اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

jeudi 13 juin 2013

مصير من يستأمن الاخونج على ثورة



اللي يحرق سفارة و اللي يكفّر واللي يقتل واللي كان شريك بن علي يخرج سرسي والا بخطية بسيطة 
و ولد الزوالي يدخل الحبس على خاطر كتب على الحيط والا قال غناية والا حرق مركز قبل اربعطاش ..

الثورة اللي تحاكم شباب الثورة..و تمنح الحصانة للفسّاد والمجرّمة وقتلة الشهداء ..
هي ثورة الخرى والخراب .. البطال قعد بطال و الفقير قعد فقير و المناطق المتخلفة زادت تخلف ..
وهوما اي احزاب الترويكا يخدموا في اولادهم و يضربوا في الفلوس لا حسيب ولا رقيب ..

mardi 11 juin 2013

التكنولوجيا الصّينية في خدمة معطّلي المستقبل

و أخيرا شباب الثورة يفيق و يتعلّم أخيرا انّ العمل و الكدّ والتضحية كلها كلام فارغ ولافائدة ترجى منها باعتبار انّ السّرقة و السطو بانواعه مثلت عماد المجتمع التونسي منذ بعث الخليقة و حتى الثورة المجيدة... و لهم في الحكومة المستنهضة بجناحيها الايسرين المثال و القدوة.

و باعتبار ان العلاقات التونسية الصّينية  مثلت احد اهم محاور الحوار الحضاري المتحضّر في بلادنا.. بين نشطاء الاحزاب وقواعدها ورابطاتها وفي كولوارات الحكومة و مصارن الترويكا نفسها .. داخل قبة التأسييسي و خارجها  و في وسائل الاعلام بسبب سيّئة الذكر المنحة الصّينية اللي منعت -والحمد لله- من عملية تحويل وجهة واغتصاب من طرف صهر الغنوش الاعظم،
 و باعتبار اجتياز ابناءنا و بناتنا امتحان البكالوريا (الثلاثة ارباع) ، اخترت ان افسّر لما تبقى من قرّاء هذه المدونة المناضلة  احد الاجهزة الاكثر خطورة و الاكثر تعقيدا اللي وقعت بين يدي مواطن تونسي منذ الحرب البونيقية..

هذا الجهاز الصّيني مثل اليوم الحل السحري اللي يغني الشاب التونسي والشابة التونسية  عن حصص التحضير الجماعي و سهر الليالي و التصبيح و ليترات النسكافي الناقصة سكر..


سماعة بدون خيط تعمل بالحقل المغناطيسي تتباع  في السوق العالمية باسعار رمزية بين الـ 12 دولار  و الـ 50 دولار.
متكوّنة من:

- سماعة اذن بحجم حبّة الأرز او البيلة متاع  المنقالة 




-حلقة الترددات المغناطيسية توضع حول الرقبة (ومن الافضل تحت الملابس)




- شارجور للباتري والا زوز بيلات من نوع الـ9 فولت
-الميكروفون
-الرابط الفيشة متاع التاليفون
-وبالطبيعة  الذّكير (المغناطيس) اللي يستعمل لإخراج السماعة من عمق الأذن




الاختراع هذا اذا تمّ استعماله بطريقة فعّالة ومع تواجد فريق تقني مناسب من الناحية الاخرى .. وبفضل الربع المضمون مسبقا من المعدلات المنفوخة بالدوبامين طيلة السنة الدّراسية .. فالباكالوريا مضمونة و الطريق مفتوحة للالتحاق بالجامعة والتخرج في اقرب الآجال للانضمام لقطعان المعطلين المنتشرة في البلاد المتذمّرة من المظالم المسلطة عليهم و على كفاءاتهم الاستثنائية .



vendredi 7 juin 2013

علي العريض يهز معاه 2 اطنان تمر لضحايا الفيضانات في ألمانيا


قرار صائب وهدية تعبر عن ذكاء وحكمة غير محدودين من السيّد العريض .. يعني الالماني في طمبك الفيضانات باش يقعد في تركينة و يفرش قدامو المنديلة متاع كعبات التمر و يبدا ياكل و يترحّم على والدين والدين الحكومة التونسية .. فبارك الله لكل من كان السبب في هذا الانجاز العظيم الذي يضاف لكراسة (مادامنا في موضوع الكرارس)  الانجازات العهد الشرعي..

وحتى لا اكون سلبيا و ناكرا للجميل فوجب التذكير انّ الجمهورية التونسية شهدت فيضانات في السنة الفارطة في بوسالم و عدد من مناطق ولاية سليانة ..
و قد اقتصر التدخل الحكومي وقتها على جولة  للمرزوقي بالبوط البلاستيك ..;و على ابتسامة المرابي اليهودي للخليفة السادس حمادي الجبالي.. ولا تمر و لا دقلة ولا عمار بالزور

source

mardi 16 avril 2013

حول حرق العلم وانزال العلم




ردّ على اللي يقارنوا بن انزال العلم من طرف السلفي في جامعة منوبة وبين احراق العلم من جمهور بنزرت:
- اولا لابدّ من ادانة كلّ من الفعلتين و ادانة مبرراتهما مهما كانت ودون تمييز
-ثانيا: التعامل مع اي قضية يكون فيها السلفيون طرفا يجب ان يكون برأيي اكثر جدية وعمق من
القضايا المشابهة واللي اسبابها تتعلق بالاحتجاجات الاجتماعية والنقابية او حتى الكروية.
*هاو علاش لازم التعامل باكثر جدية مع القضايا اللي يكون فيها سلفيون احد الاطراف:
 السلفيين - ولازم نوضح- موش الافراد اللي اختاروا يتدينوا وينتظموا في صلواتهم في المسجد ويطلقوا اللحية ويلبسوا القميص الافغاني و السروال القصير..هذيكة حرية شخصية و التزام ديني ما ينجّم حتى حدّ ينقدهم فيهم او يحرمهم من حقهم في ممارسته.
السلفيين اللي نقصدهم هي المجموعة تعرّف نفسها بالانتماء للسلفية وتميّز افرادها على ذلك الاساس ..يعني  مجموعة منظمة ومنتشرة في كل الجهات ،  تقسّم الولايات والمدن والقرى و حتى الاحياء الى دوائر صغيرة يتم ادارتها من أئمة السلفية و من "امراء" يعيّنهم الشيخ  وتعمل بتنسيق فيما بينها وعندها مرجعياتها الدعوية كالخطيب الادريسي و ميدانية كسيف الدين (أبو عياض) تتلقى منها الاوامر.
التنسيق يظهر مثلا في حملات نصرة المقدسات والاحتجاج على قناة نسمة وقت اللي الاحتجاجات كانت متزامنة ومنسقة في كل مساجد الولايات.. وكيما في احداث السفارة وقت اللي اقتصرت الاحتجاجات في محيط السفارة الامريكية في العاصمة وماخرجتش حتى مسيرة في اي من جهات الجمهورية..
هذه المجموعات عندها علاقات واضحة بشبكات التجنيد وارسال الشباب الى سوريا، وتتلقى تمويلات من الخارج (وهذا حسب بعض الشهادات حول حوالات ويستارن يونيون يتلقاها سلفيون في ولاية القيروان) وعندها علاقة مباشرة بتهريب السلاح وتخزينه واستعماله ضدّ تونسيين (كيما في احداث الروحية وبير علي بن خليفة وحتى في مقتل شكري بالعيد حسب هوية المشتبه فيهم اللي تم نشر صورهم من الداخلية).
هذه المجموعات لا تؤمن بالانتماء للجمهورية التونسية وتعتقد العلم التونسي (عن جهل او رغبة في تشويهه) علم استعمار وهناك من يقول انّو تم اعتماده اثر اتفاقية سايكس بيكو (...) و يصرّوا على استعمال العلم الاسود اللي ما ثماش اجماع من التونسيين حوله لارتباطه بتنظيم القاعدة واسامة بن لادن اللي كان اول من خرّجه للاعلام واعتمده رسميا وعلنا في السنوات الاخيرة. وهنا لازم نتساءلوا عن الولاء الحقيقي لهؤلاء؟ يعني هل يدينون فعلا بالولاء للجمهويرة التونسية والا لدوائر خارجية او جمعيات او تنظيمات في الخارج؟

 ------------------------------------------------------------------
يعني في الملخص:
حرق العلم في بنزرت هو عمل مدان بكل المقاييس لكنّه يقعد فعل مجرّد ومسؤوليته لا تتعدى مرتكبه و اللي يلزم محاسبته بالمناسبة.
انزال العلم في منوبة (وفي عدد من المعاهد والمؤسسات التعليمية ) من طرف سلفيين مش ردّ فعل في حالة غضب والا للاحتجاج على حادثة او قضية .. هي عملية ممنهجة تعبّر على انكار لقيم الجمهورية و رموزها وتستهدف الجمهورية في حدّ ذاتها .
و من المنطقي لازم التعامل يكون مختلف في الحالتين.

mercredi 3 avril 2013

المرزوقي خارج الزمن..كالعادة



المرزوقي كالعادة خارج الزمن ويعاني من اختلال في التوقيت ..
يتسرّع في احداث كان يجب عليه التريّث فيها .. ويكرّم اشخاصا او ضحايا لم يثبت القضاء جرما ضدّهم مثل استقبال الفتاة ضحية حادثة الاغتصاب مع خطيبها.
و يرقد اشهرا قبل ان يستفيق و يتذكر ان عالمة تونسية قد احرزت جائزة مشرّفة في مجال علمي مرموق .. ويتذكّر ان عليه استقبالها رغم انّها ابنة سيدي بوزيد الجهة التي رشقته وشريكه (السمّاك) بالفاكهة الخامرة.

وهنا قد يعفى الرئيس من المسؤولية الكاملة ليس باعتبار ضعف المدارك العقلية كما يروّج او كما قد يتبادر لذهن البعض ..
ولكن نظرا لأنّ المكلف بالفيّاقة الرئاسية المنظمة لتوقيت التكريم الرّئاسي على اتصال اوثق بمواعيد تكريم المخلوقات الريكوبويّة من عصابات الثورة و ميليشيات النهضة. وقد يكون اكثر حرصا على استقبال شيخ الحلزون البشير بن حسن كرّم الله ساقه باعتبار لما لهؤلاء من منفعة عامة (وخاصة) على مستقبل زيجته بقائد الثورة وملهمها راشد الغنوشي ..
ولا يهمّ تكريم من يعمل على نفع البلاد بالاختراعات والاعمال العلمية العظيمة

mercredi 6 mars 2013

عيّنة من صحافة مابعد الثورة : الصنف البنفسجي المستنهض..


محمد الحبيب السلامي - التجمّعي المستنهض:
سي الحبيب السلامي كان يحبّر معلقات في الغزل بإنجازات السّابع من نوفمبر وينشرها اسبوعيا ويوميا وكلما سنحت له الرغبة في بثّ الدّقيق على جريدة الصريح.
بعد الثورة اكتشف السلامي نهضويته المبطنة ليمزجها ببقايا الدقيق البنفسجي الغير مستعمل فيخرج علينا بعجينة زرقاء بنفسجية مقرفة...



مقالة كاملة  تستبق الزّمن لتعلن النّجاح المؤكّد لوزير الداخلية (الأقوى) في تاريخ تونس في مهمّته الجديدة  (تشكيل الحكومة)  ... وبالمناسبة تحذّره من المناوئين من يسار ونقابات وحاقدين على الاسلام الذين بالتأكيد سيضعون  العصا في العجلة ويعطلون المسيرة  فهم حسب سي الحبيب يرفضون النهضة لأنها حزب اسلامي وهم يرفضون قطعا النجاح لأي حزب اسلامي ... وهذا يبدو منطقيا باعتبار انّ الثورة قد اندلعت والشهداء قد عرّضوا انفسهم لنيران القنص لإقامة حكم اسلامي ولجلب راشد الغنوشي من لندرة حتى ان بعض الشهادات التي غيّبها اعداء الامة تؤكد ان البوعزيزي نفسه قد انتحر من اجل مشاكل في الهوية ولرغبته في تطبيق الشريعة ..

ونحن نضيف لسي الحبيب موجزا سريعا برصيد النجاحات السابقة لوزير الدّاخلية والتي كانت سببا للحكم الجائر عليه  من طرف  المعارضة:


- غزوة السفارة التي عجز الامن  في التصدّي لجانبها الخلفي مما مكن المتظاهرين من اقتحامها وحرقها جزئيا
-نجاح الأمن في رصد اكوام السلاح المنتشر في كل المناطق والصرامة الامنية الشديدة التي أدّت لكشف الشبكات التي تقف وراءها
-نجاح الامن في وقف نزيف الشباب التونسي  المهرّب لسوريا وكشفه من يقف  وراءها
-نجاح الأمن في وقف العنف الميليشي ضدّ الصحفيين والفنانين والمعارضين بمن فيهم اعضاء المجلس التأسيسي والوزراء السابقون اللي كلو طرايح لا لشي الا لانهم عارضوا النهضة
- كشف المؤامرة التي ادّت لقتل شكري بالعيد باعتبار انّ التحقيق اللي توقف عند سائق الفيسبا واللي بالمناسبة ما فيبالوش شكون يخلص فيه وكذلك الزوز المكلفين بمراقبة المنطقة لمدّة اسبوع كامل واللي على ما يبدو ماكانوش يعرفو بعضهم وما يعرفوش شكون .مكلفهم بالمهمة واشكون يخلص فيهم .
-نجاح الامن في التصدّي حماية نشاط الاحزاب السياسية المعترف بها والمرخّص لها  واللي تتعرض لهجمات من ميليشيات حماية الثورة اللي بالمناسبة تستثني دائما اجتماعات حركة النهضة ..

فبكل هذا الرّصيد من النجاحات نعتقدو انّ سي الحبيب السلامي محقّ في حكمه على ولاية علي العريّض القادمة واللي بالتاكيد ستكون مكللة بالتوفيق لو يخلّيها اعداء الاسلام..

mardi 18 décembre 2012

الصورة الاقرب لما حدث في سيدي بوزيد في الذكرى الثانية للثورة



الصورة الاقرب لما حدث في سيدي بوزيد يوم أمس:
--------------------------------------------
يوم 16 ديسمبر 2012:
- نصب خيم من انصار الجبهة الشعبية لتقبل "العزاء في الثورة".

-خيم سوداء من لجنة 17 ديسمبر لحماية الثورة (ليست رابطة حماية الثورة) تعبيرا عن حزنهم وعدم رضاهم عن الحصيلة اللي يعتبرونها هزيلة بعد سنة من الانتخابات وسنتين من اندلاع الثورة.

-خيم من حزب التحرير تحمل عبارة "نقطة حوار"، المشرفون عليها قادمون من سوسة و احضروا معهم  كميات كبيرة من الاعلام والملصقات والمطويات والبيانات.

-  حركة النهضة بسيدي بوزيد تشرف على لجنة التنظيم للتظاهرة اللي اطلق عليها (المهرجان الدولي للثورة) و الممولة من ميزانية وزارة الثقافة ،اللجنة تضم اسماء من المكتب الجهوي لحركة النهضة كمحمد طاهر شكري ومحمدالصغيّر نصري (الذي  بالمناسبة يترأّس الرابطة الجهوية لحماية الثورة ).

-ليلة الاحتفالات التوتر كان على أشدّه  خاصة بين مجموعات من الشباب والمخمورين وجماعة الجبهة الشعبية وصلت حد تبادل العنف وتمزيق اللافتات واصابة يوسف جلالي (عضو لجنة حماية الثورة) بأداة حديدية في يده.

يوم 17 ديسمبر 2012:

الحاضرون ودورهم في الاحداث:
1/على المنصة: رئيس الدولة ورئيس المجلس التأسيسي ووزير الفلاحة (الذي حضر عوض رئيس الحكومة اللي اصيب بتوعك صحي يومي 16 و17 ديسمبر وتعذر عليه الحضور).

2/الجمهور كان متكوّنا في نسبة كبيرة من متساكني مدينة سيدي بوزيد ومن نساء وأطفال ومن شباب الاحياء اللذين كانوا فوق الحيوط والاسطح المحيطة بالساحة ..اغلبهم كان يعتبر التظاهرة مناسبة للترفيه و الفرجة  في الرؤساء و"تبديل الجوّ" في أوّل أيام العطلة المدرسية.

3/جماعة الجبهة الشعبية بمختلف فصائلها وكانوا واقفين بجنب خيمة العزاء ومحضرين معهم لافتات فيها شعارات تتعلق بالتنمية والتشغيل الخ.

4/حزب التحرير يتعزز بوصول حافلتين من الانصار واحدة من العاصمة وواحدة من سوسة وينتشر اعضاء الحزب وسط الجمهور ويرفعون الاعلام البيضاء والسوداء، ورضا بالحاج يصل بالتوازي مع الوفد الرسمي ويتابع  الاحداث من خيمة الحزب (حوالي 100 متر على المنصة الرسمية).

الاحداث حسب التسلسل الزمني:
-اثناء تواجد الوفد الرئاسي في مقبرة البوعزيزي (20 كيلومتر على مركز المدينة) مسيرة الجبهة الشعبية تحاول اقتحام الساحة من الجهة الغربية (امام منطقة الأمن ومركز البريد) لكن طوقا (كوردون) متكونا  من الامن والجيش يعترضها ويمنعها من تجاوز الحاجز.

- وصول الوفد الرئاسي الى مقرّ الولاية .. التوتر كان ظاهرا على الفريق الرئاسي والمشرفين الامنيين.. في آخر لحظة يتمّ الغاء الكلمة اللتي كان من المنتظر ان يأدّيها محمد بن سالم وزير الفلاحة بالنيابة عن رئيس الحكومة ، ومسؤول رئاسي يقول له "اللي من الافضل ما ياخوش الكلمة".

- المنصف المرزوقي يؤدّي كلمته والجمهور لا يظهر تفاعلا كبيرا معها  لا بشكل  ايجابي ولا بشكل سلبي .. فقط عندما يصل المنصف المرزوقي للجزء الذي يذكّر فيه الحاضرين ان "الحكومة شرعية ولم تأت على ظهور الدبابات وانّها نظيفة وماهياش تسرق في فلوس الشعب"..وقتها الجمهور يبدأ بالصياح والتصفير  من كل زوايا الساحة.. . في الاثناء جماعة الجبهة الشعبية يلازمون الجهة الغربية وراء الحاجز بلافتاتهم وشعاراتهم. وبحضور لافتة تحمل اسم الجبهة في معتمدية اولاد حفوز. وعكس ما صرّح بهحمة الهمامي عن غياب نشطاء الجبهة واعضاء هياكلها المحليين.

- تحية العلم تتم بموسيقى مقتضبة من الفرقة النحاسية التابعة للجيش .. ولا يتمّ اطلاق الـ17 طلقة نارية المفترضة  ..عدد الطلقات لم يتعدّ العشر طلقات.

-المحامي محمد عماري جلالي (المقرب من حزب المؤتمر) يتولى الكلمة ويقدّم مصطفى بن جعفر .

-رئيس التأسيسي يبدأ كلمته وتتعالى اصوات احتجاجاتمن الناحية الشرقية ..من جهة خيمة رضا بالحاج ومن وسط الجمهور تتهمه بالعمالة وبالصهيونية ..هناك اصوات بدات ترفع شعار "ديقاج يا صهيوني".  وللتذكير مواطنو  سيدي بوزيد يتّهمون مصطفى بن جعفر بالعنصرية والجهوية وبأنه يمثل طبقة اجتماعية ارستوقراطية من صفوة "بلدية العاصمة" جراء تعامله مع نواب الجهة  ونواب العريضة بما يعتبرونه خشونة ...زيادة على انّ منتسبي التيار السلفي يتهمونه بالعمالة لفرنسا ويستشهدون تصريحاته اللي اعتبروها قابلة للتطبيع مع اسرائيل.

- مراهقون فوق سطح المطعم المقابل للمنصة يصفّرون ثمّ يقذفون المنصة بالحجارة.

-الحرس الرئاسي يتولى حماية الرئيس وينزله من المنصة.. ثمّ يدخل به لمقر الولاية ويخرجه من الباب الجانبي.
-فوضى كبيرة والجمهور  في مقدمة المنصة يبدأ بالصياح "ديقاج ديقاج" ويحرّك الحاجز الحديدي.. الامن ينسحب من الناحية الغربية  من امام مسيرة الجبهة الشعبية .. وانصار الجبهة يدخلون الساحة ويركضون نحو المنصة..احد شباب الجبهة يتم رفعه على الاعناق ويبدا الهتاف "الصدام الصدام حتى يسقط النظام"... مجموعات من الشباب يصعدون فوق المنصة ويرمون الكراسي في كل الاتجاهات .

-جماعة حزب التحرير براياتهم السوداء ايضا يصعدون مع شباب الجبهة فوق المنصة .. ويرفعون لافتة كبيرة فيها حديث الرسول صلى الله عليه وسلم " فكوا العاني " وفيها شعار "الحرّية للمساجين" والمقصود بيها هوما مساجين التيّار السلفي.

الحدث من وجهة النظر الاعلامية :
1/ صوّرته وسائل الاعلام  اللي تعتبر نفسها حايدةوحها محايدة واللي هي في الواقع اقرب للمعارضة كعملية طرد المرزوقي وبن جعفر وبالتالي سقوط شرعيتهم الانتخابية باعتبار انخفاض رصيد الشعبية متاعهم.

2/صوّرته وسائل الاعلام المقربة للحكومة او الموالية لها كاعتداء على الشرعية وممثلي الشعب المنتخبين وبالتالي اعتداء صارخ على امن البلاد واستقرارها. ومن جهة اخرى ثمة وسائل اعلام موالية لحركة النهضة لم تقبل الرفض الشعبي الشديد للحكومة باعتبارها الحركة المهيمنة عليها والرفض الشعبي لكل من رئيس الحكومة وحتى وزير الفلاحة اللي كان حتى وقت قريب من الوجوه النهضوية المقبولة شعبيا.

هذا من ناحية الرؤية للاحداث.. اما من ناحية تحديد هوية المتسبب في اللي صار تختلف الآراء والنظريات والسيناريوات:

1/الجبهة الشعبية والمعارضة عموما تعتبر اللي صار نتيجة منطقية للسياسات الفاشلة اللي تنتهج فيها الحكومة..وهي بالتالي تحرّك يمثل تواصل للاحتجاجات اللي انطلقت قبل عامين في نفس البلاصة.

2/انصار الترويكا وخاصة حركة النهضة اللي اعتبرو الحجارة ملقاة حجارة شيوعية وراها اليسار الفاشل والصفر فاصل وبقايا التجمع ونداء تونس واعداء الثورة عموما

موقفي من الاحداث كشاهد عيان:
لكنّ و باعتباري شاهد  عيان .. اللي صار ماكانش وراه لا حزب التحرير ولا الجبهة الشعبية .. لأنو اللي صار كان مشابه لحدّ كبير للي صار في 2010 .
المسيرات المنظمة والتحركات الحزبية المحضرة سلفا كانت في اتجاه وتفاعل الجمهور الحاضر كان في واد آخر.
مسيرة الجبهة الشعبية قعدت محصورة في جهة وحدة وما امتدش الشعارات متاعها لبقية الجمهور الحاضر.. وما ثمة حدّ حاول يردد شعاراتهم.
وكذلك بالنسبة لحزب التحرير اللي وزع الرايات بطريقة هندسية تغطي كل الجمهور ونجح في انو يغيّب العلم التونسي لدرجة جلبت انتباه المرزوقي اثناء اداء كلمته. لكنّ  نفس الشيء صار والناس تقبلوا وجود الرايات على بجنبهم بتسامح كبير وحتى التساؤل اللي اثارته اللهجة الغير محلية لرافعي بعض تلك الاعلام باعتبارهم قادمين من العاصمة وسوسة مامثلتش مبرر لا لطرد حزب التحرير او التعاطف معاه وتبني شعاراته.
يعني اللي صار كان من ابناء سيدي بوزيد (ومنيش باش نستعمل حتى توصيف لا احرار ولا ثوار ولا أي شيء) ..ابناء سيدي بوزيد اللي وقت اللي وقفوا في نفس البلاصة قبل عامين حاول بن علي يلقى تفسير للاحداث فلصّقها للاطراف السياسية المعارضة المتربصة بتونس واللي تحب على الفوضى والتخريب.
نفس التساؤل وقعت فيه الحكومة الحالية .. ومانجّمت تلقى حتى تفسير منطقي (بمفهومها) ومريح بالنسبة ليها الا الصاق التهمة بالمعارضة بمختلف اطيافها ..من يسار ونداء وبقايا النظام.
يعني ما تبدّل شيء ونظام بن علي اتضح انو موش اجهزة واشخاص بقدر ماهو منطق وعقلية.

الاحداث بالصوّر:



رافعوا الاعلام السوداء كانوا من اعضاء حزب التحرير الوافدين واللي كانوا يحطوا عصابات رأس تحمل شعار التوحيد




مسيرة الجبهة الشعبية تحتل الناحية الغربية للساحة ولا تتجاوز الحواجز الامنية

مسيرة الجبهة الشعبية بقيت ترفع الشعارات دون تجاوب من الجمهور الذي كان يراقب دون تفاعل

عكس ما صرّح به حمة الهمامي فإنّ نشطاء الجبهة الشعبية واعضاء هياكلها الجهوية كانوا حاضرين في المسيرة

لافتة للجبهة الشعبية بمعتمدية اولاد حفوز

المرزوقي يراقب اطلاق البالونات بعد انهاء كلمته

اعوان الجيش الوطني يسلمون ظروف العيارات الفارغة للضابط بعد اطلاق الطلقات الرمزية



احد الشباب الذين قاموا بقذف الحجارة على المنصة من السطح المقابل



محتجون  يرفعون خبز قبالة المنصة الرسمية ويصيحون ديقاج ..لمقاطعة كلمة مصطفى بن جعفر

احد شباب الجبهة الشعبية مرفوعا على الاعناق يرفع شعار "الصدام الصدام حتى يسقط النظام)

منتسبون للتيار السلفي يرفعون رايات العقاب فوق المنصة


لافتة فوق المنصة تحمل حديث الرسول صلى الله عليه وسلم حول اطلاق سراح الاسير في الاسلام



-رضا بالحاج يتولى الكلمة في خيمة حزب التحرير بمضخمات الصوت

بيان لحزب التحرير تمّ توزيعه في ساحة البوعزيزي





vendredi 13 juillet 2012

جاب ربي ما حطوش العلم

حدثني سائق الحافلة التي اوصلت وفد الحجيج الميامين من مدينة الثورة الى قصر المعارض بالكرم انّ الجماعة الحّوا و اصرّوا و تمسكوا بضرورة تثبيت علم النهضة في مقدمة الحافلة لكنه رفض مؤكدا لهم انّ في ذلك تهوّر و انّ تلك ممارسة تذكر بحزب التجمع المقبور و قد تقذف الحافلة بالحجارة جراء ذلك .. فاقتنع الجماعة على مضض و اكتفوا باعلام صغيرة على النوافذ...في الطريق نحو العاصمة و في كل استراحة و في كل مدينة او قرية و في كل منطقة عمرانية يوجد فيها تونسيون (مترجّلون) كان ركاب الحافلة الميامين يسمعون ما تيسر من العبارات الخادشة للحياء و يشاهدون ما لا يسرّ العين من فواحش الحركات و ارذلها ..حتى ركاب الحافلات الاخرى و راكبوا قطار الضاحية و حرفاء المقاهي كانوا يساهمون في تكريم الجماعة و اكرامهم بكل الطرق..ند وصولهم اقترب شيخ جليل من السائق و كان ابيض اللحية كثيفها كما يجدر ان يكون اي نهضاوي فخور بنفسه و قال: و الله عندك الحق ..كي ما حطيناش العلم خير.

mercredi 25 avril 2012

حكاية من ارشيف الثورة


قام من نومو مفجوع كيما كل يوم  .. جبد البورطابل شاف الوقت ..السبعة متاع الصباح .. حسّ براحة كبيرة و قرر يرجع يكمل نومه .. موش ماشي يخدم اليوم .. نهار آخر منقوب موش باش يغيّر حتى شيء..
حسّ الشمس تضربلو في وجهه .. الشبّاك محلول .. اعوذ بالله اشنية ها الصباح ..
قام يسكّر في الشباك ضربتو نسمة باردة متاع الصباح..
حسّ خشمو ياكل فيه .. عطس مرّتين و حكّ عينيه .. بقية متاع الكريموجان متاع البارح..
غاز الكريموجان بعد الثورة اقوى من غاز بن علي .. يلزمم تاخذ عدّة ادواش و حمام كان لزم  باش تتخلص من اثاره..
يقولو انو غاز اسرائيلي الصنع .. جابتو حكومة الثورة ..
سبّ رئيس الحكومة ..سبّ وزير الداخلية.. سبّ قائد الاركان .. سبّ فرق النينجا و فرقة النمور و فرقة الفهود و فرق الضباع و سبّ اعوان الامن و ابناءهم و زوجاتهم و أسرهم الموسّعة فردا فردا ...
الكلاب
و ختمها بلعن الثورة ..
الثورة هي السبب
قبل الثورة كان يكتفي بسبّ شخص واحد .. اليوم تعددت السلطات و كثرت الحكومات و ماعادش عارف موطن الدّاء ..
ربما يكون موطن الدّاء في الثورة نفسها ..
يلزم سبّ الثورة
لعنة الله على الثورة .. و لعنة الله على اللي سمّاها بالثورة المباركة .
بداية جيّدة ليوم منقوب ..


حكومات ما بعد الثورة ..نينجا ..وحوش و عصا غليظة كعصا جامبو الجبار



تذكّر القضية المهمّة مبعد التسعة متاع الصباح ..
اذا يكمّل في المزاج المتعكر هذا ..ممكن يفسّد كل شيء ..لذلك فكّر في حاجة ممكن تحسّنلو مزاجو و ترفع المعنويات .. فكّر فكّر ما لقى شيء.
تحت الدوش حس بروحو فاق شويّة ..
حاول يغسل خشمو مليح بالماء باش ينحي بقايا الكريموجان ..

التسعة شدّ الثنية .. ضربتو النسمة متاع الصباح مرّة اخرى .. بدا يتفرهد..
حلّ الراديو يلقى المذيع يتحدّث عن مواجهات الأمس في سوريا و ينقل الاحداث بكل دقّة ..  حمص ..ادلب .. درعا .. ريف دمشق ..
قعد يثبّت في الاذاعة باش يتاكد انها اذاعة فعلا تونسية .. غريبة.. اذاعة تونسية تبث من داخل البلاد التونسية و لا تغطي احداث صارت في قلب البلاد و في عشرات المناطق الاخرى .. الاعلام التونسي ما يضوي كان على البراني .. ما يستعرفش بمسيرات الشعب .. و ما يغطيش قمع وزارة الداخلية التونسية .. فقط يغطي قمع و ارهاب كتائب  بشّار ..

التسعة و ربع متاع الصباح .. تعدى قدام وزارة الداخلية .. كي العادة محاصرة بالاسلاك الشائكة .. غريب امر داخلية تونس .. موش كان الاولى انّهم ينظّفو ارواحهم و يبدّلوا اساليب عملهم و يحترموا المواطن و يحاسبو الفاسدين ؟؟ خير ماللي يقعدو مسكرين على ارواحهم في اقفاص حديدية يتفرّجو في المواطنين من وراء الحواجز و الاسلاك؟؟

مازال ربع ساعة .. برشة وقت .. قصّ الكياس وقف قدام واحد من الاكشاك متاع الجرايد ..
الصّريح "مسيرة بنكهة اللاكريموجان"
الشروق " عودة العنف الى شارع بورقيبة "
ما تبدّل شيء .. مازل طيف عبد الوهاب عبد الله يمرح فوق اكشاك الجمهورية

عجبو عنوان وحيد متاع جريدة الصباح "وزير الداخلية يستقبل اعضاء من المجلس التأسيسي"" ..
شرى الجريدة و وقف تحت الشجرة ..جاو زوز من ناس وقفو بجنبو .. مناظرهم تأكد هويتهم اكثر من اي بطاقة تعريف او كارت سرفيس .. حنوشة متاع داخلية..
لعن الشيطان و انتقل للضفة الاخرى للشارع.. فمة حيط قصيّر تحت شجرة .. يلقى كرذونة محطوطة فوقو ..ربما فمة شكون قاعد فيها .. يقعد فوق الكرذونة و يحل الجريدة ..

قربت التسعة و نصف .. نوقس التاليفون ..
- آلو ..صباح الخير ..
- صباح الخير قمت من نوم ؟؟
- ايه قمت و هاني قريب نوصل .. قلي انتي وين توّة ؟؟

تلفت على اليسار يلقى بنيّة لابسة بالازرق .. مرايات شمس في عينيها ..
قام من فوق الكرذونة .. سكر الجريدة ..


vendredi 28 octobre 2011

اوّل مراحل سيناريو فرحات الراجحي








مباشرة اثر اعلان كمال الجندوبي اسقاط قائمات العريضة الشعبية في دائرة سيدي بوزيد و دوائر اخرى خرج عشرات المواطنين الى الشوارع تعبيرا عن غضبهم من هذا القرار.. علما انّ قرابة قائمة العريضة بالجهة تحصلت على حوالي 50 الف صوت في انتخابات المجلس التأسيسي وهو ما يقارب ضعف عدد اصوات القائمة التالية (حركة النهضة).



كل هؤلاء المواطنين عبّروا عن غضبهم الشديد و سخطهم على هيئة الجندوبي التي لم تقدّم سببا مقنعا لالغاء مقاعد العريضة .. فحسب رأيهم اغلب الاحزاب التجأت الى تمويلات مشبوهة كحزب البي دي بي و التكتل و حركة النهضة و الاتحاد الحر و آفاق تونس . و اغلب الاحزاب ايضا تعود الى حزب التجمّع المنحل و على رأسها اشخاص كانوا اعضاء حكومة بن علي الاخيرة و التي تسببت في مقتل مئات التونسيين. كمال مرجان رئيس حزب المبادرة اكبر كتل التجمّع المنحل يمثل دليلا صارخا على سياسة المكيالين التي استعملتها هيئة الجندوبي ..فمرجان كان وزير خارجية بن علي وهو من قام بتسيير البلاد عشية اربعطاش جانفي رفقة رشيد عمار وهو من امدّ بن علي و عائلته بجوازات سفرهم و ذلك ايام بعد فراره من البلاد. علما انّ مرجان وقتها كان وزير خارجية اوّل حكومات ما بعد الثورة.

فحسب متساكني سيدي بوزيدلا يعقل ان يمنح كمال مرجان الترخيص و تمنح قائماته مقاعد في التاسيسي في الوقت الذي تحرم فيه قائمات العريضة من ذلك رغم انّ الحامدي ليس باجرام كمال مرجان.

- اثر تجمّع هؤلاء المواطنين تمّ التوجّه في مرحلة اولى الى مقرّ البلدية و احراقه بالكامل تحت انظار الجيش الذي قام بالانسحاب من المكان .

ثمّ توجّه محتجّون آخرون الى قصر العدالة حيث قاموا باخراج كل محتويات المبنى من حواسيب و ملفات و حتى ملابس المحامين السوداء و احراقها.

احد ضباط الجيش عبر بسيارته الهامر الشباب المتجمهر في الشارع و قام بتحريضهم على قوات الشرطة و الحرس قائلا:" نـ ****** امهاتهم .." قبل ان يمضي الى وجهة مجهولة.في الاثناء قام عدد آخر من المحتجين باقتحام مركز تكوين مهني و احراق اجزاء واسعة منه.

ملخص الموضوع انّ شريحة واسعة من مواطني سيدي بوزيد كانو يرون في تيار العريضة الشعبية الحركة السياسية التي ستغيّر واقعهم اليومي ..الكثير من الناس في الارياف الداخلية يثقون ثقة عمياء في وعود الهاشمي الحامدي فهو يحدّثهم بلغة يفهمونها جيّدا ..لغة ابن البلد ..ابن الدّوار ..ابن الريف الطيّب الصافي النيّة الذي لا يتوقّع منه غدر او مغالطة.

فطيلة خمسين عاما كان هؤلاء الناس يصدّقون الوعود الجوفاء التي ياتيهم بها مسؤولون متأنّقون يتكلمون لغة يصعب فك شيفرتها ..لغة مليئة بالارقام و النسب .. يحدّثونهم عن استثمارات بملايين الدينارات و انجازات و مكاسب و طرقات و مسالك فلاحية و احداثات جديدة لمواطن الشغل و النهوض بالفئات الاجتماعية المعوزة ..لكنّهم ينسون تلك الوعود بمجرّد ركوب المسؤول سيارته ..يعودون بعدها الى واقعهم القاسي المرير يتجرّعون الشعور بالعجز و القهر و الاحباط.

تلك الشريحة صوّتت للعريضة هذا امر اكيد .. لكنّ دور التجمّع في تجييش الناس و تأجيج انتمائهم العروشي و الجهوي و دور الهاشمي الحامدي القذر في تلميع صورة النظام و خيانته رفاق الدرب في حركة النهضة ايضا امور لا يمكن اغفالها.

و ما نجاح قائمات العريضة في اكثر المناطق تناقضا مع نوعية خطاب الحامدي كالمنستير و سوسة مثلا يؤكد فرضية المؤامرة التجمّعية.

لكنّ الطريقة التي تصرّفت بها هيئة الجندوبي و المبررات الضبابية التي التجات اليها لإسقاط قائماته لم تكن مدروسة ..فالكثير من التونسيين اليوم يعتقدون ان هنالك تلاعب بنتائج الانتخابات و هنالك ايضا ضعور واسع بالاحباط و اليأس لدى سكان الدواخل الذي لا يفهمون كثيرا لغة سياسيي ما بعد الثورة . فاغلب هؤلاء الناس خرجوا الى الشوارع خلال الثورة للمطالبة بالكرامة اوّلا و الخبز ثانيا .. وهم لا يفهمون كلاما معقّدا عن الدساتير و القوانين الدستورية و المجالس الدستورية و فصل السلط و استقلالية القضاء ..

اليوم بعد 10 اشهر من الثورة لم تتغير حياتهم كثيرا. بل بالعكس فقد ازدادت الاوضاع سوءا بارتفاع الاسعار و غلق الحدود مع ليبيا و انخرام الوضع الامني. هذا الشعور باليأس من الثورة ترسّخ بالحملات المتكررة في وسائل الاعلام عى من ينعتون بالمرتزقة و الرعاع و الهمج و الجبورة و غير ذلك من النعوت المهينة.

خلال شهر جوان الماضي تكلم مسؤول في نقابة الام في قناة نسمة واصفا الشباب الذي كان يقذف البوليس بالحجارة اثناء الثورة بأنهم مأجور و انّ (الساعة حجر بـ20 دينار). هذا التصريح المهين الذي يمسّ كل من شارك في الثورة مرّ مرور الكرام و لم يتم انكاره و الاعتذار عنه او حتى توضيح بعض جزئياته كاعلان هوية الطرف الذي يوزّع مبالغ الـ20 دينارا . . هل يمكن وصفه بالمجرم ام ينبغي تكريمه لانه من شجع الشباب على مقاومة البوليس و مواصلة الثورة حتى اسقاط النظام ..




هنالك شعور واسع بالاحباط اليوم بعد سحب قائمات العريضة التي يعتبرها الكثيرون تيارا سياسيا ولد من رحم تلك المناطق و نجح في كسب الاصوات في كافة جهات البلاد و خارجها. بالنسبة اليهم لا يهم ان يكون خطاب الحامدي و مرشحيه على ذلك المستوى من الشعبوية و (السذاجة) في بعض الاحيان.. الاهمّ هو انّ ذلك التيار السياسي فرض نفسه في اوّل موعد انتخابي و لأول مرّة منذ قرون يكون لمواطني تلك المناطق سيدي بوزيد و القصرين الذين ينحدرون من اصول بدوية عربية نقية عكس تونسيي بقية المناطق صوتهم و حزبهم الخاص الذي سيمثلهم في حكومة العاصمة .. هذا الشعور بالفخر سرعانما زال بالقرار الغير واضح لهيئة الجندوبي و اللي يراه كثيرون تعسّفا على جهتهم و تنفيذا لمخطط عنصري جهوي لكمال اللطيّف و الحكومة المؤقتة تكلم عنه الراجحي قبل شهور. وهو عدم التخلي عن السلطة لأيّ كان خصوصا اذا فازت حركة النهضة في الانتخابات. و اوّل مراحل هذا السيناريو هي ادخال البلاد في فوضى شديدة تستدعي الحكم العسكري و الغاء الانتخابات.



Powered By Blogger