سي السيّد...

و انا واقف قدام الدّار نسمع في العياط و الزّياط عند جاري...
يا ستار أستر... اشنية المصيبة اللي وقعت ... زعمة اطرشقت عليهم دبّوزة القاز و إلا واحد من الصغار ضربو الكوران...
حاصيلو خذيت فجعة هي بيدها ...و جريت مع الناس نستجلي في الامر...اش نلقى...

نلقى جاري واقف مدنكس راسو, يرعش بكلّو ويتنفس بالسيف ,السورية طالعة من تحت السروال (ظاهر ماكل تدقديقة),
و السيّدة حرمه تصيح: "تكلم ترى, حلّ فمّك...."

مرّة أخرى و انا ماشي للخدمة ... يا فتاح يا رزّاق, يا ربي العمال عليك... نتعدّى على دار سي السيّد جاري: باب القاراج محلول ... الكرهبة تخدم ... وهو ليه ليه يمسح في الباربريز و الاجناب و الرتروفيزور.

من بعد هبط البلار و مدّت مرتو راسها من الشبّاك: يزّي هكاكة, ما عادش بكري عليّ..خلّيني نمشي

بقيت نتابع في الموقف من بعيد, نخزر للكرهبة خارجة مارش اريار من القاراج و سي السيّد يسكّر الباب و يقصد ربي للخدمة - على ساقيه-

انا بطبيعتي مانيش كلوفي و ما نلوّجش على القيل و القال و جبدان العباد, بقيت متذكر الواقعة و سألت العطّار على الغلبة.
يطلع اللي سي السيّد ما عندوش البرمي ( ما خلاتوش مرتو ياخذو)
و كل صباح تمشي هي في كرهبة العائلة و يمشي هو على ساقيه علما و انّهم يخدمو في نفس البلاصة.

اش باش نقول و اش باش نعلّق ... توا بالرجال هذوما باش نخرجو اسرائيل... و الا باش نأسسو لجمهورية الغد و نبنو مجتمع المعرفة ..

يا ذنوبي...

قالو حرية المراة قلنا ميسالش..
قالو حقوق المراة قلنا هاذي حاجة جات في القران و في حقوق الانسان..
قالك كيفاش الراجل يطلق المرا بالكلمة عملنالها قوانين هي زادا تنجم تبعث راجلها (يقضي) و تطلقو بالانشاء..
تكيفو معانا الدخان.. شيّشو معانا في القهاوي ..شربو معانا السلتيا.. زمّرو علينا في الفو روج..صفّرو معانا في القيراج و البيلوز..مقّصونا في الكياسات (شرطة و حرس)..

توّا بالله اش مازال ...مازالت هاك الحكاية...توا يزيد يتقدم العلم و يوليو يجيبو الصغار من غير مزيتنا...

االنساء متاعنا هوما العفريت متاع الدبّوزة اللي استنّى الاف السنين باش يخرّجوه منها و وقت اللي خرج تقلب على اللي منّعو منها...
يمكن الدوزة متاع الحرية هبطت على رؤوسهم فرد ضربة ..يمكن ثمّة شكون يحرّش فيهم ... يمكن ثمّة شكون كذب عليهم قالهم اللي هذا هو التحضر و التقدم و اللي النسا في العالم المتقدم هكة يتصرّفو ... زعمة نحن متقدمين على الجابون و الصين و دول شرق اسيا ...

في الانتظار
انا اوجه نداء استغاثة الى كل المنظمات و الهيئات و الجمعيات و قرين بيس و بريجيت باردو و الفيفا و تجمع الساحل و الصحراء باش يتدخلو و يشوفولنا حل...
يهزّونا للدرفور ... يطيّشونا في القطب الجنوبي ... يحطونا في المحمية مع القرودة و الاّ دب الباندا ... يتصرّفو...
المهم يحمو الفصيلة هاذي من الانقراض..
.ة