Dark side of the moon

Tunisie 1 تونس

Tunisie 2 تونس

و كيما قسم البابا "ألكسندر السادس" اراضي امريكا الجنوبية بين اسبانيا و البرتغال بخط وهمي طولي رسمه بيده على الخريطة,

فالخوف كل الخوف انها بلادنا على صغرها تتقسم على الطول و لكن موش بيد بابا او حاخام او واحد براني كائنا من يكون, لكن بيد شيخ جماعة كيما جماعة ديسمبر 2006

و نظرا لكون -الجوع كافر- فـ جماعة التكفير ممن يكفرو في الخلق و العباد باش يلقاو ارواحهم في تمبك الموضوع و يلقاو المناخ المناسب لاداء نشاطهم كيما يحبوا .... الله يستر

La peine de mort : S T O P

La peine de mort : un crime qui nuit à l'humanité
Action menée par les "Jeunes Amnestiens"
ça sera au local d'Amnesty
aujourd'hui 26 /10 /2007 à 15h
le 27/ 10 / 2007 à 14h
le 28/ 10/2007 à 11h
Au programme: une conférence sur la peine de mort, du théatre, musique et un film !

Adresse: Amnesty
67 Rue Oum Khalthoum
1000 TUNIS
TUNISIE
TEL : +216 71 353 417

FAX : +216 71 352 671

Il était une fois رأس الشهر

قعد فوق بيروه, خزر للأوراق مكدسة و داخلة بعضها...شيء يعيّف... جمعة كاملة ما مسّ شيء و موش باش يمس شيء... خلي عرفو يخرنن عليه , هو من ربي عابدو و مكرهو في حياتو...

في الاطرف متاع الطاولة فم كأس مسّخ فيه عقاب قهوة البارح... يقعد يتامل في الكاس و يفكر... مازال على الخواء ما فطرش ما شربش قهوة...ماعندوش حق قهوة...ملا عيشة ,ملا حياة ,ملا دمّار... بالله العظيم لوكان يلقى كيفاش الا ما يحرق ... يحرق للجزيرة يحكيلهم على الميزيريا الكلبة و الزهر الأحرف اللي حطو في ها الخدمة.

يجبد الاعلان متاع الجمعة اللي فاتت, يقرأ و يخمم, "ينشل حقيبتها و قلادتها و يلوذ بالفرار على دراجة نارية" " موظف يستغل ثقة مؤجره و يختلس 30 الف دينار" " يقتحمان مكتب البريد بالغاز المشل للحركة و السكاكين "...

يجبد شطر باكو ليجار من جيبو (خذاه الصباح كريدي من عند العطار), يشعّل سيقارو...
زميلو سمع صوت البريكية تلفّت وفرح و بعثلو خزرة حبلى بالمعاني...
عمل روحو ما شافوش , تعوّذ من الشيطان و خرج.

شق الباركينق , فارغ يشقشق, ما فم كان كراهب المدير و الشاف سرفيس...

وصل للباب البراني متاع الادارة و عرضو زميلو...
"صباح الخير"
"صباح الخير , هاك جاي على ساقيك ... وينهية الكرهبة؟؟"
" لا لا اليوم الطقس طيارة قلت نتمشى شوية على ساقي, منها دورة و تفرهيدة منها شوية سبور.."

"ملا حالة , الطقس ما يولّي طيارة كان في عقاب الشهر ..."

قعد يخمم فين باش يمشي , ماعندوش وجهة واضحة في مخو , يمشي للقهوة ؟؟ يمشي يتلاوح على الابناك متاع البلدية و الا فوق القازون متاع الجنينة...

*******
من غير ما يشعر يلقى روحو ماشي للبانكة... ياقف قدام الموزع...يحط الكارطة , يكتب كلمة العبور و المبلغ ...
يسمّل بسم الله...
و ينزل على البوتون...
و كيما كان يتوقع , طلعتلو تصويرة الراجل اللي يضحك عليه " نأسف لتلبية طلبكم, رصيدكم غير كافي"

يدخل للبانكة ,
"السلام عليكم "
ما يردوش عليه
"بالله توة حبيت نجبد بالكارطة ياخي ما حبتش تعطيني فلوس..."
"قداش نومرو الكونت؟" "تي هاو الصولد في الروج , ماعادش تنجم تجبد راهو "
"امون يعيش اختي, نجمش نجبد 20 دينار , و الله مغصور ..."
"ما عندي ما نعملك , اذا ما عطاتكش الكارطة معنتها راك تجاوزت البلافون متاع السحب"
"في بالي في بالي تجاوزت, اما نحب ديباناج لراس الشهر, تسبقة"
(بالصوت العالي) " قول من الصباح راك تحب آفانس , يا خويا برة شوف مع الشاف داجنس (رئيس الفرع) امور التسبقة و السلفة كلهم عند الشاف دافانس "
(و تكمل بالشوية لكنو سمعها) " شنوة الهموم الجامدة و ملا حالة مكربة على صبحة ربي"

تلفت منا و منا, يلقى الناس الكل تتفرج فيه, و خاصة من غير الشهّارة من صبابي الفلوس و ذوي الحسابات المكتنزة,
عمل روحو ما فيبالوش ...

و هز ما تبقى من كرامتو و مسح ماء الوجه المكبوب في القاعة بالبابيي موشوار, و مشى للبيرو متاع رئيس الفرع...

ة
A suivre

Demonstrations Geométriques: Changement de dimensions

Première méthode:

Avant c'était l'ère du 3D:


Aujourd'hui on n'a que deux dimensions:

Deuxième méthode:

Avec trois dimensions on avait:

Avec deux dimensions on a:

Et pour Demain:

"On qualifie parfois de masturbation intellectuelle une activité de l'esprit qu'on ne considère pas comme féconde (le choix de ce terme découle donc de raisons évidentes) soit en réalisations, soit en idées nouvelles. Le terme possède actuellement une connotation péjorative qui doit sans doute plus à quelque mépris de l'activité intellectuelle non « rentable » (et qui tourne en quelque sorte à vide) qu'aux anciens interdits sexuels." (source)

منتدى عبد الله

مفاجأة سارة و اكتشاف كبير نلقاه في المدونة متاع أقوى إنسان في العالم : الفوروم متاع "النوارات المزيانات" وهو منبر خاص بالمرأة التونسية القارية و المثقّفة , اللي تعبر (بضمّ التاء) في تقنيات و تكنولوجيات التواصل و الإتصال و الربط و الارتباط و الكونكسيون ... بصراحة شي يشرفني كرجل تونسي و يطلّعلي المعنويات و يزيدني اعتزاز بنصف المجتمع و يخليني نطالب بمزيد تشريك المرأة و رفعها لأعلى المستويات و التوسيع في صلاحياتها الواسعة (من عند ربّي) و النفخ في صورتها أينما كانت : في حجرات النوم و المطابخ و المكاتب المغلقة و غرف النزل و في الكراهب و الحدائق العمومية و الشطوط و المنازل اللي في طور البناء و جلسات الحياة البرلمانية و المجالس الوزارية المضيّقة و الموسّعة.

بنات يلوّجو يحبّوا يعرسو , بنات زلقوا و يحبّوا يسلّكوها , و اللي فادة من اللياقة البدنية متاع راجلها و اللي تحب المسائل الكبيرة و اللي ما تشبعش من الشوية و اللي ما يملأ عينها شي, و اللي تحب على الكبير أمّا تخاف منّو (تصوّروا : )) و اللي تعمل كوب صيفية و كوب للشتاء و اللي اكتشفت الكريمة المثالية ضد البشرة الدهنية و الحبوب السوداء عند راجلها و عند صاحبها في الجامعة .

حاصيلو جو كبير و شبعة ضحك , افكار كبيرة و نقاشات على أعلى مستوى ... ما نجّموا نقولوا كان "يبارك في ترابك يا تونس "

الحاجة الباهية اني توة فهمت علاش نتكلموا على بلادنا بصيغة التأنيث...

توة شوفو نوعية المواضيع و نوعية التعاليق :
سي حمّــادي يعرض مشكلتو ( قالك عندو شي يخوّف) :
الله يسترنا

سارة و الواب ماستر
واحد آخر من كبارات البلاد


سناء و الإكتشاف اللي باش يقلب صناعة مواد التجميل و يبعث الامل في آلاف البطالة

اللي ناقص نظر و ما ينجمش يقرأ مليح... يكليكي على الصورة المناسبة أتو تكبر في عينيه

الصّراحة راحة أم صراع الديكة؟

- أنا جاك نيكولسون
-نتحداك قدام الناس الكل انك تقرأ نص مكتوب بالعربية أو بالفرنسية
- يافاشل , عملت جرد مسرحية و تحل في فمك
- يا كذاب
- اتو نقوم نهرّسك انا عملت البوكس قبل
- انا مثلت بالعربية الفصحى و بالفرنسية و بالدارجة و انتي نحي القليّم متاع اللهجة الريفية ماعندك شي
-في المسرحية اللي عملتوها بالسوري طلعت انتي أضعف واحد في الجماعة
- انا نعرفك يا لمين و انا اللي علمتك كيفاش تقرأ
- انا فنان الشعب و ولد الشعب
-ولد الشعب و تتمسخر على الشعب ؟؟

***********

هذه مقتطفات من الحلقة الأخيرة من برنامج "الصراحة راحة", البرنامج المهزلة للمنشط البارد و المسّوس (ناقص برشة ملح) سمير الوافي , و اللي استضاف اثنين من كبار المسرح الكوميدي في تونس رؤوف بن يغلان و الامين النهدي.
الحلقة كان محكوم عليها من الأول بالفشل نظرا للضعف الواضح للمنشط اللي كان يستغل فرصة احتداد اللهجة من الضيفين باش ينزل بمستوى الحوار و يحولو لعركة متاع حوم ( زعمة هذيكة هي حرية التعبير و الحرفية في العمل التلفزي , ربي يهديها الجزيرة و جماعة الاتجاه المعاكس اللي زرعوا الفكرة هاذي ) و ولّى فيها كلام سوقي و استفزاز مجاني و مفضوح خاصة من طرف الامين النهدي اللي ظهر بوجه اقل ما يمكن ان يقال فيه انو قبيح , متاع انسان يحسب فيها حسبة تجارية و يقدّر القيمة الفنية متاع زملائه بعدد العروض و المداخيل, (وهو مقياس ينجم يكون صحيح في بلاد غير تونس)... من الجهة الأخرى برز رؤوف بن يغلان بالعصبية متاعو و ما نجمش يتفادى الفخاخ الاستفزازية متاع الامين نهدي و عدى ليلة كاملة و كشاكشو طايرة بل و تجاوز الحدود الاخلاقية في بعض الاحيان كيف يوصف زميلو بالـ كذاب , و الـ باندي...
في نهاية الأمر انا كمتفرج ما خرجت بشي ما استفدت بشي غير توتر الأعصاب , انا كنت نستنى في مواضيع كبيرة و جرأة في طرحها كيما حرية التعبير, مشاكل المسرح في تونس, كيفية تطوير التجربة المسرحية التونسية , خاصة انهم الزوز ضيوف مخولين (مبدئيا ) من حيث المستوى و التجربة و الخبرة المهنية انهم يطرحوا هذه القضايا و غيرها للنقاش , و كان من الممكن انهم يطرحوا مشاكلهم و حساباتهم الشخصية المتراكمة في جلسة خاصة في دار واحد منهم و الا في قهوة من القهاوي البعيدة على العينين ...

ربي يهدي ما خلق و برة

و أصبح السلطان من حملة الدكتوراه

نرجعو لآخر مغامرة من مغامرات سيدنا السلطان في المدينة الفاضلة الطينية, وقت اللي السلطان وقف يسأل في الزوج السعيد عن طريقة بناءهم لعش الزوجية و استغرابه الشديد للإختراع الجديد و التطور المذهل في تكنولوجيا المرمّة وهو الطوب :
السلطان :"كيفاش باش ندخلولكم الضو و الماء و الاوناس؟؟"
"لا سيدي لا تدخلولنا لا ندخلولكم صلي على النبي ها الصباح , الماء موجود في كل بقعة , نجيبوه في الابادن و الدبابز .... و الضو ساديبون .."
السلطان "ساديبون ؟؟ "
البقية

المواطن البنّاء: " إينعم سيدي ساديبون , الضو نجبدوه بالانتان: إذا نحبو نخدمو الفريجيدار نوجّهو الأنتان شيرة سيبريا و إذا نحبو نخدّمو التلفزة و نتفرّجو في تـ7 و ق21 نوجّهو الأنتان شيرة مصبّ الزبلة متاع هنشير اليهودية , و إذا نحبّو نخدّمو الكمبيوتر و نبحرو في الواب نوجّهو الأنتان شيرة برط حلق الواد و الا البناية متاع مصفاة الأنترنات اللي تعديلنا الواب المكرر و المعالج بماء الجافال ...
السلطان (و بعقاب الكرامة و الرجولية الي عندو يقصّ على كلامو ): "لا لا ... هاذي وضعية من المستحيل أنو الواحد يسكت عليها, شنوة سيبيريا و أنتان و رويّق , أنا لا و لن أسمح بهذا الوضع , فلا مجال بعد اليوم للطين و الطوب و الطوبوية المطيّنة, ... يا وزير هات اعطيني التلفون "
الوزير ( يمدّ التليفون الجديد -على خاطر القديم تسرقلو في العركة متاع المرة الأخرى- و مازال خايف عليه): "سيدي انزل على الفلسة الخضراء باش تطلب "
السلطان:" ياخي قتلك وريني ؟؟ يابهيم يا مسـطّـك يا هـايشة هات لهنا "

يطلب السلطان المالك الجديد متاع معمل السيمان و بقية معامل مواد البناء , و يعملّو عرعور , و وصل هددو أنو إذا كان باش يخلي الشعب غاطس في الطين , لا حلّت لا ربطت و كل حدّ يرجّع متاعو ( بالطبيعة السلطان عندو الدورة في الحياصة كيف صّبلي نشرب ) بل وصل يهدد فيه بأنو يأمّم المنشآت لكلها كيما عمل محمد علي باشا و الأمير عبد القادر و عبد الرحمان الداخل قبل ما يهرب للأندلس.

مدير معمل السيمان خاف و جدّت عليه الحكاية فأتّصل بالملك متاع الفرنجة ( و يقال أنو هنري الرابع أو فرانسوا الأول) و ملكة الأنقليز العجوز و من والاهم من المرتزقة و الأذناب و أعضاء الإتحاد الصليبي البابوي... فنصحوه بأنو ما يحط في بالو شيء و وعدوه باش يتصرّفوا...


بعد ثلاثة أيام...
الكوبل متاع السيّارة الشعبية قاعد في الدار الجديدة , حاطّين التلفزة على مصب الفضلات و يتفرجو في الأخبار متاع الثمانية :

...وقد تسلم سيادته الدكتوراه الفخرية من أكاديمية الطين
...وفي حفل بهيج نال سموه جائزة الحفاظ على البيئة و البناء الإيكولوجي
...كما أسندت لسيدنا السلطان العضوية مدى الحياة في المنظمة العالمية للخزف
... و نالت البلاد المنحة السنوية الخاصة بمدائن الطين و تم إمضاء اتفاقية التوأمة بين مدينتي طوبة و مدينة طيبة الفرعونية ترسيخا للمبدأ التعاون و التواصل بين الحضارات الطينية و حفاظا على القيم الفرعونية العريقة.
ة

يوم الجلاء من المـــاء

إلى المديرين و المسؤولين و المخططين و المنظرين و المهندسين , من المستكرشين الجالسين على الكراسي الدوارة (*) و المقيلين طوال الصيف في المكاتب المكيفة .
مبروك عليكم يوم الجلاء .مبروك عليكم الجلاء من فرانسا . مبروك عليكم البلاد و العباد و بقايا الاستعمار. شيخو بالمنح و السنوات ذات الـ18 شهر . صحة ليكم الكراهب الـ4*4 . مبروك عليكم الفيلات و القصور و الأحياء الراقية.

أما الشعب, من سكان الحفر, و الاحياء الياجورية الحمراء , و الخنادق و الفوسيات ...
فاصبح يخشى الامطار ....و لا يستبشر بالغيث النافع ...
و في عيد الإسلام ...يبكي ابناؤه من القتلى و المفقودين,
من المترجلين , راكبي حافلات النقل الصفراء , المشمرين عن سيقانهم , المتمسكين بـأعمدة الكهرباء ,المغدورين, الغرقى ... الذين اسلموا انفسهم لمخططات متحجرة ... مصابة بالعجز المزمن ...
لوزارة تملك كل شيء ... ما عدى التجهيز

عيدكم عيدين ...

بسم الله الرحمان الرحيم

أيها المدونون أيتها المدونات
يطيب لي , باسمي الخاص و باسم المدونين الزواولة اللي ماعندهمش افكار , ان اتقدم اليكم بأطيب التهاني و التمنيات بمناسبة عيد الفطر المبارك اعاده الله علينا بالخير و اليمن و البركة.

و كيف ما قال سي عمر عبادة "افرحوا يا قراوة عيدكم عيدين " فالعيد هذه السنة يتزامن مع العودة و نهاية موسم الصيف و الذكرى العشرين لميلاد السبوعي , وهو ما من شانه ان يساهم في ترسيخ مبدأ التضامن و التآخي و الاشتراكية في الميزيريا بين افراد الشعب.
الله لا يوريها لحبـيّب .والسلام

عيدكم مبروك

إنشالله عيدكم مبروك

طوبوية مدائن القرن 21 في بلاد الطين و الطوب

نهار من النهارات, و بعد الانباء الاخيرة حول فقدان المملكة للبنائين و النقاشين و حمالة الحجارة (اللي مشاو لكلهم يخدمو في غريبة الدهر و العجيبة الثامنة من عجائب الدنيا السبع ) و رفض المالك الجديد لدار صناعة السيمان بيع انتاجو للسكان , قرر السلطان أنو يعمل دورة في المملكة و يشوف أوضاع الأمرام و الشوانط و حالة البنيان و العمران.

أيا لمّ الصكامبة متاعو و طلع في الكاليس من نوع المرسداس المدرّع, ومن عادة السلطان انو في هذه الزيارات يخرج في ألف من المماليك و الحراس بالموتورات و سيارات الـ4*4 و عشرات الرماة (هاذم يسميهم الطبري بالـ سنايبر) فوق السطوح و الأسوار و في المجاري و الزيقوات أو في خرد طائرة من بقايا الحروب البونيقية ( يقال لها هليكوبتر حسب ابن الأثير).
العالم هذا الكل قصد ربي مع السلطان و هبطوا للبلاد.

السلطان كيف خزر من بعيد ما صدقش عينيه, نحا المرايات الشمسية و عاود خزر...
"شبيها البلاد ولات صفراء ؟؟ وينو الابيض و الازرق ؟؟ وينهية الفيلات المضخمة و الشاتوات و الجرد و البيسينات ؟؟"
الوزير الاكبر: "هذاكة الطوب سيدي "
السلطان : "طوب؟؟"
الوزير الاكبر: " اينعم سيدي , طوب , الناس التجؤولو بعد فقدان السيمان و الياجور و الحديد اللي مشى الكل لمدينة المستنقع"
السلطان (كشاكشو طايرة) : "انتي زادة تسمي فيها مدينة المستنقع... مفخرة المملكة و اعجوبة الدهر و جوهرة السلطان سميتوها مستنقع ؟ مالا ها البيدون فيل اللي قدامي توة شنوة تقولولها ؟؟"
الوزير الاكبر:" هذيكا سيدي سموها طـوبة , تيمنا بالمدينة الفاضلة متاع افلاطون اللي غفل عن ذكر مواد البناء متاعها, فالعامة و الغوغاء استنتجو انها ما تكون كان مبنية بالطوب و طلعلهم المورال على خاطر باش يشيخو بالطوبوية متاع افلاطون"


سكت السلطان و اقتنع بل شاخ على الفازة , المهم الشعب شايخ , مادامهم شايخين في الطين و الطبعة سابع بركة عليهم.


دخلوا للمدينة يلقاوها تعوم و تغطس في الطين و الناس الكل متفرهدين يحوّسو في الابواط البلاستيكية متاع بر الهند و الصين...
وقفت الكاليس و ترجل السلطان و الحاشية.
يقدمو شوية يلقاو راجل و مرتو (من الاطارات الوسطى وهي السواد الاعظم في المملكة) يهبّطو في صناديق الطين من مؤخرة الـ كليو الشعبية.
"الله يعينكم , فاش تعملوا؟؟"
"نبنيو في عش الزوجية سيدي"
"وينهم الخدامة و المعلم و السيمان و البغلي و البالة و الكوتشو متاع الماء؟؟"
"ما نستحقوهمش سيدي...تبعني مليح ... نجيبو الطين من السبخة ,نخلطوه بشوية تبن و قش و نحطوه في القالب و من بعد نخليوه يشيح في الشمس... من بعد نحطو طوبة فوق طوبة للي يطلعو الحيوط ."
"و السقف ؟؟"
"السقف بعمرو لا كان مشكلة عندنا في البلاد برشة كلاتوس و صنوبر و نخل, و كلهم يصلحوا للسقف "

السلطان ( يتعجب) :"كيفاش باش ندخلولكم الضو و الماء و الاوناس؟؟"
"لا سيدي لا تدخلولنل لا ندخلولكم صلي على النبي ها الصباح , الماء موجود نجيبوه في الابادن و الدبابز و الضو ساديبون .."
السلطان "ساديبون ؟؟"

a suivre

اللهم رب الناس اذهب البأس،و اشفى انت الشافى،لا شفاء إلا انت

ديمقراطية الحنّــة

في أول الثمانينات:
-زعمة شكون باش يربح الانتخابات الــ أم دي أس و الا الحزب الاشتراكي الدستوري؟؟
- على حسب ما شفت ظاهرلي الورقة الخضراء هي اللي باش تطلع
- يا حسرة عليك, الانتخابات في تونس كيف الحــنّة...تبات خضراء تصبح حمراء.

الحفرة Le Trou

ماهو قالك فمّ حفرة كبيرة ... حفرة رهيبة جات في قلب الكياس .....اللي متعدي طايح فيها , لا تسيّب لا الماشي لا الجاي كانو راجل و لا مرا , حاصيلو سكان البلاصة هذيكة حياتهم و لات جحيم و عيشتهم امرارت في جرّة ها الحفرة الحرفة ... كل مرة و و احد كرايمو مكسرة كل مرة و واحد ماكل راسو في قاعها ... فــــ رصّاتلهم يعسّوا ليل و نهار و يتفقدو في صغارهم باش ما يقربوش من الحفرة...

أيا وصلت الاخبار لأعلى هرم (من أهرام الجيزة ) و ابو الهول بيدو انشغل بالحكاية و عمل اجتماع طارئ لبحث و دعم و ارساء و تطوير و ترسيخ و التصدي و الحيلولة و المبادرة بالحلول الكفيلة بمجابهة الحفرة....

واحد قالهم نجيبو بحذاها سيارة اسعاف باش اللي يطيح نهزوه للسبيطار.
الاخر قاللهم ماهو نبنو بحذاها سبيطار مرة وحدة و هكة اللي يطيح نعديوه في اقرب الآجال للـ

urgence

الثالث قاللهم علاش الخسارة ؟؟ سبيطار و امبيلانس و خدامة و مازوط و مصروف زايد ... ماهو نردموها الحفرة
(مبعد لا خمم شوية و جات قدامو برشة اعتبارات) و نحفرو حفرة اخرى بحذاها.
ة

نعمبو الفلوس

مجموعة من الاطارات الجامعية المفشوشة (او العاطلة عن العمل ) في القهوة:
- انا و الله لقيتلو حل القلق
-كيفاش؟
- شريتلو صحبة, وليت اصحاب انا و ياه و متعاشرين بالحسنى , ما يسمع مني كان الخير و انا كذلك
-عندك حق ما جيتش لحومتنا...هاهي كعبة القلق (بيديه) هاهي كعبة الوكس...
(يسكتو شوية)
-تتذكرش هاك اللاعب من السيراليوني اللي جاباتو الترجي اش اسمو ؟؟
-انا في بالي من ليبيريا مش السيراليوني
تي لا عاد هذاكة جورج وياه اللي من ليبيريا-
- اشنية عاصمة ليبيريا
- منروفيا
- مممم ... منروفيا

(يسكتو شوية , واحد منهم يحرّك راسو و يعقّب )
-منروفيا

بعد دقائق
- اشكون عندو نكتة جديدة
-عندي برشة ما سمعتش نكتة جديدة
- انا ما نحفظش النكت ...الله غالب
- انا نعرف نكتة الليبي و دبوزة القاز
- تي قديمة هذيكا
- باهي نكتة البوليس و شوفور الكار
- مش منين هبطو في محطة المترو؟؟
(يضحكوا)
- ايه هذيكة هية
- ايا احكيهالنا
- هاكم تعرفوها
- تي ميسالش احنا قاعدين قاعدين

(يتعدى حنش سيفيل بحذاهم, يقلبوا الهدرة)
- خالد بدرة وين يكوّر توة ؟؟

(يفوت البوليس)
-ملاّ ميزيريا
- قدمت في الكونكور؟؟
- تي قدمت ماخذة في الخاطر متاع الدار , عارف روحي مللول موش ناجح
- انا غاظتني العشرة الاف متاع التنبري متاع المطلب
- و الله واحد قاللي تحبش تخدم في معمل الحليب ؟؟
- هي اشبيه ماهو اخدم و شد ايديك حتى يجيك ما خير
- تي الشهرية ميتين الف و زيدهم الاس ايفيبي , حكاية فارغة و ينجم يقلك روح في كل لحظة
- هانا قاعدين مالا حتى يفتحها ربي

(يتعداو مجموعة من شباب الليسي و الطلبة شايخين يلعبو و يبزنسو في بعضهم حطايط و سبادريات و الامبي 3 في الوذنين )
-مساكن يجهلو الحقيقة
- ما يفيقو الا ما يتحشالهم كيفنا احنا
-اش خص لوكان نرجع لعمرهم راني شديت صنعة و تعلمت الميكانيك و الا النجارة راني معلم توة و لاباس عليّ
- يا حسرة

(ياقف بحذاهم واحد من الشلواشة و القوادة اللي تراهم في لجان الحي و التلصيق و الشعاب المرجانية و مكاتب الاعتماد على الذات)
- الله يعينكم , ماهو تعرفو اللي احنا ديما نخممو في البطّالة , شغلنا الشاغل هو البطال اينما كان و حيثما وجد , ما تخافوش احنا معاكم قلبا و قالبا , و ننصحكم بالمثابرة و الكد و العمل المتواصل و خاصة و خاصة وسع البال , الفلوس؟؟ اشكون مازال يلوج على الفلوس ؟؟
وسخ دار الدنيا , نعلبوها الفلوس ....
ة

ربي يهديك يا نوستراداموس

يا رسول الله, ملاّ فال أحرف ....

يا سي نوسترا ويني المخوية البلوقوسفيرية , توة هكة ما لقيت ما تمنّالي في ها الشهر الفضيل , راجل مكتف في الباقة و الا شاماد من تالي و هو يبكي ....ليه اش عمتلك اش ريت مني...
توى انا سامحتك و ما حبيتش نعمل ريبوست و قلت عواشر و هذا صاحبي ما يجيش نعملو فرشة قدام الناس ....
و زيد العمروش يخزر من غادي و انا ما نحبش نعمل الدوانة قدامو ...

على كل حال سي نوسترا انا انشالله ناوي حرقة مضخمة معنتها حرقة جوية و بفيزا كان كتب مش في شقف متاخذ كيما عملو اولاد الحومة لسبب بسيط و اني نخاف من السباحة في اعالي البحار.

و فيما يخص الريبوست برة هاك منعت المرة هاذي و احسب روحك تعدّيت على " لغم " و ما طرشقش عليك


ps:
يعطيك الصحّة خويا العمروش على الفيلم و خاصة البارتي متاع بنت الدون كورليوني , زعمة شكون ؟؟