نهارة أحد

قعد على بيروه كيف العادة.. حل الاورديناتور.
ترشف رشفة من قهوة الحليب... زوز طوابع سكر ..
كيما كل يوم في الخدمة ..حلّ الإذاعة الامريكية اندي103.1... ما يعرفش علاش بعمرو ما قعد على الكمبيوتر و حط اذاعة الموزاييك او اذاعة تونس الدولية .. هذية اذاعات بلادو ..اذاعات محلية و هو سايي كره كل ماهو محلي.. الصحف المحلية للاخبار المحلية ..القهوة المحلية الكراهب المحلية الكيران الكياسات القناطر المحولات .. شركات الهاتف الجوال و ارقام البورتابل
98 ..97..96..95..94..92
حتى مالتاليفون مقاطع الشركة الوطنية و عندو خط تونيزيانا .. على الاقل فلوس الروشارج تمشي لجيوب نجيب السويرس.. كلب مصري و لا كلابنا الوطنية..
يراجع احداث اليوم .. يوم الاحد .. الكونجي الاسبوعي
يقوم الصباح على صوت كراهب الخبز .. تهبط في الخبز للعطار.. مبعد يتعدى بياع الفريب ... فريييييييييب ... منشار ينقب الوذنين.. ملى فقر و ملى ميزيريا...مبعدو الموتور متاع بياع القاز .. شادد المفتاح (مفتاح 20) و يضرب بيه دبوزة مالدبابز اللي قدامو في الصندوق.. صوت يفيق الموتى في الجبانة .. يا عالم يا ناس راني نحب نرقد ... يتعدى بياع الماعون ...شكون عندو حوايج قديمة ؟؟ يا اللي عندو حوايج قديمة ... يدق الباب ... تعطيه صباط يعطيك في بلاصتو 5 كيسان بلار و ساعات بانو بلاستيك .. .. يقبل كل شي صبابط سبادريات كبابط فيستات سراول سواري موبيليا قديمة .. ما يسيب شي ...
سايي طار النوم يلزم يقوم .. فين باش يمشي .. السوق ؟؟ المارشي ؟؟ كيف كيف فريب و ماعون و كيسان و بلار ... يا مدام اليوم الطزينة بسوم الستة .. زيد هذا بلاش و زيد معاهم هذا بلاش .. يقوى عليه ربي بياع البلار .. يلصق ميكرو في جلغتو و يعدي نصف نهار وهو ينبح .. ملى خبزة .. خبزة مرّة ..
موش كان هو يعاني في جرّة الخبزة ... المرا اللي تبيع الحمص و اللوبيا المنفخة في باب المرشي و الطفل اللي يبيع خبز الطابونة في القفة و بياع الملسوقة و مولى نصبة المعدنوس .. . الكلهم يعانيو .. ربي معاهم ..

يخرج مالمارشي يتعدى للقهوة .. يعرضو القهواجي بكلمة زائدة موجهة للحرفاء جملية ... "يعطيكم ................. "
ماينجمش يشد روحو ، يرجّعلو التحية بخير منها.."يعطيك ............ على ............ في .............. و............... لـ............."

يتعدى لطاولة فيها مجموعة من الموظفين ..كروشهم منفوخة بالمقارن و المرق و العجج و كعبات البيرة متاع البارح.. لابسين الزي الرسمي متاع نهارة الاحد ... سيرفاتمون (بدلة رياضية) و سبادري... يعاودو نفس التساؤل ..مايعرفش علاش في بلادنا السيرفاتمون هي لبسة القهوة ... في العالم الكل يلبسو الزي الرياضي لممارسة الرياضة .. عندنا احنا يلبسو الجوغينغ باش يعملو شيشة في القهوة و يلعبو الرامي و البيلوت..
يتساءل كذلك على سر العادة الاخرى متاع نهارة الاحد .. لابراس .. الناس الكل تهبط عليها النفحة في اللابراس ...حتى اللي ما ينجمش يقرا بالسوري ياخذ لابراس .. كلو تابع الزي الرياضي ..
يشرب القهوة .. يقرأ الجريدة .. يتفرج شوية في اللعبة القريبة .. و كي العادة يخلص الضريبة.. "بربي كلاندو ماني خوك ..عندكشي دينار و الا الفين ..ماعنديش دخان"
ملا حالة مكربة...ماعندكش دخان بطل والديه جملة ...يروح للدار يحل الاورديناتور على انغام الاذاعة الامريكية .. نفس الخنار .. تمقيص حجب .. نصب متاع سلق و معدنوس و حمص و لوبيا ...ناس تنبح كيف بياع البلار.. ناس تفركس في الحوايج القديمة ...ناس تفيّس بالزي الرياضي ..ناس تتفزعك بلغة فولتار .. و تتجلطم على لغة شيكسبير
هذيكة بلادنا و هذاكة اش عطانا ربي ... انشالله ربي يخفف الخبزة من ها البلاد

حكايات

الحسد و الغيرة...بين الدول احيانا

لماذا تصرّ مصر على اقفال المعابر؟-

لأنّ غزّة نجحت فيما عجزت عليه مصر , بأهليها و زمالكها و فراخ جمعيتها و سدّها العالي , و بأهراماتها و فراعنتها المحنطة.

طموح (مشروع)


عبّر رئيس احدى الجمعيات (الصغرى) عن امله في ترشّح فريقه لنهائي الكأس, لا بغاية الحصول على اللقب... أو اللعب من اجل الفوز - معاذ الله- .... فأمنيته الوحيدة هي مصافحة رئيس البلاد .

مصيبة

-سمعت؟
-انشالله خير
-محمّد...المسكين خذا الماتريز (الأستاذية)
-الله اكبر...ايا ايا نمشيو نصبّروه و نصبّرو اهلو

عقوبة (مضاعفة)

من ظروف تشديد عقوبة المساجين في بلادنا أنو يهزّو المربوط للحبس الانفرادي و يحطّولو تلفزة...ما فيها كان تونس سبعة.

تحالفات آخر الزمان

من المعروف أنو كي تتحالف زوز دول او اكثر انّهميستفيدو من الفرص المتاحة بيناتهم, و يعطيو امتيازات لبعضهم و يكون بيناتهم تنسيق في المواقف و القرارات و ينصرو بعضهم في الحرب و يتشاركو في معاهدات السلام... و أهمّ حاجة انهم يحميو بعضهم أو على الأقل ما يهجموش على بعضهم .
في القرن الت21 طلعت انواع جديدة من الاحلاف و التحالفات:
الحلف 1:
*نعطيك الفلوس باش تستحفظ على كرسيك و تبرك عليه ميتين سنة لقدّام, نعطيك الفلوش باش تقوّي البوليس و المخابرات و مصالح مراقبة المواطن بصفة دائمة (من اللي يطلع من كرش امو للي يقص تذكرة ذهاب فقط (آللي سامبل) للجبّانة) ,و البطالة متاعك زادة ماذابيك تخليهم يشدو بلاصتهم عندك و اللي يحب يحرق منهم احشيه في الحبس (اوبالأحرى اللي قعد منهم على قيد الحياة) , و عسّ زادة شكون لحيتو طوالت اكثر من اللازم و شكون كثّر من المشي للجامع ...احشيه زادة في الحبس ...بالكشي يوللي عفريت من بعد... و إذا ماتراش مانع اللي نسيّبو مالحبس متاعي , زيد اهبط على جد بوه بـخمسة و الا عشرة سنين حبس, بونوس.

الحلف 2:
احنا ماهو حلفاء (و اخيان في السرّاء و الضراء) ميسالش خلّيني المرة هاذي نضرب شوية قنابل على المدن و القرى متاعك, نقتل شوية مواطنين من عندك , ابري تو ما بيناتناش , و مافيها باس كان وحدة مالأف16 متاعي قتلت عايلة و الا عايلتين في عرس و الا طيّحت زوز و الا ثلاثة مدارس و سبيطار , نورمااااال .

الحلف 3:
و هذا افسد نوع من التحالفات لانو حلف عقيم مافيهش لا قنابل لا طيارات لا فلوس لا حبوسات , فيه برشة كلام كبير , برشة خطابات و برشة تصحاح و اوراق و معاهدات, الدفاع المشترك , حماية الحدود المشتركة , التعاون, تبادل الخبرات و المعلومات , تجارة مشتركة, قوانين مشتركة, تنسيق تدعيم توحيد الصفوف... على الورق...ورق 80غرام فورما آ4

شهيلي و زمّة و حملة انتخابيةّ

عوامل طبيعية

ـ(مغترب عندو 10 سنوات ما روّحش)
- اشبيها البلاد ولاّت هكّة؟؟ علاش الفقر و الميزيريا و الحالة المكربة؟؟؟
- هذاكة مالغلاء متاع البترول...
- إيه حتى فرانسا و امريكيا و بلدان العالم الكل ضاربها الغلاء
- بلادنا يا سيدي ضاربها الغلاء و الشهيلي .... و التجمــ ـع ...

صياغة

(الصايغي و الزوز عرسان)
- عندنا الذوق 18 و الذوق 24 في الذهب الاصفر و عندنا زادة الذهب الابيض و -اذا عندك الفلوس - الديامونت و الجوهر و الاحجار الكريمة ....
- (العريس يخزر لخطيبته ) نحب حاجة ما أغلى ...
- و فمّة زادة الحديد ...

و الشهرية هي هي

- احنا في تونس - و الحمد لله- زادو في المازوط , زادو في القاز, زادو في الخبز و في السميد و في السيمان و تساكر الكار و الحليب و الياغورت و في الضو و في الماء و في التي في آ .... حتى الوقت زادو فيه ساعة...

ذكاء

- سمعت بالزيادة الجديدة ؟؟ الايسنس بـ1320 و المازوط بـ950
- نورماااال ... ما يقلقنيش... انا ديما نصبّ بـ5 آلاف

عودة لموضوع الجهوية و العروشية و الخوصصة و التنمية الجهوية

بعد ما روحت البطولة لباب الجديد, و وفى الموسم الكروي الاكثر اثارة (ممكن في تاريخ الكورة في تونس) , و شبعنا بالعرك و المشاكل و الكلامات و السب و تطييح القدر , و شفنا حاجات ماكانش تنجم تصير , كيما تصريحات الزحاف و معز ادريس و تساكر الـ100 دينار متاع رئيس قفصة و المؤامرة اللي (حسب ما يقولو) قريب تحرم القصرين من الصعود... و المحرك الرئيسي متاع الجواجم هاذي الكل هو الجهوية, اللي عمال تقوى و تاخذ ابعاد اخرى , على خلفية احداث قفصة. و ما بيناتنا مسألة الجهوية موش باش تتعدّى سلامات و موش باش تتفض طالما الاوضاع كيما هي حاليا, بالعكس مازال الخير القدّام.
و الموضوع هذاية يتفز برشة عباد و يخليهم يطرحو التساؤلات و يقدمو تشخيصات و ساعات حلول لمشكل الانتماء الجهوي, و هو ما يخلي باب النقاش ديما مفتوح و الحديث فيه ما يوفاش.
انا الحقيقة عندي برشة ملاحظات كنت باش نقدمهم في تدوينة اخرى و كل مرة مانلقاش الوقت نقول خلي غدوة عملا بمقولة "أجّل عمل اليوم الى الغد " اللي بالمناسبة نعتبرها شعاري في الحياة و نطبّق فيها في الخدمة و في الحياة اليومية (بالطبيعة في الحاجات اللي تنجّم تصبر ), الا ان التدوينة الاخيرة متاع البي تي بي ( الأماكن كلّها .. مشتاقة لك) استفزّتني و قررت باش نقوم على الصباح ندوّن الملاحظات متاعي في موضوع الجهوية و ازمة قفصة و الآراء الليبيرالية متاع خونا البي تي بي .

أوّلا حكاية "المدن الكبرى " اللي باش نخلقوها باش نخدّمو فيها بطالة البلاد , و اللي نركزو فيها وسائل الانتاج في جميع القطاعات و جميع الخدمات و نحصرو فيها مواطن الشغل و فرص الاستثمار, اي انو نقسمو البلاد المقسومة اصلا الى مناطق "مراكز و اطراف" كيما موجود في الاقتصاد المعولم , مش ممكن تعطي نتيجة ايجابية في واقعنا الحالي اللي فيه (و لو بصورة موش مكتملة) 3 اقطاب اقتصادية اساسية (العاصمة و الساحل و صفاقس) و اللي رغم وجودها منذ الاستقلال الا انو النتائج (هاهي قدامكم ) كانت اكثر من فاشلة...لانو اللي صار هو انو سكان الاطراف ( في حالة بلادنا المناطق الداخلية) لقاو انفسهم في طريق مسدودة, و انعدمت الحلول و قّلت الفرص و الخيارات قدامهم . و كل جهة تخصصت في نشاط معين ( من غير ماتتمتع بالميزة الايجابية متاعو), و مافماش حتى فرصة باش الناس اللي تسكن في الجهة هذيكة باش تختار مستقبلها او تقرر مصيرها...انت من سيدي بوزيد ؟ يلزمك ماللي تولد للي تموت و انت تزرع في الطماطم و البصل و تسرح بالغنم و البقر, و اذا عطاك الوقت و الزهر تعمل معمل متاع طماطم و هريسة و معجون و الا تعمل تعاضدية لتجميع الحليب... و اذا كنت من توزر عليك بالنخل و الدقلة , اخدم و اجمع و ابعثلهم الدقلة متاعك اتوة هوما يصدّروها في بلاصتك... و كانك من قفصة راهو تحكم عليك باش تكون كيما بوك و كيما باش يكون ولدك فار داموس تتنشق الفوسفاط و تسكر بالغبابر متاعو, و كانك مالشمال الغربي كيف كيف يلزم تخدم الفلاحة و تزرع القمح و الشعير و تبيعو لديوان الحبوب و موش لازم تناقش في الاسعار على خاطر لازمك توكّل بقية الجمهورية الباقات و البانات و البيزا و البانيني و انتي موش مشكل... ماهو عندك الطابونة و المطبقة..
ففي المناطق الداخلية حسب الواقع الحالي , مافماش برشة خيارات, عندك القطاع الرئيسي اللي حكمت عليك العوامل الطبيعية و المخططات التنموية باش تخدم فيه و الا الزوز صوردي متاع الوظيفة العمومية ( اللي هي بيدها موش مضمون انك تدخل تخدم فيها) و اللي زادة تنحصر في مراكز محدودة من جميع النواحي , و تعملت لفرض النظام و تسيير السلطة في الجهات و توفير الحد الادنى من الخدمات الاساسية و ماتنجم تكون كان بوليس و الا معلم او استاذ و الا طبيب متاع مستوصف...
من ناحية اخرى فكرة الاقطاب الاقتصادية كانت تنجم تكون ايجابية اما في نطاق منظومة اقتصادية متكاملة تنهض بكل المناطق مع بعضها, و تولي كل جهة تتمتع بالميزات الايجابية المقارنة متاعها و يولي عندها شوية استقلالية و تولي عندها ميزانيات خاصة تعتمد اساسا على نشاطها الاقتصادي و تتمتع بنوع من الحرية في التصرف فيها, و يولي فمة شوية توازن في النسق التنموي موش جهة تعمل في معدل نمو سلبي و جهة تعمل معدل نمو بزوز ارقام و يجيو في تونس سبعة يقلك راهي البلاد عملت نسبة نمو متاع 5 و الا 6 % . و مرة وحدة نرتاحو من حكاية المشاريع الرئاسية و المخططات الوزارية و برامج التنمية المندمجة اللي للأسف تعملت باش تغطي عين الشمس بالبلوط و توفر مادة اللوح و الكلوخ للنشرة الرئيسية للأنباء للزملاء متاع الصريح و الحدث و الاعلان...

اما موضوع الفلوس اللي " يلزم تحطها في البلاصة اللي تربّحك اكثر فلوس" , (و هاذي قالوها برشة مدونين في نقاشات الرديون حول الجهويات في شهر جانفي) , فهو قبل كل شيء يحيلنا على برشة تساؤلات , أولا الفلوس هاذي وينهي ؟ قبل ما نتساءلو كيفاش نوظفوها الفلوس ماهو يلزم نسألو ثمة فلوس و الا ؟ باش كي نتكلمو نكونو على بينة من الموضوع و مانحكيوش على حاجات وهمية او خيالية ماعندهاش علاقة بالواقع.
و السؤال على الفلوس يلزم يطرح في الفترة الحالية اكثر من اي وقت آخر , لأنو عندنا سنوات دخلنا في سياسة البيع المسترسل لوسائل الانتاج المملوكة من طرف الدولة, و ثمة مليارات الدولارات دخلت للبلاد من صفقات كيما ( للذكر لا للحصر) اللزمة متاع التونيزيانا و بيع رأسمال التيليكوم و معامل السيمان و المغازة العامة ... و اللي حققت للبلاد عائدات كبيرة و استثنائية من العملة الصعبة, اي انها ماهيش ناتجة عن نشاط اقتصادي مستمر و متواصل, هاذية رؤوس اموال و أصول كانت تملكها المجموعة الوطنية , و كانت تصرف عليها برشة فلوس و كانت في معظمها تعاني من سوء التصرف و عدم نجاعة اساليب الادارة و التسيير, الشي اللي أثر على المردودية متاعها لكن رغم العوامل هاذي الكل كانت البلاد تدخّل منها في الفلوس و تعيش منها في الاف العايلات. فمن المنطقي انو يتم استثمار فلوس الخوصصة في مشاريع تقعد للأجيل الجاية ( بنى تحتية و استثمارات تدعم التنمية و توفر فرص اخرى لأولادنا) على خاطر موش معقول نحرموهم من المنشآت هاذي و في نفس الوقت نحرموهم من فلوسها و نستهلكو كل شي في حياتنا و مانخلو شي للي بعد, لكن اللي صاير هو العكس و انشالله اولادنا و بناتنا باش نورّثوهم بلاد مملوكة للاجانب و ديون و عجز في الميزانية بالمليارات.
في الجزائر على سبيل المثال , تم استغلال العوائد الاستثنائية متاع الطاقة لتسديد كل الديون الخارجية, و في ليبيا قام العقيد بتوزيع المداخيل النفطية على الاسر الليبية في شكل شهريات و سندات دين, بالطبيعة اللي عملو العقيد يعتبر قمة البهامة و الغفاصة الاقتصادية , أما نجموش نلوموه , هذاكة حد عرفو , و على الأقل اجتهد و لم يصب و عندو اجر واحد , و على الأقل بانت الفلوس و ظهرت للعيان حتى كان تم استغلالها بالغالط...

اما احنا, ما بان شي, بححح ( على القليلة بالنسبة ليّا ماريت شي) , المليارات اللي دخلت الكل كلاها الذّيب و ذابت كي الملح... مطار النفيضة قالك عطاوه للأتراك باش يبنيوه و يستغلوه , مشاريع البحيرات (الراقية موش الجبلية) و المشاريع الفرعونية متاع الانشاء العقاري لكلّها من عند بني عمومتنا الشيوخ (شيوخ الطرب) و كل حاجة تنزاد في البلاد من مؤسسات طبية و تعليمية و رياضية الا و تكون ممولة من الاجانب و من البلدان الشقيقة و الصديقة , هذا الاتحاد الاوروبي هاذم اليابانيين هاذي منظمة الثقافة و العلوم و هاذي اليونسيف و هاذي جمعية ندرا شنوة.... آش قعد ؟ قعدت الافلام التونسية و دعم وزارة الثقافة ؟ زعمة فلوس الخوصصة تحطّت في الافلام التونسية ؟ زعمة عرس الذيب ممول بقلوس صفقة التونيزيانا ؟؟ و فيلم الـخرمة موّلوه جماعة التيليكوم ؟؟ و الا بالكشي الفلوس الكل مشات في بناء الحبس متاع المرناقية ( و العياذ بالله) ؟؟ على كل حال موضوع الفلوس طويل ومتشعّب لذلك باش ننجّم نوصّل الفكرة متاعي , نعتبر انو فمّة فلوس , و نرجع نتساءل وين باش نحطوها؟

الفكرة البديهية الاولى اللي تخمم فيها الناس الكل هي انو "النجاح يغذّي نجاحات أخرى" و من منطلق محدودية الموارد من الافضل انو نحاولو نتحصلو على مردودية سريعة و عاجلة للاستثمارات و بالتالي التركيز على المناطق اللي عندها مقومات النجاح اكثر من غيرها. و هذا حسب رأيي موش حل (على الاقل للحفاظ على السلم الاجتماعية و التنمية العادلة و المتوازنة) , بالعكس يلزم توة نبدّلو قبل ما يفوت الفوت, و كل ايد تشد اختها, و تتعمق الفوارق و تكبر حاجيات التنمية في كل جهة للحد اللي يخلي محاولات الاصلاح و اعادة التوازن صعيبة و مؤلمة و مكلفة و ربما تعيق تنمية البلاد لمدة طويلة. و فكرة ترسيخ الامر الواقع و تعزيزو هي اساسا فكرة بدات منذ الاستقلال , وقت اللي 90% من البلاد كان فيافي و قفار و الجهة الوحيدة اللي كانت فيها مراكز حضرية و نسيج اقتصادي متطور (في الوقت هذاكة مقارنة بالواقع متاع البلاد) و فيها صناعات و انشطة تجارية و اقبال على التعليم هي جهة الساحل ... و دخلت البلاد في دورة مغلقة و خدمت التغذية المرتدة على زوز مستويات ( ايجابية في مناطق الساحل و سلبية في البقية ) , و الواقع اللي كان ظرفي في فترة الاستقلال ولىّ واقع مستمر و متواصل 50 سنة من بعد , و تولدت عليه المشاكل متاع النزوح اللي نعرفوها ( فمة مناطق في الجمهورية نقصت السكان متاعها نتيجة النزوح كيما الكاف ) و الضغوطات و التوترات الاجتماعية اللي كانت متخبية , وصلت درجة ماعادش يمكن كتمها طويلا و ظهرت بزوز مظاهر , تصاعد التيار السلفي في منطقة الوسط الغربي و الاحتجاج الشعبي العام في منطقة قفصة .

الملاحظة الثالثة ( او الرابعة ما نيش مثبت) تخص قول البي تي بي انو " باش تصدر يلزمك تكون في اقرب بلاصة للبرط", اللي هي نورمالمون مسألة ما تطرحشفي بلاد كيما بلادنا, عندها 1300 كم شطوط , و ابعد بلاصة على الموانئ التصديرية ما تتجاوزش الـ500كم.
و الصناعات التصديرية اللي عندنا في تونس في معظمها مؤسسات نسيج و خياطة عادة ما تكون مملوكة من طرف الاجانب, اللي جايين لتونس موش على خاطر البحر و الا الشمس و الطقس الجميل, هاذي عباد جات على خاطر ما عندهمش في بلادهم اشكون يخدم 10 سوايع في النهار بـ200 دينار في الشهر, اي انو اللي يهمو هو فارق الاجور متاع اليد العاملة, و وقت اللي جاء يخزر لتونس انها بلاد صغيرة و ساحلية اي انها مشكلة القرب من البرط ثانوية بالنسبة ليه, خاصة اذا كان جاي من بلاد مصنعة ماعندهاش منفذ بحري و الا من بلاد عندها حدود بحرية اما المسافات متاع النقل من المعامل للموانئ تتقاس بآلاف الكيلمترات (كيما فرانسا و المانيا و اسبانيا )...حاجة اخرى, البنيات اللي يخدمو في معامل الخياطة نلقاوهم في اغلبهم اصيلي المناطق الداخلية, و يخسرو ( رغم ظروفهم القاسية) في الفلوس على الكراء و النقل في اللواج و الكار, باش مولى المعمل ما يتحملش حق الكميونات و ما تغلاش كلفة السلعة متاعو و تقعدلو في الرقبة ؟؟ آخى اما أولى ؟؟؟ ناقفو مع خدامتنا و نسهلولنا ظروف المعيشة و الا نعاونو المستثمر و ننقصولو في التكاليف متاعو ... فحكاية البرط هاذي حجة فاشلة تعتمد على نظريات اقتصادية عندها ميات سنة و الا اكثر , منين كان المستعمر يعمل في المدن و مراكز الشحن و تجميع الانتاج قريبة من السواحل متاع المستعمرات على خاطر في الوقت هذاكة كان النقل يتم باستعمال الزوايل -حاشاكم- و ظهور العباد, و ماكانش فمة كياسات و سكك حديد بالصفة الموجودة في الوقت هذاية... و الحجة هاذي مازالت للاسف تصرف عندنا, باش سكان المناطق الداخلية يسكّرو افّامهم و يقتنعو و يصبرو لمولاهم كي يشوفو المناطق الصناعية متاعهم تسرح فيها الكلاب السايبة و يكفرو بالنهار الاول اللي جات فيه جهتهم بعيدة على البحر.

الملاحظة قبل الاخيرة و الاهم, هي موضوع العروشية و القبلية, و دور القبلية في احداث قفصة... و تخليني نطرح جملة من الاسئلة, هل أنو الانتماء القبلي هو اللي يخلي الجيعان يحل فمّو؟ و البطّال يطالب بحقّو؟ و إذا كان الإنتماء القبلي موجود في اغلب جهات الجمهورية, علاش ما ظهر كحركة احتجاجية كان في منطقة قفصة ؟ زعمة وين المشكلة؟ زعمة عروش القفاصة هوما اللي عندهم استعداد مسبق لشريان الشبوك و البحث عن المشاكل اكثر من بقية عروش الجمهورية؟ و الا الوضع الاقتصادي و الاجنماعي في جهة قفصة هو اللي يستدعي اللجوء لشريان الشبوك و استعمال الطرق الصعيبة للمطالبة بالحقوق؟
زعمة لوكان جاو سكان قفصة من الالمان و الا شنوة و الا من الموزمبيق , ماكانش تصير الاحداث اللي شفناها؟
فجهة قفصة كيما تعرف الناس الكل , منطقة جبلية صحراوية عكستها العوامل البيئية و المناخية و الجغرافية , و زادت كملت عليها مخلفات عشرات السنين من الاستغلال المنجمي...الشي اللي خلى اي نشاط آخر ( ماعندوش علاقة بالمناجم) محكوم عليه بالفشل , اعطيني تراه اش ينجم واحد في ام العرايس و الا في الرديف و الا في المظيلة يخدم؟ يعمل نزل سياحي مصنّف ؟ يعمل بواتة و شركة كراء سيارات؟ و الا ياخذ قرض من بنك التضامن و يعمل مشروع زراعة سقوية؟
بحيث انو السيد هذا يخزر لربي و من بعد لشركة الفسفاط سينون هوكة قاعد على بنك البدلاء حتى يفرج ربي. و كي يزيد يشوف عباد وافدة من الجهات الاخرى يجيو يخدمو في نفس اختصاصو رغم اللي عندهم فرص اخرى في جهاتهم, و يشوف عباد تتعين اساتذة و معلمين و تاخذ تسمياتها في جوان , و يشوف عباد ما دخلتش معاه للمناظرة و من بعد دخلت تخدم , اشنوة تحبو تكون ردة الفعل متاعو ؟؟ يمشي يهز درابو و يشجع منتخب العاب 2009؟؟ و الا يمشي يشري كردونة الكوول من اقرب حانوت يشربها و الا يكبها على روحو و يشعّل عرف وقيد و يحرق روحو (مافماش فرق كبير ).؟

تقلي نخوصصو الشريكة باش تولي ثمة شفافية و نزاهة و حسن تصرف و مردودية ما خير , نقلك صحيح...
أما الخوصصة زادة فيها و عليها , و ما نجموش نعملوها في القطاعات الكل و المناطق الكل, الخوصصة تجيب معاها سياسات التطهير و التحكم في التكاليف و التخفيض في اليد العاملة , و اقتصاد بلاصة كيما الحوض المنجمي ما يحتملش التخلي عن اليد العاملة الموجودة , بالعكس يلزم التخفيض في عدد البطالة.
تقلي هاذية ضريبة اقتصاد السوق, نقلك اللي النموذج اللي برشة مدونين و غير مدونين في تونس يطالبو بيه , وهو الرأسمالية الفجّة و اللاإنسانية متاع النموذج الامريكي , مشى على روحو من هاك العام, و فقد الجاذبية متاعو كيفو كيف النموذج متاع شي قيفارا. و اثبت عدم قدرتو على التأقلم مع الظروف الخصوصية لكل بلاد, و عجزو على مراعاة البعد الانساني و الاجتماعي, و وجود الدولة كلاعب أساسي و محافظتها على على بعض القطاعات الحساسة و الحيوية هو عامل استقرار ( رغم اللي ينجم يكون اقتصاديا موش الخيار الامثل و يكلف الدولة برشة )
و خوصصة السي بي جي في واقع بلادنا توة موش باش تكون حل, بالعكس يمكن تسبب خسارة اضافية للمجموعة الوطنية من غير فائدة

ايا نحس في روحي تعبت من الكتيبة, انشالله ما نكونش طوّلت عليكم.
ايه نسيت حاجة اخرى , حكاية المواطنة اللي قال عليها البي تي بي (و اللي ظاهر انو يفهملها مليح في القوانين و الدستور و تنظيم الجمهورية), عندي سنوات نحب نقنع روحي اني مواطن و نحاول نحس بروحي مواطن و شايخ بقيم الجمهورية ...


و لتوّة مازالت نحاول

يا قفاصة كانكم توانسة يزيو مالغفاصة... و اصبروا لمولاكم

كيما الناس الكل كنت في المدة الاخرة نتبّع في أزمة قفصة و المشكلة اللي عملوها جماعة "الحوض المنجمي" (كلمة ماشية ياسر ها الايامات و على الموضة كيما المثلث السني في العراق), و قعدت باهت في الناس هاذي , اللي تلوج على الشغب و تشري في الشبوك راسين براس, الشرذمة الضالة, اللي تسعى لبث الفرقة و البغضاء بين افراد الشعب الواحد, و تنشر في الفوضى و تخل بالنظام العام في بلاد الأمن ...و الأمان.

توة بالله اشبيهم القفاصة كيما هكة ؟؟ علاش هكة ياسر أنتيباتيك و مكرزين ؟؟

ياخي فيهاش حاجة لوكان قعدت اولادك بطالة ؟؟ نهاية العالم ؟؟
برة راهو بتت ليلة و الا ليلتين و الا حتى شهرين بلاش ؟؟ حاجة عادية و تصير في اكبر العايلات... تي شوفو أثيوبيا يا رسول الله, كانت مضرب الامثال في المجاعة و الشر و الميزيريا,و توة ولى عندها جيش و ولات تحتل في الدول و يقولولها "الاحتلال الاثيوبي" كيفها كيف أمريكا.
شبيهم القفاصة ما يصبروش و ما يعرفوش يتصرفو ؟؟
ساهلة هي التنمية ؟ ياخي باقات ماجيك ؟؟ كن فيكون ؟؟ ماهو مرة عندك و مرات عند الاخرين ... و اقعد استنى المخطط الجاي ...
ياخي لازم الناس الكل تعمل كراهب ؟؟ لازمة هي الديار؟؟ لازمة هي الخدمة ؟ شوفو اليونان و الرومان بكري, شكون كان يخدم ؟؟ ما كان حد يخدم و الامور لاباس.
و علاش العرعور و الهرج و التهريج ؟؟ لازم يكسّرولنا روسنا بالسؤال على فلوس الشعب ؟؟ و من وقتاش الشعوب عندها فلوس؟؟

حاصيلو شي يفدد, عباد تتشكّى و تتبكّى و تنادي و تطالب , كأنهم مواطنين و عندهم حقوق ... كانهم ضربو عليه الاستقلال بالكرتوش ...ياخي حاربو فرانسا ؟؟ فماش قفصي مات في حرب التحرير ؟فيهمش شكون بعث ولدو لبنزرت ؟ باش يعاون البنزرتية اللي خرّجو فرانسا ؟؟ كيفاش يحبّو يخدمو و هوما ما عندهم شي يساهمو بيه في اقتصاد البلاد...كيفاش يحبو يكونو توانسة و هوما سمر ؟؟ يتكلّمو بالـ"ڨاء" و روسهم كاسحة و جمعيتهم اسمها القوافل...شي يعيّف

هي اشبيه كي يدخلو اساتذة متعاقدين يخدمو في بلادهم ؟؟ (ناس ماخذة الاستاذية في جوان و دخلت الخدمة في سبتمبر)
شنية المشكلة كي يدخلو اوليداتنا في الساحل باش يخدمو في الفسفاط ؟ ماهو كلو من عند ربي و إلاّ الفسفاط زادة حطوه القفاصة في قفصة؟
اش كان عليه اذا تعيّن شوية معلمين من ولايات الجمهورية الكل باش يقرّيو في مدارس المتلوي و الرديف؟؟ الفائدة ديما حاصلة مادام اولادهم باش يقراو عند ناس عندهم شهايد ما فماش حتى واحد قفصي عندو شهادة كيفها...

حاصيلو انا نرى اللي المشكلة لهنا هي في القفاصة ذاتهم في كونهم قفاصة و ما ينجموش يكونو حتى شي آخر... و يمشيش في بالكم اللي قاعد نستهزأ و نتركك عليهم و الا عندي نية السخرية ... حاشا و كلاّ , بالعكس ...
انا مع العباد اللي كلاها المطراك و الكريموجان و اللي تعاني حاليا في السيلون ... اللي يفتشو على الشهرة و دفعو الضريبة متاعها.... على خاطر كيما شفتو حكات عليهم تونس سبعة و 21 و حنبعل و عملو عليهم 5000 ريبورتاج و 300 ساعة نقل حي و تصريحات و بيانات و معلومات و اخبار فرشكة... تي اكثرش من هالة الركبي -يذكرها بالخير- عدّات حصّة كاملة على الوضع في معتمديات المناجم , و نقلت الحقيقة كيما هي و فهّمت الرأي العام اشنوة قاعد يصير لغادي بالضبط...

أما توة و بعد ما صار اللي صار - و اللوم بعد القضاء بدعة- , انا نرى انو الحل ساهل و بسيط, و نوجه كلامي لوخياني في قفصة,
و نقلهم اصبرولها اتوّة تعطيكم, المسألة مسألة وقت, انوّة يجيكم البث و يجيكم مدّ التنمية الشاملة...
فإذا مشات الأمور كيما يلزم, الولايات الكل باش تتريقل في ظرف 720 سنة فقط ... على خاطر احنا و الحمد لله في بلادنا التنمية الشاملة و المستديمة(او ما يسمّى بطوفان الاستكراز العام ) تمرّ اولا و اخيرا بمسقط الرأس...
فإذا كان كل مسؤول اول في البلاد يركّز مجهود التنمية اساسا في حومتو و بلادو... فإنه بحسبة بسيطة نلقاو انو 24 (عدد الولايات) مضروبة في 30 سنة ( متوسّط المدّة الضرورية لكلّ فترة رياسية) تعطينا 7 قرون و 20 سنة...
و ربي انشالله يكبّرنا في طاعتو و يوصلنا للنهار هذاكة لاباس.
و نعاود و نقول الصبر مفتاح الفرج.

مثال توضيحي:

ملاحظة: مالقيتش طريقة أخرى باش نصوّر او نمثّل معلّمية المستقبل الا بالتشكيلة هاذي من الوجوه (الحرفة), لأنو و للأسف تربة بلادنا و رغم استعمال الفلاحة العصرية و الاسمدة و البذور الممتازة و المستوردة و اللجوء ساعات للري التكميلي ما تنجّم تجيب كان النوعيات هاذي.
ة

نهاية العصر الذهبي للكلاندستان

برشة قرّاء للمدوّنة يظنّوا أنو الكلاندستان بطّـال و مشهودلو بالبطالة في المقاهي المحلية و العالمية و فوق التروتوارات تحت الحيوط الخايخة و في الديار اللي في طور البناء. لكن موش هاذي الحقيقة, لأنو الكلاندستان عندو سنوات منتمي لقطيع الوظيفة العمومية ذي النصف مليون رأس
و قبل الخدمة عاش البطالة أو عدّى سنوات البطالة ( على خاطر البطالة واجب وطني كيما الواجب العسكري و الا أهمّ)...

و يمكن القول انها سنوات البطالة هامة جدّا لبناء شخصية الفرد و تكوين عناصر صالحة في المجتمع و هذاكة علاش التوجه العام يشجّع على تعاطي البطالة و يرغّب الشباب و الشّابات للاقبال عليها و لما فيها من ايجابيات و خير للمجموعة الوطنية ككل.

هاو باش نحكيلكم على حالة صاحب هذه المدونة و كيفاش عاش التجربة هاذي:
فسنوات البطالة بالنسبة لكلاندستان كانت فترة الأحلام و الطموحات الكبيرة , فترة صعود الجبال و التأمل في الطبيعة و الناس , فترة الأوتوستوب و المغامرات الغير محسوبة, فترة الدينار ( باكو كريستال 750 و كابوسان 250), فترة المحبّة الصحيحة , فترة الصحبة و الرجولية , فترة تعلم اللغات (قرى برشة طليان و شوية المانية) , الفترة اللي قرا فيها برشة كتب و تفرج في برشة افلام و عمل فيها برشة حاجات ماهوش فخور بيهم ...

و بزهرو تزامنت السنوات هذيكة بـ " تشعّب " الأنترنات ( اي انها ولات في متناول الشعب الكريم) و ظهور اوّل محلات البيبلينات, فتحوّل الكلاندستان من كائن ورقي الى كائن رقمي افتراضي ... و غطس في الشات و الميرك و الاي سي كيو ... و وقع في حب الاسماء المستعارة من امريكا و فرانسا و فنزويلا و تركيا و سويسرا و سائر انحاء العالم, و اتخذت الميزانية متاعو بالتليفونات مع الخارج... بالكشي تخطف ...
و عمل موقع واب شخصي من 3 او اربع صفحات (ماعادش يتذكر) و حط ساقو في المنتديات و النوادي التونسية و الاجنبية , و فرح بالمولود الجديد متاع الاذاعة الدولية - البرنامج متاع كريم بن عمر- , اول برنامج يعدي الموسيقى المفضّلة للكلاندستان في الاذاعة التونسية و اللي كان اسمو "كلوب دو نوي" و كان فيه ما تسمع, و مللّي تبدّل الاسم و ولات "زنزانة" (رغم اللي صوّت ضد التسمية هاذي) ودّع البرنامج و مولى البرنامج و خلّى المفرخ ترتع في الفوروم.

في نفس الفترة كانت وكالة الانترنات مازالت ما تحولتش للوحش الكاسر اللي نعرفوه اليوم, و ما طورتش اساليب القمع الفكري او السيفونة اللي تصفي بيها في الواب, فكان الواحد يشيخ بالانترنات و يبحر باتم معنى الكلمة و كان فمة ما تفرأ, فمة الرأي و الرأي الآخر , فمة التكريز و النكتة و عمر الخيام , و المرحوم اليحياوي, و برشة صفحات شخصية مجانية فيها ما يتقرا ...
و في البارابول كانت فمة زادة الزيتونة و المستقلة , و كان الكلاندو يستنى نهارة الاحد باش يتفرج في سي بن بريك ( ههههه) اللي تحول لنجم و طيح على حاتم بن عمارة و عمي رضوان , و سي المرزوقي و السيدة بنسدرين و عمكم الهاشمي (هههه) يحكي مع مرت ميتيران بالسوري ....
و من المهازل وقتها انو القناة الوطنية كانت تستنى وقت البرنامج اللي كنت نحكي عليه باش تعدي مقابلات الارجنتين 78 , و الا تعدي برنامج مسابقات يعطي للفائز شكارة خبز ....


حصيلو عينين الكلاندستان تحلت على الدنيا في فترة البطالة و فاق ببرشة حاجات و اكتشف برشة حقائق ماكانش يعرفهم... و بعد الـ11 سبتمبر سهّل ربي , شدّ الخدمة و دقّ المسمار الاول...
و دخل في الغيبوبة و غرق في المستنقع و بدا التيار يجبد فيه, باش ينضم للبوكيمونات... و طلعت مشاكل جديدة و حط روحو في مآزق اخرى...

ماعادش عندو فاش يستنى , ماعادش عندو باش يحلم...
الاصحاب متاع الخدمة موش كيما الاصحاب متاع الفلسة, الطفلة اللي يحاول يتقربلها يلقاها تكمبص, تحاول تحصّلو باش يصحح و يرهن روحو في كمبيالة ما يخلصها كان عزرائيل...
و كثرت العينين, و كثر الحديث و الكلام, المرا اللي تعرض عليه في بنتها , و الزميلة اللي تستدعيه لسهرية عائلية باش يتعرف على قريبتها , و أمو اللي تحب زعمة زعمة تفرح بولدها الكبير, و الجار اللي يتساءل ببراءة "قداش عندو يخدم , وينهي فلوسو ؟؟؟" ( نسى عائلتو و حياتو و وفات المشاكل من العالم و ولات الثروة الكبيرة متاع الكلاندو هي شغلو الشاغل )

و اتضح انها الخدمة ماهياش باقات ماجيك باش يكون الواحد في حال يصبح في حال, و غالط اللي يعلّق آمالو الكلها على الخدمة...



لذلك نصيحة من مجرّب ,من المستحسن انو الواحد يستفيد من الوقت هذا حتى للي سهّل ربي ...
انا لهنا مانيش نعطي في الدروس لاني انا بيدي في حاجة للدروس
و مانيش باش ندعو للتحرك و الاحتجاج على الاوضاع لانو موش ديما الحل الملائم هو الاحتجاج

و طالما البطالة ولاّت خدمة اجبارية و الخدمة ولات بطالة مقنّعة , و طالما الشباب يعيش بمشاعرالعجز و اليأس و خيبة الامل و الخوف من المستقبل , ما نجم نقول كان ربي يجازي اللي كان السبب و كل من ساهم في اللي صاير ...
و حضرو ارواحكم للأسوأ

المهنة عسّاس

البارح الصباح ظهرلي باش نعمل قهوة قبل الخدمة, و مش من عادتي اني نمشي للقهوة في الصباح لعدة عوامل مرتبطة بضيق الوقت و بالطقس و بالعباد اللي ما نحبّش نتصبّح على طلعتها البهيّة.

ايّا خذيت قهوة و قعدت نشرب فيها على الكنتوار و نقرا في النسخة المجانية متاع جريدة الشروق - لانو القهواجي و مولى القمرق متاع الجرايد اصحاب فكل صباح يهديلو النسخ المجانية متاع صحف النهار هذاكة اللي بدورها تدور على الحرفاء المهمّين متاع القهوة و منهم العبد لله - و هذاية امتياز موش متاح للناس الكل ...

و دخل واحد ما نعرفوش, يظهر في الاربعين او في الخمسين (لكن اتضح فيما بعد انو ما يبعدش عليا برشة في العمر اما الهم و الميزيريا و تعب الخدمة يظهر اكبر من سنّو) ,

صبّح و قعد يخزر للقهواجي ,

القهواجي: شبيك يا ولدي
الراجل: رقدت ؟؟
القهواجي : شنوة اش تقصد ؟؟
الراجل: شايخ ؟؟ شبعان بالنوم؟؟؟
القهواجي: برة يا ولدي يهديك
الراجل : يهديني ؟؟؟ شوفو اللوغة اللي يحكي بيها ...البارح بايت تصك في النوم و تقلّي يهديك
القهواجي: تي شبيك ها الصباح ؟؟؟
الراجل : اشبيك انتي شاريهالي على الصباح ؟؟؟

حاصيلو احتدت اللهجة و بدأ تطييح القدر, و اللي فهمتو انو السيّد الحريف يخدم عساس ليلي (موش مترسم) في احدى المؤسسات الحكومية المجاورة و المسكين عدّى ليلة بيضاء , و يحتمل اعصابو بدات تفلت و يلوّج على اول شخص باش يشريهالو فجات في وجه القهواجي .

ايّا قامو اولاد الحلال و تم تطويق الازمة ( على طريقة الجامعة العربية) , و خرّجو هاك العسّاس مالقهوة.

فقعدت نخمم

في الظروف الراهنة من ظلمة مفتعلة قصد الاقتصاد في الطاقة و من ارتفاع في معدلات الجريمة و البراكاجات و السطو و شرب الالكوول و القوارص و اللصق و نزيدو عليها ظروف الحرب على الارهاب و الانتخابات الامريكية و ارتفاع اسعار البترول و الازمة اللبنانية و حصار غزة و خطر تقسيم العراق , ما نجمو نقولو كان يعطية الصحّة للسيّد اللي يخدم عساس , لانو فعلا عسّاس هي خدمة المتاعب,... و تزيد عليها انو موش مترسّم رغم السنوات اللي عدّاها في السرفيس و انو ياخذ في شهرية اقل مالسميغ ,
السميغ اللي الحاكم عامللو قانون و تفقديات شغل حاطط فيهم متفقدي شغل خدمتهم الوحيدة هي مراقبة الخواص لتطبيق قانون اكبر مخالف ليه هو الدولة و مؤسساتها , اللي تخدّم في فيالق متاع الاف العباد -الوقتيين المصنفين حسب كل الحروف الابجدية- من غير حتى امل في ادماجهم و ترسيمهم او على الاقل اعطاءهم حقهم من فلوس و تأمين و كونجيات...

فما نجم كان نعذرو السيد عساس الليل و ندعيلو بالفرج ....

و ما ابركها ما يعملش عملية انتحارية على الملأ و الا ياقف في الشارع يصيح " كلوة للبيع" ...
هذية حكاية اخرى كنت شاهد عليها انشالله نحكي عليها مرة اخرى

حفلة على غفلة و الطـ**** يبات ساري

يحكى - و العهدة على الراوي- انّ احد كبار المسؤولين في البلاد خرج في زيارة فجئية, يشوف العباد اش يزيدها و اش ينقصها , مالحليب و الجبن و الهريسة والفريكاسي و كوارط التليفون , و مرة وحدة يشوف الناس تخدم على رواحها و جايبة ماعندها و الا قاعدة تدز في البيدق و تكركر فيها على الحشيش...

فوصل لاحدى المنشآت او الادارات العمومية و حبّ يدخل يعمل طلّة.

لكن -و يا المفاجأة- يلقى العامة و الطامة تستنى فيه , الاطارات بانواعها ( قوديير و ميشلان و بيريللي) و المسؤولين و العباد اللي تصفّق و اللي تناشد و اللي تساند و اللي تضرب البندير و جماعة صلّي على النبي تربح و جماعة زيدو كاس بلاش و النسا اللي يزغردو بـ 5 الاف ( تعريفة 2004 و يحتمل زادت توة مع ارتفاع اسعار البترول )و الطبال و البنات اللابسين الزي التقليدي ( هازين النوار و حاطين مقص في الصينية على ما ياتي)...

الناس الكل حاطين الحطّة و لابسين احسن ما عندهم الا واحد ... زوّالي محتحت , اجنابو طابت مالشر و الميزيريا و سروالو تقطع مالكراسي متاع القهوة (قالك هذا وقت اللي تولد ما قيدوهش في البلدية مشاو بيه طول لبيرو الشغل عملولو بوانتاج )... مسكين لابس حويجات على قدّهم ديجا ما فيبالوش بالمناسبة السعيدة و ما علبالوش بالطقس و بالطقوس المراسمية متاع الزيارات الفجئية .

المسؤول الأوّل وقت اللي شافو شاورلو بيدّو و ناداه و قعد يكلّم فيه في وذنو....

الجماعة مالشيرة الأخرى (اطارات و مسؤولين ) ما فهمو شي ... زعمة شبيه ما حبّش يكلّم حتى واحد منّا ؟؟؟ علاش يكلّم في ها الزنس ؟؟؟ زعمة شنوة قالو ؟؟؟ بالكشي دبرها ؟؟ بالكشي "حشاه" و قعدنا احنا نتفرجو كي المهبلة ؟؟؟

و قعدو هكاكة يسألو في بعضهم و ماهم فاهمين شي ... فيهم شكون تغشش ... فيهم شكون حسد هاك الزوالي على اللفتة الكريمة ...فيهم شكون بغضو على الفرصة النادرة باش يسمع صوت الباران مباشرة... و الناس الكل تتمنى لوكان جاو في بقعة هاك البطال المتاخذ

مبعد ما دخل الموكب الرسمي , مشى واحد من كبار القوم و اكثرهم ضربا للبندير و تفانيا في القوادة الوطنية و ضرب اللغة الخشبية للسيّد متاع الحوايج المقطعين .... كركرو لتركينة و قالو خوذ اش تحب و هيا نبدّلو الحوايج...

كان الامر كذلك, لبس الزوالي الكوستيم المذخم متاع المسؤول و زاد حط مبلغ محترم في جيبو, و لبس المسؤول كبوط 1,500 فرنك و فيستة 3 الاف متاع هاك المحتحت و مشى يجري باش يخلط على الموكب...

و كيما المرة الاولى ... وقت اللي شافو المعلّم ناداه و قالو في وذنو : " صار انتي مازالت هوني ؟؟؟ موش قتلك اقلب منظرك؟؟ "

ة

رفع التباس:

الطـ**** اللي في العنوان موش المقصود بيها الطمّاع

اعتذاري للصفاقسية... و شوية حديث في الجهوية و الكارطة المركّبة

يظهرلي الحكاية متاع البارح موش باش تتعدى على خير, لذلك فالامر يستوجب التوضيح , و التفسير لتجنب الخلط و سوء الفهم اللي طاحو فيه برشة قراء.
اولا انا نحترم جهة صفاقس و كل جهات الجمهورية دون استثناء , و البوست متاعي مافيهش سخرية او تهكم على الصفاقسية و ما فيهش اي شكل من اشكال النعرة و العصبية الجهوية ... و ما شابهها من الحاجات اللي يتندرو بيها بين الجهات كيما اللهجة و العادات والتقاليد و الطباع .

كل ما في الامر انو اللي صار مهزلة و ما يليقش لا بصفاقس لا بتونس ككل و لأنو تصرف الزحاف و تصريحاتو فضيحة بجلاجل كيما يقول المصري...
الناس الكل تعرف انها رياضة كرة القدم فيها برشة اندفاع و التحام و تصادم و الاصابات واردة جدا و توصل حتى الوفاة في بعض الاحيان...فهل يعقل انو ملاعبية متاع كورة يتفجعو كيف يشوفو اصابة زميلهم و يترعبو من مشهد الدم على الميدان و من ثم يرفضو مواصلة المقابلة...
الحاجة الثانية انو رئيس فريق كورة يقوم في التلفزة و يقول انو الشي اللي صار في الطيب المهيري يرجع لمؤامرة تستهدف جهة صفاقس و فمّ عصابات جريمة منظمة تستهدف الصفاقسية ناقص كان يقول اللي تنظيم القاعدة هو اللي عيّن الحكم و هو اللي ضرب ابوكو و امير الحاج مسعود...
ثالثا و هذية المهزلة الكبيرة انو واحد ينشر صفحة كاملة في صحيفة الصريح يشبّه فيها نفسه كاحد البلشفيين المحكوم عليهم بالاعدام , و يلتجيء لاسلوب المغالطة اللعب بالمشاعر و تحريك الاحساس بالانتماء الجهوي عند مليون شخص من متساكني صفاقس. و يحول هزيمة كروية الى معركة و قضية جهوية يختمها بقوله " سنموت و لن نركع"

و ظاهر انو الزحاف افتعل الحكاية بكلها باش يتجنب النقد و المساءلة على مردود الفريق و الهزيمة في ميدانو , و استعمل الوسيلة المثلى و اللي عادة ما تعطي نتيجة خاصة في السنوات الاخيرة و هي تحريك النعرة الجهوية.

و السؤال اللي يطرح نفسو هو علاش رجعت الجهوية بقوة و علاش ولات طريقة مثلى لتوجيه الراي العام و اقناعه مغالطته في بعض الاحيان ؟؟

انا -حسب ما نرى- انها تونس و رغم مساحتها الضئيلة و تركيبتها الديمغرافية المتجانسة تعاني من المشكل هذا , و الحكاية تتجاوز الفذلكة البسيطة و النكت ( جريدي كعرار , صفاقسي مشحاح , جندوبي حاشا المحل ...) , و هذا حسب رايي يرجع لزوز اسباب :
اولا اصل غالبية السكان (خاصة سكان الدواخل) و هو اصل قبلي , فالـ "عرب " كانو قبايل ( او عروش) مسيبة في البلاد منذ الغزو الهلالي الي ما بعد الاستقلال , يسكنو في الخيام و بيوت الشعر و يربيو في الابل و الاغنام و الماعز و كانو ديما مصدر قلق للحاكم في تونس (اللي كان مجبر على مسايرتهم خوفا من ثوراتهم) و لجيرانهم من العروش الاخرى و سكان المدن و القرى ( عمليات السطو و المعارك القبلية ). و الشعور بالانتماء القبلي مازال ليوم الناس هذا و مازالنا لتوة ننعتو بعضنا باصولنا (مثلوثي فرشيشي عميري جلاصي ...) .
ثانيا و هذا الاهم , انو بعد الاستقلال بعض الجهات استفادت كيما يلزم من الفرص اللي اتاحتها الدولة الجديدة و بعض الجهات دخلت مرحلة السبات الاجباري , جهات تحكم عليها بالبقاء مدى الحياة في الاقسام السفلى , و جهات تلقى روحها في مجموعة تفادي النزول , و جهات اخرى تكتبلها انها تلعب دائما الادوار النهائية و تنافس على اللقب... بحيث انها الكارطة مالاول ماهياش مشكية مليح و تنجم تقول الكارطة مركبة... تركبت منذ الاستقلال ... و اللي جاه كف احرف يلزم يكمل بيه اللعبة حتى يفرّج ربّي...

حاجة اخرى تهم الاعلام فالاعلام في تونس ساهم بطريقة او باخرى في زرع الجهوية في المجتمع التونسي (في المسلسلات و الافلام)
, ناخذو مثال , القناة الحكومية الاولى ساعات تعدي سهرية كاملة في ملف او حوار تلفزي ما يهم كان جزء بسيط من المجتمع ( مثلا الملف حول مشكل الشنقال و نقص مآوي السيارات في العاصمة اللي ما يهم كونشي سكان العاصمة من اصحاب الكراهب و الا بعض زوار العاصمة من داخل الجمهورية ) , شنوة ذنبو المشاهد اللي في تاجروين الحامة او السند , يعدي سهرية كاملة يسمع في عباد تخرّف (على خاطر ملفات ت7 كلها تخريف في تخريف) في موضوع ما يعنيهش من قريب و لا من بعيد.
شنوة ذنبو المشارك الجاي من القيروان اللي سألو سامي الفهري عن وجهة الكار رقم 4أ ؟؟
صحيح تونس عاصمة البلاد اما زادة القناة الوطنية هي وجه البلاد و صوتها الرسمي يلزم يتوجّه للتوانسة الكل.

فالجهوية موجودة و باش تقعد... لكن الجديد انو الشعور بالحيف ولى شعور عام لدى اغلب الجهات , و التذمر المتواصل ولى سمة بارزة للشارع التونسي , و هذا راجع لمشاكل عامة , وهي التي يعاني منها المجتمع التونسي ككل كيما مشكلة البطالة و غلاء المعيشة و انعدام الحريات و فضاءات التعبير ... العامل الثاني يتمثل في تعميق الاحساس بالضيم و الحيف عند مقارنة الواقع الجهوي بالانجازات اللي تصير في جهات اخرى وهو الوقوف موقف الضحية ,

و الصفاقسية كيما برشة توانسة اخرين يعانيو من الشعور هذا , و يحسو اللي فم نقص في العناية الحكومية خاصة في مجالات الحد من التلوث و تحسين البنى التحتية و تطوير السياحة اللي تبقى ديما قطاع ضعيف في صفاقس مقارنة بالساحل و الوطن القبلي. و رغم ذلك تبقى صفاقس العاصمة الثانية للبلاد و فيها حيوية اقتصادية كبيرة - و هذا راجع بالاساس لأبناء الجهة من الصناعيين و المستثمرين موش لتدخلات الدولة-.
لهنا نحب نوضح انو النقص في عناية السلط العمومية تعاني منو جل مناطق البلاد (غير الساحل) , و خاصة المناطق الداخلية اللي ما فيهاش برشة موارد و اللي تعتمد كليا على دعم الدولة لتطوير اقتصادياتها و خلق مواطن الشغل , لكن اللي قاعد يصير هو العكس تماما, فالطرقات السيارة و السكك الحديدية و المطارات متركزة على الشريط الساحلي, و كذلك الامر بالنسبة للمؤسسات الجامعية الكبرى و المستشفيات الجامعية ... و في زوز ولايات هوما سوسة و المستير (ما تتعداش المسافة بيناتهم 50كم) نلقاو زوز مطارات (واحد منهم الاكبر في البلاد) و زوز اذاعات و زوز جامعات طب وطب اسنان و صيدلة و برشة سبيطارات جامعية و برشة جامعات متاع اداب و حقوق و لغات و دراسات تكنولوجية و عدد لا يحصى من النزل و الفنادق و البواتات و المنشآت السياحية المتنوعة, و مئات المشاريع و الاستثمارات الصناعية الخاصة الاجنبية... بحيث ناخذو كامل ولايات الغرب التونسي و الجنوب موش باش نلقاو فيهم ربع الانجازات هاذي.
و حتى الحلول اللي تعتمد فيها الدولة كتصنيف بعض الجهات "أولى بالتنمية" و التشجيع على الاستثمار فيها ما عطاش نتيجة , موش على خاطر فم عزوف المستثمر الاجنبي عن الانتصاب في المناطق هاذي لكن لانو المسولين في الهياكل المكلفة بتوجيه اصحاب رؤوس الاموال الاجانب كلهم يحبو يوجهو المشاريع القوية لجهاتهم و بما انو المناطق الداخلية ما عندهاش وجود كبير في مراكز اتخاذ القرار فتحكم عليها باش تبقى تستنى في الحكومة باش تخلق مواطن الشغل (و فم مهازل صارت كيما المناظرة متاع وزارة الصحة اللي حبت تنتدب 12 حامل للباكالوريا فتجاوز عدد المطالب الـ 30 الف مطلب , ولات بطلت من الحكاية جملة)

حصيلو موضوع كبير و متشعب و الحديث فيه ما يوفاش , لذلك باش نقصها الحكاية لهنا و نحب في الختام نطرح سؤال:
علاش في قائمة الثلاثين متهم متاع احداث سليمان نلقاو اكثر من النصف اصيلي سيدي بوزيد و القصرين , و البقية من احواز سوسة (النازحين من القيروان و من الشمال الغربي) ؟؟

حــوّات الصحراء

بقية الحكاية متاع البارح:
نقّز مواطن من الحضبة (هذاية واحد ماللي هزلهم الفيضان ديارهم ) و صاح:
" يا معتمد ... رانا من عام 69 و نحنا في كارفة"
"نعم ؟؟؟"
"و الله سي المعتمد رانا من كارفة لكارفة ... متّاخذين من جميع ما"
"شنية هاذي كارفة ؟؟ اش تقصد ؟؟"
"معنتها تحط دارك و متاعك و رزقك , و فلوسك و دبشك و القربج متاعك في بلاصة, تجي تضرب ما تلقى شي"
"اها ؟؟ معنتها سرقة , معنتها سرقة , تتهم فينا بالسرقة ؟؟ سراق احنا قدامك ؟؟؟"
"حاشاك و حاشا قدرك , لا الكارفة نقصد بيها هاك المصايب اللي يعطو عليها في التلفزة , في الصولامي متاع الاكراد والا دونيسيا و الا شيقولولها "
"كارثة... تقصد كارثة ..."
"ايه هذيكة هي ... كارثة كارفة كلها مصايب "
"شبيكم لاباس ؟؟"
"ماهو دز علينا الماء و هز الملمة و اللي ثمّة , حتى المرا منعت بالسيف , قريب نقعد هكاكة... شاهد على العصر"
"لا هاذي ساهلة ... برة تصرف توة دبر وين تكن راسك و مبعد جيبلي مطلب و هز مطالب للشيخ و لرئيس الشعبة المهنية متاع الغرف الفتية و اتحاد الصيد البحري و تربية الماشية و جمعية بسمة و الجامعة النقابية و صندوق التضامن الاشتراكي المندمج و وكالة ردم الهوة الرقمية اتوة نعطيوك دار"

من فوق:" ما تسمعش كلامو , راك للي تموت و انت تكتب في المطالب و ماكش باش تحصّل شي"
المعتمد:" ايا اسكت عاد و الا انتحر خلي نرتاحو, توة وليت تحب تخدم في بلاصتي ؟؟"

مواطن اخر يستغل قربو مالمعتمد و ينتهز الفرصة باش يعبّر... (هذايا من اصحاب الشهائد - ماخذ شهادة من تعليم الكبار حفظ كليمتين يدور بيهم في الزيرو و يسخايل روحو ولى متثقّف ) يتنحنح و يسرّح قراجمو :
"بسم الله الرحمان الرحيم , سيدي المعتمد اننا نشعر بالفخر و الاشمئزاز , و نرحّبو بيك في حومتنا و الـ حوم الصديقة و الشقيقة , و كلنا سعي و غنم نسرحو و ناكلو في خيركم و حشيشكم و ريشكم و عايشين من كرم سيادتكم فلو موش منكم رانا توة في تمبك الديمقراطية اللهم عافينا"

"صحّيت صحّيت هاك متثقّف طلعت, و تعرف تحكي مع المسؤولين"
"ايه سيد المعتمد , انا قريت في نحو الامّية و خذيت الشهادة و الحمد لله"
"الحمد لله... و فاش تعمل توة؟؟"
" قدّمت مطلب و خذيت بيها قرض و عملت مشروع"
"زادة ؟؟ الله مصلي على النبي , نجم نعرف شنوة المشروع متاعك"
"حلّيت حوّات ... حوّات في رجيم معتوق"
"هيه ... تبارك الله ... تبارك الله عليك هاذي المشاريع و الا بلاش... هذا المطلوب , المبادرة , البعث , الانتصاب , بعث المشاريع و الانتصاب للحساب الخاص , موش تستناو الحاكم باش يخدّمكم"
يهز راسو للسيد اللي لفوق : " سمعت سي الشباب ؟؟ ريت الناس اللي تحب تخدم على ارواحها"

من فوق :" هههه الناس اللي تحب تخدم ؟؟ حوات في رجيم معتوق , توة هذا مشروع ؟؟ موش لوكان عطيتوه ارض في القطب الجنوبي يغرسها زيتون خير ؟؟؟"
المعتمد يتلفت للحوات : " ما تسمعش كلامو ... بصراحة احسنت و بارك الله فيك , فكّرني باش نقيّدك في المنحة متاع تحسين المسكن و المنحة متاع المعوزين و اتوة نعطيك من عندي جويّب تهزو للمدير متاع وكالة الاستثمارات تاخو بيها دعم للمشروع"

من فوق :" -انا ميّت ميّت, خليني نتكلم و انشالله تتخذ-... يزّيكم يا راجل من ها الكلام , قداش تضربو لوغة , لوقتاش تقعدو تعدو فيها على العباد , واحد تبيّعوه في شهادتو على خاطر زوز صوردي و مشروع ما يجي شي , و تزيدو تعملولو دراسة و تشجعوه وهو ماشي للفوسي... ملا تشجيعات و ملا مشاريع .... تي بالحرام... نحلف عليه حوات الصحرا هذا راهو فلس من هاك العام..."

المعتمد :" ايه بالحق , شنية امورك توة ؟؟؟ ماشية و الا هكاكة "
" الحمد لله على احسن ما يرام"
"مالا قلي كان جيت نهار لرجيم معتوق نتعدى نهز شوية بوري فرشك؟؟"
"لا سيد المعتمد صعيب باش تلقى عندي حوت فرشك"
"عجب ؟؟"
" انا الحوت الفرشك نسيت منظرو من الجمعة لولى اللي حليّت فيها "

من فوق :" يا حوّات , عليك بعرصة التونيزيانا"

المعتمد: " يزيتش انتي مالبلادة" و يكلم صاحب المشروع " مالا كيفاش تخدم و فاش قاعد تبيع؟؟"
"ماهو نلقى الحوت ما يوصلي من قابس و الا جرجيس الا ما يبدى يفسد , و زيد ما يصبرش برشة في السخانة ... ولّيت دوّرتها وزغة و زرزومية و امبوية و ورل و ضربان و لفعة بزوز قرون"
" عجب؟؟ اخي فم شكون ياكل الشي هذا ؟؟؟"
"لا , اما نبيع فيهم للعرافين و الدقازات و السحارة و الطبّة المتخصصين في العلاج الرعواني... و الحمد لله نصوّر الخير و البركة , عندي كريهبة نوصل عليها السلعة و نخمم باش نولي نصدر المنتوج متاعي للعالم"
"ايا باهي ... حاصيلو زايد ... انا ما ريتش كيفك, ما ريتش عباد عندها الحس الوطني كيفك و تدعم توجهات الدولة و تحب تخدم اقتصاد البلاد و تنهض بالقطاعات الحساسة و الاستراتيجية كيما قطاع العرافين ... و بالمناسبة خممتش في مستقبلك ؟؟"
" هاني معمّل على ربي و انشالله نعرس و نعمل برشة صغيّرات يعاونوني في المصيد"
"لا لا نقصد المستقبل السياسي , انتي فيك كل الشروط متاع رجل سياسة و بالحكمة متاعك و المستوى الثقافي الهايل نتوقّعلك باش تتبوّء اعلى المناصب في البلاد"
يحشم هاك الحوات و يتبسّم " عاد انتي قلت سيدي , اشبيه انا ديما مستعد باش نخدم بلادي و اولاد بلادي"

من فوق " صار هكة هي الحكاية ؟؟ هاذم المسؤولين متاعنا ؟؟؟ كلها محو أمية ؟؟ و زرزومية و امبوية ؟؟ تي بالحرام الا ما نلوّح روحي ؟؟ يزيد ها القشرة يصبح مسؤول و يحكم في ***ي ؟؟؟ نقرى نقرى نقرى و مبعد ترصيلي للبرد فوق بوتو تيليكوم و هو يبيع في الجران و في الخنافس يدجّل بيهم على الخلق و يزيد يتكلم باسمي في مجلس الشعب ؟؟؟ ماعادش فاها ...هاذي قلتلهم بلّعو..."

(هاو في الاثناء , المعتمد تصرّف و جاب بياع الملاوي و اقنعو باش يدخل الانتحاري صانع عندو في الحانوت...)

المعتمد :" باهي ولدي ... زيد سبّنا و سمّعنا الكلام , احنا نلوّجولك على خدمة و انتي هذا اش يوصلنا منك ؟؟ ايا سيدي اهبط هاك صبحت خدّام و بشهريتك , ايا اهبط يهديك , هاو عرفك يكلّم فيك "
بياع الملاوي :" ايا اهبط قص السلاطة و قشر البطاطا و اعجن العجينة"

جدّت الحكاية على الانتحاري و صدّق انو بالحق باش يخدم ... (هو الحقيقة موش باش ينتحر بالرسمي خاطرو جبان اما حب يدز فازتو و برة...) .... و هبط.

دوب ما حط ساقو على الارض و يجيه وحيّد مقص لا يقرا لا يكتب , و تركح فيه المشطة و الماطراك, و من غير ما يمس الارض يلقى روحو في الباقة من تالي...
و صبّح في الاوتيل المصنّف متاع برج الرومي يقشّر في البطاطا و يعجنو فيه مع العجينة و هو يقول و يعاود:
"فعلا سيد المعتمد , انجز حرّ مــــــا وعد"
ة

هاو علاش ساعات يطيح الريزو

ملاحظة هامة: الحكاية هاذي صارت في بلاد بعيدة , و اي تشابه في الاحداث و الاماكن و الاشخاص و الالقاب و الرتب و المسؤوليات و و الحوار و اللغة المستعملة في بلادنا راهو صدفة ....


فمّ واحد , فارغ شغل , ماعندو ما يصنع في الدنيا , نهار الكل و هو راقد , مخو راقد , اطرافو راقدين ,البيت اللي يرقد فيها راقدة ,الحومة اللي يسكن فيها راقدة ,العطار راقد , الفطايري راقد ,الحلايبي راقد , الطفلة متاع التكسيفون زادة تصكّ في النوم ,حتى من الكلب العربي اللي عندهم ولى يفيق كان باش ياكل و الا يوسّخ (حاشاكم ) و مسيّب الماء على البصل لا يعس لا ينبح لا شي , قالك يحب يولي كلب سوري متاع فيس و تبزنيس... لكن يا حسرة...
نرجعو للسيّد الغاطس في السبات المزمن , مسكين النهار الكل وهو يبكي على سعدو المكبوب و يشكي من زهرو الراقد, مرّة من المرّات فدّ من روحو و نقم على وضعيتو المزرية و كره عيشة "عندكش خمسة الاف سلف" و حياة الـ "تره سيقارو" و قرر انو يقوم بكري و يعمل حاجة في حياتو يحتمل يدخل بيها التاريخ.


قام الخمسة متاع العشية , و تشعبط في العرصة الكبيرة متاع البوسطة , (هاك البوتو الاحمر و الابيض متاع التيليكوم) , طلع لفوق, و تربّع في الوسط بين البارابولات و القصاعي و الاجهزة متاع الارسال , و صاح بصوتو و ما يجيب :" رااااني فدّييييت .... نحببببب ننتحـــرررر..."

الجماعة (الله يذكرهم بالخير) قاعدين في المركز يكملو في السرفيس , شادين جماعة يعديو فيهم على الكمبيوتر و يحللو فيهم بالنورتون و الكسبرسكي بالكشي يلقاو فيهم فيروس و الا دودة و الا حصان طروادة متخبي ... و يهبط عليهم الاوردر : اجريو راهو الرّيزو طاح ....
تخرج الباقة , قدّامها الصنتانا و في جرّتها الشاماد... وصلو تحت العرصة , و جراو يحبو يطلعو باش يهبّطو الانتحاري اللي لفوق.

"هاني باش نسيّب روحي , اهبطو لا ننتحر عليكم..."
الأخّيان سمعو الكلمة هاذي خافو, قالو هذا ما يجي كان انتحاري من جماعة الزرقاوي و ميا في الميا عندو شبعة قنابل و باش يمشّينا غبرة. ... اللي هذا قال انا بو صغيّرات و وخّر لتالي. و بعثو واحد يتفاوض معاه.

العون: " يا سي ز*** , يا سي نـ*** ايّا اهبط من غادي ديرررا , اهبط ز*** امك الـقـ*** , اشبي ز*** امكم ما تنتحرو كان على ز***نا ؟؟؟"
" لا مانيش هابط , و تخراولي فيه"
"تي شبي ربك اش تحب ؟؟؟"
"انا ما نحكيش مع الزعانف و الحثالة و سقط المتاع و الدواجن , ما نحكي الا ما يجي الوالي و المعتمد و الا عضو من اعضاء مجلس الامّة"

شافو الجماعة اشكون مالسادة المذكورين متفاضي و ينجّم يجي , يلقاو الوالي مشا لدار انسابو ما ينجّمش يجي, و النوّاب كل حد لاهي في نوارو و متحصّن بالحصانة متاعو في تركينة من التراكن يمشمش في حويجة , اشكون باش يجي ... اشكون باش يجي... جاء السيّد المعتمد. (هو بطبيعتو يسكن قريب مالبوتو متاع البوسطة و سمع الحسّ و خرج يشوف شنية الحكاية).

جاء السيّد المعتمد
و بدا الانتحاري يصيح: " يا معتمد ... ياااا معتمد..."
" آآآآآه..."
"نحب نخدم "
" ايه ميسالش , اهبط ساعة توة , و طل عليا غدوة الصباح في البيرو , نشالله نشوفولك حل..."
"لا مانيش هابط الا ما دبرلي خدمة و الا نلوّح روحي و ننتحر..."
"يا ولدي اهبط يهديك, ماهو كي تنتحر, ماعادش تبقى صالح للاستعمال و ما تنجمش تخدم , ايا اهبط يعيّش ولدي"
"يا معتمد....ياااا معتمد"
"آآآآآه...."
"راني باش نحرق للجزيرة و نحكيلهم حكايتي و نفضحكم في الاتجاه المعاكس"
"برّة وليدي حتى للملتيفيزيون , اما توة العن ابليس خلي ها العشية تتعدى خير"

هوما هكاكة و جات العامة و الطامة و تلمّت حضبة كبيرة من الشعب الكريم اللي ما عندو ما يصنع ويموت على الفرجة في العرك و الاكسيدونات و المشاكل .

تقدّم واحد اطار الله اعلم فاش ( هذاية من الجماعة اللي يفرحو بالطلعة البهية متاع المسؤولين و كي يشوفو حد مسؤول تقولشي شاف واحد من الصحابة و الا من نجوم هوليوود) , و قرب من للمعتمد:
" سيّدي المعتمد اننا نرحّب بسيادتكم في هاته الربوع و هذه الارض المعطاء , و اننا نشعر بالفخر و الاعتزاز و نعدكم بمزيد الكد و البذل و السعي في سبيل اعلاء راية الوطن عاليا في المحافل الدولية و ....."
يقصّ عليه المعتمد : " باهي باهي سافا فهمتك" و ينادي بوليس من الواقفين الغادي " بالله هزّ عليّا الكازي"

هوما شالوه من هنا, و ينقّز مواطن من الحضبة (هذاية واحد ماللي هزلهم الفيضان ديارهم ) و يصيح:
" يا معتمد ... رانا من عام 69 و نحنا في كارفة"
"نعم ؟؟؟"

البقية غدوة انشالله
A suivre

حكايات على هامش التصفيات

Double effectif

انتي عديت الكاباس قبل؟؟

ايه
قداش من واحد يعدي معاك فرد قاعة ؟
بين الاربعين و الخمسين...
علاش ؟؟ ياخي موش ماكسيموم عشرين شخص في كل قاعة ؟؟
هاو علاش:

يا و الله حـــال

*************************

عندما تبكي الرجال

هذاية واحد عدّى كنكور و روّح للدار يبكي ياخي عرضتو أموّ (و على طريقة ام الامير الاندلسي الاكسبولسي):
"تبكي كالنساء على كنكور لم تنجح فيه كالرجال؟؟"
"مالا اش عندي نعمل ؟؟"
" وليدي نحبّك راجل في كل المواقف ديما راسك لفوق"
( و على طريقة المسرح التراجيدي)
"سامحيني أماه لا استطيع وقف دموعي,
هنا يبكي الرجال,
يبكي الرجال,
العتاة,
القاسية قلوبهم اشباه الجبال
وداعا, وداعــــا اماه..."
ثم يدخل للدار و يهز ما جاء قدامو من ادباش ويخرج لابس المريول اللي بعمرو ما ظن نفسو يلبسو في يوم من الايام...
و يمشي...





*************************

اضراب الجوع

الجوع كافر و الخبزة صعيبة , و طالما تنحات الخبزة او بالاحرى تفكّت من يديكم , فشدو الصحيح , و واصلوا, و في كليمتين , شدو الصحيح لأنو الترشح للكاباس ولى صعيب و ولات فم تصفيات و ادوار تمهيدية و دور سادس عشر...
و لانو مواجهة الملعب القربي في عقر ميدانو و امام جمهورو ماهياش مهمة مستحيلة, انشالله ربي معاكم

اضراب على الحجامة

كريكاتور ناجي العلي (بالتصرف)
ة

الحلم الكابوس و جنّة البطّــال الموعودة

بعد ما خسر زوز طراح رامي , و خلّص القضاء و الكفارة, دخّل يدّو لجيب السروال و جبد سيقارو كريستال معوّج, شعّلو و قصد ربّي للدار... كي العادة الحومة مظلمة, امبوبات البلدية يخدمو كعبة بزوز (وحدة تشعل و زوز طافين اقتصادا في الطاقة) , الكياسات محفّرة , ماء مقلّت , زيقوات فايضة , ريحة برّاد تاي محروق تفحفح في النّهج , بوبالات مكبوبة ترتع فيها القطاطس و الفيران بوصباطة جنبا الى جنب...حصيلو ميزيريا لا توصف.

دزّ الباب عرضو بوه بالاحضان "تسهر لتوّة يا كلب...زايد ما تحشمش... كلب بن كلب , وقتاش تعمل قيمة و قدر لروحك؟؟؟ لوقتاش نقعدلك حي؟؟ لوقتاش نبقى نصرف عليك ؟؟ شوف اندادك ... تفووووه على منظرك كان انتي عبد و فيك ريحة الرجولية"

هبّط عينيه و مسح البزاق من وجهو و تعدّى على روحو للبيت... تلاوح على الفرش و غمّض عينيه....

يقوم الصباح يلقى أمو محضرة الفطور و العايلة تستنى فيه على الطاولة
صبّح و قعد... و بدا يتامل في الشي المحطوط قدامو: خيرات من عند ربّي ...حليب قهوة عظم زبدة عصير سيريال للصغيرات...
فطرو على غناء فيروز و كل حد مشى على روحو ....اللي يقرا يقرا و اللي يخدم يخدم...

يطلع في الكرهبة و يمشي للخدمة, شايخ عامل كيف , لا سيركيلاسيون لا تعجريف لا حرقان ضو لا حرقان اعصاب...

درج و كان في الخدمة , يدخل يتعدّى على ماكينة القهوة يسربي لروحو قهوة و يمشي لبيروه... بيرو واسع ,متهوّي , نظيف, اورديناتور , انترنات...

الناس الكل تخدم و عاطين ما عندهم , لا حديث لا حلقة لا هدرة في التلفون ... جاء العرف يضحك صبّح عليهم و فرق عليهم النوّار و بشّرهم بالزيادة الجديدة (500 دينار لكل واحد) و زاد بدا يلحلح بيهم باش ياخذو كونجياتهم... خاطرهم تاعبين من الخدمة و يحب يرتّحهم شوية...
الامور ماشية كي الزيت فوق الماء , اللي يجي يقضي قضيتو و يروح فرحان , الخدامة شايخين المدير شايخ المواطن شايخ و الدنيا هانية... الطقسو جميلن و الفراشاتو و الازهارو و الطيورو تزقزقو فوق الاغصان...

يكمل الخدمة , يدخل للكيوسك , يعمل بلان للكرهبة بـ 10 الاف فرنك , يخزر للكياس , يشوف بوليس يربط حزام الامان للمواطن الراكب في كرهبتو , من غير غش من غير تنرفيز , كان الضحكة و الابتسامة العريضة .... يعطيها عزى الدنيا ...تحيا تونس...تحيا جودة الحياة ... يحيا الرئيس يحيا الوزير يحيا الوالي و نواب مجلس النواب...
محلاها الحياة محلى الخدمة محلى البلاد محلى عرفي محلى البوليس محلى الكرهبة و محلى الكيوسك و مولى الكيوسك و محلى الايسانس كي يبدى رخيص... و محلى اش اسمها ...برجولية يلزم نلم سويقاتي و نكمل نص ديني ... نعرس و نجيب زوز سنافر ... وليّد و بنيّة...

و يسمع صوت أمّو: "ايا قوم , قوم وليدي يهديك, برة لوّج على خدمة بالكش ربي يفتحها في وجهك..." ة