Un kamikaze...raté

قالك فمّ طفل في الاربعطاش او الخمسطاش من عمرو , معناها في سن المراهقة و الكل نعرفو انو السن هاذي حساسة ياسر و تدخل الواحد بعضو و يحتمل يضيع فيها اذا كان ما لقاش التأطير اللازم و تفهّم اقرب الناس ليه.

الطفل هذاية يا سيدي ولات عندو ميولات جنسية "خطيرة" اي انو يميل لوخايانو الذكور و بدا يحس بروحو اقرب منو لجنس الاناث ...البو مسكين يخزر لولدو كيفاش يتصرّف و كيفاش يقلد في كلام امو و اخواتو و نساء الحومة , فهبل و كوخر (توة هاذا ولدي اللي باش يحفظ اسم العيلة و اللي باش نخلليلو كل شي من بعد , و خاسر عليه طهارة و تربية و و و يطلعلي بيدالة و يبقى عارة لولد الولد ...) وقرر انو يتخذ الاجراءات اللازمة.

من الاول جبدو و بدا يسخسخ فيه و عاير فيه فماش ما يتكبس و يسترجل ... لكن شااااي,
من بعد بدا يستدعي في زميلاتو في المكتب باش يحضّروا معاه في الدار بالكشي تتحركلو شعرة السيّد علي ...باقي شي
حرّش فيه أمّو باش ماعادش يقعد بحذاها , وصى عليه فروخ الحومة باس يهزوه معاهم للسال دو جو و الا حتى القهوة (ميسالش يتبلى بالكارطة و الشيشة متاع القهوة خير من اللي يتغرم بالحاجات الاخرين ), جابلو سي دي ايروتيك صبهولو في الاورديناتور جابلو حتى البورنو ...
تقولشي من يحرث في البحر

ايا اخر حاجة خطرت على بالو ( و اخر دواء هو الكيّ) , هو انو يرجعلو للصراط المستقيم بالقران و السنة:
جابلو الستين حزب (المكتوب و في السي دي ) و الكتب الفقهية و التفاسير و قالو يلزم تقراهم و تفهم الدين متاعك و تطبق اللي جاء فيه... بعد جمعة زاد حب يقويلو الدوزة , مشا (خذا الريسك و غامر بخبزتو و مصير عايلتو ) و هبطلو فيديوات الزرقاوي و بن لادن و الظواهري و الملى عمر و كل من عندو لحية في العالم ( ابري تو اللحية= رجولية و هذا هو المطلوب)

تعدّات الجمعة الاولى , الجمعة الثانية , الجمعة الثالثة و الطفل معتكف في بيتو ...يخرج كان في الليل باش ياكل حويجة و يرجع للعالم اللي حطو فيه بوه.

بعد شهر العايلة قاعدة تتفرج في التلفزة ...
والوليد خرج من بيتو و دخل عليهم...

الام طاحت ما في عينها بلة...
البو قام و حط السيقارو ( ما زال يشعل ) في فمو بالمقلوب

ولدهم جاء لابس...خمار

المسكين تحجّب