Demain je brûle: شكون قال :"بيض البُزاة أثمن من سود الغربان..."؟؟

vendredi 22 février 2008

شكون قال :"بيض البُزاة أثمن من سود الغربان..."؟؟

وقفت قدام المراية نتأمل في الخلقة الكريمة ( ما يعبر عنه بالفاطشة)

وهاذي عادة حميدة مانعرفش وقتاش و منين تعلمتها, انّو قبل الحجامة الصباحية ناقف قدام المراية و ننطلق في رحلة تأمل و تخيلات كبيرة حول الماضي و الحاضر و المستقبل الواقع و الافاق الحرب الباردة و ساعات حول اشكاليات العولمة و العلمانية و واقع الاسلام و الحداثة و مجتمع المعلومات و فاتورة الانترنات و زميلي المتمارض في الخدمة و منطقة الاورو و اوروبا الــ 25 و اتفاقية شنغان و ساعات يتعدّى قدامي طيف علي بن نصيب يشوّشلي أفكاري... و يرجّعني للواقع المزري متاعنا...

النهارين و انا مسافر في رحلة الابداع الصباحية و نحضّر في الجوتابل (بيك) باش نحجّم لحية الأسبوع و نتداركها قبل ما تطور و تولي لحية الشيخ الكهفان اللي تهز للفينقة و العياذ بالله, نكتشف حاجات بيض , اوّل مرة ننتبهلهم...
بلايص بلايص بيض تلمع في الضوء...
في بالي طرف غبرة و الا تفش لاصق في وجهي...
حاولت ننفضها , عاودت عدّيت عليها يدي...غسلت وجهي بالماء...

لكن البقايع ديما في بلاصتهم , تقولش عاملين بالعاني , بيض يللشوا.. أبيض من تدوينات ديسمبر...

فتنهدت و قلت ربّي يكبّرنا في طاعتو

3 commentaires:

FarFar a dit…: ايييه
عيرتني بالشيب وهو وقار فياليتها عيرتني بما هو عار

تعرف يا أخ كلندو لمرة الي فاتت ريت في شعري كعبة شيب.. عملت عليها جو..
عاد توة جمعة نعمل في قهوة أنا و ولد عمتي ..لحيتو فيها برشة شيب ولات.. و قالي اكهو الرجوع لربي.. قتلو.. عندي كعبة حتي أنا.. حسيلو قعدت نلوج ملقيتهاش.. رصيتليشي نحلفلو الي هي لمرة الي فاتت ريتها و هو يقلي ما ثماش .. حتي مشينا قدام مرايا..ماقيتهاش
tant mieux; 22 février 2008 à 11:38
3amrouch a dit…: كلندو

اعمل كيما خوك العمروش واعمل كوب اقاسي تو لا عاد يظهر لاشعر ابيض ولا بلايص فارغة هههههههه; 22 février 2008 à 18:33
yes_in a dit…: اصابون لخذر !! عليك بصابون لخضر ضربة ضربة ل كلشي !!
كان ما مشاش، أعمل طلية عسل كلتوس ولا زعتر ونورملمون لبيس
هههه
nistou; 23 février 2008 à 21:02