بالله صوّتولي...

اثر مبادرة "حب العزيز" التي اعلن عنها السيد حاكم اراضي "و نورمال" , و شدانه الصحيح لمغادرة الكرسي قبل مضي ربع قرن على الأقل ... وهو امر موش نورمال (حتى طرف),
فإننا "الكلاندستان" نعبّر عن بالغ تأثرنا بهذه المبادرة و فائق تقديرنا لهذه اللفتة الكريمة , و نهنأ السيد الحاكم على هذا القرار الشجاع و هذه الحركة النبيلة للي بالمناسبة نثمّونها و نسبعوا عليها بالكمون الاخضر, و ندعو باش ما تكونش سحابة صيف (او باراصول) عابرة , بل تؤسس و تمهد و تهيّأ الاجواء و المناخ لسنة الحوار و التداول على الكرسي ...
وهو ما يطلق عليه السياسيون و خبراء الجيوبوليتيك "نظرية قاعة الحلاقة للرجال" , حيث يتم التداول على الكرسي بانتظام و دون فوضى خلاقة كانت ام عقيمة, ففي قاعة الحلاقة لا يخشى الجالس على مقعد الانتظار شيئا , بالعكس تلقاه يقرأ الجريدة و يتكيف و يحكي بكل حرية و اريحية و يستنى الدور متاعو من غير خوف و لا قلق , اما السيّد اللي قاعد على الكرسي ففيسع ما يكمّل و ما يكبشش برشة , يغسل راسو بالماء و شمبوان ليبيا و يخرج انظف ماللي دخل...
الله مصلي على النبي... انشاالله ربي يخرجنا خفاف نظاف ... ( هذا اذا دخلنا بالطبيعة)

فنحن الكلاندستان , و بعد تجريدنا من كافة مهامنا (وزير المقاهي و البشكوطو , الناطق بودورو باسم الحكومة , منظم عمليات الحرقة , و المستشار الخاص لدى السيد القوفرنور) و صعود بعض الاطراف الاخرى على الساحة السياسية و اضطلاعهم بمهام كبيرة و تآمرهم على شخصنا كيما فري رايس , ارابيكا و اللصة رقم واحد و نوفراج, و ذلك باستعمال القمع و الاقصاء و فرض العزلة ( كيما عملو يوم الأوووووش والدوش و البكوش ) , فإننا نعلن رسميّا نيتنا الاستيلاء عفوا الترشّح للكرسي اللي باش يفرغ على قريب انشاء الله
و حق الجلوس هو حق تكفله القوانين و التشريعات السماوية و الوضعية و المواثيق الدولية بما فيها ميثاق الفيفا و الكاف ( مقعد البدلاء) و قوانين شركة المترو و الكار و اللوائح المهنية لسيارات التكسي و اللواج اللي تعمل على توفير كراسي بالعدد الكافي دون اعتبار السائق, و ذلك لتمثيل الإئتلاف المتكون من : حزب " الكنتول و الطوب", حزب" اخطى راسي و اضرب ", حزب " اضرب و راسي يسد" , حزب "غدوة نحرق "(المهد الاول) , حزب "الخبزة" , حزب "الديك ", حزب "بدّلي الكابوسان لا نعمل اضراب", حزب "ماكش معايا راك ضدي ", و حزب "ميحي مع الأرياح وين تميح", وهو تجمع يضم معظم التيارات السياسية في البلاد و اللي رغم اني ما نتفقش معاهم الكل في الافكار و التوجهات فانا نشكرهم على الثقة و نوعدهم باش نكون عند حسن الظن.

و قبل ما نحط البرنامج متاعي باش نقدم الشعار و الايديولوجية متاع الكلاندستان في كليمتين باش ما تفدّوش وهو "الطبرنة محلولة و الجامع محلول و انتي دليلك ملك... أما ما تكسرلي كرايمي باش نجي معاك"

و في ما يلي برنامج العمل و المخطط الثلاثيني الأول اللي باش يغري السادة الناخبين باش يصوّتولي :

أولا باش نوفّرو اسطول من الفلايك و البالانسيات المجهزة بالجي بي اس و الانترنات و اللبلابي و الهرقمة و احدث انظمة الملاحة و اللي ما يكتشفهاش الرادار باش نحرّقو الشباب من اللي بلغو سن الحرقة , على خاطر الحرقة حق و واجب على كل الشباب النورملندي .

ثانيا ليترة متاع الايسنس باش تولي بـ 1500 مي خاطر بصراحة شوية علينا 1200

ثالثا الخبزة باش تولي توزن 25 قرام فقط و تنجم تاكلها في قدمة وحدة و تباع في الباكوات , كيما باكو المشوار او باكو القوشو , خفيفة ظريفة باش نحيّو المشهد المزري متاع العباد اللي هازة خبزة طولها 60 صانتي او اكثر, عيب قدام التوريست.

على ذكر التوريست باش نعمللولهم صندوق خاص نلمّدولهم فيه الفلوس باش اللي يجي يصيّف عنا يلقى اش يصرف و ما يعيشش على الخبز و السردينة و ماء السبّالة.

في الجانب الاقتصادي باش نأسسو لتقليد جديد قديم , وهو "هات آش عندك خير " وهو ما يعرف بـ "قر تجيك خفيفة" اي انو كل رجال الاعمال و الكرز و اصحاب المشاريع القوية مدعوين باش يعطيو (لــ ذاتنا الكريمة بطبيعة الحال) مما رزقهم الله , حلاله و حرامه و ذلك بالحسنى و من غير عمليات ضرب او قسمة, و اللي عندو بزايد ميسالش نقبلو عليه ما زاد على النصاب و ما فاق الحاجة.

في نفس السياق الحليب باش يولي بـ 2000 فرنك فقط , و هذا قرار لفائدة البقر اللي وكلناه و شربناه و زرقنالو و صرفنا عليه , و قريناه للي تخرّج , ما يجيش منو تقعد الليترة متاع الحليب بـ800

و دائما مع الابقار و المواشي فالابقار المتخرجة و اللي بلغت السن القانونية لمغادرة المراعي المجانية و ما نجمتش تدبر راسها في خدمة و الا حرقة و اللي مافاقتش على وضعها و ارتقت بروحها و حاولت تخرج من القطيع و تحل جلغتها على الملأ و ما عندهاش باش تفيدنا فنأمر بارسالها للبوطوار حفاظا على كرامتها و رأفة بها من التمرميد و الميزيريا المزمنة

و في نطاق توفير اسباب العيش الكريم للمواطنين , نعلن عن اعتزامنا استيراد نساء من عديد البلدان ضمن برنامج المرأة الشعبية حيث يتولى صندوق خاص تمكين الراغبين في الزواج من قروض ميسرة و مرأة شعبية حسب الشروط اللي باش يقع تحديدها فيما بعد و ذلك لتكريس مبادئ تساوي الفرص و المنافسة (خاصة انها المراة التونسية ماعادش في متناول المواطن البسيط و الشهار الزوالي)

باش نعلنو عن بعث اقليم امازيغي يتمتع بالحكم الذاتي و نخليو مسالة تحديد رئاسة الاقليم للسادة ازواو سومنديل الاوراغ و السيد قصة اون لاين , و نوصيهم إذا باش يولي فاها عرك و ضارب و مضروب , راهو نقصّها الحكاية من توة..

و في النهاية نطمّن الناس الكل انها حرية التعبير باش تكون موجودة بكميات كافية و في الاسواق و المغازات و المقاهي و المساحات الكبرى , كما نطمنهم انوّ العصا متوفرة دائما و ابدا, و اجهزة اولاد الحومة الامنية بالمرصاد لكل من يتجاوز الحدود و من لا يتجاوز الحدود...

; لذلك , بالله صوّتولي و ناشدوني ...أمّـا ما تقرقوش بيا برشة على خاطر فيسع ماناخذ بالخاطر

و السلام

ps:

ما تترددوش باش تقولولي مشاكلكم و مشاغلكم و مطالبكم , و استغلو الفرصة من توّة على خاطر مبعّد الخدمة هاذي باش تولي بالفلوس اي

payante