اهمّ انجازات الثورة المجيدة

كما يقول العظيم (و العظمة لله) جلال بريك انّها لثورة حتى النصر .. وهذا اصحّ توصيف لثورة الياسمين لانّ الثورة اللي انطلقت من السباسب الغربية فسدت و اتّخذت و نتنت ريحتها بمجرّد وصولها للنصر و المنزه و المرسى و قمرت و قرطاج .. و ركوب بني عاشور و آل السبسي عليها و حرصهم الشديد لتحقيق اهدافها ..

من اهم مكاسب الثورة و انجازات حكومتي الثوار خلال السبعة اشهر الاخيرة :

سامي الفهري ربح قضية كاكتوس و استرجع كامل امواله .. سليم شيبوب استرجع امواله المجمّدة في اوروبا .. الحكومة الكندية تنتظر الى اليوم تعاون الحكومة التونسية لاسترجاع اموال الطرابلسية و جلب بلحسن الطرابلسي .. الحكومة السويسرية (ريقها شاح) وهي تطالب بتفصيل الارصدة المنهوبة لاعادتها ..صخر الماطري باع نصيبه من رأس مال التونيزيانا .. سيّدة العقربي شدوها متنكّرة في فيفري و هربت بدون تنكر في جويلية .. سعاد بن جميع (زوجة عادل الطرابلسي) هربت مع ليلى في الطائرة الرئاسية يوم 14 و رجعت لتونس (عبر مطار قرطاج في شهر مارس و تحصلت على باسبور جديد وهربت للكندا .. المؤتمن العدلي ما يستعرفش باملاك سليم المبروك .. عماد الطرابلسي رفع قضية على الطرهوني بسبب احتجازه بطريقة غير شرعية في المطار يوم 14 جانفي .. اعوان البوليس يطالبو بدم زملائهم اللي استشهدو في الثورة .. تجمعيون يقولون انّ الدساترة هم من قام بالثورة .. محمد جغام يقول "سيّد الرئيس" عندما يتحدّث عن بن علي .. كما مرجان يصرّح في التلفزة بأن "ما يعاب على بن علي هو تسرّعه بالمغادرة"..

صحافة مغالطة ..صحافة مأجورة .. احزاب تباع على قارعة الطريق ..جمعيات مشبوهة مدعومة من المخابرات الامريكية..

كمال لطيّف من خفاش ظلام يتحوّل الى ملاك بجوانح بيضاء ..

العكرمي 250 وزير اصلاح..

مختار اليحياوي يتحوّل الى قواد بن علي و فرحات الراجحي الى مناشد..

حتى البوليسة اللي ضربت البوعزيزي تحوّلت الى شهيدة حيّة ..

تجمّعيون على رأس الادارات..

تجمّعين في التلفزة ..تجمّعيون على الجرايد .. .. تجمّعيون يهددون بحمام دم .. .. تجمعيون يتوعّدونا بالعودة عبر الانتخابات .. تجمّعيون يتمسخرو على دماء الشهداء ..تجمّعيون يتصرّفون الى اليوم بالاموال العمومية بعد عطلة خالصة الاجر تفرّغو خلالها للتخطيط لافضل و ايسر السبل للعودة .. الم يكن من الافضل تركهم في اماكنهم و عدم طردهم بالديقاج ؟؟ على الاقل نعرفوهم فاش يعملو ..

زيادة على الفتن العروشية و القبلية و حرق الاملاك العامة و الخاصة و قتل المتظاهرين و قمع المعتصمين و تركيب تمثيليات و افلام و اختلاق شخصيات افتراضية كشخصية نبيل السعداوي .

الاكاذيب و الاخبار الزائفة .. تخويف المواطن بالاشاعات .. هجمات على الشطوط و النزل .. حرق الصابة .. الشهريات ستتوقف في جويلية .. السكر مفقود .. الاسمنت مفقود .. الماء مفقود .. ازمة وقود .. هجمات ارهابية على المهرجانات .. وهجمات ارهابية اخرى على العروسات التنكيد و التنغيص على التوانسة حياتهم اينما كانو .. ..

براكاجات و قطع طرق بالتنسيق مع اعوان الامن .. ميليشيات تنهب و تحرق الممتلكات العامة و الخاصة بعلم و تحت انظار الامن .. جيش من المخبرين و الصبابة يجتاح ارصفة و انهج وسط العاصمة و يتحوّل في الوقت المناسب الى قوة ميليشيا تقمع و تلاحق المتظاهرين..

هذه دفعة من الانجازات و المكاسب التي وجب التنويه بها و تثمينها في انتظار الجزء الثاني في الركوب على الثورة وتصنيف الراكبين و انواعهم و طبقاتهم.