- أنا جاك نيكولسون
-نتحداك قدام الناس الكل انك تقرأ نص مكتوب بالعربية أو بالفرنسية
- يافاشل , عملت جرد مسرحية و تحل في فمك
- يا كذاب
- اتو نقوم نهرّسك انا عملت البوكس قبل
- انا مثلت بالعربية الفصحى و بالفرنسية و بالدارجة و انتي نحي القليّم متاع اللهجة الريفية ماعندك شي
-في المسرحية اللي عملتوها بالسوري طلعت انتي أضعف واحد في الجماعة
- انا نعرفك يا لمين و انا اللي علمتك كيفاش تقرأ
- انا فنان الشعب و ولد الشعب
-ولد الشعب و تتمسخر على الشعب ؟؟
***********
هذه مقتطفات من الحلقة الأخيرة من برنامج "الصراحة راحة", البرنامج المهزلة للمنشط البارد و المسّوس (ناقص برشة ملح) سمير الوافي , و اللي استضاف اثنين من كبار المسرح الكوميدي في تونس رؤوف بن يغلان و الامين النهدي.
الحلقة كان محكوم عليها من الأول بالفشل نظرا للضعف الواضح للمنشط اللي كان يستغل فرصة احتداد اللهجة من الضيفين باش ينزل بمستوى الحوار و يحولو لعركة متاع حوم ( زعمة هذيكة هي حرية التعبير و الحرفية في العمل التلفزي , ربي يهديها الجزيرة و جماعة الاتجاه المعاكس اللي زرعوا الفكرة هاذي ) و ولّى فيها كلام سوقي و استفزاز مجاني و مفضوح خاصة من طرف الامين النهدي اللي ظهر بوجه اقل ما يمكن ان يقال فيه انو قبيح , متاع انسان يحسب فيها حسبة تجارية و يقدّر القيمة الفنية متاع زملائه بعدد العروض و المداخيل, (وهو مقياس ينجم يكون صحيح في بلاد غير تونس)... من الجهة الأخرى برز رؤوف بن يغلان بالعصبية متاعو و ما نجمش يتفادى الفخاخ الاستفزازية متاع الامين نهدي و عدى ليلة كاملة و كشاكشو طايرة بل و تجاوز الحدود الاخلاقية في بعض الاحيان كيف يوصف زميلو بالـ كذاب , و الـ باندي...
في نهاية الأمر انا كمتفرج ما خرجت بشي ما استفدت بشي غير توتر الأعصاب , انا كنت نستنى في مواضيع كبيرة و جرأة في طرحها كيما حرية التعبير, مشاكل المسرح في تونس, كيفية تطوير التجربة المسرحية التونسية , خاصة انهم الزوز ضيوف مخولين (مبدئيا ) من حيث المستوى و التجربة و الخبرة المهنية انهم يطرحوا هذه القضايا و غيرها للنقاش , و كان من الممكن انهم يطرحوا مشاكلهم و حساباتهم الشخصية المتراكمة في جلسة خاصة في دار واحد منهم و الا في قهوة من القهاوي البعيدة على العينين ...
ربي يهدي ما خلق و برة
18 commentaires:
ههه
حتي انتي مخص عقلك كلندو ن تستني في حوار ادبي ، فاقد الشيء لا يعطيه راهو
أنا شخصيا ما نتفرجش فيها الحصة هذي لكن البارح حكاولي عليها و الي شدت بعضها و الجماعة تسال و قتاش باش يعاودوها هذاكة شنو يطلب الجمهور
انت كلندو لازمك حصة ينشطها فكتور هيقو هههه
يا ولدي لا نستنى في حوار ادبي لا شي
الله غالب روحت في عقاب الليل طحت بيه صدفة ياخي قعدت نتفرج , مش على خاطر الوافي اما على خاطر الزوز معلمية اللي حاضرين
انا لمين النهدي كنت نتوقع منو اكثر من هكاكة اما رؤوف بن يغلان كنت نعتبرو مختلف شويةو نحتروموا كفنان مختلف
ياخي طلعت غالط على طول
بربي يا كلندو ثمة منشط فرنساوي اسمو علي طرطوشة لساني و انسيت اسمو ، اهوكة يلبس مريات متع نظر و يبداو طايحين علي خشمو و ينشط برنامج متاع املاء في فرنس دو
Bernard Pivot ??
اشبيه زادة؟؟
رغم المستوى الهابط للحلقة... فأنه لا يجب فقدان الأمل في قدرة نخب تونس على حوار متزن و بناء إذا أتيحت لهم الفرصة المناسبة لذلك...
برنامج الصراحة راحة برنامج ردئ , هدفه الأثارة... و أستضافته للضيفين المذكورين أعلاه كان من باب الأثارة و صب الزيت على النار و ليس من باب فتح أبواب الحوار العقلاني بين الطرفين...
أتعجب من سقوط الطرفين في فخ هذا البرنامج... رغم اني لا أشك في علمهما المسبق بالأهداف الخبيثة للمنشط البودورو سمير الوافي.
أنزلاق الطرفين لهذا المستوى الهابط يؤلم المتفرج التونسي (ظهرنا مش بعاد برشا على ديوك بعض برامج الجزيرة) ...
لكن الأكيد أن النخب التونسية ( في جميع المجالات ) تزخر بالمحاورين و المفكرين الممتازين القادرين على تبليغ المعلومة دون تشنج ..و حتى بطريقة كاريزماتية...
الى أن يفتح يوما الباب أمام الكفاءات المـــُغيبة: كل عام و نحن حارقون
بون أنا شخصيا بن يغلان ملايكتو رزينة و عمرو ما ضحكني ، لمين النهدي ساعات يضحك
فك عليك من التلفزة لبارح طحت بفيلم د.ف.د تسلفتو عجبني بلقدا أما ما كملتوش، باش نكملو ليوم هزني النوم البارح
اسمو الاسبوع
28
the twenty eigاt week normalement,suspens 7leww yaisser :d
normalement yokhrej au cinéma fi 2008 ken 3echna :d
dkhalt ba3dhi fihe el message , 3arbi anglais , francais
هههه
chay mai bihe g voulu mettre bernard pivot fel mesage , ghbe 3laya esmou , g mis victot hugo, ama achabb à ton avis :d
aya ennestou tawa , nerja3 nekhdem :)
أنا نستغرب من استغرابك
مجتمعنا العنف متغلغل فيه بصفة مهولة وفي جميع الطبقات
حتى إلي يقولولها النخبة
دوماج فاتتني الحلقة؛ماشوفت شي، ياوالله خسارة.
اماهاني ريت انو بن يغلان عندو بلوق وحكى فيه على المنوعة،اش قولك كان نمشيو عندو ونسهلوه
brabi je voudrais commenter sur le comportement du Rkik Samir Elwafi celui qui prétend être un beau goss sa façon de poser les questions n'est pas du tout professionnel ni d'ailleurs sa façon de s'assoir devant ses invités et moi personnellement je blâme les artistes qui accepte son invitation .
ena awel mara n7ot un commentaire moi je connais les deux j'ai bosse avec les deux lamine rajel ama da3wa chouaya et l'autre kaleb ou mouch rajel sem7ouni fi el kelma ama samir el wefi mi7adh 3arbi
moi j'ai vu l'emission lamine tayara barcha 3lihom ezouz ama l'emission fdhi7a
يا جماعة لمين انسان جاهل ..لقى جمهور يحب المسرح الـتـافه ..جمع برشة فلوس و جدت عليه الحكاية ولّى يحسب روحو مسرحي كبير...الله غالب ها الوقت الكلب..لمين اللي يضحك على لهجة أمو و بوه يولّي فنان الشعب..و هكذا حال الثقافة في تونس..دوحي يا مباركة باحمد"
la vidéo de l'émission n'est pas en ligne ? (dailymotion, youtube)
http://video.google.fr/videoplay?docid=-2937141906171542309&hl=fr
voila la video
برشه كلام اصحيح و انزيد انأكد 1- لمين النهدي ما انجحش في حتى دور غير النصوص اللي كاتبينها غيرو و تحكي باللهجة الريفية لكن في التلفزة المسلسلات اللي عملهم كانو زيرو
2- اصحيح يضهر جاهل رغم تجربيو الطويلة
3- بن يغلان يظهرلي ارزين و عبوس
4- سمير الوافي مستوي طفولي و عنيف في استفزازو للضيوف و موش امتاع محترفين يقدرو المتفرج و لاحظت هذا في جل برامج قناة حنيعل ) كيف لطفي بندقة..(
انما الامم الاخلاق ما بقيت فأن هم ذهبت اخلاقهم ذهبوا
Manich msadda9!!
Vraiment malla 7ala! Lamin msattek yesser w mahou fehem menha chay, ech mjayybou lel theatre brabbi hedheka?? Raouf est tres faible en argumentation et manke d'intelligence. Samir 5arya est vraiment lamentable.
J'ai honte!!!
Enregistrer un commentaire