في انتظار تفسير حكومة الشمس للأحداث

نبدأ اوّلا بالترحّم على شهداء الوطن ، و نتوجّه بالخصوص بالتعازي الى المدوّن ياسين عياري اللي كانتلي معاه تجربة سابقة في النشاط الافتراضي من خلال تنظيم حملة مقاطعة الصحافة الوطنية سنة 2009 .

العديد قاعدين يتساءلوا عن المتسبب في قتل الجنود التونسيين خاصة في غياب بيانات تتبنى العملية من اي جهة كانت.

فمة شكون يتهم القذافي بتنفيذ تهديده الاخير بحرق شمال افريقيا .. و فمة كذلك شكون يتهم تنظيم القاعدة كردّ فعل لمقتل اسامة بن لادن.. و فمة كذلك (و انا انتمي للمجموعة الاخيرة) شكون يتهم الحكومتين حكومة الظل و حكومة الشمس كما سماهما السبسي... و همزة الوصل اللي تربط ما بيناتهم وهي وزارة الداخلية..

ايا كان المتسبب في قتل الجنود التوانسة فما يلزمش السكوت و الانتظار حتى تفتح حكومة الشمس تحقيقها ، و كانا نعرفوا السرعة الرهيبة التي تخدم بيها الحكومة المذكورة و النجاعة الغير عادية اللي تتميّز بيها التحقيقات .. و تنجموا تشوفو مسار التتبعات ضد بلحسن الطرابلسي في الكيباك و نهاية القضية اللي رفعها سليم شيبوب على البنوك الاوروبية ربح بمقتضاها مبالغ خيالية من فلوس الشعب ، و كذلك المراحل اللي بلغتها الحكومة في حصر التهم الموجهة ضد عماد الطرابلسي و الملفات اللي بعثتها لسويسرا باش تسترجع المليارات الموجودة في البنوك السويسرية و قضية قنص المواطنين خلال شهر جانفي و حرق الشابين في سجن الايقاف و تهريب قيس بن علي و و و و الاثلة ما توفاش ....

السبسي خلال الندوة الصحفية الاخيرة حاول بوسائل الستينات انو يعطي تفسيرات -يتصوّر انها منطقية- للاحداث اللي وقعت بعد تصريحات الراجحي... و منها انو المواطن التونسي اللي شفناه في فيديو الفايسبوك هو عون امن و مضروب بياجورة على راسو من الطابق الاول لدار لابراس .. علما انو المواطن كان ملقى على الرصيف المقابل لمدخل البالماريوم و ما نتصوّروش مواطن يمشي من وراء نزل الانترناسيونال الى البالماريوم (على ساقيه) و بآثار ياجورة هبطت على قباعتو من علو 6 امتار على الاقل..

على كل بنوعية التفسيرات اللي تتميّز بيها حكومات الشمس المتعاقبة ، فنتوقّع انو السيناريو الحالي للاحداث باش يكون على الشكل التالي :

تنظيم القاعدة تذكر اليوم بعد مرور 4 اشهر على هروب بن علي انو تونس تشهد انفلات امني و قرّر انو يهاجم البلاد من ثلاث جبهات الجنوب الشرقي و الجنوب الغربي و على طول الحدود الغربية مع الجزائر .. لكن علاش توّة بالذات ؟؟؟؟

خلال شهري جانفي و فيفري وقت اللي البوليسية سيّبوا البلاد و انسحبوا من مراكزهم و عطلو دورياتهم و سيّبوا آلاف المجرمين و اللصوص و قطاع الطرق على البلاد ، و ساعة ساعة يمارسو هوايتهم الجديدة متاع الاضرابات الاستعراضية .. وقتها زعمة الكونجي السنوي متاع القاعدة ؟؟و الا فترة الامتحانات في افغانستان ؟؟ و الا رجال بن لادن ربما كانوا يتابعوا كأس العالم لكرة اليد في السويد ؟؟

علاش ما تفطنوش كان اليوم لحقيقة الانفلات الامني ؟؟ زعمة يطلعوش من جمهور النادي الافريقي و بالاحداث اللي صارت في مقابلة الفريق السوداني اكدتلهم اللي البلاد على كف عفريت ؟؟

و الا زعمة تكون لتنظيم القاعدة علاقة قويّة باحدى الحكومتين ، و تحديدا حكومة الظل لأنّها تتلاءم في اساليب العمل مع اسلوب الحياة متاع التنظيم، فتدخل بذلك عملية الروحية في نطاق ارجاع هيبة الدولة و اعادة علاقات الحبّ و الوئام ما بين المواطن و الجيش بعد تصريحات الراجحي و بعد الوقفة الضعيفة في وجه كتائب القذافي في الجنوب؟؟

و في الاسابيع الماضية ،برشة تظاهرات كانت موجّهة ضد رشيد عمار و غضب المواطنين كان موجّه للشرطة و الجيش على حدّ سواء و ذبلت الصورة الناصعة متاع رشيد عمار و الجيش ..

انا مانيش نتّهم في حتى حدّ لكن السيناريو لحدّ اللحظة مازال ضعيف و يذكـّر بسيناريو 11 سبتمبر متاع امريكا (مع مراعاة فارق الحجم و مستوى الوعي للرأي العام)..

وزارة الداخلية حطت بيان فيه صورة لارهابي مسلح و خطير مازال يسرح في الطبيعة ، المفارقة انو نبيل بن محمد بن أحمد السعداوي

هو مواطن تونسي موجود في السجون التونسي طبقا لقانون الارهاب متاع 2003 و تنجّموا تلقاو اسمو في القائمة (البي دي اف) الموجودة على موقع السبيل اونلاين و للتأكد شوفو الرابط توة تلقاو اسمو رقم 843 (ثمة خطأ في كتابة الاسم بالعربية)

قد يكون انو السيّد هذا هرب من السجن مبعد 14 جانفي رغم انو اللي هربو كان لكلهم سجناء حق عام و مافيهمش حتى سجين سياسي وهاذي مصادفة اخرى (الانفلات الامني يستثني السجون السياسية).

قد يكون هذا الشخص تمّ اخراجه من السجن ضمن العفو التشريعي متاع مارس 2011 .. قد يكون كذلك انو تمّ تهريبه من السجن بطريقة ما و تسهيل اتصاله برفاقه القدامى و لما لا توفير بعض الاسلحة و الذخائر بطريقة عفوية..

و في انتظار السيناريو الرسمي .. ثبّتوا مليح في محيطكم .. في الطريق في مواقع العمل و وسائل النقل العامة .. توة تلقاو وجوه جديدة كانت بالامس تهتف بحياة بن على و اختفت بقدرة قادر بعد 14 جانفي لكنها عادت اليوم للتجمّع و الاجتماع و الظهور العلني بوجوه ابيضت من طول الجلوس في المخابئ المظلمة.

La couleur protectrice

- je ne sais pas ce qu'il y a dans ces bois ça me prend aux tripes..

(The village 2004)

الفحص عن أمر الثورة

لمن لا يعرف الثورة و لم يسمع بها يوما.. . و لمن كان مسافرا و قدّر عليه ربّي بأن عاد بعد 14 جانفي بعد طول غياب .. و لمن أطرده القذافي و ابناؤه بعد ان كانوا شائخين في خير الجماهيرية للعنكوش .. و لمن نسي ريحة البلاد بعد السنوات الطويلة في اوروبا و امريكا و بلدان الخليج .. و لمن نسيها أيضا وراء القضبان و في اعماق زنزانات السيلون الوطنية ...

لكل هؤلاء و غيرهم اريد اعلامهم بأننا عشنا الثورة ... ثورة لا شرقية لا غربية .. ثورة لم يكن يتوقّع حدوثها أحد ..حتى الشارني نفسه و الأستاذة لمياء الشيخاوي ..

هذه الثورة المجيدة التي يسميها اهل العاصمة ثورة14 جانفي و يسميها اهل القصرين ثورة 8 جانفي يوم المجزرة المريعة التي ارتكبها بوليس زين العابدين ،و يسميها اهل سيدي بوزيد ثورة 17 ديسمبر 2010 يوم احرق البوعزيزي نفسه بالديليون ..

كما ينعتها شيعة جمال عبد الناصر بالثورة العربية المجيدة ، و شيعة السادة ساركوزي و اليوت ماري بثورة الياسمين ، و يسميها بعض التوانسة الذين درسوا في العراق و عادوا بعثيين (نسبة لحزب البعث الذي اجتثّ من موطنه في العراق) بأنها ثورة يوليو جديدة ،

كما يصفها بعض التونسيين الذين يرون في كل جدار (ياجوري) من جدران الاحياء الشعبية جدار برلين، و يرون في اقسام البطولة الوطنية تصنيفا طبقيا و يصنفون معارك الفيراج بصراع الطبقات ، هم يسمون ثورتنا العظيمة بثورة اكتوبر اخرى قد تمنحهم فرصة جديدة لتحقيق الحلم الاممي الذي طالما طمحت اليه جموع العمال و المزارعين في ربوع بلاد الاعتصام الدائم*

هذه الثورة هي حسب شباب الثورة من مثقفي الفايسبوك (الذي هو في واقع الامر شباب التغيير و شباب التحول الذي ربّاه زين العابدين فأحسن تربيته) هي ثورة ........

اي انها حيوان ثديي، لبون، عاشب.. ويسمى ذكرها ثورا .. و له قرون طويلة .. و لم يُعرف الى اليوم اسم هذا الثور المبارك او عنوانه او مسقط رأسه او رقم بطاقة تعريفه الثورية .. كما لم يعرف له وجه الى الآن ..و لو اننّي بخبرتي الثورية الطويلة ارجّح انه ليس هناك ثور لثورتنا المباركة .. فهي ثورة هجّالة او مطلقة (اي فصع بها ثورها) او هي مقطوعة من شجرة فلا أصل و لا مفصل لها .. و كل من يقول خلاف ذلك فهو بالضرورة مخطئ او هو يعيش في زمن خارج هذا الزمن ..

الكشف عن أمر الثورة:

هنالك أمور كثيرة تمكنك من التأكد من حدوث الثورة منها على سبيل الذكر

إذا فتحت يوما جهاز تلفازك و وجدت وجها قبيحا (حاشا خليقة الرحمان) كان قبل اسابيع قليلة يصفّق و يناشد و يثمن و يعدد المكاسب و الانجازات بكل ما أوتي من قوة بن علي لسنة 2014 ، يسبّ صانع التغيير و يصفه بالمخلوع و ينعت زوجته بالحجامة و ينعته بزوج الحجامة ... فتأكد انّك امام احد ركاب الثورة..

( مع احترامنا لحجّامات بلادي و ازواجهنّ من رجال بلادي كذلك .)

إذا اشتريت جريدة بستة مائة فرنك فوجدتها تعجّ بالصور المفبركة بالفوطوشوب التي يظهر فيها زين العابدين في وضعيات مختلفة فهو تارة في صورة علي بابا يحضن جرّة مليئة بالذهب .. وهو تارة اخرى يرتدي زيّ هتلر و يمدّ يده في تحية الرايخ الثالث .. و في احيان كثيرة تظهر ليلى الطرابلسية في وضعيات فوطوشوبية و لا اخلاقية مع القذافي حينا و مع السيشوار احيانا .. فلا تفرك عينيك كثيرا .. فذلك الذي تراه ليس نجيب الشابي و ليس بن بريك و ليس الغنوشي و ليست بن سدرين .. انّه زين العابدين و ليلى .. انّك امام جريدة تركب الثورة و صحفيوها و رئيس تحريرها كذلك من راكبي الثورة ..

صحف كانت ترتزق من سبّ الناس و شتمهم و القدح في اعراضهم تحوّلت بقدرة قادر الى سب بن علي و القدح في عرض ليلى و شتم عائلتها فردا فردا ...تلك هي بركات الثورة

اذا مررت يوما امام حضبة من الناس يخططون لطرد مديرهم في الخدمة و تشنيف اسماعه بما تيسّر من بذيء الكلام لأنه اراد ان يطبّق عليهم القانون او هكذا خيّل اليهم .. فاعلم انّك امام مجموعة من الراغبين في ركوب الثورة .. و من اهم بنود الركوب على الثورة هو التدرّب على استعمال كلمة ديقاج المجيدة.

اذا مررت يوما امام مسجد و وجدت مجموعة من شباب غير مكتملي الرجولة يطلقون لحيهم و يلبسون القمصان الافغانية على السراويل الكمبا البريولي و سبادريات النايكي الامريكية .. و يرمقون الماشي من الناس و الجاي بنظرات ثورية و كأنهم من صحابة النبي الاكرم و بقية الناس من قوم نوح او لوط ...فاعلم يا صديقي انّك امام شباب يريد اقامة الخلافة عبر الركوب على الثورة ..فالثورة كما قال بعض حكماء الركوب على الثورات تجبّ ما قبلها.

إذا ذهبت الى بعض الشوارع او الساحات العامة و وجدت معلقات عن مؤتمرات لأحزاب لا يعلم اسمها غير مؤسسيها ، و لا يعلم عن اصل مؤسسيها و فصلهم شيئا وهم في كثير من الاحيان تجمعيون تائبون او من احزاب المناولة الذين يريدون مقعدا أماميا للركوب على الثورة المسكينة.

اذا وجدت يوما امراة و طفلا يقومون بالستوب على قارعة الطريق و اخذتك بهم الشفقة و الرأفة فتوقفت بسيارتك لمساعدتهم .. فخرج لك مجموعة من الشباب الثوري المسلح بالسكاكين و قضبان الحديد و العصي و الهراوات و قالوا لك : هات اش عندك.. يريدون يذلك مالك من اموال و ما عليك من هاتف جوال و ملابس ثمينة و حتى سيارتك فمن المرجح انك لن تراها ثانية ، و لن تستعرف لك شركة التأمين بالتعويض لأننا في إطار ثوري لا يطبق فيه القانون الاعتيادي.. عندها تأكد انّك قد عشت تجربة ثورية مباركة ، فتلك المراة و الفتى و العصابة المسلحة كلهم من ركاب الثورة قد فتح عليهم باب من الرزق لم يكن في حسبانهم.. كما ان شركة التامين ايضا من ركاب الثورة فهي لا لا تطبق من القوانين السابقة للثورة سوى تعريفة التأمين التي تقبضها نقدا و ما عدى ذلك فهو محرّم بقوانين الثورة .. و رجال الامن ايضا راكبون للثورة بغيابهم المستمرّ عن اداء الواجب و بقبضهم زياداتهم و منحهم الثورية عن استماتتهم في الدفاع عن نظام زين العابدين.

اذا دخلت بلدة و شاهدت سيارة الهامر العسكرية تملأ و تفرّغ في رجال بالزي الرسمي و الزي المدني تحت هتافات الديقاج الثورية فاعلم يا صديقي انّك امام شعب احترف التصفيق و المناشدة حتى فقد حواسّه جميعا و اصبح غير قادر على التمييز .. فكل من يرتدي البدلة هو بالضرورة فاسد و تجمعي و من يرتدي بدلة البوليس الرسمية فهو بوليس فاسد و مرتش لذلك يجب ان نقول له ديقاج حتى نركبه سيارة الهامر الثورية من الخلف و يمضي تحت طلقات الجنود الثورية .. هذا شعب يريد ان يغسل ملابسه البنفسجية .. بحليب ثورة لا يعلم عنها شيئا سوى انّها هبّت عليه دون سابق اعلام فرحلت بعقله و وعيه مع بن علي و ليلى و باقي الجوقة.

من ارشيف مسرح الدمى البرلمانية

للتذكير الكائنات الحقيرة اللي مازالت ليوم الناس هذا تحاول الحفاظ على شرعيتها (هههه) و هذه الشرعية هي في حقيقة الامر متمثلة في الشهرية البرلمانية لأنّ هؤلاء الرهط فقدوا الشرعية من نهارة اللي قاللهم بن علي "هيّو بنا نلعب" و حطهم كي دمى الباربي الصامتة اللي تغمّض عينيها وقت اللي حرّكوها و تكتفي بتحريك رأسها عند الضغط على الزرّ المناسب .

(بالطبيعة دمى الباربي القديمة لأنّ الباربي الحديثة قادرة باش تحلّ فمها و فمة بعضة الموديلات اللي تنجم تكوّن جمل مركبة و مفهومة و معبّرة)

البيان هذا خرج نهارين قبل فرار زين العبدين بن علي.. و فيه يعبّر النواب المحترمون عن أسفهم لما شهدته بعض الجهات الداخلية من (أحداث أليمة أخذت منحى خطيرا .. و أفرزت واقعا مؤلما) ، يحبّوا يقولوا ثورة.

الثورة اللي يتشدّقوا بيها طيلة الجلسة الفايتة في استعراض بائس للقطرات القليلة من ماء الوجه المتبقية.. كانوا ما ينجموش ينطقوها حتى مجرّد النطق ، حتى للضرورة التعبيرية تجنبا للتمطيط و التطويل الزائد عن اللزوم.

Cycle de vie d'un partie parasite tunisien

رسم بياني لكيفية عمل الاحزاب الطفيلية التي كانت تتمعش من خيرات التجمع و تعيش في ظله

اخترنا لكم الحزب التحرري كمثال ، لكن الرسم صالح لبقية الاحزاب.

المرحلة الاولى: لكل حزب ينوي الانضمام لجوقة التأييد و المناشدة ان يستر عورته بالحزب الحاكم حتى يصبح لديه حدّ ادنى من الهيبة و الاحترام و ذلك لما للتجمع من قدرات ترهيبية عالية و امكانيات تنسيقة كبيرة مع الامن و البوليس

المرحلة الثانية: يتمّ اختيار نسخ معيّنة من هذه الاحزاب (بوجمعة كمثال ) حتى يتم ادراجها في العروض المسرحية للمداولات البرلمانية

النسخ هاذي تكون عادة على قدر كبير من الرقعة و ممكن تتوقع منها ابداعات كبيرة كيما النائب بوجمعة اللي قال البارح مثل على قدر كبير من البلاغة و الفصاحة وهو :

بوس الافعى و الا طيح في بير

المرحلة الثالثة: عند حدوث اي مكروه للحزب الحاكم تقتضي التعليمات (كيما يقولو في الشرطة ) انو يتم التخلص من رمز الحزب الاوّل كيما صار في الوحدة الشعبية و الام دي اس و الحزب التحرري،

المرحلة الرابعة و الخامسة : بعد القاء رمز الحزب في البوبال يتم الانتقال الى عملية نشر غسيل واسعة ، و يا حبّذا تكون على الملأ كيما صار في جلسة البارح .

لكن الفيصل في هذا الكل هو الشعب.. و الشعب كان متفرّج طوال كل هذه السنوات، و وقت ما كانت القلابس تشطح في البرلمان كان بقية الشعب لاهين في امور اخرى. لكن اليوم كل شيء وفى و انتهي و الكائنات الطفيلية هاذي مصيرها البوبال مع رموزها.

تنحّيلي شرعيتي انّحيلك شرعيتك

روضة السايبي: في ابعاد الجلسة الاخيرة لبرلمان الدّمى المتحرّكة

ما لقيتش حتى عنوان آخر للجلسة التاريخية لمجلس الأمّة بتاريخ 7 فيفيري 2011، الا أني نسميها بإسم الشخصية الأبرز و اللي برزت بصراحتها الكبيرة و الرجولية اللي هبطت عليها فجأة بعد ما كانت هي و أسرتها يمثلوا نسخة مخبرية مصغّرة عن عائلة بن علي و زوجته الطرابلسية . تبّعوا مليح:

روضة السايبي سيّداتي سادتي هي حرم السيّد منذر ثابت. وهي كذلك نائبة في مسرح الدّمي المتحرّكة ( اللي كان بن علي يحبّ يسمّيه برلمان ) عن الحزب الاجتماعي التحرري. علما و أنّ السيّد منذر ثابت هو نائب في نفس البرلمان المذكور كممثل عن الحزب الاجتماعي التحرري ، و هو في نفس الوقت رئيس الحزب الاجتماعي التحرّري. يعني أنّ الأسرة التحرّرية المحترمة كانت تتمتّع بمنحة شهرية قدرها 5 آلاف دينار من فلوس دافع الضرائب التونسي زيادة على الامتيازات العينية الأخرى و الاستدعاءات الخصوصية لقصر قرطاج لسي المنذر من طرف بن علي ، و الحضور الدّائم في نشرات الاخبار.

من ناحية أخرى ، السيّد منذر ثابت هو الوحيد بين قادة الأحزاب الطفيلية اللي كان يحفظ عن ظهر قلب دوره في مسرحية الدّمى المتحرّكة متاع بن علي و كان الآداء متاعو فوق كل شبهة بل أنّو في كثير من الأحيان يخرج عن النّص و يرتجل. من اهمّ ابداعاته في هذا المجال هو تقدّمه بمشروع تنقيح جديد للدّستور يمكّن رئيس الجمهورية من سقف آخر للعمر الاقصى للترشّح. علما و أنو يعرف بينو و بين روحو انّو بن علي وفات الصلوحية متاعو عندها مدّة، الا انّو ككل تاجر غشاش يتعمّد بيع الياغورت الفاسد على انّه صالح، واصل المناشدة لآخر يوم من ايام بن علي.

يقول القائل شكونهم افراد العائلة التحررية و علاش افامهم مسكّرة طوال المدّة الفارطة ، و علاش هبط عليهم الوحي فجأة. للتذكير السيّدة روضة هي نائبة عن ولاية سيدي بوزيد، الولاية اللي شهدت انطلاق الثورة و كانت الاوضاع فيها محتقنة منذ سنوات ، علاش السيّدة الفاضلة ما تكلمتش على جهتها ؟ علاش السيّدة الفاضلة ما ورّاتش فصاحة اللسان اللي عندها (و اللي بالمناسبة تذكّر بحارزة الحمام ايام زمان) ؟ وين كانت طوال شهر ديسمبر وقت اللي المظاهرات كانت يومية في سيدي بوزيد و كان الاهالي يتحمّلو لوحدهم ضغط القوة البوليسية متاع بن علي تحت التعتيم الاعلامي المعهود في مثل هذه المناسبات.

الاسئلة هاذي و غيرها موش صعيب برشة الاجابة عليهم، لانو في شهر ديسمبر الامور لاباس و النظام واقف على ساقيه و الأمن شادّ روحو و التجمّع لاباس و المنحة موجودة و ربي يخليلنا بن علي.

مبعد وقت اللي هرب بن علي ، اتضح انو سي المنذر ثابت في وضعية تسلل، لأنّ اعضاء الحزب متاعو حبّو يتبرّؤو منّو و ينظفوا ملابسهم الداخلية بمسحها في رئيس الحزب، و رحم الله شهداء الثورة و ديما يمشي.

حتى في المرحلة هاذي، السيّدة روضة ما كانتش عاطية اهمية للموضوع. يكفي انّها متمتّعة بالمنحة البرلمانية . و بقلة للباقي.

لكن البارح السيّد رئيس المجلس نطق الكلمة السحرية اللي فيّقت جماعة التحرّري ، و خلاتهم ينطقوا كيما البرابول مبعد الباتش..

رئيس المجلس قال اللي المجلس باش يتحلّ ... مما يعني .. المنحة البرلمانية .. الامتيازات .. الحصانة .. الحزب .. لكلو يمشي في خبر كان..

خمسة ملاين في الشهر تمشي هكاكة ؟؟ مهبول اللي يعتقد انّ جماعة التحرّري سوف يسكتون .. كلا و الف كلا ..

يلزم نطلعو لفوق هههههههه كيما جماعة لي مونتانيار متاع الثورة الفرنسية هههههههه ، و طلعت السيّدة روضة في المقاعد العليا ، و عملت عركة و صياح و تقطيع شعر ...

ملا برلمان و ملا احزاب و ملا مواقف يحطو في ارواحهم فيها ..

حاصيلو ناس بكري قالو اللي اذا كان الكلام فضة فالسكوت ذهب ، و الجماعة عملو استعراض بهامة من الطراز الرفيع.. استعراض قلابس من غير مؤطر.. من غير نصّ.. من غير مخرج

انا تمنيت لوكان قدمو استقالة جماعية و كفى الله المؤمنين القتال .. على الاقل تبقى الصورة المبهمة و الضبابية متاعهم كمعارضين وهميين، قفافة وقت السلم و قوّادة زمن الثورة...خارجين من الحكومة وقت بن علي و مقصين من كل تمثيل بعد الثورة.

و يقعدلهم ما يستروا بيه انفسهم، اما للاسف.. البارح سقطت ورقة التوت و كافة اوراق الاشجار و اوراق السلق و المعدنوس و الكلافز و الخضروات المعروف منها و المجهول .. قعدو عرايا من كل شيء..

يهددوا في بعضهم بنزع الشرعية ..

و كيما قالت المدوّنة سنية مخلوف:

وين القبقاب يا و سيلة عيّط للحارزة روضة ايجا يا خديجة نشفلو شرعيته. حماة الحمى. ايّا الثورة شاحت البس دبشك. روّح

فنقوللهم اللي شاح يلبس ...اللي شيّح شرعيتو يمشي يروّح... مع تحذيرنا لكافة قرّاء المدوّنة للحفاظ على شرعيتهم

ما تفرحوش برشة ..رانا مازلنا في الدّور الأوّل

مانيش باش نكتب تدوينة للشماتة في زين العابدين بن علي و الا في ليلى الطرابلسي و الا عصابة السرّاق الهاربين منها و اللي مازالو في تراب الوطن في اعلى المناصب كذلك.

انا قاعد نشوف في الشعب الكريم يهنّي في روحو بنجاح الثورة (الثورة المباركة كيما سمّاها محمد الغرياني البارح على قناة حنبعل) ، و نسمع في عشرات المحللين اللي قاعدين يتداولو على ستوديوات تونس 7 و حنبعل و نسمة و ينفخوا في الشعب بالانجاز التاريخي اللي حققو ، و الثورة اللي دخلت التاريخ كأعظم الثورات في تاريخ الانسانية و الثورة الفرنسية و الثورة البلشفية و ثورة الضباط الاحرار في 52 ما تجي شيء قدامها.

بطبيعة الحال مانيش باش نشكك في اخلاص الشباب اللي خرج للشوارع في ديسمبر و جانفي ، و مانيش باش نطعن في دماء الشهداء اللي خلاو دين كبير في رقابنا جميعا.

لكن فمة اسئلة يلزم تطرح حاليا:

هل انّ اللي صار لحدّ الساعة يعتبر ثورة ؟

شنوة اللي تبدّل بخلاف وجود الشابي و ابراهيم من قادة احزاب معارضة الي وزراء في الحكومة؟

هل أنّ استمرار وجود تشكيلة من وزراء الحكومة المجرمة (التي كانت لحد اسابيع قليلة ماضية تقنص المواطنين في الشوارع و الساحات في كافة مدن الجمهورية ) في الحكومة الحالية يمثّل مكسب و الا تهديد للثورة ؟

وقت اللي نتكلمو على حكومة معينة ، من وقتاش نعملو الفصل بين مواقف وزراء نفس الحزب و نعملو تقسيم بين الوزير النظيف و الموش نظيف، او الوزير الضالع في عمليات التقتيل و الوزير البريء؟

هل يعقل مثلا ان نقول انّ وزير دفاع اسرائيل مثلا هو المسؤول عن عمليات قتل الفلسطيين في غزّة في حين انّ نتنياهو و سيلفان شالوم ماعندهمش علاقة بالموضوع ؟

ثمّ شكون طلع يحكاية المسيرة المساندة لحكومة الغنوشي ؟ و علاش تمت بعد مقابلة "فلتمان" مستشار الخارجية الاميريكي لكمال مرجان؟

و في نفس الليلة يهل هلال الغرياني على قناة حنبعل و يكون محل ترحاب من وليد الزرّاع و بقية الحاضرين على قناة حنبعل ؟

في الوقت اللي يتعرّض فيه اتحاد الشغل و النقابيين الى حملة منسّقة اعلاميا و سياسيا ،بتأليب الرأي العام على المدرّسين و تحريض فئات اجتماعية كالبطالة مثلا على الاحتجاج على اتحاد الشغل و اظهاره كطرف قاعد يحط العصا في عجلة التنمية اللي باش تجيب الخدمة و الفلوس و الخير للجميع.

اما اولى بالمساءلة حاليا ؟ وزراء حكومة الوحدة ؟ و الا اعضاء المركزية النقابية ؟

شكون اللي قاعد يحط العصا في العجلة ؟ الاتحاد ام الحكومة الاجرامية اللي قتلت العشرات من ابناء الشعب ؟ و اللي قاعدة تكسب في الوقت لترسيخ الامر الواقع ربما ، و الا لاخفاء ملفات حساسة تتعلق بالفساد و و الرشوة والتزوير و انتهاك حقوق الانسان..

فمة جزء كبير من الشعب بلع الطعم بدليل الناس اللي على الفايسبوك قاعدة تسبّ في (الهوكش) الجايين من المناطق الداخلية و تتهمهم بالفوضى و بتعطيل سير حياتهم اليومية.. و عشرات الاولياء اللي هجموا على مقرات الاتحاد بدعوى انّ صغارهم يحبوا يرجعوا للقراية و انّ مستقبلهم باش يضيع بسبب نقابات الاتحاد .. و بدليل عشات البطالة و المهمشين اللي بفضل مجهودات حنبغل و تونس 7 يطنوا انّ الاضرابات تحمل مطالب قطاعية كزيادة الاجور ، و يظنوا انّ ثورتهم تم اختطافها من طرف اصحاب الشهريات اللي يحبوا يحققوا مكاسب على حسابهم و على حساب رمز الثورة (البوعزيزي) اللي كان بطال و مهمّش .

واضح انّ الاوضاع ما تغيّرتش برشة، و الحكومة الانتقالية قاعدة تنفّذ في مخطط مدروس ،

و واضح انو ما فمة حدّ ينجم يهدد المخطط هذا الا اتحاد النقابات.. لانو بوزنه و ثقله و تاريخه و العدد الضخم لمنخرطيه ينجم يحرّك الشارع التونسي.

وقت اللي الكرطوش ياكل في شباب سيدي بوزيد و القصرين ، احمد ابراهيم كان مع نخب النخبة متاع اليسار لاهين في حملة تاريخية للدفاع عن الشخصية الرمز (المصنفة كاعظم شخصيات الانسانية في الالفية الاخيرة) سوسن معالج ضدّ مغني الراب الرجعي السلفي المتخلف بسسيكو آم . في نفس الوقت كان السيّد الشابي وزير التنمية الجهوية الحالي لاهي في معضلته التاريخية متاع جريدة الموقف و كي العادة يبكي من التضييق و القمع و الحرمان من الاشهار و غير ذلك.

فجأة ، و كيف اللي يغمّض عينيه و يعاود يحلهم يلقى روحو في حلم جميل، زين العابدين هرب للسعودية و يلقاو استدعاء من عند الغنوشي لتشكيل حكومة الوحدة و من بعد يوليو وزراء بالفمّ و الملا..

احزاب الكرذونة هاذي كي نزيدوها الاحزاب الطفيلية اللي كانت مرتبطة عضويا بالتجمع كيما حزب المنذر ثابت و بوشيحة و بولحية و الخماسي و الاينوبلي ، لوكان تلمّد انصارها في كامل الجمهورية ما تنجمش (مجتمعة) تعبي فيراج المنزه.. فما بالك بتحريك الشارع ضدّ تلاعبات حكومة الغنوشي و لما لا صعود واحد من التشكيلة التجمعية الحالية للرئاسة.

ثورة مستمرّة

مسيرة في سيدي بوزيد معقل الثورة

مسيرة حاشدة في شوارع المدينة بعد اطلاق جميع المعتقلين - البوب ينسحب من المدينة و يكتفي بحماية المقرات الحكومية
اهالي سيدي بوزيد يرسلون الخبز و المعونات الغذائية الى مدينة الرقاب المحاصرة.
مواطنون من منطقة بئر علي بن خليفة التابعة لولاية صفاقس يتمكنون من دخول الرقاب و يدقّون ابواب المنازل لاعطائهم الحليب و الخبز و مواد غذائية اخرى.

ثورة حتى النصر

هناك انباء عن انسحاب مرتبك لاعوان الداخلية و تركّز معظم اعدادهم الباقية في العاصمة و ضواحيها .. بعد رفض الجيش تطبيق حظر التجوّل اللذي اعلن عنه يوم امس و اكتفائه بالحفاظ على المنشآت العامة و حراستها..
داخل الجمهورية الجيش يمسك بزمام الامور في ظل فرار كافة اجهزة الامن و المسؤولين الجهويين و المحليين ..
هنالك انباء عن فرار معتمدين و ولاة و ادارات عمومية بدون موظفين في غياب اي تعليمات من السلطة المركزية .. كذلك العشرات من اعوان امن(من بوب و غيره) يلوذون بالفرار و يتركون عتادهم و سيارتهم بعد محاصرتهم من طرف المواطنين الباحثين عن الانتقام للشهداء الذين سقطوا في المواجهات..

هدايا للشباب في سنة الشباب

رصاص مطاطي و قنابل مسيلة للدموع هدية للشباب التونسي في سنته الدولية للشباب