة ميزانية للكراهب المضخمة و ميزانية لتوسيع البيروات و تكييفها ... و ظهر نوع جديد من التضحية و النضال في سبيل العمل النقابي, فواياجات , خرجات, هاي لندرة, هاي بروكسال, هاي جنوب افريقيا هاي طوكيو هاي نيويورك...

و كيما يقولو في ريا و سكينة " ناسبنا الحكومة و بقينا قرايب " , بعد قصة حب طويلة ,بدأ شهر العسل مع السلطة, تلقاه ممثل الوزارة يقلهم خوذو10% , و هوما يقولولو لا يا راجل عيب , 5% فيها الف بركة عندكم ازمة طاقة و دعم و ديون و عجز في الميزانية...فولات المفاوضات الاجتماعية توفي في شهر و اللي يتكلم على الخدام و الزوالي يولّي معارض و متسيّس و يحب يدخّل السياسة للاتحاد , و اللي يجبد كلمة اضراب تقولشي سب الدين , فالاضراب توة ولى كبيرة من الكبائر.
و ضاعت المصداقية و مشات اخلاقيات العمل النقابي , و حتى الديمقراطية و الشفافية اللي كانت تميّز المؤتمرات و انتخابات اعضاء النقابات و ممثلي القطاعات مشات على روحها, و طلعت فازة التزكية و التصويت بالاجماع من غير اقتراع, اي انو اللي يحب يشد المسؤولية , يجيب جماعتو في القاعة متاع الاجتماع و في الوقت المحدد ياقفو و يهزو ايديهم و يهتفو بإسمو فيتحط الجميع امام الامر الواقع و اللي يحب يحتج و الا حتى يطالب بالتوضيح يتحط في الخندق المضاد و في اول فرصة يجبدو عليه الساش ... و حتى الناس اللي تم انتخابهم ديمقراطيا من قواعدهم و من جهاتهم - في بالي ما ينجم حد ينحيهم - يقعدو ديما تحت المجهر و تحت الرقابة المباشرة لأصحاب البيروات المكيفة متاع بطحاء محمد علي, و مع اوّل اختلاف يلقاو رواحهم آوت, كيما يعملو جماعة الحزب الواحد وقت اللي يطيرو مسؤول و يقولو عليه في التلفزة ( دعي لمهام أخرى) , و هذاك اللي صار للسيد كاتب عام الاتحاد الجهوي متاع بنزرت المسكين اللي - بقرار من لجنة النظام - مدّ مفيتحات الميقان و مفيتحات البيرو للعسّاس و مشي على روحو , و يقال انو لتوة موش فاهم علاش... نفس الشيء للسيّد "عدنان" , النقابي في جهة قفصة, اللي تعرف اكثر بالخطابات متاعو اثناء ثورة الحوض المنجمي 2008 - تنجمو تشوفوه لهنا- اللي لقى نفس المصير , و ( بسرعة قياسية ) اصدرو فيه قرار تجميد النشاط لمدة 5 سنوات , رغم اللي ظروف اعتقاله فيها برشة تجاوز و فيها اعتداء واضح على حرمة المنظمة , بحيث قعد وحدو المسكين و الله اعلم اش باش يصير فيه بعد انتهاء الازمة...

و اليوم كيما تعرفو, بلادنا تستعد لاجراء عملية تجديد نصف الغرفة البرلمانية الثانية ( مجلس المستشارين ) , و كيما تعرفو زادة انو الاتحاد كان قاطع المجلس هذاية بعد تردد كبير وبعد تضارب في التصريحات و القرارات...و كانت برشة عباد راهنت على الموقف هذاية , و تصورت انو موقف باش يرجّع الاتّحاد متاع بكري و يرجّعلو الهيبة و الوزن متاعو في البلاد خاصّة اذا تطبّق القانون اللي ينظّم عملية التمثيل في مجلس المستشارين و اللي يفرض وجوب مشاركة المنظمات الوطنية (فلاحين عمال اعراف) و اللي - على حد علمي - ما فيهش صيغة لمواجهة وضعية المقاطعة , و يخلينا قدام برشة فرضيات حول مصير المقاعد متاع الاتحاد توصل حد ابطال عملية الانتخاب لعدم استكمال النصاب .... حصيلو الحكاية وقتها تفضّت سلميا و هذاية من ميزاتنا في تونس , ما يوقف قدامنا شي لا قانون لا دستور لا شي , وقت اللي نقررو حاجة يلزم تمشي مهما كانت الظروف...

و اتضح انها عملية المقاطعة اللي راهنت عليها العباد , ماهي الا مهزلة و اقرب منها للعب الفروخ, و مثلت جولة من جولات العرك على جني ثمار العمل النقابي... و حسب بعض المصادر في بطحاء محمد علي , قالك اللي صار هو أنو الناس الكل حبّت تكون ضمن قائمة الـ14 ( على خاطر عملية التمثيل كانت باش تم باقتراح الاتحاد لقائمة تقوم السلطة فيما بعد باختيار 14 اسم و المصادقة عليها) , و الناس الكل كانت طامعة في مقعد المستشار و الفرص اللي باش يتيحها (زوز ملاين شهرية , حصانة , تقاعد محترم , زيادة على القدر و الوهرة...)
الا انها الحصة المحدد موش باش تززي الناس الكل ... اشكون باش يززيو ؟؟ اعضاء المكتب التنفيذي؟؟ كتاب عامين الجامعات ؟؟ و الا ممثلي الجهات ؟؟

و كيف آيّسو من الهدرة قالك عليا و على اعدائي و في التراب و الا لأولاد الحلال ( ههه) و حرمت الحكاية و بطلت من اساسها... و هذاكة نهار و هذا نهار و قعدو الكراسي متاع الـفارغين , و اللي غاب غاب قسموUGTT ـ

J - 9 : يا شهيد الخبزة رجعت

الكلاندستان الصغير يروّح من المكتب , تمدلو أمّو ميات فرنك باش يمشي يشري خبزة من الحانوت ...

(الكلاندستان كيف العادة يمشي فرحان على خاطر الخبزة بثمانين و باش تفضلو العشرين يشري بيهم شينغوم (اللي مصوّر فيها جمل ينفخ ), و ساعات يشري بيهم حلوى و يبدى يتعارك هو و العطار باش يعطيه دراجي و الا حلوى كافي و ما يعطيهش الحلوى الحارة , و ساعات يشري الشينغوم اللي على شكل سيقارو و يمكن هذاكة علاش كيف كبر الكلاندستان ولىّ يتكيّف الليجار على خاطرو يشبّه ياسر في المنظر و الطول للشينغوم سيّئة الذكر...حاصيلو العشرين هذيكة كانت راس مال الكلاندستان و سبب من اسباب فرحتو بالحياة.)

يوصل لوليّد للعطار يمد الميات فرنك

-كمّل سبعين فرنك ولدي , الخبزة بميا و سبعين
-باهي اعطيني بعشرين حلوى

من بعد , يروّح للدار يقرمش في الحلوى , يدخل للدار يلقى بوه روّح من الخدمة و يستنى في الفطور (ظاهر عليه الستراس )
و يلقى امو مفجوعة , بالرسمي مرعوبة , بالطبيعة الكلاندستان ما فهم شيء و مش عارف اش فم و علاش ها الحالة ...
اما توة فهم اللي ردة فعل والديه عادية , على خاطرهم من الناس اللي عانت الميزيريا متاع اوائل الاستقلال و الميزيريا متاع التعاضد و الي بقى عندهم رفلاكس متاع الخوف من الفقر و الحاجة و عدم توفر الخبز و السميد و المواد الغذائية عامة .

ايا مدلو بوه الفلوس , رجع للعطار و جاب الخبزة .

و من نهارتها مشات على روحها ايامات العشرين و ولى يلزمو ياكل طروف الخبز الكل و ما يرميش نعمة ربي و ماعادش ينجم يخرج وحدو من الدار بحيث انها الحياة خذات اتجاه جديد و ماعادش كيما قبل ...


و من الطاف الله انو الوضع ما طولش برشة ...


للي جاء بورقيبة في النشرة الرئيسية و قال "نرجعو كيما كنا " .

لهنا الكلاندستان حار في حاجة : توة الشايب التاعب هذايا بكليمتين و بتحريكة متاع ايدين يرعشو يحكم في بلاد و يبدل الموقف متاع الشعب. بورقيبة اللي كانو الصغار في المكتب يطلعو عليه في النكت و يقلّدو في حركات ايديه و مشيتو و كلامو , "تحسن معناها " يثبت انو عندو قدرة كبيرة على حكم الشعب التونسي المضروب فيه و اللي يعتبرو الاب الروحي ...

العايلة الكل فرحانين و ناقص كان يهنو بعضهم , الناس الكل تحمد في ربي "الله يعيّشلنا بورقيبة و نعل بو المزالي الكلب" .
و عمت الافراح و الليالي الملاح و طلعت فتحية خيري في التلفزة "يا سلام يا سلام يا غالي علينا , نفديك بارواحنا و عينينا "


و خرجت البشرية تصيح في الكياسات
يحيا بورقيبة يحيا بورقيبة
يا سيد الاسياد يا حبيب البورقيبة الغالي



و تقلب الموقف و رجع الشعب اللي كان يسب و يقشقش في المجاهد الاكبر يصيح بالروح بالدم نفديك يا بورقيبة ...
اما اللي ماتوا بالكرتوش و في الكياسات و في المظاهرات ... اللي غنّو عليهم " يا شهيد الخبزة " ... فطواهم النسيان و صعيب كان مازال شكون يستعرف بتضحيتهم او يتذكرهم اصلا.

Bourguiba discours du pain
envoyé par rsprod

من قوة العام : إتحاد الشغل حزب معارض

بعد المقالة متاع سي طارق الكحلاوي فيما يخص الانتخابات متاع هيأة المحامين , تذكرت حكاية صارت عندها مدة.
انا كنت نعرف بنيّة , عاقلة , بنت عايلة و كل شيء ... تخدم مدرّسة في الثاناوي :)
نهار قاعدين نحكيو على مشاكل الأساتذة (في الفترة هذيكا فمّ اضراب) و نقنع فيها بضرورة المشاركة, خاصّة و أنّو المطالب المطروحة وقتها هي مطالب مهنية بحتة و تهم مشاغل القطاع (اي ماهياش سياسية) , تفاجأت بردّة الفعل متاعها

- يا بنتي هذا إضراب شرعي ما ينجّم حتى واحد يناقشك ولاّ يحرمك من حقّ الإضراب
- لا لا فكّ عليا
- راهو ما يجيش هكّا , زملائك يضربوا و يتنقبلهم النهار و انتي تجي مبعد و تتمتع بالمكاسب اللي تحصلو عليها , هاذي انانية
- ياخي قلتلهم انا تكلمو عليا , انا هكة ساف , حتى الزيادة يخليوها عندهم ماعينيش بيها
- معناها انتي داخلة في الربح خارجة من الخسارة كان جابو حاجة هاك معاهم سينون هاك قاعدة تتفرج

ايا بقيت نحاول و كل مرة نجيب حجة جديدة لكن الطّفلة بقات خايفة من الإضراب و ما حبّتش تقتنع ...

اخر حاجة وقت اللي فدّت و فددتني معاها قالتلي (بكل فصاحة و صحة رقعة)

"أنا بابا قالّي ما تدخلش في المعارضة "

و