Out of time - BLUR

زعمة نرجع و الا نواصل ؟؟

بعد اجتماع السيّد وزير المالية مع ممثلي وكالة التبغ و والوقيد و ممثلي نقابة المالية ، تمّ الاتفاق على سحب كميات الدخان المضروب من الاسواق و وقف استيراد التبغ من الهند و العودة الى المورّدين السابقية (من سويسرا أساسا) ..
و في نفس الاجتماع نفى الوزير الاخبار اللي تقول اللي ازمة الدخان كانت مفتعلة ، و الخسائر الكبيرة اللي عرفتها الوكالة في 2009 (اكثر من 15 مليار) كانت كذلك بفعل فاعل، باش تنخفض قيمة الشركة كمقدّمة لخوصصتها و التفريط فيها للبعض من (رجال الاعمال) الصّحاح اللي نعرفوهم الناس الكل.
انا هذا الكل ما يعنينيش في شيء..
ربحت الوكالة .. خسرت.. تباعت باختف.. و الا بالكريدي .. شراتها فلانة و الا فلان ..
مريومة ليلى سنية فاطمة حفصية خديجة بلقاسم ..ما يهمنيش في اساميهم ..
هذا الكل خاطيني
انا كمدخّن سابق .. عندي قرابة العام ماللي بطلتو جرّاء رداءة السجائر التونسية و عدم قدرتي على المواظبة على السجائر الامريكية و الاوروبية ...
اش يلزمني نعمل ؟؟
نرفع قضية في الوكالة و مسؤوليها اللي عملو الصفقة المشبوهة متاع التبغ الهندي ؟؟
نطالب بتعويض على الاشهر اللي قعدت ندخن فيها المارس (عادي و خفيف) المضروب؟؟
و الا .. وهذا الأهم ...اشكون باش يعوّضني على العام اللي عديتو من غير دخان ؟؟

صورة مؤثرة لرئيس تويوتا

"When the cars are damaged, it is as though I am as well" رئيس تويوتا يعتذر امام الصحافيين

ماسايوشي اراي ، المستشار الخاص لوزير الاقتصاد و التجارة و الصناعة الياباني صرّح لمجلة نيوزويك الأمريكية بخصوص الأزمة اللي تمرّ بيها شركة تويوتا للسيارات:

"we are proud of Toyota, so this story has damaged our pride"

يحب يقول اللي سحب العشرة مليون سيارة من الاسواق و اعتذار الرئيس و وريث المؤسس الأوّل للشركة "اكيو تويودا" امام الكنغرس الامريكي على بيدالات الوقود الرديئة الصنع اللي صنعتها شركته، سبب حرج للمواطن الياباني و الحكومة اليابانية على حد السواء و ادخل الشكّ في ثقة الياباني في القيادة السياسية و الاقتصادية في بلادو.. و حط مكون اساسي من مكونات الشخصية اليابانية في وضعية سيئة وهو روح الفخر و الاعتزاز بالذات و الإيمان بـجودة الصناعة اليابانية و تفرّدها في العالم بالحرص على النوعية الجيدة ..خاصة انها مثلت مصدر اعتزاز و فخر اليابانيين بعد الحرب العالمية الثانية و انحسار نزعة الفخر بالتفوق العسكري للجيش الامبراطوري .

و القصة او القضية للي ما تبعوش المسألة من الاوّل تعود الى خطأ فني في دواسة الوقود (السرعة) لسيارات التويوتا.. معنتها بالعربي و بالفلاقي انو تصوّر انك تسوق في كرهبة من نوع تويوتا (موش الياريس الشعبية الموجودة عندنا) في كياس من كياسات الجمهورية و تبدا مسافر لاحدى مدن الساحل او احدى المناطق الداخلية ، في وضعية شائكة في قلب السيركيلاسيون (كي العادة) قدامك زوز كيران و وراك كميونة ليبية متاع 25 طن و بجنبك لواج كامل الجمهورية و تلصق البيدالة متاع السرعة في القاعة (سرعة 120 كم في الساعة مثلا) و ترفض كل محاولات العودة الى الوضعية الاولى ، ومن الافضل وقتها فتح الباب و القفز تحت عجلات الكار المجاورة او قبل ذلك ارسال ارسالية قصيرة للعايلة توصيهم فيها باش يحضرو رواحهم باش يقبضو فلوس التأمين .. ..

هو في الحقيقة الخطأ موش بالفداحة هاذي لانو موش أكيد باش يحصل ، الا انو فمة نسبة ضئيلة باش يصير ..النسبة هاذي في البلدان المصنفة كيما بلادنا ( اللي تلعب على البطولات متاع جودة الحياة و الشفافية و القدرة التنافسية و الخدمات الادارية و الشفافية و تحتل دائما المرتبة الاولى عربيا و افريقيا في المجالات هاذم الكل و عدد من المجالات الاخرى ) تعتبر مقبولة جدا و تدخل ضمن الهامش المسموح به في مقاييس الجودة. و في الشعوب اللي كيفنا ..شعوب مبادئها الاساسية " دز تخطف" و "كعور و دزّ للعور" و "عندك اش عندي" و" برة مايسالش الليقة تجيب" ، طلما الغلطة ما تتسببش في القضاء على شطر الراسمال البشري متاع البلاد مافماش موجب للاعتذار ..
في الوقت اللي تهتز فيه معنويات الـ130 مليون ياباني باهتزاز الثقة في رمز الصناعة اليابانية، نلقاو عندنا نفتخرو بتونسي صنع سروال كبير، و نفتخرو برتب و تصنيفات معندهاش علاقة بالواقع، و شهائد اشبه ما تكون بشهائد الامتياز و الاستحسان اللي ياخذو فيها فروخة التعليم الاساسي متاعنا.
و في الوقت اللي يعتذر فيه رئيس تويوتا على خطأ تصنيعي مبعد اكثر من 50 سنة من الخدمة المثالية و الاداء المتقن و المثالي ، يرفض مسؤولي امّة الميتين و خمسين مليون مجرّد الاعتراف بعجزهم و فشلهم الدائم و المزمن و فشل سياساتهم في كل المجالات ، ماعدى مجالات الارهاب و القمع و السطو المقنن و الجريمة المنظمة ..





تحية خاصة للشيف عباس على الوصفات المتميّزة ، و الوجبات العجيبة اللي تنطلق دائما بعضمة و شوية فرينة و برشة احساس ههه، على كل حال الفرينة موجودة بكثرة في البلاد و تفقيص العضم يعتبر كذلك نشاط رئيسي ينخرط فيه اكثر من 80 في الميا من الشعب الكريم ..فيما يخص الجدل القائم حول سلطة البلانكيت ، نرى انو من الحياد و الموضوعية الاعتراف بانّو مافماش اجماع حول الوصفة الصحيحة، و انا كمواطن عايش على هامش المجتمع و نستنى في الوقت المناسب لمغادرة ارض الوطن (دون رجعة ) نتمنى انو نفتحوا الحوار حول الموضوع هذاية و تتناول وسائل الاعلام (المحلية و العالمية) المسألة و لما لا يتم طرحها للنقاش في منابر الحوار مع الشباب و المرأة و حتى مع النقابات و اتحادات الفلاحين و الاعراف ...و علاش لا طرحها للنقاش في البرلمان لانو حاليا مافماش غير البرلمان بالاطياف السياسية اللي تمثلو ينجم يجزم في قضية "تركريك الهريسة" في سلاطة البلانكيت .

من صور العهد القديم

توضيح لعموم القرّاء و مسؤولي وكالة تكرير الانترنات بالـ404 المزدوج ، اجارني الله و اياكم منهم و جنبنا مقص عمار لا ربّحه الله و لا بلـّغنا عنه المفرح و المبهج من الاخبار :
العهد القديم هنا هو كتاب بني اسرائيل السابق لكتاب اهل المسيح بانواعه و اصنافه و نسخه المتعددة (انجيل متا ،انجيل يوحنا، انجيل مرقس ..)
و لا علاقة له بما قد يتبادر لاذهان المصطادين في المياه العكرة ( الباحثين عن الشبوك) اللذين قد يظنون انّ للعهد القديم علاقة بالبلاد او اثرا باقيا و ظاهرا عليها و على اهلها.. فلا أثر للعهد القديم و لا تأثير في البلاد ، كما أنّ الاناجيل الجديدة اكتفت بمسح ما سبق دون ان تأتي بما يكفي اتباع اليسوع مشقة البكاء و ذرف الدموع على ما سبق..


في العهد القديم ، كان الناس يدخنون السجائر الامريكية الممتازة، فبنو اسرائيل لا يعرفون انواعا كثيرة من المارس ..مارس مضروب و آخر مطبوع و آخر فاوح يباح تحت الكنتوار بضعف السوم.. في حين انّ قوم هذه الايام لا يكتفون بالحاق المضرة بابدانهم بالتدخين ، بل يرضون بما يشبه السجائر و يدخنونها دونما ادراك و يشترون منها الكميات الكثيرة يخبؤونها، و في احيان كثيرة يخدّمون امخاخهم على بعضهم البعض فيمقّصون بعضهم البعض سجائرهم المضروبة..



في العهد القديم كان الشعب الكريم يساهم في اغاثة منكوبي الفيضانات، و كما ترون في الصورة فالجندي و المواطن بالبلوزة و الآخر بقميص الموظف يتعاونون على ايصال الخبز لبعض المتضررين من فيضانات 1964 بالعاصمة.
ملاحظة : يمكن ملاحظة انّ الخبزات القليلة التي يحملها المواطن في الصورة تعادل حمولة سيارة (بارلينقو) المخبزة لهذه الايام، فخبزة العهد القديم تكوّر بعشرة من خبزات هذه الايام الرشيقة المحافظة على نحافتها المتابعة لمجلات الموضة العالمية.


البقري كان (رفقة اللحم الغنمي) اللحم المفضل لشعب العهد القديم ، عكس شعوب هذا الزمان اللتي اشتهرت بادمانها على لحوم دجاج الماكينة من الدندون و الاسكالوب و الدجاج المقصوص المعروض في فيترينات المزارع المنتشرة في كل مكان.
بطبيعة الحال ، لا يمكن التعليق على ثمن هبرة الستينات ، لأن الخمسمائة اليوم لا تكفي مدخنا من مدخني المعاهد الثانوية من شراء "زوز سواقر" ماريت او ماربورو من الصنف الخفيف.


في العهد القديم، لا يرى الناس عيبا من اعلان تخفيضات معقولة في اسعار الموادّ الأساسية. و لا يخجلون من ذلك و لا يسمونها "تعديلا". في حين انّه في هذه الايام يعتبر التراجع في زيادة ما من قبيل التراخي و الجبن و ضعف الارادة، فزيادات هذه الايام غير قابلة للنقض..و هي مترسّمة في مكانها كموظفي الدولة .. بل هي اقسى عليهم من ضعف شهرياتهم المتآكلة بفعل القروض المزمنة المتراكمة .


لحظة تاريخية شهدها العهد القديم ادّت الى كارثة يعيشها الجميع هذه الايام، و يتعايشون معها بطرق مختلفة في منازلهم و في بيوت قعادهم و عبر شاشات تلفزاتهم.. قناة تونس سبعة (و العياذ بالله)
فقط لو اتيحت لي فرصة العودة بالزمن الى الوراء عبر آلة الزمن المعروفة في افلام الاصدقاء الصغار.. لاخترت تاريخ يوم غرّة جوان المشؤوم ، و لكنت وجدت طريقة ابطل بها هذا المشروع و اغير بها مجرى التاريخ، فلا ترى تونس سبعة النور ابدا، و تخف وطأة فاتورة الستاغ على الشعب الكريم ...و يظل علاء و هالة و رازي و سفيان و نزار (و باقي المنشطين المتسببين في ارتفاع نسب المصابين بضغط الدم و امراض الذوق الفاسد في البلاد و مقدم الاخبار نصف المعاق الذي لا اعرف اسمه ) نكرات لا يسمع بهم احد.

في العهد القديم كان للاشهار نكهة اصيلة لا وجود لها هذه الايام مع الاشهارات الهجينة المستوردة او المنقولة بحذافرها من اوروبا و من امريكا بخريجي جامعات التصرف ناقصي الخبرة و الذوق و القدرة على الابداع.
قاللك:" قلمي بيك كريستال يسابق افكاري نظرا لكرته المصنوعة من كاربور التنغستان..
انه يجري و يجري على الورق...
و كاد تسويد الصفحات يتعبني قبل ان يتعب هو...
للكتابة بسهولة و باقتصاد و لمدة طويلة ليس هناك سوى بيك.."
ة

In the mood for life

Wax Tailor - In the mood for life -2009

جيمي .. لعنة فراعنة القرن 21

مبروك لتونس و لشباب تونس (اينما كانوا) بالانتصار التاريخي على منتخب فراعنة القرن 21 .. الفراعنة الفالصو أي فراعنة الحصار و الاسوار التحت ارضية موش فراعنة الاهرامات و المسلات و المعابد العملاقة

و بالمناسبة نهدي الانتصار هذاية للسيّد (في التصويرة لفوق) المادد يدّو للحنّـة و يمنّي في روحو باش يورث عرش المحروسة

نفس هذا الوجه الاحرف حضر مباراة الخرطوم الفاصلة مع منتخب الجزائر و كانت النتيجة انسحاب مصر من تصفيات كأس العالم. و اليوم تعاودت نفس اللعنة و انهزمت مصر هزيمة مذلة على أرضها .. (على ايدي لولاد يعطيهم الصحة)

انا ديما نتساءل ، زعمة شعب المحروسة يقبل يسلـّم مستقبله و مصيره لهذا الفرعون المشؤوم ،اللي اثبت فشله حتى في جلب الحظ لمنتخبات الكورة في المباريات (المصيرية) فما بالك بمباركة اراضي النيل للثلاثين سنة الجاية

في اللجوء الافتراضي و حماية المعطيات الشخصية في تونس

تحية :
تحية للصديقين برباش و انتيكور على الاقتراح المتميّز باستضافة خونا طارق الكحلاوي بعد حجب مدونتو المعروفة " أفكار ليلية "، الفكرة دخلت حيّز التنفيذ و طارق الكحلاوي قام بنشر اولى تدويناته من المنفى .
وهاذي تتسجل كفكرة جديدة و صورة من اروع صور التضامن و الاتحاد ضد الحجب و القمع الفكري، و تتسجل كذلك للمدونين التوانسة كمفهوم جديد يضاف لمفاهيم النفي و حق اللجوء و الحق في الحماية.. و بعد اللجوء السياسي اللي نعرفوه في بلادنا مليح دخلنا في مرحلة بدينا نشوفو فيها اولى حالات اللجوء الافتراضي باعتبار انو خونا طارق الكحلاوي هنا يعتبر "لاجئ افتراضي " في انتظار استكمال التحضيرات للانتقال من العنوان المحجوب الى عنوان آخر.

خبر كروي 1: بين العام سام و الأم العكري
الجامعة التونسية لكرة القدم رفضت طلب نظيرتها الامريكية باجراء مقابلة ودية نهارة 26 ماي 2010 على خاطر يوم 30 ماي المنتخب التونسي باش يتقابل وديا مع منتخب فرانسا.
اتحاد الكورة متاعنا يثبت مرة اخرى انو خارج الموضوع تماما. و على ما يبدو مازال يشدو الحنين للعشرة القديمة مع "امنا العكري" على عكس التوجه العام بتغيير قبلة هوائيات الارسال و الاستقبال ناحية شمال الاطلسي و بلاد الـ"عم سام"... و كيما قالو ناس بكري ما يغلب الولادة كان الوسادة..

خبر كروي 2: المخّ في فلسطين
بعض مفاوضات مع جبريل الرجوب قبل مختار التليلي مهمة تدريب المنتخب الاولمبي الفلسطيني و اعتبرها مهمة قومية و واجب وطني و التزام بقضية مبدئية لكل عربي . و وصل صرّح للصحافة التونسية تصريح من جملة ماقال فيه " مرحبا بالموت إذا جاءني في فلسطين".
المخّ كان قبل عامين انقذ فريق النادي البنزرتي من الطياح بعد عملية بالغة التعقيد تغلب خلالها على فريق النجم الساحلي بطل الموسم انذاك و سبّ فيها فريق الترجي على الهواء.. المخّ نجح في عمليات مماثلة و عندو تاريخ في العاب آخر الموسم و عندو كذلك بصمات بارزة في تاريخ البطولة التونسية و تاريخ اغلب نواديها.

انا من ناحيتي استبشرت بقرار المخّ لانو بصراحة مافماش شكون ينجم يتحمل المسؤولية هاذي غيرو، و قدرات المخّ تتجاوز مجرّد وضع الخطط التكتيكية و تسطير برامج الحصص التدريبية للفريق الفلسطيني.. بالعكس الاخيان في فلسطين ينجمو يستعينو بقدراتو الخفية الاخرى للخروج بالقضية الفلسطينية من المأزق و انقاذها من السقوط في الاقسام السفلى للعمالة و القوادة و الفتنة الداخلية.

خبر كروي3:
دائما في فلسطين ، قبل عدة اسابيع لعب المنتخب الاولمبي التونسي مباراة ودية مع نظيره الفلسطيني و كان مرافق المنتخب هو سي سليم شيبوب. المفارقة لهنا هي في منع سلطات الاحتلال للسيد سليم شيبوب من الصلاة في المسجد الاقصى ...

حول حماية المعطيات الشخصية:
بعد اعادة نشر صور قائد فريق النسور الورقية ( كريم حقي) في تدوينة نهارة 18 جانفي ، احتج البعض بدعوى انو هذا يعتبر خرق لسرية المعطيات الشخصية و اقتحام (غير قانوني) للحياة الخاصة.
قبل عامين ، السباحة الفرانساوية "لور مانودو" قررت باش تعمل عملية لتكبير الصدر ، وقتها الصحافة الفرنسية بشقيها الكتروني و الورقي و المواقع الكترونية و المدونات الكلها شنت هجوم كبير على البطلة الاولمبية و تم تداول صورها قبل و بعد العملية على نطاق واسع و كبرت الحكاية و خذات اهتمام كبير و سببت برشة قلق للبطلة في حياتها اليومية ..
يقول قائل انو صدر السباحة الفرنسية، و حجم صدرها ما يهموش بقية الشعب الفرنسي على خاطرو موش ملك عام من املاك الجمهورية، لكن ( حسب الصحافة وقتها) الموضوع اكبر من زوز كعابر سليكون .. الحكاية ابعد من هكاكة ، لانو حجم الصدر عند بطلات السباحة عندو تأثير مباشر على الاداء الرياضي خاصة في المستويات العليا، و قالك كذلك اللي موش معقول تخسر فرانسا ميدالية اولمبية على خاطر نزوة عابرة .
عندنا احنا قالك اللي سي "كريم حقي" عندو الحق كي يسهر لمطلع الفجر البسام ، كإنو لياقتو البدنية ماتهمناش .. كأنّ المريول اللي يلبسو في الدورات الافريقية مافيهش علم البلاد .. و كأنو التربصات و البريمات و الثلاثة بلايص في الطيارة الخاصة موش خالصين من مكاتب دافعي الضرايب التوانسة.. علاش مانحاسبوش المقصر؟؟ علاش ديما نتعوجو و نحاولو نلبسو الجبّة بالمقلوب .. توة فرانسا المرجع الاول متاعنا في مجالات حقوق الانسان و الحريات الفردية و احترام الخصوصية الشخصية قالت لا باش البطلة متاعهم تستجيب لرغبتها في الاغراء على حساب الكاريار الرياضية متاعنا .. و احنا كي نعلقوا على موضوع السكر و السهر في الملاهي للاعبي المنتخب الوطني نوليو مخالفين القانون ؟؟
الموضوع اثارو الصحفي منجي الخضراوي في جريدة الشروق المدة الفايتة و كان على مستوى كبير من الموضوعية خاصة الا انو ما وضحش بالتفصيل موقف القانون من نشر صور الشخصيات العامة و المعروفة من فنانين و رياضيين و غيرهم، لانهم ولاو جزء من الشأن العام و (انا على الاقل) نظن اللي نشر صورهم امر مقبول و عادي ، و القانون يتدخل الا في حالات اخرى كالاستغلال التجاري بدون ترخيص اصحابها او كالسب و الثلب و التشويه.

العراء للتصدي للسلفية : يبارك في ترابك يا تونس
الفنانة التونسية "منية الورتاني " صرّحت لصحيفة الصباح الاسبوعي (عدد 01 فيفري 2010) انو استعمال الايحاءات الجنسية و العري في الاعمال المسرحية (بطريقة مدروسة) يساهم في التصدي للـ " رجعية و السلفية" ..
انا ماعندي مانقلها كان يا منية وخيّتي اش مدخلك في الرجعية و في السلفية.. هاذية مشاكل حارت فيها كوندوليزا رايس و بوش و تشيني و تنظمت على خاطرها ندوات و مؤتمرات و جلسات في الامم المتحدة و مجلس الامن و تكتبت فيها كتب و نظريات و فلسفات و افكار و مشاريع و برامج و هموم زرقة اقوى من مخك.

لذك وخيتي ، كان تحب تتعري على ركح المسرح عمّل على ربي .. شكون حزّك .. بالعكس كوني متأكدة من النجاح الجماهيري للمسرحية و تنجم حتى تستغني على دعم وزارة الثقافة.. و اخطاك من اللغة الصعيبة و اللغة متاع بات ليلة مع الدجاج صبح يقاقي و استكفي على رويحتك و في عوض ما تنظر في مواضيع كبيرة حاول تعملنا مسرحية ينجم الواحد يكملها للآخر.

العرب و قضية المياه:
مجلس وزراء المياه العرب اجتمع في القاهرة لبحث جملة من البنود اهمها سرقة اسرائيل و استغلالها لمياه جنوب لبنان و الجولان المحتل و الاراضي الفلسطينية المحتلة.
و كيما جاء في موقع جريدة العرب اللندنية، قاللك اللي : " ونقلت وكالة الأنباء الأردنية عن مصادر مطلعة في القاهرة ان المكتب سيبحث في السبل الكفيلة بالوصول الى الشركات والمكاتب الفنية الدولية التي تعمل في مجالات المياه في الاراضي العربية المحتلة والعمل على دفعها للتوقف وعدم التعامل مع سلطات الاحتلال."

يعني و حسب توقعات الكلاندستان ، و حسب نسق الاداء الفعلي للتحركات السياسية العربية و قدراتها على التأثير في الاوضاع الحالية في المنطقة فـ :
باش يقعدو 5 سنين يبحثو في السّـبل الكفيلة للوصول للشركات و المكاتب الدولية ، و مبعد ما يلقاو السّبل يعديو عامين اخرين باش يوصلو للشركات هذية .. و عشرة سنين باش يدورو على الشركات هاذية (او ماتبقى منها على خاطر في الاثناء برشة شركات باش تكمل عقودها و يلزم نعاودو من جديد المرحلة الاولى متاع "بحث السّبل" و من بعد مرحلة "الوصول")
و يعملو على دفعها للتوقف و عدم التعامل مع سلطات الاحتلال. حاصيلو الحكاية و على احسن تقدير باش ترصّي في 20 او في 30 سنة و من هنا لهاك الزمان ينجمو الاسرائيليين يضربو العريبة بالفوسفور الابيض و الاحمر و الازرق و باليورانيوم المنضب و اليورانيوم المخصب و يطيحولهم ديارهم و يقلعولهم شجرهم و يقتلولهم صغارهم ....و ينحيولهم حتى شربة الماء من افامهم.
تبارك الله عليكم يا خير امة

نهارة أحد

قعد على بيروه كيف العادة.. حل الاورديناتور.
ترشف رشفة من قهوة الحليب... زوز طوابع سكر ..
كيما كل يوم في الخدمة ..حلّ الإذاعة الامريكية اندي103.1... ما يعرفش علاش بعمرو ما قعد على الكمبيوتر و حط اذاعة الموزاييك او اذاعة تونس الدولية .. هذية اذاعات بلادو ..اذاعات محلية و هو سايي كره كل ماهو محلي.. الصحف المحلية للاخبار المحلية ..القهوة المحلية الكراهب المحلية الكيران الكياسات القناطر المحولات .. شركات الهاتف الجوال و ارقام البورتابل
98 ..97..96..95..94..92
حتى مالتاليفون مقاطع الشركة الوطنية و عندو خط تونيزيانا .. على الاقل فلوس الروشارج تمشي لجيوب نجيب السويرس.. كلب مصري و لا كلابنا الوطنية..
يراجع احداث اليوم .. يوم الاحد .. الكونجي الاسبوعي
يقوم الصباح على صوت كراهب الخبز .. تهبط في الخبز للعطار.. مبعد يتعدى بياع الفريب ... فريييييييييب ... منشار ينقب الوذنين.. ملى فقر و ملى ميزيريا...مبعدو الموتور متاع بياع القاز .. شادد المفتاح (مفتاح 20) و يضرب بيه دبوزة مالدبابز اللي قدامو في الصندوق.. صوت يفيق الموتى في الجبانة .. يا عالم يا ناس راني نحب نرقد ... يتعدى بياع الماعون ...شكون عندو حوايج قديمة ؟؟ يا اللي عندو حوايج قديمة ... يدق الباب ... تعطيه صباط يعطيك في بلاصتو 5 كيسان بلار و ساعات بانو بلاستيك .. .. يقبل كل شي صبابط سبادريات كبابط فيستات سراول سواري موبيليا قديمة .. ما يسيب شي ...
سايي طار النوم يلزم يقوم .. فين باش يمشي .. السوق ؟؟ المارشي ؟؟ كيف كيف فريب و ماعون و كيسان و بلار ... يا مدام اليوم الطزينة بسوم الستة .. زيد هذا بلاش و زيد معاهم هذا بلاش .. يقوى عليه ربي بياع البلار .. يلصق ميكرو في جلغتو و يعدي نصف نهار وهو ينبح .. ملى خبزة .. خبزة مرّة ..
موش كان هو يعاني في جرّة الخبزة ... المرا اللي تبيع الحمص و اللوبيا المنفخة في باب المرشي و الطفل اللي يبيع خبز الطابونة في القفة و بياع الملسوقة و مولى نصبة المعدنوس .. . الكلهم يعانيو .. ربي معاهم ..

يخرج مالمارشي يتعدى للقهوة .. يعرضو القهواجي بكلمة زائدة موجهة للحرفاء جملية ... "يعطيكم ................. "
ماينجمش يشد روحو ، يرجّعلو التحية بخير منها.."يعطيك ............ على ............ في .............. و............... لـ............."

يتعدى لطاولة فيها مجموعة من الموظفين ..كروشهم منفوخة بالمقارن و المرق و العجج و كعبات البيرة متاع البارح.. لابسين الزي الرسمي متاع نهارة الاحد ... سيرفاتمون (بدلة رياضية) و سبادري... يعاودو نفس التساؤل ..مايعرفش علاش في بلادنا السيرفاتمون هي لبسة القهوة ... في العالم الكل يلبسو الزي الرياضي لممارسة الرياضة .. عندنا احنا يلبسو الجوغينغ باش يعملو شيشة في القهوة و يلعبو الرامي و البيلوت..
يتساءل كذلك على سر العادة الاخرى متاع نهارة الاحد .. لابراس .. الناس الكل تهبط عليها النفحة في اللابراس ...حتى اللي ما ينجمش يقرا بالسوري ياخذ لابراس .. كلو تابع الزي الرياضي ..
يشرب القهوة .. يقرأ الجريدة .. يتفرج شوية في اللعبة القريبة .. و كي العادة يخلص الضريبة.. "بربي كلاندو ماني خوك ..عندكشي دينار و الا الفين ..ماعنديش دخان"
ملا حالة مكربة...ماعندكش دخان بطل والديه جملة ...يروح للدار يحل الاورديناتور على انغام الاذاعة الامريكية .. نفس الخنار .. تمقيص حجب .. نصب متاع سلق و معدنوس و حمص و لوبيا ...ناس تنبح كيف بياع البلار.. ناس تفركس في الحوايج القديمة ...ناس تفيّس بالزي الرياضي ..ناس تتفزعك بلغة فولتار .. و تتجلطم على لغة شيكسبير
هذيكة بلادنا و هذاكة اش عطانا ربي ... انشالله ربي يخفف الخبزة من ها البلاد

عمار قالك ماعادش يحب أفكار ليلية.. يحب على افكار في القايلة

مدونة "أفكار ليلية" متاع خونا و صديقنا طارق الكحلاوي تعرضت اليوم للحجب بعد اكثر من الـ3 سنوات من التدوين المتواصل في المواضيع الهامة و الحساسة . مقصّ الرقابة في تونس ولات عندو دلالات اخرى و تجاوز كونه شكل من اشكال القمع و الحد من حرية التعبير بقدر ماهو وسام للمدوّن و شهادة من الرقيب نفسه في قيمة المدونة و اهمية المواضيع المطروحة فيها.

مبروك للصديق طارق و مرحبا به مجددا في نادي المدونات المحجوبة

صفحة من تاريخ بلاد السروال الأعظم -2

الجزء الأوّل هنا


واصل صحفي العهد الكرماوي روايته لأحداث عام تسعة و ألفين، (و كان ينظر بوجل لعلبة الكبريت بيد احدهم يخشى ان تحرق القشّ العالق بجبينه و انفه من أثر السجود) و قال:

بعد أن ارتفعت رايات السلطان فوق الابراج و الاسوار و بعد ان علّق "اهل الرقعة" السراويل العظيمة في الأزقة و الساحات و الأسواق احتفاء بزيارة الوالي ، و اثر انتهاء أبواق العهد السعيد من نوبة الانشاد و المناشدة ، انطلقت النوبة الثانية ، نوبة اناشيد الفرح ، نوبة الشعب الكريم عاشق المزود ، عاشق الطبل و الدربوكة و عاشق سيدنا السلطان المظفّر ..

يا عم علي ... يا عمّ علي .. بجاه الله يا عمّ علي

شوف شوف ... صطوفة صطوفة

يا عمّ صطوفة بالله ... كان شفتو قلو انا شاهي ... يمتّعني بخيالو الباهي...

و يمشي ... و يجي...

و يجي ....و يمشي

كانت تلك النوبة اقوى من ان يحتملها الشعب الكريم المصطفّ على جوانب الطرقات في انتظار وصول والي البلاد ، الحاكم بأمر السلطان. فعصفت بمشاعر الناس ممن كانوا يرقبون المشهد من بعيد، و اندفعوا يقفزون من اماكنهم يصفّقون و يرقصون بجنون . و كان اغلبهم يعيدون اللحن المميز لأغنية المزود :

يمشي ... و يجي ...

يجي ... و يمشي

وينو غزالي وينو هو

تلميذة (فاصعة من الدراسة ) رمت بمحفظة كتبها و نزعت عنها الـ"طبلية" ، ثم ّزغردت كامرأة بالغة ... وينو غزالي وينو هو ... و يمشي و يجي ... و يجي و يمشي..
الفلاح الذي كان مكتفيا بمشاهدة الجموع ترقص ، التفت يبحث عن غلاله التي احضرها هدية للسلطان فلم يجد منها شيئا . البرتقال المالطي و البرتقال الطمسون .. المدالينا ..الدقلة .. حتى الهندي طاف عليه طائف من ربك ... . و لم يبق الا بعضُ من البصل و المعدنوس و السفنارية . فألقى بها وسط الجموع "بوزيد غني ..بوزيد فقري" ثم نزع القميص و حزم به وسطه .. و انضم الى اللحن الجماعي .
"و يمشي ... و يجي ... و يجي و يمشي"
صاحب معمل اليغورت و صاحب معمل الشكلاطة و صاحب مصنع الصابون و صاحب الفندق السياحي ..كلهم لم يجدوا هداياهم التي جاؤوا بها للسلطان ، ملا حشمة ...تبا للسرقة والسّرّاق .. ثمّ تفقّدوا جيوبهم فوجدوها خاوية القيعان .. لم يجدوا مفاتيح سياراتهم و لم يجدوا سياراتهم .. حتى ملابسهم الداخلية المستوردة ذهبت في خبر كان .. فصاح أحدهم " بقلة ليها .. اشطحوا و مولاها ربي .." ثم انضمو الى بقية الشعب الكريم.

في ناحية بعيدة من الساحة ، رمى المدرّس الجامعي حاسوبه المحمول .. سقطت منه اطروحة (منقولة من الانترنت) و بضعة مواضيع مسروقة و عدد من البومات الصور الخاصة بالطالبات ... يمشي و يجي .. وينو غزالي وينو هو..
بائع الفريب عصب جبينه بسروال احمر من النيلون الصيني الممتاز ثم انطلق يدور حول نفسه حتى فقد الوعي.. وينو غزالي وينو هو.
عراف مغربي اشعل سلة اعشابه ثم رماها على الارض امام الجميع .. يالله يا مغيث يا مجير سهّل علينا الامور و افتح ما اغلق منها و اغلق ما تبقى منها مفتوحا ..
نقيب عملة الشوانط السلطانية .. كان يمشى بخطوات خجلة وجلة .. ينظر يمينه و شماله.. كان يشتهي ان يرقص لولا بقية من انفة و خشية من سخرية الرفاق..اللحن الساحر كان لا يقاوم و مشهد ساحة الرقص تمكن من حواسه كلها ... امسك به احد الفرنسيس الحاضرين "ايا اشطح معايا و لا يهمك" فقفز كالممسوس يرقص و يصفق بيده و ساقيه كقردة السعدان ..
حتى النجار .. نجار البلاد .. رمى بلوح كان يعدّه منذ سنوات لصنع "المغرف" .. فـ داره كما يعلم الجميع لا تزال لحد الساعة بدون مغرف
.. و رفع صندوقا خشبيا فوق رأسه و صاح بأعلى صوته لحنا جديدا

"جيبو الحنّة ...هاتو الحنّة

و عريسنا اليوم تهنّى ...

آآه آآه جيبو الحنّة"
فردد الجميع وراءه
"آآآآآآآآه جيبولو الحنـّة"

عندها تقدم المذيع التلفزي (المنادي في تلك الايام) ، وضع مايكروفونه جانبا ، ارخى عقدة الكرافات حتى يتيح المجال لحنجرته ثم سعل و بصق أمامه و استردّ المايكروفون:
" ايها السيدات و السادة ، مرحبا بكم دائما و أبدا في بلاد الفرح الدائم ، بلاد الالف فرحة و فرحة ، بلاد البنطال الأعظم الذي احتارت فيه الامم و عجزت عن صنع مثله الشعوب ، نجدد العهد و نعدد معاني الوفاء و العرفان لولي النعم ، الحاكم بأمره ، المنصور بإذنه و بإذن اولياء الله الصالحين.."

صفّق الجميع

"في هذه الآونة ، يسرنا ان نرحّب بقدوم سيدنا الوالي مبعوث السلطان المفدى .."

صفّق الجميع ثم عادوا لحلبة الرقص ..

فقام احد الحاضرين و كان يدعى عمار يدفع الناس و يضربهم بشدة
" ايـّا يزّي يا ولدي .. شدّ بلاصتك و ريض .. اركح من غادي .. سيدنا الوالي وصل و انتوما تشطحوا ؟؟ ماعادش حشمة ماعادش قدر ؟؟؟"

و كان الوالي في الاثناء قد وصل و استوى جالسا على المنبر فأشار على عمار مبتسما ابتسامة النشرة المسائية
"يا عمار .. يا عمار خلي الشباب يشيخ و يعبـّر على الفرحة متاعو"

فعاد عمار بنفس الحماسة يدفع الناس للقيام مجددا و التحاق بساحة الرقص
"قوم يا ولدي .. تقعّد (بثلاثة نقاط على القاف) من بلاصتك .. قوموا اشطحوا ..افرحو و فرّحوا سيدنا.."
و بعد ساعات من الهستيريا قام الوالي و تنحنح.
فصاح المنادي " سكر هاك البوق يا بوق .. سيدنا باش يقول حاجة"

و للحديث بقية مع خطاب مبعوث السلطان

"